Heb 10 | KjiSC | STEP | Ia vetula ka Mosese mu taghe mamaeludi ma ira leghutau ta veha tadi la meha nga, eka ghua ghu ira torai nonidi leghutau. Ira kokolodi veala ta au ka ia vetula Mosese ta mala riva ghidi leleghu komuhu mu e deo ge boka va mamalahuri ghu ira noni ta va totoana lao ka God.

Hebrews 10

1 Ia vetula ka Mosese mu taghe mamaeludi ma ira leghutau ta veha tadi la meha nga, eka ghua ghu ira torai nonidi leghutau. Ira kokolodi veala ta au ka ia vetula Mosese ta mala riva ghidi leleghu komuhu mu e deo ge boka va mamalahuri ghu ira noni ta va totoana lao ka God. 2 Veala iranimu geke boka va mamalahuri la maneri, geala maneri to nodo rivai vealana. Vununa maneri mu dike to va mamalahu fuludairi ka sasake, to deo ghu va ghilaghilaina haghava ghedina di kuru sasakedi taghodi, ta ghuana.

3 Ghe e deo ge ghua ghu ianimu. Veala dike riva ghidi iranimu maneri neke va ngana leghuri maneri ka ira sasakedi leleghu komuhu. 4 Vununa e toraina marutana fuludu ka ira busakadi bulumakau nia gouti ta hio kairira ira sasake. 5 Neke ghua mamu ghe, neke kahe ghua nga iahi Kraes ka God, ka ia mehana manei ka malau iahi peka,
“Ira veala nia kudoveha,
e deo goke lao nanafa ghidi ghu agho,
nga agho noke vanagu tiniguini mo,
mala veala ghinina ara.
6 Ka ira saliga veala nia veala ta mala hio kai sasake,
agho e deo go veha vananigho ghu.
7 Nake kahe ghua ghu iahi ara, ‘God, ara iahi, nato va tana mala riva ghinina ia nou lao nanafa,
taghe dike kangavio la maneri ghinaguna ara ka ira Kakangava ta Maduana.’ ”

8 Kraes neke kusu kahe ghua iahi, “Agho deo goke kabai ghidi ghu nia e deo goke va manemane ghidi ghu ira veala nia ira kudoveha, ira kudoveha ta saligari nia ira kudovehadi ta mala hio kai sasake e ghua,” geta leghui ghu ia vetula riva ghidira veala nia kudoveha irahi. 9 Ianimu tuna ghe neke kahe ghua nga iahi manei, “God ara iahi, mala riva ghinina ia nou lao nanafa.” Vununa ka ngengene iahi da avohi ghu ghita, neke hio kainina God ia ghaghahena rivai veala sepa ne holari ghu ka ia veala ghini Zisas Kraes. 10 Zisas Kraes ne leghui ia lao nanafa ka God ne va malumi ghu ia tinina mala leme taghe kaike veala ta ghuana kaike fafata mo malanana ia kamotona fafata. Vununa ka ta ghuao ianimu manei da meha nona noni beana ghu ghita God.

11 Leleghu ravata ira hiama edi riva ghidi ira nodi riva beana, riva ghidi ma ta auna ghu ira varifatadi veala ta toraina deo kalasu kai ge boka hio kai sasake ghu. 12 Nga Kraes ia noda Hiama Pauna mu neke veala ghini lao taghona ka God kaike fafata mo malana ia kamotona fafata maladira ira sasakedi ira noni. Ka ianimu tuna ghe, neke la nohe nga manei ka ia nonohe va vonavona, ka kame mautunao mo God. 13 Aianimu neke la au afana manei, e vuhai dufu ghu ia fafata ta age nakairi God ira kana ka manei ka ia pekana mana manei. 14 Vununa ka kaike veala iahi lama neke toraina nakai va lotoro va vehari ghu manei ira noni ka God, edi age au toghunai ghua ghu ianimu maneri.

15 Ia Tarunga Ta Maduana ne va kahe vanada ta hohoghonana iahi. Manei neke kusu kahe ghua ghu iahi,
16 “Iahi mu foforuna varivehai ta age riva ghinina ara
taremehadira ira noni ka ravata ianimu, ne ghua ia Lod God:
Ara a age nakai laori ira nogu vetula ka hihingodi ari
nia a age kangava laori ka nganganadi ari, e ghua.” ^{▼▼10:16 Zeremaea 31:33}

17 Nia iahini neke kahei harona manei,
“Ara e deo boka ke ngana leghurigura,
ira sasakedi nia ira riva ta muko ka maneri.” ^{▼▼10:17 Zeremaea 31:34}

18 Nia to kai hazari ghu God ira sasake, e deo fafahakana take rivai vealanani mala kai haza sasakena.

Posi Va Gima Lao Ka Ia Naiungene God

19 E ghua ghu ghau taremehagu noni kiloau, ghita da boka haghele mo ka ia Malau ta Maduana Fuludu Lao ka malauo God fate deona gada maugheda ghu vununa ka ia busakana Zisas neke oraha vanadao. 20 Aianimu e au kaike foforuna hangana ta mala laona ka God nia taghonai Zisas ia ta doli fuludai. Manei neke tobehi ghu riringi poko ta tuta iahi ka ia leme neke riva ghinio manei ka ia hekefalahata.

21 Nia vununa ghita dato kuru ghita kaike Hiama Pauna ta mala kopu ghidira ira noni ka God, 22 da haghele lotoro age ghu ghita ka kenuna God ka hihingo ta toraina lotoro nia ta toraina va hohoghonai manei. Vununa ira nganganada ghita dike mukoro mu, to va kefuruai ghidi ka ia busakana Kraes mala va mamalahu ghitana, nia ira tinida geto ke va sesele ghidi ghu ka kolo ta mailo, e ghua.

23 Ghita da toraina posi va gima ghu deona gada ngana palupalu ghu ka ia rangerange ta kahe kave va gigimai ghita, vununa ghita da va hohoghonai God ta suteina ia nona naiungene. 24 Nia ghita da toraina ngana vonari ira ghaghahedi ta boka mala vari va gigimai ghita mala va podolina ia namaha nia ira riva ta veha. 25 Nia ghita daka nodo ghu ka ia varighara meha ta va totoana ghu, taghe ia ta riva ghini keha nonira. Nga da vari va gigimai laoni, sughavona ghu ka tato varinamo meha ini ia ravata ta mala ke leghu meha ia noda Lod.

26 Dato kuhanai rivai sasake Ia to au ghu ghita leghuna va fafahaki ghita ia nonomohona Kraes ia ta hohoghona, ianimu e deo heve keha vealanani ta boka hio kairira sasake iranimu. 27 Nga ta auna mu, to au afa ghini ma ka mamaghu ia varifate ta la meha nia ia totoi ta gutata ta age saliga va noghari ira noni ta huhai God. 28 Heiri dike pake ghediro leghuina ia vetula ka Mosese ta kahe kaveri ghu muko ari ka maneri palu ba lito noni, e deo dudumana dike vanadira, nga dike toraina atungu va lemeri. 29 Nga ge heve soni mu ka ia nganganau agho mu ia va kilasa ia ta toraina muko fuludu lao, ta maladi ira ta deke pauma ghini ia Tuuna God nia ta deo gedi fini va maduanai ghu ia busakana foforuna varivehai ka God ia ta va maduanari maneri, nia tadi ngovali ia Tarunga ta Maduana ta va podolo vanadi ia varisute, e ghua.

30 Vununa ghita dato avohi neke kahe ghuana iahi God,
“Ara ta age va kilasarira nga maneri,
Ara ta age va riva ghidira maneri lilifunana muko dike riva ghini ani.” ^{▼▼10:30 Ngengene 32:35}

Nia manei neke kahe ghuani iahi,
“Ia Lod ta age faterira ira nona noni taghonai.” ^{▼▼10:30 Ngengene 32:36; Samu 135:14}

31 E leghutau mamaghuanana fuludu mu riufu zoghu laona ka ira kamena ia God ta doli.

32 Oke ngana laorina ira ravata kenudi noke hio avoavohono ghau ghinina Kraes. Ghau noke va vavahagala ka tehi leghutau ta mumukoana, ghe noke au va nadu ma noke au ghu ka ia nomu va hohoghona. 33 Keha fafatara maneri dike vela ghini ghau nia ngovangovala ghau ka ira hibadi tehi noni, nia keha fafatara ghau noke toka ghidi ira keha noni dike vavahagala taghe ghau la dike ghuaro molamo. 34 Ghau noke holara vavahagala taremehadi haro ira dike kai laoriro ka pipiliga. Ka ia hio tamu maneri ira vahina nomu ta taghori nga ghau, ghau noke au va manemane ma, vununa noke avohi ta kuru ghauna nga keha leghutau ta veha ta veha fuludu laoni, ira ta age au toghunai.

35 Oka nai kaini la ghu ghau ia nomu va hohoghona ta gigima, vununa God e age vanamu mo ghatu ia leghahaina nomu tabara ka ia nomu va hohoghona ta gigima. 36 Ghau o au va nadu ghu, mala noto riva va hokoti la ia lao nanafa ka God, o age hioi ghu heve neke naiungene ghinio manei. 37 Vununa ne kahe ghua iahi ka ira Kakangava ta Maduana,
“Ka birusuna fafata tei ma
e la meha ghu, ia ta mala meha,
manei e deo ge age mamahuge ghu.

38 Nia ira nogu noni ta lotoro mu, edi age va hohoghona edi doli ghedi ghu.
Nga hei ka maneri neto taghuru kaiau la mu,
ara e deo ga age veha vanagu ghu ka manei.” ^{▼▼10:38 Habakuku 2:3,4}

39 Ghe ghita mu taghe ira noni ta taghuru kaini God ta age hioi ghu mukodina e deo gada ghua ghu. Nga ghita mu e au ghita va hohoghona ne hio va doli ghita ghu manei.