Gal 4 | KjiSC | STEP | Ta kahei ini ara mu e ghua ma iahi. Neto rekahana tei la nga ia rekaha, manei e deo nga boka age posi kadolorira ira vahina leghutau nga ta mala hio kadolori manei ka nona mama. Manei e kusu au taghe noni mala varituhu e ghuana ma, geta age taghori ghu manei ghatu vahina leghutau iranimu nga.

Galatians 4

1 Ta kahei ini ara mu e ghua ma iahi. Neto rekahana tei la nga ia rekaha, manei e deo nga boka age posi kadolorira ira vahina leghutau nga ta mala hio kadolori manei ka nona mama. Manei e kusu au taghe noni mala varituhu e ghuana ma, geta age taghori ghu manei ghatu vahina leghutau iranimu nga. 2 Manei e ungene nonomohona ma ka heiri ira ta kopuna ghini taghonai nia ira nona leghutau e ghua, e vuhai age dufu ghu ia fafata neke nakainio nona mama. 3 Taghe ianimu dake ghua haroma ghita. Ka ia fafata deo nga ghita gada avohi ghu Kraes, ira puhi mala leghuri ka malau iahi peka dake leghurira ghita ka ira dolida, taghe ira noni mala varituhu ta ghuana. 4 Ghe ne dufu ghu ia torai lotorona fafata, God neke tuhu mehai ia Tuuna, neke doli ghu ka kaike fotati, ka pekana ia vetula ira Ziu, 5 mala tabara kave ghitana ghita dake auro ka pekana ia vetula, mala ge boka la gada meha nona rekaha ghu God, ta ghuana.

6 Vununa ghita dato meha nona rekaha manei, neto ke va mehai ghu God ia Tarungana ia Tuuna ka hihingoda idi. Ghatunaina ghita da boka kudo ghua lao mo ghu iahi, “Mama, Nogu Mama,” tada ghuana. 7 Ghatunaina mu ghau to deo go noni mala varituhu ghu, nga toraina nona rekaha taghonai God. Nia vununa ghau mu nona rekaha manei, o age hiori ghu ghau ghatu ira leghutau neto ke naiungene ghidiro manei.

Ia Ngana Tahu Ka Polo Ghidi Ira Nonidi Galesia Ta Va Hohoghona Ka Zisas

8 Sepao ghau deo goke avohi ghu God, noke noni mala varituhu ghu ka ira god taka hohoghodi ghu. 9 ?Ghe ghatunaina mu ghau noto avohi God, (ba, God neto avoho ghau, geala a ghua ta kaheina ara), heve ghu ghe no leghu laoni nga ghau ka ira puhi mala leghuri ta paeke nia deo lighorodi ta nona malau iahi peka? ?Heve, ghau no kabai ghini take meha mala nodi noni mala varituhunani maneri? 10 Na fanga ghau nga ara iahi vununa ghau toke leghuri mo ira vetula mala va manemane nia nganaleghu, mala leghurira kehara ka ira ravata, hihile, fafata nia komuhu e ghua ta tongovodi ka ghau, vununa ianimu e age nai va lotoro ghau ka ira nahalina God, no ghua. 11 !Ara na anga ghini ghau ghegu! Gedi toke pepesana ghedi lama ira rigete va gigima ta meha ghu ka ara vanamuna ghau, na ghua.

12 Ghau tahiguro, ara na papada ghau ta au va kalasana ka ia vetula taghe ara ta ghuana. Ghinaguna ara sepao mu, ara nato meha taghe ghau ira taka Ziu ghu nato ghua, noke kalasao ka ia vetula. Geta ngengene va gigima ghu ara ka ghau ghe, noke riva ghidi va zea ghau ka ara keha leghutaura, ghe na kakangava vanamu ghua age nga iahi, eka ghua la ghu. 13 Taghe tato kusu avohi niala ghau, ara ka ia va kenuna fafata nake au taremehamu ghau sepaoni, vununa nake fogara. Ghe ianimu lamu ghe, nake to kuruau nga ara ia vehana fafata mala tuturi beana ghinina ia Nonomoho Ta Veha. 14 Neke va faa vanamu mamarutana mo ia fogara ka ara ghe, ghau e deo goke sokeau ghu ara, ba, va ghahe au ghu. Uve, ghau noke hio namahau taghe kaike engizeli ka God noke ghua ghinagu, ba taghe taghonai Zisas Kraes, noke toraina ghua ghinagu. 15 Ka fafata ianimu, ghau noke toraina va manemane. Vununa ghau noke torai namaha ghinagu ara, na toraina avohi ghu ara geto ke boka la mo ka fafata ianimu, ghau geala oto ke hio kaveri hibamu nira taghomu, oto ke vanagu meha ghu ara. ?Heve ghu ghe noka va manemane nga ghau ghatunaina? 16 ?Heve, ghatunaina mu ara nato meha kana ghu ka ghau, ka ia va kahe ghini ghau ia hohoghona?

17 Ira noni ta vari va kakahei sesebo mu, edi kabai ghini ghau ta leghuina ia vetula ka ira noni Ziu. Maneri edi toraina riva va gigima o mala kuhanai holara taremehadi ghu taghodi ghau, edi ghua, nga e deo gedi riva ghini ghu iahi mala toka ghini ghauna ghau. Maneri edi kabai ghini ma ta fota ghauna ka ara, o mala age leghuri ghu ma taghodi ghau, edi ghua. 18 E veha noto hagalai riva ghidi la ghau ira leghutau ta veha. Ghau o toraina riva ghidi tudu leghutau iranimu, sughavona ghu ka ia fafata ta deo ga au taremehamu ghu ara. 19 !Ghau tuguro! Taghe vavahagalana va doli rekaha nake ghuani ara va vavahagala vanamuna ghau, e vuhai age kamoto ghu ia aꞌauna Kraes ka giliomu nira ghau. 20 Hera ka au taremehamu nga ghau ka torai fafata iahi ghatunaina, ga boka ngengene va totoke ghau ghu na ghua. Ghe vununa na au varihau a toraina ngengene va gigima ghau age ghu, vununa na toraina anga ghini ghau fuludu.

Ia Va Fafahaka Ghidi Ira Palu Fotati, Hegari Ghe Sera

21 ?Ghau ira ta kahei ta kabai auna ka pekana ia vetula Mosese, o va kahe ghinagu, no avohi mo ghau heve ne torai kaheina ia vetula? 22 Ira Kakangava ta Maduana di kaheina mu Ebarahamu neke aui palu tuunamane, Isimaeli ghe Aesake. Isimaeli mu neke doli ka Hegari ia fotati mala varituhu ka Sera. Nia Aesake ge doli ghu ka Sera ia fotati kalasana, ia keranau Ebarahamu, neke ghua. 23 Isimaeli neke dolio ka ia fotati mala varituhu mu, neke doli taghe ira ta ghua lama leghu rekaha nga. Nga Aesake neke dolio ka ia fotati taka noni mala varituhu ghu mu, neke doli leghui ia naiungene ka God neke riva ghinio manei ka Ebarahamu.

24 Palu fotati irahi mu edi au taghe kaike totoghaledi ira palu varivehai ka God neke riva ghidiro manei taremehadi ira nona noni. Hegari mu taghe ia varivehai neke meha taremehanao ia vetula ka ia fafata vanani God Mosese, ira tazo ungene va gigima ka ia Vuhukuna Saenae. Aianimu dike kusu meha mane varituhuna ira noni ka ia varivehai, vununa ira ta leghui ia puhina varivehai ianimu, edi boka meha mane varituhu ma ka pekana ia varivehai lama. Iahi mu e varifata ma ghu ka Hegari ia ghase mala varituhu, ia ta boka va doli rekaha ta mala varituhu ma molamo. 25 Hegari mu e totoghalena ghu ia Vuhukuna Saenae aianihi ka ia Babarana Arabia, e totoghalena haroma ghu molamo Zerusalemu ia malau leghaha ghatunaina, nia ira noni ta au aianimu e ghua. Ne ghua nga iahi mu, vununa maneri di au taghe noni mala varituhu di ghua leghuina ia vetula. 26 Nga ghita mu taghe ira rekaha ka Sera ia fotati ta kalasa e ghua, vununa ghita da va hohoghona ka Zisas. Manei mu e totoghalena ghu ia malau ka ghita Zerusalemu ka malauo God fate ia ta kalasa ka ia vetula. 27 Iahi mu heve neke kaheio Aesaea ia porofeti ka ira Kakangava Ta Maduana, kahe ghuana iahi,
“!Va ghaseghase, agho fotati ta sasahaka,
noto ke deono go boka va urahi ghu kaike rekaha ghu!
!Kudo va fafaa taremehana va ghazaghaza
agho ta toraina deo nga goke va ghilaghilai ghu ia vavahagalana va doli rekaha!
!Vununa ia fotati neke ghahe kainio mu e age tehini rekaha,
fuludina ia fotati ta kuru keranau!” ^{▼▼4:27 Aesaea 54:1}

28 Nia ghau taremehagu noni kiloau mu, nona rekaha ia naiungene, taghe Aesake la. 29 Sepao, Isimaeli ia tuunamane Hegari, ia neke doli varifatao ma ka leghu rekaha nga, neke ngovangovali Aesake, ia tuunamane Sera, ia neke dolino ka ia manana ia Tarunga Ta Maduana. E varifata ma ghu ghatunaina, vununa heiri ira ta kabai ghini ghita ta leghuina ia vetula, di ngovangovala ghita haroma ghita ira ta doli ka ia Tarunga Ta Maduana.

30 ?Ghe heve mu ne kaheina ka ira Kakangava Ta Maduana ghinina ianimu? “Hio ghahei fotati mala varituhu nia taremehana tuunamane nia,” ne ghua. “Vununa ia tuunamane ia fotati mala varituhu mu, e toraina deo ge age hio kadoli ghu kaike tufa ghu ka ira taghotagho nona mama. Ia tuunamane ia fotati ta kalasa mo ta age hio kadolorira vahina leghutau nga,” ^{▼▼4:30 Tatanigaina 21:10} ne ghua. 31 Ghau tahiguro, ghita mu eka rekaha la ghu ka ia fotati mala varituhu, ira ta au ka ia pekana vetula Mosese. Ghita mu rekaha ka ia fotati ta kalasa, vununa ghita da au kalasa ka ia vetula e hio ghita ghu God vununa ka ia noda va hohoghona ka Zisas Kraes.