Heb 12 | KjiSC | STEP | Ka ghita mu kaike leghahai varigharana noni ta va hohoghona ka God di au liloho ghitana ghita. Vununa ne ghua iahi, da nai kairi ghu ghita ira leghu ta va gogoha ghita nga ka ia va hohoghona nia ira sasake ta au va gima ka ira dolida e ghua, da purudu va gigima ghu ka ia varighohi neke nai vanadao God mala purudina ghita.

Hebrews 12

God Ia Noda Mama

1 Ka ghita mu kaike leghahai varigharana noni ta va hohoghona ka God di au liloho ghitana ghita. Vununa ne ghua iahi, da nai kairi ghu ghita ira leghu ta va gogoha ghita nga ka ia va hohoghona nia ira sasake ta au va gima ka ira dolida e ghua, da purudu va gigima ghu ka ia varighohi neke nai vanadao God mala purudina ghita. 2 Mala riva ghinina ghu iahi mu, ghita da nai va gima ageri ira hibada ka Zisas, ka ia ta tataniga nia hokoto ia va hohoghona ka ghita. Manei neke va malumi taghona ta va vavahagalana ta lemena ghu ka ia hekefalahata, deona ge nganai ghu ia haghava ta au ka kokolona leme iahi, vununa manei neke mato vai kenui ia va ghazaghaza ta age hioi taghona ghatu. Ghatunaina mu manei neto nohe ghu ka mautunao mo ia nonohe ginitaukela ka God. 3 Oke ngana laoina Zisas. Ira noni ta muko dike ngovala va mukoi mo ghe, manei e deo geke age paeke ghu. Ghau haro oka age paeke la ghu go bualefo ghu. 4 Ka ia taga tetui ghau ia sasake, ghau e deo nga go magara dufu lao ghu ka ia ta age leme ghau.

5 ?Nia heve, noto ke ngana kairi ghemu ira ngengene mala va gigima ghau neke va kahe vanamuo God ghau ira nona rekaha? Ia ta kahe ghua iahi,
“Tuuguo, oka ngana va sananori ghu ka ia va lotorigho ia Lod God,
nia neto burua ghau la manei, oka paeke hinae ghu.
6 Vununa ia Lod mu, e va lotorori tudu ma ira rekaha ta namaha ghidi taghonai,
nia e va kilasari ira rekaha ta nona taghonai, e ghua,” ^{▼▼12:6 Tatangana 3:11,12} ia ta ghua.

7 Ka ia au va nadu ghau ka giliodi ira vavahagala, o nganai taghe nona rekaha taghonai ta ghua ghini ghauna God. ?Heiri mu rekaha dike deona ge va lotorori ghu nodi mamari? 8 Neto deo la God ge va lotoro ghau ghu, taghe ta va riva ghidi ira leghu nona rekaha nga, fafahakanana mu ghau noke doli peghuruna ia varihio, e deo ghu go toraina nona rekaha ghu taghonai. 9 Kehanani mu ira noda mama ka malau iahi peka mu edi va lotoro ghita, da heluhelu ghidi ghu ghita. Geala e toraina veha fuludu ghu ta va malumina ghita noda Mama ka malaunao fate ta va lotoro ghitana ta hioina ghu ghita ia doli hohoghona.

10 Vununa ira noda mama ka malau iahi peka mu, edi va lotoro ghita ka kaike birusuna fafata ma ka ia torai nganganadi ta veha. Nga God ne va lotoro ghita malana ia veha ka ghita, mala da au maduana taghe taghonai da ghua ghu ghita. 11 Ka ia va lotoro ghita God, ghita da va vavahagala nia deo gada va manemane ghu. Ghe leghuna ia vavahagala mu, ghita neke va lotoro ghitao God ka ghaghahena iahi mu, da boka leghui mo ia ghaghahena ta lotoro auna ka bule.

12 Oka baelu ghemu la ghu leghuina ia doli ta hohoghona, ia ta lotoro. O hure vonari kamemu tato fonoghu nira nia va gigimari ghahemu ta paeke nira, e ghua. 13 O va sare va vehari ira hangana maladi ghahemu nira, ^{▼▼12:13 Tatangana 4:26} mala heiri ira ta paeke nia paheku edika age riufu la ghu, nga edi meha gigima.

14 O va sisiva ta auna ka bule taremehadi ira noni haroharo, nia ta au maduanana e ghua, vununa ira noni taka au maduana ghu mu, e deo gedi boka age finini ghu ia Lod. 15 O au vari kopui mala e deo ghu hei ta age sokeina ia varisute ta va meha kakatoi God. Ghatu kehara ka ghau o meha taghe kaike heke ta huhungu o ghua o age va mukori ghu ira tehi noni. 16 Oka va malumi ghu hei ta zave lao mehana, nia ghatu o va malumuri agho kehara ta deona gedi va vonavonai ghu God taghe Iso, neke tatabara ghidiro ka kaike disi ghano ma ira nona kaikadolodi ira manadi hio kadolo ta malana ia mane ta kusu doli. 17 Taghe ta avohi niala ghau, leghunana Iso neke kabai hio kadoli va beana iahi, ghe nona mama neke sokei manei. Neke nakele dudumana mo manei fangaina ia va beana, ghe to deo heveni take boka riva ghinina manei mala holarina heve neke riva ghini va zeao.

18 Ghau e deo go meha ghu ka kaike vuhuku ta boka posi laoi agho, ta malauna totoi ta burungu, nagoromo nia tapaoho e ghua, taghe ka ia vuhuku Saenae dike laoro ira nonidi Isiraeli. 19 Ka fafata ianimu maneri dike nomohi ia kigolona kufili nia dike nomohi kaike leo ngengene laona ka maneri. Ka ia nomohidi maneri leo ianimu, dike papadi God taka ke ngengenena ghu manei, 20 vununa heve neke ungene va gigimaino manei neke puina mamaghuana fuludu. Manei neke kahe ghua iahi: “Hei ta ghuana, geta ghua ghu kaike pusi meusu ghe, neto la ghirini la vuhuku ani, e toraina fera va lemei ka ghahipa.” ^{▼▼12:20 Kave 19:12,13} 21 Heve dike fini laoio maneri neke puina mamaghuana neke kahe ghua ghu iahi Mosese, “Ara na nanazara maughegu,” ^{▼▼12:21 Ngengene 9:19} neke ghua.

22 Ghe ghau noto la meha ka Vuhuku Zaeoni, ka ia malau leghaha God ia ta doli. Manei lamu Zerusalemuna ka malauo God fate ta au ira tehi togha engizeli. 23 Ghau mu noto la meha taghe ira varigharadi nona rekaha God ta kusu doli ta kangavari ira babaolodi ka malauo God fate, no ghua. Ghau mu noto la meha ka God ia ta mala fateri leghu noni nga, nia no la meha ka ira tarungadi ira noni ta veha neke va mamalahuriro God ira leghu sasakedi nga. 24 Ghau mu noto la meha ka Zisas neke hio mehaio ia foforuna varivehai ka ira noni. Ia busakana manei neke orahao neke va mamalahu ghitao ghu ka sasake mu, e veha fuludi ia busakana Ebolo, vununa ne va podolori ira leghutau ta veha.

25 O balau, oka pake ghemu ghu nomohina God ta ngengene ghaunia. Ira nonidi sepao dike deoro gedi nomohi ghu ka ia fafata kahe ghidi va gigima meha ka malau iahi peka, dike deo gedi boka peloho ghini ghu ia vari va kilasa ka God. ?Heve da ghua ghu ngaini gada boka pelo kaini nga ia vari va kilasa, dato huhughi la ghita manei ka ia fafata ngengene va gigima ghita meha manei ka malaunao fate? 26 Ka fafata ianimu ia leona God neke kuzoi malau iahi peka, nga ghatunaina mu manei ne naiungene ghua iahi, “Kaike fafatani ara a age kuzoi malau iahi peka nia ira leghutau ka kolangana fate,” ^{▼▼12:26 Hagai 2:6} ne ghua. 27 Fafahakanana “kaike fafatani” ta ghua iahi mu, ira vahina leghutau ta va vuhari nga mu e age kuzori e hio kairi ghu e ghua, mala edi au hinae ghu ira leghutau ta deo ge boka kuzori ghu.

28 Ghita da kudo vehai God, vununa ghita da au ka ia ravutu God, ia ta deo ge boka kuzoi ghu. Ghita da helahela ghini manei ka ia ghaghahena ta va manemanei manei, da riva ghini ghu ka heluhelu nia mamaghu. 29 Vununa God iahi ka ghita mu, ia totoi ta vari saliga. ^{▼▼12:29 Ngengene 4:24}