Heb 6 | KjiSC | STEP | Ghita daka turi ghidi la ghu gada au ghu ira vari va kakahei ghinina Kraes ta nanamo va fafahakarira. Ghita da rizu vona ka ira vari va kakahei ta fatadi ira ta zeolo ka ia nodi va hohoghona ka manei. E deo ge fata ghu take tataniga leghunani ghita ka ira leghutau dato ke kusu nomohoriro ghita: taghe ia ghaghahena mala va hohoghonai God nia ia ghaghahena mala taghuru kairi ira sasake ta boka hio lao ghita ka leme fuludai, e ghua.

Hebrews 6

1 Ghita daka turi ghidi la ghu gada au ghu ira vari va kakahei ghinina Kraes ta nanamo va fafahakarira. Ghita da rizu vona ka ira vari va kakahei ta fatadi ira ta zeolo ka ia nodi va hohoghona ka manei. E deo ge fata ghu take tataniga leghunani ghita ka ira leghutau dato ke kusu nomohoriro ghita: taghe ia ghaghahena mala va hohoghonai God nia ia ghaghahena mala taghuru kairi ira sasake ta boka hio lao ghita ka leme fuludai, e ghua. 2 Nia ghita geala daka ke leghu age ghu ka ira vari va kakaheidi ira sopai seselebeana, ia vari va kakaheina heve da ghua ghe da va fara lao kameda nga ka ira paudi noni, ia vari va kakaheina ia tetuleghu ka leme nia ia vari va kakaheina ia varifate ta age riva ghini ghatu God ka ia va nonoghana ravata, e ghua. 3 Neto va malumu ghita la ghu God, ghita da age hadu avoavoho ghidi ira keha leghutau ta age toka ghini ghita meha zeolona ka ia noda va hohoghona.

4 Ira noni ta va hohoghona ka Kraes mu dito taghuru kaini la ia nodi va hohoghona ka manei, e marutana vanadi fuludu ta taghuru kairira ira sasakedi take leghuna ghu ka manei. Sepao maneri dike au ka ia fegala God dike hioi ghu ia kaikadolo ka God nia dike to hioi ia Tarunga ta Maduana, e ghua. 5 Maneri dike hadu kave vanadi taghodighi ta vehana ia saorona God, dike finini ghu ia mana ta age va podolo kave kamoti manei keha nareo. 6 Kokolodi noni irahi dito taghuru kaini la heve dike va hohoghonaio sepao, maneri e deo ke boka taghuru kairira ira sasakedi. Vununa maneri mu taghe toke tupila ghini leghu ma taghodi ka heke falahata ia Tuuna God mala lemena dike ghu, dike va hahaghavi ghu ka ira hibadi ira noni.

7 Keha kavara mu edi sute kolo nanare ta fani zoghu ka kava ianimu. Manei e va fuari ira nunuma edi veha ghini ghu ira ta kutamai kava. Ianimu lamu kokolona kava ne va beanina God. 8 Nga ia kava ta va kodolo sesehu ta kekere nia lolozo e ghua mu e deo lighorona ma, e au ghu ka ia pekana tibiri God. Ka ia va nonoghana ge age saligai ghu, e ghua.

9 Ghau taremehagu noni kiloau, geta ngengene ghua ghu iahi ghai ghe, tehi leghutau ta veha fuludu laoni na va hohoghonarira ghai ghini ghauna ghau. Leghutau irahi ne va podoli ta hio va doli ghauna God. 10 God e riva ghini tudu ma heve ia ta lotoro. Manei e deo ge age ngana kaini ghu ia riva ka ghau nia ia namaha noto ke va podolo vananio ka ia toka ghidi ira keha noni ta va hohoghona, taghe ta riva ghini ma ta au nia ghu ghau. 11 Ghai na toraina kabai ghini ghau fuludu ta namaha ghidi ma ta auna ghu ka ia dolimu kamoto ira keha noni ta va hohoghona, mala toraina age hioina ghau heve ta rangerangei nia. 12 Ghai e deo ga kabai ghini ghau ghu ta toalina, nga o leghuri ira ta va hohoghonai God nia ta deo gedi bualefo ghu ka ia au afa maneri mala hio kadolorira ira leghutau neke naiungene ghidiro God.

Ira Naiungene Ka God E Vanada Rangerange

13 Ka ia riva ghini God ia nona naiungene vanani Ebarahamu, manei neke va bebereana ka ia babaolona taghonai, vununa e deo heini neke varanga fuludina taghonai, 14 neke kahe ghua ghu iahi, “Ara a toraina age va vehaigho nia a age va hugarari ira pagusu ka agho,” ^{▼▼6:14 Tatanigaina 22:17} neke ghua.

15 Ebarahamu neke vanemoho ma neke au afa ghu nia hioi tuna heve neke naiungene ghinio God, neke ghua.

16 Ira noni mu edi va bebereana lao ka babaolodi ira keha noni ta varanga fuluduri taghodighi. Va bebereana ianimu e va gigimai heve ia ta kahei maneri, e bara kaputuri ghu leghu kokolodi varituufuai nga. 17 Ka ia fafata riva ghini God naiungene ianimu, manei neke toraina kabai va podolo va veha vanadi ira noni ta age hio kadolina heve neke naiungene ghinio manei, deona ge age holari ghu ia nganganana. Neke ghua mamu ghe neke va bebereana nga manei ka taghonai. 18 God neke riva ghidi palu leghutau mala deona ge age holari ghu manei ia nganganana nia ka ia ta deo ge boka sesebo ghu manei, e ghua. Va kenunana manei neke naiungene ka Ebarahamu, nia va palunana ge va bebereana ghu manei ka ia babaolona taghonai mala zagoina naiungene ianimu, neke ghua. Ghita dake pelo ageno mala sorona ka manei mu, da posi va gima lao ghu ka ia rangerange neke vanadao manei. 19 Rangerange ta kuru ghita iahi mu taghe kaike sighoto maladi ira dolida ta deo ge boka rizu ghu ka ia ta au manei. Ia rangerange ka ghita e batu ghini ghita lao ka ia galahena ta maduana ta gilio lao ka leghuna ia poko riringi leghaha ta tuta. 20 Zisas to kusu la haghele aianimu vanada ghita. Manei neto ke meha noda Hiama Pauna leghuina ia kokolona hiama taghe neke ghuao la Melekizedeki, e age kaike hiama toghunaina ghu.