Gal 3 | KjiSC | STEP | Ghau nonidi Galesia ta kingo! Ara nato ke kusu va kahe ghini ghau ghinina ia leme ka Zisas Kraes ka ia hekefalahata. ?Hei mo neto ke va kingo ghauna neke age va nagoromorira ghu nganganamu nira?

Galatians 3

Va Paluna Pagahaina: Polo Ne Va Fafahaki Ia Varisute Ta Vanada Kakato God. 3:1–4:31

Ia Vetula Nia Ia Va Hohoghona Lao Ka Kraes

1 Ghau nonidi Galesia ta kingo! Ara nato ke kusu va kahe ghini ghau ghinina ia leme ka Zisas Kraes ka ia hekefalahata. ?Hei mo neto ke va kingo ghauna neke age va nagoromorira ghu nganganamu nira? 2 Kaike leghutau ma na kabai avohina ara. ?Noke hioi mo ghau ia Tarunga Ta Maduana ka ia leghui ia vetula ka Mosese? !Toraina deo! Noke hioi nga ghau ia Tarunga Ta Maduana mu, vununa ghau noke va hohoghonai ia nonomoho ghinina Kraes noke nomohio. 3 ?Heve, noto ke puina age kingo ghemu mamu? ?Ka nganganamu nira mu, o boka mo taghomughi va hokotina heve neke tataniga ghinio ia Tarunga ka God ka giliomu nira ghau, no ghua? 4 Ghau noto ke vavahagala fuludu, vununa ka ia ghini ia nomu va hohoghona ka Kraes. ?Heve ghu ka ia nganganamu ghau ghatunaina, va hohoghona ianimu ne deo lighorona ma, no ghua? 5 Ara a ke notoho ghauni. ?Heve, vununa ghau no leghui ia vetula, ne vanamu ghu God ia Tarunga? ?Nia vununa ghau no leghui ia vetula, ne rivai hahaima ghu manei ka hoatamu ghau? !Toraina deo! Ne ghua nga ianimu ghu mu, vununa ghau no nomohi ia nonomoho ghinina Kraes no va hohoghonai ghu.

6 Taghe iala molamo, “Ebarahamu neke va hohoghonai God, neke tahoi ghu God ta lotorona manei, vununa ka ia nona va hohoghona,” ^{▼▼3:6 Tatanigaina 15:6} ne ghua ka ira Kakangava Ta Maduana. 7 Heiri ira ta auri va hohoghona ghu ka God mu, ta toraina nona rekahara ghu Ebarahamu. 8 Sepaoni neke kahei ghu God ka ira Kakangava Ta Maduana mu, ta mala nai va lotororira taghonai ira noni taka Ziu ghu, vununa ka ia nodi va hohoghona. God neke naiungene vanani ghu Ebarahamu Nonomoho Ta Veha iahi kahe ghuana iahi, “Ara a age va beanari ghatu ira leghu noni nga, vununa ka ia ghinigho agho,” ^{▼▼3:8 Tatanigaina 12:3; Tatanigaina 18:18; Tatanigaina 22:18} neke ghua ghini. 9 Fafahakanana ghu iahi mu, heiri haroharo ta nai laori ira nodi va hohoghona ka Kraes mu, edi hioi haroma ia va beana taghe neke riva ghinio la Ebarahamu, vununa ka ia nona va hohoghona.

10 God e age va kilasari heiri ira ta va ghighiu lao ka ia vetula mala nai va lotororira taghodi ka God, vununa ka ira Kakangava Ta Maduana ne kahe ghua iahi, “God e age va kilasari heiri haroharo ta deo gedi leghuri ghu ira vahina leghutau teri nga ka giliona ia vetula,” ^{▼▼3:10 Ngengene 27:26} ne ghua. 11 To podolo va veha ghu mu ghinina hei ia ta leghui ia vetula mu, e deo ge boka nai va lotoro taremehana ghu God, ta ghuana. Vununa ka ira Kakangava Ta Maduana ne kahe ghua iahi, “Ia noni ta va hohoghona lama ta nai va lotoro taremehanana God ta age hioina ghu ia doli soduai ghatu,” ^{▼▼3:11 Habakuku 2:4} ne ghua. 12 Ia vetula mu eka va dedeke ghu ka ia va hohoghona. Nga taghe iahi mo mu ne kaheina ka ira Kakangava Ta Maduana, “Ia noni ta riva ghidi lama ira vahina leghutau ta au nga ka ia vetula mu ta age doli ghenana,” ^{▼▼3:12 Hiama 18:5} ne ghua.

13 Geta toraina marutana mo ianimu ghe, ira Kakangava Ta Maduana ne kaheina mu God e age va kilasari heiri ira ta deo gedi leghui ghu ia kamotona vetula. Ghe Kraes neto ke va kalasa ghita ka va kilasa ianimu ka ia fafata leme manei neke hioio ghu ka taghonai ia va kilasa ta fata ka ghita. Ianimu lamu fafahakanana mu ta kahei ini ira Kakangava Ta Maduana, “Hei ia ta va reketi maneri ka kaike heke mu neto ke kusu fatei God, to va kilasi ghu,” ^{▼▼3:13 Ngengene 21:23} ia ta ghua. 14 Vununa ka ia riva Kraes Zisas, neto ke va beanari ghu God mu ira noni taka Ziu ghu ka ia va beana haro neke naiungene ghinio manei ka Ebarahamu. Zisas neke leme vanada ghita mala ghita ira ta va hohoghona ka manei, da boka hioi ghu ia Tarunga Ta Maduana neke naiungene ghini vanadao God.

Ia Vetula Deo Geke Holari Ghu Ia Nai Ungene Ka God

15 Ghau tahiguro, ara a vanamu kaike totoghale ka ia dolida leleghu ravata. Keha palu nonira dito variveha ghini la kaike leghutau, e deo hei take boka ke la holarina, ba hio kainina varivehai ianimu. 16 God neke vanani Ebarahamu nia kaike noni ka ia pagusu manei e ghua, ia naiungene. Ira Kakangava Ta Maduana e deo ge kahei ghu “ka ira noni ka ia nona pagusu,” ta ghuana, nga “ka kaike noni ka ia nona pagusu,” ^{▼▼3:16 Tatanigaina 12:7; Tatanigaina 13:15; Tatanigaina 24:7} ne ghua ma. Kaike noni mo, e ghua ghu mu iahi fafahakanana, Kraes ghu babaolonana. 17 E ghua ghu iahi mu fafahakanana ka ara: God neke kusu riva ghini ia varivehai taremehana Ebarahamu, nia leghuna 430 komuhu tuna geke vanani ghu Mosese ia vetula neke ghua. Vununa ia varivehai neke to kusu au meha, to deo ghu ia vetula ge boka hio kaini ghu naiungene ianimu. 18 Ghita da leghui ia vetula ka Mosese ghe gada age hio kadolori nga ira va beana ka God, eka ghua ghu. Deo. Manei e age vanada ira va beana, vununa manei neke naiungene ta mala riva ghinina. Taghe iala molamo, God neke vanani Ebarahamu ira va beana, vununa manei neke naiungene ta mala riva ghinina.

19 ?Heve ghu mu rivana ka ia vetula ghe neke va mehai nga God? Neke va mehai nga God ia vetula mu, e mala va podolori ghu ira leghu sasake ta riva ghidi nga ira noni, neke ghua. God neke kabai ghini ia vetula ta auna ma ta vuhai mehana ghu ia rekaha ka neke vanani laono manei naiungene iahi. Ira engizeli lamu dike va mehaina ka Mosese ia vetula, neke va kahe ghidio ghu ira noni manei. 20 Mosese lamu ghu mu neke au mala va fafahakana ka vari hoataidi ira noni nia God, e ghua. Nga ka ia fata riva ghini God ia naiungene ka Ebarahamu mu, e deo hei neke auna ka vari hoataidi maneri palu ghu. God neke riva ghini ma taghonai lama.

Fafahakanana Ghe Ne Au Nga Ia Vetula

21 ?Heve, ia vetula ka Mosese di tetu kaputuri ira naiungene ka God? !Toraina deo! Vununa geke to va mehai la God ia vetula ta hio va doliri ira noni, ira noni geala edi leghui, edi meha lotoro ghu ka kenuna God. Ghe God e deo geke riva ghini ghu ianimu. 22 Ghe ira Kakangava Ta Maduana ne kahei tato auna malau kamoto iahi peka ka pekana ia mana ia sasake. Ia kaikena ghaghahena mala hioina ghu ia kaikadolo neke naiungene ghinio God mu, ia ta va hohoghona ka Zisas Kraes.

23 Ghe neke la meha nga ia fafata mala va hohoghona, ghita dake au ka pekana ia mana ia vetula, taghe ta au ka pipiliga ta ghuana, neke vuhai dufu ghu ia fafata neke va podolio God ia hangana ta hohoghona mala hioina ia doli soduai. Iahi mu ia va hohoghona lao ka ia Va Doli Zisas Kraes. 24 Ia vetula ghu mu neke kopuna ghini ghitana, va kakahe ghini ghitana nia neke batu ghini ghitana e ghua, neke vuhai dufu ghu Kraes, mala ge boka la ge age nai va lotoro ghita taremehana ghu God ka ia va hohoghona ka Kraes, ta ghuana. 25 Ghe ghatunaina ka tato meha ini ia va hohoghona ka Kraes mu, ghita to deo ghu hagala ghinina ta mala ke kopu ghini ghitanani ia vetula.

Ira Noni Ta Va Hohoghona Ka Zisas Mu Nona Rekaha God

26 Ghau haroharo mu nona rekaha ghu God, vununa ghau no va hohoghona ka Kraes Zisas. 27 Ghau mu noke meha kaike taremehana Kraes ka ia noke seselebeanao. Taghe ia ta ghua la kaike noni ta va vona poko foforu no ghua, noto ke va vonari ghu ghau ira puhina Kraes tatanigai leghurira. 28 To age deo ghu heve ta hazana mu ka vari hoataidi ira Ziu nia ira taka Ziu ghu, vari hoataidi ira noni mala varituhu nia ira noni ta kalasa ghedi, nia vari hoataidi ira mane nia ira fotati, e ghua. Ghau haroharo mu kaikeu ma ka ia vari parekete taremehana Kraes Zisas. 29 Ghau mu to nona la Kraes, ghau lamu ghu mu ira pagusu ghu ka Ebarahamu, o age hioi ghu ghatu heve neto ke naiungene ghinio God.