Heb 1 | KjiSC | STEP | Sepao laoni God neke va ghahe laori ira porofeti mala la turina ka ira faada tehi fafatani nia ka tehi ghaghahedini, e ghua.

Hebrews 1

Zisas Kraes Mu Ia Tuuna God

1 Sepao laoni God neke va ghahe laori ira porofeti mala la turina ka ira faada tehi fafatani nia ka tehi ghaghahedini, e ghua. 2 Nga ka va nonoghadi ravata irahi mu, manei neto va mehai ia Tuuna mala meha turina ka ghita. God neke faeti ia Tuuna ta mala hio kadolorira vahina leghutau nga nia manei neke riva taremehanana ia Tuuna va vuharira vahina leghutau nga ka kolangana fate nia ka malau iahi peka. 3 Ia Tuuna mu ia pelarana varanga ka God nia manei mu e toraina varifata ka God, e ghua. Manei ne posi varighara ghidi va gima vahina leghutau nga ta au ka ia ngengenena ta toraina mana. Leghuna tihi kairi manei ira sasakedi noni, manei neke la nohe hinae ka ia nonohe va vonavona ka ia kame mautuna ia God ta varanga sugha vona, ka malaunao fate. 4 Iahi ne va podoli ia Tuuna God ta tongovona fuludurira ira engizeli, taghe ia babaolona neto ke hio kadolio la manei ia ta tongovona fuludi ia babaolo ta vanadi ira engizeli.

Ia Tuuna God Mu E Varanga Fuluduri Ira Engizeli

5 Vununa God e deo ghe geke kahei ghu ka kaike engizeli ghu, heve neke kahei iahi manei ka Zisas:
“Agho mu Tuugu ara,
Ravata iahi ara nato meha nou mama agho.” ^{▼▼1:5 Samu 2:7}

God neke kahei molamo,
“Ara a age nona mama manei ghatu.
Nia manei e age Tuugu ara, e ghua.” ^{▼▼1:5 2 Samueli 7:14; 1 Sukutu 17:13}

6 Nia ka ia fafata tuhu mehai God ia va kenuna Tuuna ka malau iahi peka, manei neke kahe ghua iahi,
“Ira leghu engizeli nga ka God, edi toraina va totoana ghini manei.”

7 Ka ira engizeli mu ia saoro ne kahe ghua iahi,
“Ira nona engizeli mu taghe dafe e ghua ghidi.
Nia ira nona maneriva mu taghe helupuna totoi, e ghua ghidi.” ^{▼▼1:7 Samu 104:4}

8 Nga ka ia Tuuna mu, ia saoro ne kahe ghua iahi,
“God, ia nou ravutu e age au toghunai.
Ia ghaghahena nou kopu agho ka ira nou noni e lotoro.
9 Agho e veha vananigho ira riva ta lotoro
nia o sokeri ira riva ta muko.
Ianimu la ghe neke faetigho nga God ia nou God,
neke vananigho ghu ia va ghazaghazana va vonavona,
fuludu laoina ia neke vanadio manei ira keha leghu noni nga.” ^{▼▼1:9 Samu 45:6,7}

10 Manei neke kahei molamo iahi ka ia Tuuna,
“Agho Lod ka ia tatanigaina
noke va vuhai ia pakaraina malau iahi peka.
Nia noke va vuhai ka kameu nira taghou ia kolanga fate
nia ira vahina leghutau nga ka ia giliona.
11 Maneri mu edi age nogha, nga agho mu o au toghunai.
Maneri edi age mohutu taghe sesepana poko.
12 Taghe kaike koti e ghua age lopo vonarira.
Nia taghe poko e ghua age holara kairira.
Nga agho mu o age au varifata tudu ma.
Nia o age au toghunai e ghua.” ^{▼▼1:12 Samu 102:25-27}

13 Nia God e deo kalasu kai geke kahei ghu ka kaike engizeli ghu,
“Nohe ka kame mautugu ini,
a vuhai nakairi ghu ara ira ta kana ghinigho,
ka pekana ia mana mala kopu agho,” ^{▼▼1:13 Samu 110:1} ta ghuana.

14 Ira engizeli mu ira tarunga ta riva vanani God neke tuhu mehari ghu manei mala riva toka ghidira heiri ira ta mala age hio kadoli ia hio va doli.