Hebrews 13

Ira Riva Ta Veha Vanani God

1O vari namahai ghemu tudu taghe tatahina noni kiloau, ta ghuana. 2Oka ngana kai ghu suteri ghedira ira noni mehadi, vununa kehara dike riva ghua ianimu dike hio sute fatari ghu ira engizeli deona ghe gedike avohi ghu! 3O ngana laori ghedi ira noni kiloau ta au ka pipiliga taghe ta au harona taghomu ka pipiliga ta ghuana. Nia o ngana laori haro ira ta ngovala va mukori taghe ta va ghilaghilai harona taghomu vavahagala ani ka maneri ta ghuana.

4O heluhelu ghini ia au varihio, nia o au hohoghou taremehana kerauau e ghua ka giliona ia varihio. God e toraina age fateri ghatu ira noni ta zave lao meha, nia ira noni ta pedo, e ghua.

5Oka au ghu ka ia doli ta namaha ghini fuludu ghau ia rongo, nia o veha vanamu ka heve ta kuru ghau nira. Vununa God neke kahe ghua iahi,
“Ara e deo ga age ghahe kaigho ghu.
nia ara deo ga age ngana kaigho ghu.” ▼

▼13:5 Ngengene 31:6

6Ne ghua mamu ghe, da gigima nga ghita kaheina iahi,
“Ia Lod mu mala toka ghinaguna ara; e deo ghu ara age maugheguna.
?Heve mu ta boka va riva ghinaguna ara ia noni?” ▼

▼13:6 Samu 118:6,7

da ghua nga ghita.

7O ngana laori ira nomu noni babatu dike va kakahe ghini ghauro ia saorona God. O ngana laori ira leghu veha nga ka ira doli maneri, o deke leghui ghu ia va hohoghona ka maneri.

8Zisas Kraes mu e varifata ma norao, ravata iahi, nia e varifata toghunai, e ghua. 9Oka va malumuri ghu leghu kokolodi vari va kakahei nga ta hio kave ghauna ka ia lotorona hangana. E veha ta va gigimarina hihingoda idi ka ia nona varisute God ta vanada kakato, nga eka ghua ghu ka ira nai puhi maladi ghano ta deo ge vanadi veha ghu heiri ta leghuri nai puhi iranimu. 10Ia veala ta au ka ia fatena sopebeana ghita mu, e deori mana ta mala mahai ghanona aianimu, ira hiama ta riva ka giliona suga tapole ta maduana iahi.

11Ia hiama pauna mu, e hio laoi gilio ka ia Malau Ta Maduana Fuludu Lao ia busakana bulumakau, taghe kaike veala malana sasake. Nga ira tinidi mu, edi saligari peghuruna ia malau tei ka dike auno maneri. 12Zisas neke vavahagala ghu molamo ka peghuruna ia makatanana ia babarana malau leghaha, mala va mamalahurira ira noni ka ia busakana taghonai. 13Ghita da kave age ghu ka manei ka peghuruna malau tei ani, da age holara taremehana haro ghu ka haghava neke hurei ani manei. 14Vununa malau iahi peka mu eka noda malau toghunaina ghu ghita. Ghita mu da au afa ghini ia malau leghaha ia ta la meha nga kenu mo.

15Vununa ka heve neke riva ghinio Zisas maladana ghita, da helahela ghini tudu ghu ghita God va podolina ta torai varangana manei. Helahela ta riva ghini ianimu ghita mu taghe kaike veala ta riva vanani lao ghita manei, e ghua. 16Oka ngana kai ghu ta riva va vehana, nia ta vari tokaina e ghua, vununa ira veala taghe iranimu ta ghua lamu ta va manemane ghidira God.

17O nomohori ira nomu noni babatu o riva ghidi ghu ira ta va kahe ghini ghau maneri. Maneri lamu ta kopu ghidira ira dolimu ghau ka Kraes, nia maneri di avohi ta age tetuna maneri leghunana ka kenuna God, turi vananina ira nodi riva. O nomohori ghau, edi mala va manemane ghu maneri riva ghidira ira nodi riva. To deo la, maneri edi age riva ghidi ka muko hihingo, nia e deo go veha ghini ghu ghau, e ghua.

18Ghau o tarai toka ghini ghai. Ghai na toraina avohi ta lotorona ngangana ini ka ghai na kabai riva va veha ghu ka vahina leghutau nga. 19Sughavona ghu ara na va ohiohi ghau ta tarai fangaina ghau God a boka ke magali la leghu meha ghu ara ka ghau.

Ira Va Nonoghadi Tarai Nia Ungene Veha

20– 21God ia ta vanada bule, neke va doli leghui ia noda Lod Zisas ka leme. Ara na tarai fangai ta age vanamuna manei vahina leghutau ta veha nga ta age toka ghini ghau leghuina ia lao nanafa ka manei. Ara na tarai fangai molamo ta age rivana manei ka ira dolimu ghau ka ia mana Zisas Kraes o mala age riva ghidi ghu ghau ira leghutau ta age va manemanei manei. Vununa manei neke leme, ne torai mane hohoghona mala kopunai sipisipi ghu mu Zisas. Nia ka ia leme, manei neke riva ghini taghe kaike veala ia ta ghua maladana ghita, va tetuina manei ia foforuna varivehai ia ta age au tudu ma. Ka va fafahaka ianimu, ghita da helahela ghini toghunai Kraes. Amen.

22Ghau taremehagu noni kiloau, ara na va ohiohi ghau ta nonomoho va vehana ka ponoena vari va kakahei ta kangavi iahi ara mala va gigimaina ia ngangana ka ghau.

23Ara na kabai ghini ghau ta avohina tato ke va malumu kaveina maneri ka pipiliga ia tahida mane Timoti. Neto magali meha sabara la manei, ara a meha taremehana nga mala age fini ghauna.

24O vanadi nomai ungene veha idi ka ira leghu nomu noni babatu nga nia ira leghu nona noni nga God e ghua. Ira noni kiloaudi Itali di va ghahe vanamu age ira nodi ungene veha haro.

25Ara na tarai e age vanamu ghu God ghau haroharo ia varisute ta vanada kakato.