Hebrews 11

Ia Va hohoghona

1Ia va hohoghona mu, ia ta toraina avohori ghita ira leghutau ta rangerangeri ghita e toraina age hohoghona ta ghuana. Geta deo nga gada finiri ghu ghita leghutau iranimu ghe, ghita to avohi mu tato kusu aura leghutau irahi. 2Ka ia nodi va hohoghona lamu, neke veha vananina God ka ira nonidi sepao.

3Ka ia noda va hohoghona lamu da va fafahakina ghita malau iahi peka mu neke vuha ka ia ungene va gigima God, ta ghuana. Heve ia ta finini ghu ghita mu neke riva ghini ka heve ia ta deo gada boka fini ghu ghita.

4Ebolo neke va hohoghonai God, ianimu la ghe neke hio laoi nga ka God ia veala ta veha fuludi ia neke riva ghinio Keni. Ka ia nona va hohoghona Ebolo, neke kahei ghu God ta lotorona manei ka ia va manemane ghini veala ani ka manei. Geta toke leme ghu Ebolo ghe, ia nai malabana va hohoghona ka manei ne tuturi vanada ngama ghita.

5Inoke neke va hohoghonai God, ianimula ghe neke hio vonai nga God ka malaunao fate deona geke leme ghu manei. Manei neke to ogoro ma, vununa God neke hio ghaheina. Ghe neke hio vonai nga God ka malaunao fate, manei mu kaike mane neke toraina veha vanani God ka manei. 6Neto deo la ia va hohoghona, e deo ge boka ghu ta mala veha vananina God. Hei ta ghuana ta kabai mehana ka God, maneri edi va hohoghonai ta torai auna God, nia maneri edi va hohoghonai molamo ta vanadi tabarana God heiri ira ta kabai meha ka manei.

7Noa neke va hohoghonai God, ianimula ghe neke nonomoho nga manei ka ira ngengene banabana ka God ghidira ira leghutau ta la meha ta deo ge boka finiri ghu manei. Manei neke nomohi God, neke riva ghini ghu ia zaghimaha, neke hio va dolinio taghonai nia ia fototatamana ka manei, e ghua. Ia va hohoghona ka manei neke va podoli ta mukona malau iahi peka nia God geke kahei ghu ta lotorona Noa ka ira nahalina taghona e ghua, vununa ka ia nona va hohoghona.

8Ebarahamu neke va hohoghonai God, ianimula ghe neke nomohi nga manei ka ia kudoi God mala laona ka ia malau neke naiungene ghinio manei mala hio kadolina Ebarahamu, geta deo ghu geke avohi ghena ghu hae mo neke laona. 9Manei neke va hohoghona, ianimula ghe neke la au taghe kaike mane mehana neke la ghua ghu ka ia malau neke naiungene vananio God ka kaike malau peghuruo. Manei neke la au ghu ka ira suga tapole, taghe iala molamo Aesake ghe Zekopu dike hioi harono molamo ia naiungene ka God taremehana Ebarahamu. 10Ebarahamu neke au ghua ianimu vununa manei neke mato vai kenui ia malau leghaha ta kuru pakaraina ta gima neke vato ghinio nia neke riva ghinio God.

11Geta to manekusu mo Ebarahamu, nia Sera geke sasahaka haro ghu dike ghua mo ghe, maneri palu dike boka age nai rekaha mo, vununa Ebarahamu neke va hohoghonai God ta va ghuduvina manei ia nona naiungene. 12Geta neke to puina mamanekusu mo neke to namo leme ghu Ebarahamu ghe, ka kaike mane iahi lama neke la meha ghu ira tehi pagusu ka manei taghe tehidi ira babaghunu ka kolangana ira ta ghua. Maneri mu taghe ira garanga ka ia tapuruna tahi edi ghua deona hei ta boka tahorira.

13Leghu noni irahi nga dike va hohoghona ma dike lao ghu ka God dike vuhai leme ghedi ghu. Ka ia dolidi nga maneri, maneri e deo gedi ke hiori ghu leghutau neke naiungene vanadi irahi God. Maneri dike suna fini laori ma varihauni dike va manemane ghidi lao ghu. Maneri dike avohori taghodighi taghe noni mehadi ma ta meha sigho ghu ka malau iahi peka, ta ghuana. 14Ira noni ta kaheri kokolodi leghutau irahi mu di va podoli ta haduina kaike malau ta mala nodina taghodighi. 15Gedi ke ngana lao lama gedi au ghu maneri ka ia malau dike ghahe kainio, geala maneri e nanamori ma ke leghu laona ka malau ianimu. 16Ghe deo. Maneri dike hadui kaike malau ta veha laoni, kaike malau ta au ka malauo God fate. E deo ghu God ge haghava ghidi ghena ghu ira noni, nodi God taghodi dito ghua ghini la maneri, vununa manei to va tana vanadi kaike malau leghaha.

17Ebarahamu neke va hohoghonai God, ianimula ghe neke lao hihingona nga ta veala ghinina Aesake ia tuunamane taghona ka neke va sisiva ghinio God manei. Ebarahamu neke hioi mo ia naiungene ka God, ghe neke va tana mo mala veala ghinina Aesake ia tuuna kaikena, 18geta kahe ghua iahi God ka manei, “Ka Aesake lamu ta age auna ghatu ira pagusu ka agho nake naiungene ghidio ara ka agho.” ▼

▼11:18 Tatanigaina 21:12

19Ka ia va fafahaka Ebarahamu, God eke boka va doli leghui mo Aesake neto leme la manei neke ghua. Ghita da boka kahei mo ghu, Ebarahamu neke hio leghui ia tuuna ka ia leme, ta ghuana.

20Aesake neke va hohoghonai God, ianimula ghe neke vanadi nga ia va beana manei Zekopu ghe Iso ka heve doli ta mala dufuna ka maneri palu keha nareo.

21Vununa Zekopu neke va hohoghonai God, neke va beanari ghu manei ira palu tuuna Zosepu ka ia fafata neke to va tanai leme ghenao. Manei neke rorogho poposi lao ka ia nona totongono neke va totoana lao ghu ka God.

22Zosepu neke va hohoghonai God, ianimula ghe neke tuturi ghini kave nga manei ka neke to age namo leme ghenao, ghinina ia kave kaini Izipi ka ira nonidi Isiraeli neke age mala riva ghinio God, nia vanadi ungene babatu tuna ta mala hio taremehadi harona maneri ira humana taghonai ka kavedio, neke ghua.

23Nona uke nia nona mama Mosese dike va hohoghonai God, ianimula ghe dike poikai nga Mosese maneri palu giliona lito hihile, vununa maneri palu dike finini ta rekaha vevehanana Mosese, dike deo ghu maughedina huhughina ia ungene va gigima ka ia mane ginitaukela.

24Mosese neke va hohoghonai God, Ianimula ka ia meha mane faana manei ghe, neke deo nga ge kabai ghidi ghu manei ira noni ta va kudo ghini tuunamanena ia tuunaghase ia mane ginitaukela. 25Manei neke faeti ta mala holara vavahagalana taghonai taremehadira ira nona noni God mo, vununa neke pake ghena ta holara au va manemanena ka ira doli ta sasake ia ta malana ka birusuna fafata tei ma. 26Manei neke va hohoghonai e veha ta vavahagala vananina Kraes fuludu laoina ia ta taghori ira leghutau ta veha ta au Izipi, vununa manei neke mato kenu laoi ia tabarana leghaha ta age hioi manei ka God keha nareo. 27Mosese neke va hohoghonai God, ianimu la ghe neke ghahe kaini nga manei Izipi deona geke maughini ghena ghu ia haala ka ia mane ginitaukela. Mosese neke torai tetu va gima ma neke lao ghu, taghe neto finini God ta ghuana, ia ta deo nga hei ta fininina. 28Mosese neke va hohoghonai God, ianimula ghe neke va kahe ghidi nga ira nonidi Isiraeli ta suteina ia Ghahefuludu nia ta va kefurua ghidi busakana ira fatedi nodi makatana e ghua, mala ia engizelina leme eka atunguri la ghu ira tuudi mane ta kusu doli.

29Maneri dike va hohoghonai God, ianimula ghe dike ghahe kadolo nga ira nonidi Isiraeli ka kava nasapa ka ia Tahi Busaka. Ghe ira nonidi Izipi dike va sisiva bozo leghu laoriro, dike la lomoho.

30Ira nonidi Isiraeli dike va hohoghonai God, ianimula ghe neke riufu nga ia leghahaina babara hidi ghahipa ta tetu lilohi Zeriko leghuna ghaghahe lilohi ira mane punugara vitu ravata.

31Rehabu mu kaike fotati ta kikirasei tabara neke va hohoghona ka God neke auno Zeriko. Manei neke va hohoghonai God, ianimula ghe dike deo nga ira nonidi Isiraeli gedi ke atungi ghu taremehadira ira noni dike huhughio God, vununa neke hio sute poikari ira manesigho.

32?Nia heveni geala ta turi ghininani ara? Ara e deo au fafata ta boka turi ghidi harora ira va hohoghona ka Gidioni, Baraki, Samusoni, Zefeta, Deveti, Samueli, nia ira leghu Porofeti nga, e ghua. 33Ka ia va hohoghonai God noni irahi, maneri dike magara dike paufuri ghu ira keha soloso. Maneri dike au kopu ka ira ghaghahedi ta lotoro dike hiori ghu maneri heve neke naiungene vanadio God. Kehara ka maneri dike posi kaputuri ira mangadi laioni. 34Kehara ka maneri dike sakomo kai laori ka totoi ta gutata, ghe deo gedi ke saliga ghu nia kehara gedi ke deo ghu lemedira ka ira leboto sisilufu mala magara, dike ghua. Ira dike paekero dike age gigima. Nia maneri dike puina maneheta ka ira magara, dike va pelo ruruturi ghu ira kamotodi punugara. 35Keha fotati dike leme tadi ira nodi rekaha, ghe dike age doli ghedi leghu. Nga ira keha mu dike ruza va vavahagalari edi mala fihiki kaini ghu God, dike ghua. Ghe maneri dike lao hihingodi ta mala lemena dike deo ghu gedi suaraghi ghu, vununa maneri dike nakai laoi ia nodi rangerange ka ia doli ta veha fuludu lao ka leghuna ia tetuleghu.

36Kehara mu dike mala vela nodi nia dike puruasimiri, nia kehara gedi ke va piliga ghidi ghu ka ira seni nakairira ka pipiliga, dike ghua. 37Kehara mu dike fera va lemeri ka ghahipa, kehara gedi ke kodaka paluri ghu ira tinidi, nia kehara gedi atunguri ghu ka leboto sisilufu mala magara, dike ghua. Maneri dike kuma dike va vona kafudi sipisipi, ba gouti ma ghu, ghe dike ghahe lao meha nga. Ira kana ka maneri dike kikipana ghidi nia ngovangovalari ghedi maneri. 38Maneri mu dike noni vehadi, e deo ghu ge fatadi ghu ta au taremehadira ira noni ta muko ka malau iahi peka. Maneri dike ghahe lao meha ka ira malau koroghadi ta karango nia ka ira vuhuku, mala poikana ka ira lianga nia ka ira korosa ka giliona ia kava, e ghua.

39Leghu noni irahi nga mu dike toraina gigima ka ia nodi va hohoghona neke veha vanani ghu God ka maneri, ghe e deo hei ka maneri neke hiorira ira heve neke naiungene vanadio God, 40vununa God neke to kusu vato ghini ia leghutau ta veha fuludu lao maladana ghita haroharo. Manei neke kabai ghidi maneri ta afa ghini ghitana ghita, e mala kaike va mamalahu ghita varighara ghu ka ira nahalina taghonai.