Heb 4 | KjiSC | STEP | Ia naiungene ka God ta mala age hagheli ira noni ia maghoso ka manei ia ta ghua, e tobehe vanada nga ghita. Ianimu la ghe gada puina banabana nga ghita, ghatu e ghua mo, o age deo ghu hioimuna kehara ka ghau maghoso ianimu.

Hebrews 4

Ia Maghoso Neke Naiungene Ghinio God

1 Ia naiungene ka God ta mala age hagheli ira noni ia maghoso ka manei ia ta ghua, e tobehe vanada nga ghita. Ianimu la ghe gada puina banabana nga ghita, ghatu e ghua mo, o age deo ghu hioimuna kehara ka ghau maghoso ianimu. 2 Vununa ghita haro dake nomohi mo Nonomoho ta Veha ianimu, taghe dike ghuaro la ira faada ghita. Ghe dike nomohi mo maneri nonomoho ani ghe, e deo ghe geke toka ghidi ghu, vununa ka ia fafata nomohi maneri, e deo gedi ke va hohoghonai ghu. 3 Ghita ira ta va hohoghona lama mu, ta boka haghelina ghu ia maghoso ka God. Nga ka ira ta deo gedi va hohoghona ghu mu, God neke kahe ghua iahi,
“Ara nake halau nake va bebereana ghu:
‘Maneri e deo kalasu kai gedi age hagheli ghu ia maghoso ka ara,’” ^{▼▼4:3 Samu 95:11; e au haro ka papaguaina 5} neke ghua.

God neke kahe ghua ianimu geta toke nogha mo ira leghu nona riva nga ka ia fafata va vuhaini malau iahi peka. 4 Vununa ka keha pelodira ka ira Kakangava ta Maduana, manei neke turi ghini ia va vituna ravata ka ngengene irahi: “Ka ia va vituna ravata God neke maghoso ka ira leghu nona riva nga,” ^{▼▼4:4 Tatanigaina 2:2} e ghua. 5 Nia aianimu haro la, God neke kahe ghuani iahi,
“Maneri edi toraina deo gedi age hagheli ghu ia maghoso ka ara,” neke ghua.

6 Ia maghoso ka God mu to au ghu aianimu mala haghelena ka ira noni. Ghe heiri ira dike kusu nomohio ia Nonomoho Ta Veha mu dike deo hagheledina, vununa maneri dike huhughi God. 7 God neke nakaini ghu kaike ravatani mala haghelena ka ia maghoso manei. Ravata ianimu neke va kudo ghini ghu manei, “Ravata iahi” babaolonana. Ka tehi komuhuni leghuna fafata ianimu God neke faeti Deveti ta tuturi ghinina fafata ianimu, ka ia papaguaina ta kahe ghua iahi noke kusu izumio ghau:
“Ravata iahi noto nomohi la ghau ia leona God,
oka kaputuri ghu hihingomu nira,” ^{▼▼ 4:7 Samu 95:7,8} ia ta ghua.

8 Vununa geke to vanadi maghoso la Zosua ira noni Isiraeli ka ia ghaghahena neke naiungene ghinio God, geala God to deo ke turi ghinina keha ravata mala maghosonani take la mehana. 9 Kaike maghoso taghe ia maghoso neke riva ghinio God ka ia va vituna ravata ghu mu, e la meha nga maladira ira noni ka God. 10 Vununa heiri haroharo ira dike haghelio ia maghoso neke naiungene ghinio God mu, edi maghoso molamo ka ira riva maneri, taghe neke ghuao la God neke maghosono ka leghuna ia va vuhai manei malau iahi peka. 11 Da toraina riva va gigima ghu ghita mala haghelina maghoso ianimu. Vununa ghatu da deo gada age hagheli ghu, taghe dike ghuaro ira noni Isiraeli dike huhughuro dike deoro ghu haghelidina.

12 Vununa ia saorona God mu e doli nia e mana. E ngaru fuluduri ira leboto sisilufu mala magara ta ngaru palupelo. E boka kodaka haghele lao gilioni ka ia torai hihingona nia nganganana noni. Ia saorona God mu e va podolo kaveri ira ngangana nia lao hihingo ka noni. 13 E deo kaike leghutau ka ira leghu ta va vuhari nga God mu ta boka poikana ka manei. Manei e fini podolori ka ira nahalina ira sare leghutau haroharo. Ka manei lamu ta age turi ghidi kavera ghu ghita heve dake riva ghidi nia nganariro ka ira dolida.

Zisas Ia Hiama Pauna Ta Varanga

14 Ghita da posi va gima ghu ka ia va hohoghona ta turi ghini tudu ghita. Vununa ghita mu da kuru ghita kaike hiama pauna ta varanga mala toka ghini ghitana. Hiama pauna iahi mu, Zisas ia Tuuna God neto ke vona laono ka malauo God fate. 15 Hiama pauna iahi mu ia ta avoho va vehari ira paeke ka ghita, vununa manei neke talari ira leghu auau nga, taghe ta ghua ini la ghita, ghe manei mu neke deo ge rivai sasake ghu. 16 Ghita e deo ghu maughedana meha namona ka ia nonohe ginitaukela ia God ta varisute. Aianimu ta age vanadana ia nona dudumana nia hioina ia varisute ta vanada kakato God mala toka ghini ghitana ka ia fafata ta toraina malanga ghini ghita.