Heb 5 | KjiSC | STEP | Leghu hiama paudi nga mu, God e faete kaveri ka ira noni, mala tetu vanadira ira noni ka ira leghutau ta susugoro lao ka God. Manei e vanani lao God ira nodi kudoveha ira noni nia e rivai veala mala hio kai tadira ira sasakedi, e ghua.

Hebrews 5

1 Leghu hiama paudi nga mu, God e faete kaveri ka ira noni, mala tetu vanadira ira noni ka ira leghutau ta susugoro lao ka God. Manei e vanani lao God ira nodi kudoveha ira noni nia e rivai veala mala hio kai tadira ira sasakedi, e ghua. 2 Manei e boka hio amotori mo heiri ira ta deo gedi fini avohori ghu ira tadi riva ghidi va zea, vununa taghonai ia hiama pauna mu noni haroma, e paeke ghu ka tehi ghaghahedi sasakeni. 3 Ianimu la ghe, ne rivai veala nga manei maladira ira sasakena taghonai nia maladira ira sasakedi ira noni, e ghua. 4 Nia e deo hei mu ta boka meha hiama paunana ka ia ta kabai ghini ma taghonai va vonavona ianimu. Nga God e toraina kudoi manei mala riva ghinina riva iahi, taghe neke ghuao la Eroni.

5 Taghe iala neke ghua molamo Kraes deona geke va vonavonai ghu taghonai mala meha hiama paunana. Nga God neke kahe ghua iahi ka manei,
“Agho mu Tuugu ara,
Ravata iahi, ara nato meha nou mama agho.” ^{▼▼5:5 Samu 2:7}

6 Nia manei ne kahe ghua iahi ka kaike pelonani,
“Agho mu kaike hiama toghunaina
ta leghui ia kokolona hiama taghe neke ghuao la Melekizedeki.” ^{▼▼5:6 Samu 110:4}

7 God neke kurui mana ta fata mala hio va dolinina Zisas, e deo ghu age lemena manei. Nia ka ia auna manei ka malau iahi peka, manei neke tarai nakele va fafaa lao ka God mala toka ghinina. God neke nomohi ghu ia tarai ka manei vununa Zisas neke hohoghona heluhelu ghinina manei. 8 Neke Tuuna mo God manei ghe, ia vavahagala neke daparino manei neke toka ghini mala avohina ia hangana mala torai leghuina God. 9 Nia vununa manei neke leghui God, neke faeti ghu God ta meha fatana manei mala hio va dolirira ta vanadina ghu ia doli soduai heiri haroharo ta leghui God. 10 Nia God neke faeti Zisas ta mala meha hiama paunana, leghuina ia kokolona hiama taghe neke ghuao la Melekizedeki.

Balau Ghini Ghahe Kainina Ia Va Hohoghona.

11 E tehi fuludu ta mala turi vanamuna ghai ghinina heve neke ghua Zisas ghe neke meha kaike hiama pauna neke ghua nga leghuina ia kokolona hiama pauna taghe neke ghuao la Melekizedeki, ghe ne toraina marutana va kakahe ghini ghau va vehana, vununa ghau no toraina mamahuge fuludu mala hio avoavohona. 12 To soduai mu ia au va hohoghona ka ghau, geala ka fafata iahi mu to va kakahe ghidi ghu ghau ira keha noni leghutau ta va hohoghonari irahi ghau. Ghe kehara edike mala va kakahe ghini ghauni ghidira ira kusu leghutau noke to nomohoriro ghau ghinina Zisas. Ghau mu taghe ira gogoso ta puti miloki no ghua nga, ta deo gedi boka mahai ghano ta gima ghu. 13 Heiri haroharo ta puti miloki kakato nga mu, edi gogoso nga, e deo nga ghu gedi avohi ghu ia vari va kakaheina heve ia ta lotoro. 14 Nga ghano ta gima mu, e maladi ira noni ta zeolo. Kokolona noni ianimu ghu mu eto boka fini avohi mo heve ia ta muko nia lotoro.