Heb 2 | KjiSC | STEP | Ghita da toraina nonomoho va veha ghu ka ia hohoghona dake nomohio, daka felo ghahe la ghu ka hohoghona ianimu.

Hebrews 2

Ia Leghahai Ghaghahena Mala Hio Va Doli Ghita

1 Ghita da toraina nonomoho va veha ghu ka ia hohoghona dake nomohio, daka felo ghahe la ghu ka hohoghona ianimu. 2 Ia nonomohona ia vetula ka God dike hioio ira engizeli dike vanadio ghu ira faada mu e hohoghona. Heiri dike deoro gedi leghui ghu mu, God neke vanadi ia va kilasa ta fata ka huhughu iranimu maneri. 3 ?Heve, da boka peloho ghini mo ghita ia va kilasa, dato deo la gada va ghunaghunai ghu ia leghahaina ghaghahena mala hio va doli ghita? Ghaghahena mala hio va doli ghita iahi mu neke kusu kahe kavei taghona ia Lod Zisas, ghe dike va kahe ghini ghita nga ira dike nomohio. 4 God neke va podolo kavei molamo ta toraina hohoghonana ia nona nonomoho, ka ira leghu kokolodi hahaima nga nia va ghila nga neke riva ghidiro manei nia ka ia tufa ghidi ira kaikadolo ka ia Tarunga ta Maduana, leghuina ia lao nanafa ka taghonai, e ghua.

Zisas Neke Toraina Meha Noni Mala Tokai Nonina

5 God e deo geke faeteri ghu ira engizeli mala kopu ghinina ia foforuna malau ta la meha, ta turi ghini iahi ghai. 6 Vununa ka kaike pelona ka ira Kakangava ta Maduana, e kahe ghua iahi,
?“God, ne heve mu ta toraina ngana heta ini agho ia noni,
ta suna tuuna noni ini ma manei,
ghe ta hio suteini agho?
7 Ka birusuna fafata tei
agho noke nai va hinaei manei
ka pekadi ira engizeli,
agho noke vanani varanga nia heluhelu,
8 nia agho noke nakairi vahina leghutau nga
ka pekana ia mana manei.” ^{▼▼2:8 Samu 8:4-6}

Ka ia nakairi vahina leghutau nga ka pekana ia mana manei, e deo kaike leghutau ghu neke nakai kaveina God. Ghe ghatunaina ghita e deo nga gada finiri ghu vahina leghutau nga ta auna ka pekana ia mana hei noni. 9 Nga ghita mu da finini Zisas, ia neke nai va hinaeio birusuna fafata tei ka pekadi ira engizeli. Nia ghatunaina God ne vanani ia varanga nia va vonavona, vununa manei neke hioi ia vavahagalana leme. God neke va podoli ia nona varisute ta vanada kakato ka ia lemena Zisas vanadira ira noni haroharo. 10 God neke va vuhari ira leghutau haroharo, mala vanani varangana ghita ka leghutau iranimu. Vununa God neke kabai hio mehari ka varanga ira tehi noni ta leghui manei, neke lotoro ghu ta va vonavonaina manei Zisas ka ia vavahagala neke riva ghinio manei mala age fatana manei babatu ghidira ira noni mala hioina ia doli soduai.

11 Hei ia ta va kalasari ira keha ka ira sasakedi nia heiri ira ta kalasa ghedi e ghua mu, edi meha ka kaike kokolona noni mo. Zisas e deo ghu ge haghava ghena ghu va kudo ghidi tahinara. 12 Manei neke kahe ghua ghu iahi ka God,
“Ara a age kahe kavei ia babaolou agho ka ira tahigu.
Ara a age helahela ghinigho ka hoataidi ira nou noni ta va totoana varighara.” ^{▼▼2:12 Samu 22:22}

13 Manei neke kahe ghua molamo iahi,
“Ara a age va ghighiu ka God.” ^{▼▼2:13 Aesaea 8:17}
Nia neke kahe ghuani iahi,
“Ara na au aiahi
Taremehadi ira rekaha neke vanaguo God.” ^{▼▼2:13 Aesaea 8:18}

14 Vununa ira rekaha ka God mu edi kuru tinidi, neke meha kuru tinina taghe maneri neke ghua ghu molamo Zisas. Vununa taghe noni e ghua manei, ghe ge boka leme nga. Nia ka leme lama ta boka paufina manei ia mana ka ia Faghinadi ira nazahi, ia ta kurui ia mana ka leme. 15 Ka ghaghahena ianimu lama ta boka va kalasarira manei ira noni haroharo dike au pipiligaro leleghu ravata vununa dike maughedi leme.

16 Ghita da avohi molamo neke deona geke meha mala toka ghidi ghu ira engizeli mu Zisas. Manei neke meha mala toka ghidi ira pagusuna Ebarahamu. 17 Ianimu la ghe, neke torai tongovona nga ta toraina meha noni taghe maneri ta ghuana manei ka ira leghu ghaghahedi nga, mala boka meha kaike Hiama Pauna ta kurui dudumanana nia ta mala au hohoghonana ka ia riva vanani God e ghua. E ghua ghe ge boka riva ghini nga manei ia veala ta boka hio kairi ira sasakedi ira noni. 18 Vununa taghonai neke vavahagala ka ia fafata neke auauio, e boka toka ghidi mo ghu manei ira noni ka ia fafata ta dufuri auau.