Heb 3 | KjiSC | STEP | E ghua ghu ghau taremehagu noni kiloau ta holara taremehadi heiri neke faeteriro God ta mala auna ka malaunao fate, o va hoto laori ghu ira nganganamu ka Zisas ia ta va hohoghonai ghita taghe noda mane nonomoho nia Hiama Pauna neke tuhu mehaino God, ta ghuana.

Hebrews 3

Zisas Mu E Varanga Fuludi Mosese

1 E ghua ghu ghau taremehagu noni kiloau ta holara taremehadi heiri neke faeteriro God ta mala auna ka malaunao fate, o va hoto laori ghu ira nganganamu ka Zisas ia ta va hohoghonai ghita taghe noda mane nonomoho nia Hiama Pauna neke tuhu mehaino God, ta ghuana. 2 Zisas neke riva hohoghona vanani God ia neke faetio manei, taghe neke ghuao la Mosese neke riva hohoghonao ka ia sugana God. 3 Geta ghua mo ianimu ghe, Zisas mo mu ta torai varanga fuludu laoina Mosese, taghe ta ghua la ia noni ta rivai suga, ia ta varanga fuludu laori suga iranimu. 4 Vununa ira leghu suga nga mu, e au mo hei neke riva ghidira, nga vahina leghutau nga mu God neke riva ghidira. 5 Mosese mu neke kaike maneriva neke riva hohoghonao ka ia suga God. Ia riva ka manei mu, neke mala tuturi ghidi ira leghutau ta mala age turi ghidi God keha nareo. 6 Nga Kraes mu neke kaike Tuuna ta riva hohoghona ka fatena ia suga God. Ghita ghu mu sugana ka God dato posi va gima la ka ia noda va hohoghona nia rangerange ghidira ira naiungene ka Kraes ta avohori ghita age hiorira ghatu.

Malau Mala Maghoso Maladi Ira Noni Ka God

7 Vununa ka ianimu ne kahe ghua ghu iahi ia Tarunga Ta Maduana,
“Ravata iahi noto nomohi la ghau ia leona God,
8 Oka va kaputuri ghu hihingomu nira,
Taghe dike riva ghinio ira faamu
Ka ia fafata dike taga tetu auno ara maneri,
Ka fafata iahi maneri dike va sisiva ghinagu ara,
ka ia malau koroghana ta karango.
9 Aianimu dike va sisiva ghinaguna ara ira faamu ghau,
geta finiri mo maneri heve nake riva vanadiro ara
ka giliodi ira rodana-ngavulu komuhu.
10 Ara nake halau ghu ka ubalana noni ianimu,
Nake kahe ghua ghu iahi,
‘Hihingodira noni irahi mu,
Edi taghuru kaiau tudu ma ara.
Edika va fafahakari ghu puhigu idi ara.’
11 Nake va bebereana ghu ara vununa nake halau:
‘Maneri e deo kalasu kai gedi age hagheli ghu ia maghoso ka ara.’” ^{▼▼3:11 Samu 95:7-11}

12 Ghau taremehagu noni kiloau, o banabana, e deo ghu auna ka ghau ia hihingo ta muko nia ta deo ge va hohoghona ghu, ia ta va fihiki ghahe ghau ka ia God ta doli. 13 Ghe o vari va gigimai leleghu ravata, ka ta au ini nga ghau ka ia fafata ta va kudo ghini “Ravata iahi.” O vari va gigimai, mala ia sasake e deo ghu age sebo ghauna nia va kaputurira hihingomu nira, e ghua. 14 Ghita da age parekete taremehana Kraes ghatu, dato hohoghoda la posi va gimai ta dufuna ghu ka ia va nonoghana ia noda va hohoghona ka God dake kusu kuru ghitao. 15 Taghe tato kusu nomohio la ghau ka ira Kakangava ta Maduana:
“Ravata iahi, noto nomohi la ghau ia leona God,
Oka kaputuri ghu hihingomu nira,
Taghe dike riva ghinio ira faamu
Ka ia fafata dike taga tetu auno maneri,” ^{▼▼3:15 Samu 95:7,8} ia ta ghua.

16 ?Heiri ghu mu dike nomohina mo ia leona God, ghe dike huhughina? Maneri haroharo dike batu ghidi kavero Mosese aianihi Izipi. 17 ?Nia ka heiri mu neke halina God ka giliodi ira rodana-ngavulu komuhu? Ka ira noni dike rivai sasakero, dike leme lao meharo ghu ka ia malau koroghana ta karango. 18 ?Nia ka hei mo mu neke ngengene laona God, ka ia fafata va bebereana manei neke kaheio ghu ta toraina deona gedi boka haghele ghu maneri ka ia maghoso manei? Manei neke ngengene laori ira noni dike deoro gedi ungene nonomoho ghu. 19 Ghita da finini ghu mu, ta deona maneri gedike boka haghele ghu ka ia maghoso manei, vununa dike deo gedi va hohoghona ghu ka God.