Gal 6 | KjiSC | STEP | Ghau tahiguro ka Kraes, kaike noni ta va hohoghona neto riufu la ka ia sasake, ghau ira ta gigima ka ia nomu va hohoghona ka Kraes, geala o tokeni o toka ghini ghu noni ianimu mala ke leghuna manei ka ia doli ta lotoro. Ghe o balau ghini ghau taghomu e ghua, ghatu o ke riva ghini haroma taghomughi kokolona sasake ianimu.

Galatians 6

Vari Tokai

1 Ghau tahiguro ka Kraes, kaike noni ta va hohoghona neto riufu la ka ia sasake, ghau ira ta gigima ka ia nomu va hohoghona ka Kraes, geala o tokeni o toka ghini ghu noni ianimu mala ke leghuna manei ka ia doli ta lotoro. Ghe o balau ghini ghau taghomu e ghua, ghatu o ke riva ghini haroma taghomughi kokolona sasake ianimu. 2 O vari tokai vari hure ghidira ira mamarutana ka ghau. Ka ghaghahena iahi lamu ta boka age leghuina ghau ia vetula ka Kraes. 3 Hei noni neto nai va vonai la taghonai neto pake ghena ghu tokai nonina, manei mu ne seboi ma taghonai, vununa manei mu eka tongovonana noni ghu. 4 Agho o mato va veharina ira au doli ka taghou. Neto veha la ira puhiu agho, ghe go kuruigho nga keha leghutau ta mala varanga ghidi. Nga oka va fata ghinigho lao ghu taghou ka ira keha noni. 5 Vununa ghita mu da sopai kopuna ghidi ira sopai puhida.

6 Heiri ira ta hio ungene babatu ka ia saorona God mu, geala edi toka tufari ghedira ira noni ta rivai ungene babatu.

7 Oka sebo ghau ghu taghomu. Ghau e deo go boka seke ghini ghu God mala peholo ghinina. Ghau o age hioi tudu ma ghatu ia fuana ia heve ta numa ghini ghau. 8 Ira noni ta numa ghini ia leghutau ta muko mala va vevehaina ia tini mu, edi age hioi ghatu ia leme fuludai. Nga ira noni ta numa ghini ia heve ta age veha vanani ia Tarunga Ta Maduana mu, edi age hioi ghatu ia doli soduai ka ia Tarunga Ta Maduana. 9 Oka baelu ghemu la ghu riva va vehana. Ghau o age hioi mo ghatu ia tabara ka ia toraina lotorona fafata, noto deo la go suaraghi ghu. 10 Leleghu fafata kuru ghita ia fafata vehana, ghita geala da toka rivai vehana ka leghu noni nga, sughavona ghu ka ia toka ghidi ira tahida noni ta va hohoghona ka Zisas.

Va Nonoghana Tatangana Ka Polo

11 Ara na kangavari va nonoghadi ngengene irahi ka torai kamegu ini taghogu. O boka finiri mo ghu ghau kakangavagu ta faa idi. 12 Ira noni ta va sisiva tuufu ghini ghau ta mala papahe va ghilaghilana mu, edi suna kabai ghidi ma ira noni Ziu ta va manemane ghidira. Maneri e deo gedi kabai ghidi ghu ira Ziu ta ngovangovalarira ka ia tuturi beana ghini God ne hio va doli noni vununa ira noni di va hohoghonai Kraes neke leme ka ia hekefalahata, ta ghuana. 13 Nia geta ghua ghu ira ta hioi ia papahe va ghilaghila ghe, e deo haroma gedi leghui ghu ia vetula. Maneri edi suna kabai ghini ma ta papahe va ghilaghilana ghau, edi mala helahela ghini ghu ta leghuri nia ghau taghodi, edi ghua ma.

14 Nga ara mu, a helahela ghini ma ia hekefalahata ka ia noda Lod Zisas Kraes lama. Vununa Zisas neke leme ka hekefalahata ianimu, to deo ghu heve ta tongovonana ka ara ka malau iahi peka, nia to deo ghu ara ga tongovona ghu ka ira noni ka malau iahi peka, e ghua. 15 Geta papahe va ghilaghila ba deo ghita ghe, ianimu e deo ge tongovona ghu ka ia ta mala hiori God ta mala age nona nonina ghu ira noni. Leghutau ta tongovonana mu ia ta hioi ghita ka God ia foforuna doli. 16 Ka heiri ta ghaghahe ka puhi mala leghui ianimu ka ira dolidi mu, God e age dudumana ghidi e vanadi ghu ia bule. Noni irahi mu ta toraina nona noni hohoghonara God.

17 Ghatunaina e vai vona ghu, ara e deo ga kabai ghini ghu hei noni ta va mukoauna ka leghutau irahi. Vununa lavi ta au irahi ka tiniguna, nake hioriro ara ka ia fafata ngovangovalau ira noni vununa ka ia tuturi beana, ne va podoli ta nona noni mala vari tuhuna ara Zisas.

18 Ghau tahiguro, ara na tarai e age vanamu ghu ia Lod Zisas Kraes ia varisute ta vanada kakato. Amen.