Hebrews 7

Melekizedeki Ia Hiama

1Melekizedeki iahi mu neke mane ginitaukelana Salemu, nia neke nona hiama God ia ta varanga sugha vona, e ghua. Ka ia ke leghuna Ebarahamu neke sipanao ka ia magara neke la paufuriro manei ira rodana mane ginitaukela taremehadi ira punugara ka maneri, Melekizedeki neke la dufui manei neke va beani ghu. 2Tetu tuna Ebarahamu ge vanani ghu Melekizedeki kaikeu ka leleghu tazo leghutau ka ira heve neke hioriro manei ka ia magara, neke ghua. Fafahakanana babaolo Melekizedeki ta ghua iahi mu, “mane ginitaukelana lotoro,” e ghua. Nia mane ginitaukelana Salemu ta ghua iahi tuna mu fafahakanana “mane ginitaukelana bule,” ge ghua ghu, e ghua. 3E deo tuturi ta auna mu ghinina hei mo nona mama nona ukena manei nia heiri mo faanara manei, e ghua. E deo haro ge avohi mu nihao neke dolina nia neke lemena manei. Manei mu taghe ia Tuuna God neke ghua ghu, e kaike hiama toghunai ghu.

4Ka fini ageina ghita mu, Melekizedeki mu kaike manefaa leghaha. Vununa, geta ghua ghu Ebarahamu ia kusu noda mama va kenuna ghita ghe, neke vanani lao manei kaikeu ka leleghu tazo leghutau, ka ira heve neke hioriro manei ka ia magara. 5Ka ia vetula Mosese mu, e kahe va gigimai ka ira Ziu, ta mala vanadira ira hiama ta au ka ia pagusu Livae kaikeu ka leleghu tazo leghutau ta kururi maneri. Hiama iranimu ghu mu edi hiori leghutau iranimu ka ira noni taghodi, geta pagusu meha ghu ka Ebarahamu maneri haroharo. 6Nga Melekizedeki mu neke hioi ka Ebarahamu kaikeu ka leleghu tazo leghutau, geta deo mo manei geke pagusuna meha ghu Livae. Melekizedeki neke va beani molamo Ebarahamu, ia neke kusu hiorio ira naiungene ka God. 7E deo ghu ge zezeana ghu mu, ia noni ta vari va beana mo ta mana fuludu laoina ia noni ta hioi ia va beana, ta ghuana.

8Ka ghidira ira hiama mu, kaikeu ka leleghu tazo leghutau edi hioi maneri ira hiama ta age leme, nga ghinina Melekizedeki neke hioio kaikeu ka leleghu tazo leghutau ka Ebarahamu mu, ia Kakangava ta Maduana ne kahei ta dolina manei. 9Ghita da boka kahei mo Livae nia ira pagusu ka manei dike vanani lao Melekizedeki kaikeu ka leleghu tazo ka ira leghutau maneri ta ghuana, ka ia fafata Ebarahamu neke vanani laono Melekizedeki kaikeu ka leleghu tazo leghutau neke hiorio manei. 10Vununa ka ia fafata ghahe laona Ebarahamu neke la dufuio ghu Melekizedeki, Livae neke deo nga ge doli ghu, nga neke au nga ka giliona ia tinina Ebarahamu ka neke pagusu mehao manei.

11Ka ia vetula Mosese mu, ira hiama mu edi pagusudi meha ma ka Livae lama, ghe hiama iranimu e deo gedi ke fata ghu ta mala va lotororira ira noni ka ira nahalina God. Ne ghua mamu ghe neke tongovona fuludu nga ka God take va mehainani kaike hiama ta haza ta leghui ia kokolona hiama taghe neke ghuao la Melekizedeki, ta deo ge leghui ghu ia kokolona hiama taghe neke ghuao Eroni. 12Vununa ka ia holarari God kokolodi hiama iranimu, ia vetula ka Mosese e toraina age holara molamo. 13Hiama ta tuturi ghini iahi ghita mu neke meha ka keha pagusuna mo, eka meha mo ka ia pagusu Livae. E deo ghu hei ka ia pagusu manei neke riva taghe kaike hiama neke ghuana ka ia sopebeana. 14Vununa to avoavohoana fuludu mu neke sipa mehana ia Lod Zisas ka ia pagusu Zuda mo, neke deo ghu Mosese ge turi hiama ghu ta mehana ka pagusu ianimu.

Kraes Mu Taghe Melekizedeki E Ghua

15E deo ge marutana ghu fininina mu ia ghaghahena mala faeteri ira hiama mu tato holarana ghatunaina, vununa kaike hiama ta haza ta leghui ia kokolona hiama taghe neke ghuao la Melekizedeki to meha. 16Eka ghua ghu ka ia ungene tatangana ta kahei, ira hiama edi toraina mala meha ka ia pagusu Livae ia ta ghua mu, neke meha hiamana Zisas. Nga ka ia manana ia doli ta deo va nonoghana. 17Vununa ne kahe ghua iahi ka ira Kakangava ta Maduana,
“Agho mu kaike hiama toghunaina
ta leghui ia kokolona hiama taghe neke ghuao la Melekizedeki.” ▼

▼7:17 Samu 110:4

18Ia sesepana ungene tatangana mu to nai hazai ghu, vununa neke paeke nia deo lighorona, e ghua. 19Vetula ianimu neke deo ge va lotoro ghita ghu ka ira nahalina God. Ghatunaina mu God ne va podolo vanada ia hangana ta veha fuludu laoi ia vetula ka Mosese, ia ta boka va ghighiu lao ghita, nia ka ia ta boka hio va namo ghita lao ka God, e ghua.

20Foforuna hangana ianimu ghu mu e toraina veha, vununa God neke va bebereana ka ia fafata vanani manei Zisas ia papala hiama. Ka ira pagusu Eroni mu, God e deo geke va bebereana ghu ka ia fafata vanadi ia papala hiama, 21nga Zisas mu neke meha kaike hiama manei ka ia va bebereana, ka neke kahe ghuao iahi God:
“Ia Lod ne va bebereana,
e deo ghu age holarina ia nganganana:
‘agho mu kaike hiama toghunaina.’ ” ▼

▼7:21 Samu 110:4

22Vununa ka va bebereana iahi, ne va hokoti ghu Zisas kaike varivehai ka God taremehada ghita. Foforuna varivehai iahi mu e veha fuludu laoi ia sesepana varivehai.

23Ira kusu hiama mu dike deo gedi boka riva toghunai ghu, vununa leme neke va nodorira, dike ghua mamu ghe dike tehi nga maneri. 24Nga Zisas mu ne doli fuludai ne toghunai ghu ia papala hiama ka manei. 25Ghatunaina nia leleghu fafata e ghua, manei e boka hio va doliri mo ira ta meha ka God ka ia babaolona manei, vununa manei e doli fuludai mala tarai fanga laona ka God mala toka ghidina.

26Zisas lamu kokolona Hiama Pauna ta boka vanadana ira ta malanga ghidi ghita. Vununa manei mu e maduana, e deo sasakena nia e deo muko ta boka va zutu ghinina, e ghua. Nia ghatunaina manei e au va ilolo ka ira ta sasake, nia God neke nai va vonai manei ka malaunao fate. 27Manei mu taghe ira keha hiama paudi ta rivai veala leleghu ravata eka ghua ghu. Maneri edi kusu rivai veala maladi ira sasakedi taghodi ghe gedi ke rivai veala maladi nga ira sasakedi ira noni. Nga Zisas mu neke veala ghini taghonai kaike fafata mo malanana ia kamotona fafata mala hio kairira ira sasakedi leghu noni nga. 28Ia vetula ka Mosese mu neke faeteri ira noni ta sasake mala meha hiama paudira. Nga ia va bebereana ka God neke mehao leghuna ia vetula mu, neke faetina ia Tuuna mala meha kaike Hiama Pauna ta toraina lotoro fuludaina.