Hebrews 9

Ia Va Totoana Ka Ia Malau Ta Maduana Ka Malau Iahi Peka

1Ia kusu varivehai mu, neke kuru ungene tatanganana mala va totoana, nia malau ta maduana mala va totoana ka malau iahi peka e ghua. 2Suga tapole ta maduana iahi mu e palu ringifotana. Ka ia kusu ringifota mu ta auna kaike mala nonohena zuta, kaike tevo nia ira kamotodi bereti ta maduana ta au ka fatena tevo ani, e ghua. Ringifota iahi mu neke va kudo ghini ia Malau ta Maduana. 3Ianimu tuna ghe ge au nga ka leghuna mo iahi kaike poko riringi leghaha ta tuta ta au ia va paluna ringifota ta va kudo ghini ia Malau ta Maduana Fuludu Lao. 4Ka ringifota ianimu neke auna mu ia sopebeana ta golu mala saliga inisenisi nia ia bokesena varivehai ta heke ta golu kamoto ia peghuruna tinina. Ta auna ka giliona bokese iahi mu kaike zagi ta golu ta au lao kaike birusuna ghano ta va kudo ghini “mana”, ia totongono ka Eroni neke sekere kuru kalanao, nia ira ghahipa tetepele neke au laoro ira kakangavadi varivehai, e ghua. 5Babakisina bokese iahi mu e malau mala kai hazari ira sasakedi ira noni. Nia ka fatena babakisi iahi mu palu nguzunguzu ta kuru laedi ta aura. Maneri palu mu kaike ghila mala va podolo kaveina God ne au ka malau ianimu, ta ghuana. Ghe ara e deo ga boka turi ghidi ghu vahina leghutau ghinina nga malau iahi ghatunaina.

6Ka ia fafata dike to age nai va lotoro ghua ghidiro iahi vahina leghutau nga, ira hiama dike haghele leleghu ravata ka ia ringifota ta au va peghuru meha mala riva ghini ta laona ghu ia nodi riva beana. 7Nga ia hiama pauna lama mu ta haghelena ka ia Malau ta Maduana Fuludu Lao kaike fafata mo ka giliona kaike komuhu. Manei e hio lao busaka mala rivai veala maladira ira sasakena taghonai nia ira sasakedi ira noni e ghua, dike riva ghidiro ka ia deo ta avohina. 8Ka ungene tatangana iahi ia Tarunga Ta Maduana neke va podolo va vehai ta deona nga ge tobehe ghu ia ghaghahena ta mala haghele lao ka Ringifota ta Maduana Fuludu Lao iahi ka ia fafata neke tetuno nga ia suga tapole ta maduana. 9Iahi mu kaike va ghilaghila ta tuhu lao ka fafata iahi ghatunaina. E va podoli ta deona ia kudoveha nia veala ge boka va kalasari ghu ira nganganadi ira noni ta va totoana. 10Vununa ungene tatangana irahi mu e ghini ma ia ghano, ketuhu nia ira keha ghaghahedi ta mala va mamalahui ia tini e ghua. Ungene tatangana iranimu ghu mu, e malana ma ghu ia tini. God neke nakai vanada ghita mala leghurira ta vuhai dufuna ghu ia fafata ta age holarari manei ka kaike ghaghahena ta foforu.

Kraes Mu Ia Veala hohoghona

11Ghe ka ia mehana Kraes ta meha kaike hiama paudi ghu manei ira leghutau ta veha tato au aiahi ghatunaina mu, manei neke la hagheli ia suga tapole ta maduana nia veha fuludu lao ta deo ge riva ghini ghu ka kamena noni, ia taka nona ghu malau iahi peka. 12Manei eka la haghele mo ka ia busakana gouti nia rekahana bulumakau, nga manei neke hagheli ia Malau ta Maduana Fuludu Lao kaike fafata mo malana ia kamotona fafata maladira leghu noni nga neke va kalasa ghita fuludai ghu ka sasake ka ia busakana.

13Sepao mu, ira busakadi gouti, bulumakau nia ia kofelena rekahana bulumakau e ghua, ta mala va kefuru ghidi laora ka ira noni ta rivai sasake take meha kalasana ghu ira tinidi maneri. 14Nga ge heve soni mu mana fuludu laona ia busakana Kraes. Ka ia mana ia Tarunga ta Maduana ta au toghunai, Kraes neke vanani lao God ia dolina taghonai taghe kaike veala ta toraina veha fuludu lao, ta ghuana. Nia ia busakana manei ge va mamalahuri ghu ira nganganada ghita mala deona ke haghava ghedana, nia nai kairi tuna ira puhi ta muko ta boka leme ghidi ghita ta ghuana, da mala riva vanani ghu ia God ta doli. 15Ne ghua mamu ghe neke hio mehai nga Kraes ia foforuna varivehai ka God taremehadira ira nona noni, mala ira noni neke kudoriro God edi boka hioi ghu ia hio kadolo ta toghunai ta hohoghona neto ke naiungene ghinio God. Vununa Kraes neke leme mala va kalasarira ka ira sasake dike riva ghidiro maneri ka ia fafata au nga maneri ka pekana ia kusu varivehai.

16Ka ia va vuvuirina varivehai mu, ia noni neke riva ghinio ia va vuvuirina varivehai e leme ghe ge boka age riva nga va vuvuirina varivehai ianimu. 17Ia va vuvuirina varivehai mu e age riva ma ka leghuna ia leme lama, vununa ka ia ta doli nga ia noni neke riva ghinio ia va vuvuirina varivehai, ira noni e deo gedi boka leghuri ghu ira neke variveha ghidiro ka ia va vuvuiri.

18Neke ghua mamu ka ia va kenuna varivehai ghe, dike hio busaka nga maneri mala va podolo kaveina neke au kaike leme, ta ghuana. 19Vununa ka ia leghuna izumuri Mosese leghu ungene va gigima nga ka ia vetula God vanadira ira leghu noni nga, manei neke hioi kaike hobona hisopu neke va piliga ghini lao ghu ka kalana sipisipi ta wulu omo’omo nia va boesi tuna ka busakadi rekahadi bulumakau nia gouti ta heni taremehana kolo, neke ghua. Ianimu tuna ghe neke va kefuru ghini lao nga ia buka vividuhuna ia vetula ka God nia ira noni haroharo, neke ghua. 20Kahe ghua tuna iahi neke ghua, “Iahi mu ia busaka neke va gigimaio ia varivehai neke ungene va gigima ghauno God ta mala leghuina ghau.” ▼

▼9:20 Kave 24:8

21Taghe iala neke ghua manei va kefuru ghini busakana ia suga tapole ta maduana nia ira vahina leghutau neke mala rivaro ka ia va totoana, e ghua. 22Toraina hohoghona fuludu, ka ia Vetula mu, to namo vahina leghutau ngama mu tato va mamalahurira ka busaka nia ira sasake ge deo ghu kai hazarira neto deo la ge va oraha ghidi busaka ghu, e ghua.

23Ne ghua mamu ghe dike toraina va mamalahui nga maneri ka busaka ia suga tapole mala va totoana, nia ira vahina leghutau nga ka ia giliona e ghua, neke totoghalediro ira leghutau ka malauo God fate. Nga ira toraina leghutau ka malauo God fate mu, dike toraina mala va mamalahuri maneri ka kaike veala ta veha fuludu laori ira veala ta riva ghidi ka malau iahi peka.

24Vununa Kraes e deo geke haghele lao ghu ka kaike Malau ta Maduana neke riva ghinio ka kamena noni ia ta totoghalena ma ia toraina Malau ta Maduana hohoghona. Manei neke haghele lao ka malauo God fate mala la podolona ka ira nahalina taghona God vanadana ghita. 25Nia manei e deo geke la haghele tehi fafata ghu ka malauo God fate, taghe ka ia ghaghahena ta la haghele taremehana busakana bulumakau leleghu komuhu ia hiama pauna ka ia Malau ta Maduana Fuludu Lao. 26Taghe ianimu geke ghua la manei, geala manei e toke mala vavahagala tehi fafatani ka ia tatanigaina va vuhaini God malau iahi peka dufu ghu ghatunaina. Ghe deo geke ghua ghu ianimu. Vununa Kraes neke podolo ma kaike fafata mo ka fafata iahi ghe neke nogha nga malau iahi peka mala hio kai sasakena ka ia veala ghini taghonai.

27Taghe ta ghua lama ghita noni ta mala leme kaike fafata mo, nia leghuna ianimu ge age fate ghita ghu God ia ta ghua. 28Kraes mu neke leme ghu kaike fafata mo malanana ia kamotona fafata taghe veala ta ghuana, mala hio kairira ira sasakedi ira leghu noni nga, nia manei eke va paluna fafata mehani, ghe e deo ke meha leme mala hio kai sasakena, nga mala meha hio va doliri ira noni ta au afa ghini manei.