Jam 3 | KjiSC | STEP | Ghau taremehaguro, eka ghau tehi ghu geala ta meha vari va kakaheina ka ia kiloau, vununa ira ta vari va kakahei ka ia kiloau mu, God e age fate va faa laorini ghatu.

James 3

Ia Lalame

1 Ghau taremehaguro, eka ghau tehi ghu geala ta meha vari va kakaheina ka ia kiloau, vununa ira ta vari va kakahei ka ia kiloau mu, God e age fate va faa laorini ghatu. 2 Ghita haroharo mu tehi va zezeani ta da riva ghidira, ghe hei ia ta banabana ka ira heve ta kaheri mu, manei e toraina kalasa ghena, e boka au leghu ghini mo ghu taghonai ka ia tinina kamoto.

3 Ghita da boka fihiki lamehai mo ia leghahai hose, ta laona ghu manei hae ta kabai va laoina ghita, ka ia kaike kipena aeana tei, ta nai laoi ghita ka ia mangana. 4 Nia ia rekahana gili tei mu e boka fihikini mo ia vaka leghaha e lao ghu manei hae ta kabai va laoina ia ta posi gili, geta heve gigima ta la mehana ka ia dafe. 5 Taghe iala e ghua molamo mu ia lalame; geta rekahana tei ghu manei ghe, e boka helahela ghidi mo vahina kokolodi va varavaranga nga.

Nia ke ngana laoi haro ia leghahai tinoka, ia ta boka age saliga kamoto mo ka kaike kakaidorona totoi tei ma, e ghua. 6 Ia lalame mu kaike helupuna totoi haroma. Manei mu e foudui muko ia ta boka ngovali ia kamotona tini. Manei e va doli ghini totoi ia kamotona doli ka ia noni, ka ia burunguna totoi taghonai gehena, ia ta la meha ka manei.

7 Ira noni mu edi boka va namahari mo vahina kokolodi va vuha nga; taghe ira pusi meusu, ira memeha, ira zote rabaka nia ira namari e ghua, 8 nga e deo hei mu ta boka va namahina ia lalame. Manei mu e muko nia e deo ge boka va leleghu lao mehai ghu e ghua; e lelemeana taghe adogho minga e ghua ghu. 9 Keha fafatara ia lalame, ghita da mala kudo vehai ia Lod ia noda Mama, nia keha fafatara gada mala tibiriri ghu ira keha noni neke va vuhariro ka ia hihilina taghonai God, e ghua. 10 Ira ngengene helahela nia tibiri e ghua edi la kave meha ma ka kaike manga mo. Ghau taremehaguro, e deo ge veha ghu mu ta ghuana iahi. 11 E deo kolo ketuhu nia kolo ta minga, ta boka kaike la kave mehana ka kaike futu mo. 12 Ghau taremehaguro, ia heke figi mu e deo boka ke fuai olivina; ia heke gerepi tuna, e deo boka ke fuai figina, e ghua. Nia e deo haroma tuna ia futu ta kuratahi, ta boka va meha kolo ketuhuna, e ghua.

Ia Avoavoho Ta Veha Sipana Fate

13 Hei ka ghau neto kurui la ngangana ta veha neto va fafahakari ghu ira puhina God, manei e va podoli ka ia dolina ta veha, ka ira nona riva ta veha ta riva ghidi manei ka ia unuhu, ta la meha ka ia ngangana ta veha. 14 Nga noto puina minga vanamu la ka kakabai nia ngana ghau ma tuna taghomu lama ka hihingomu nira, noto ghua la, oka va varavaranga ghu go kahei ghu no avoavoho taghomu ta ghuana, ba, oka sesebo ghu mala toufu kaputina ia hohoghona. 15 Kokolona avoavoho ianimu ghu mu, eka la hinae meha ghu ka malauo God fate; nga e nona malau iahi peka; eka meha ghu ka ia tarunga, nga e meha ka ira nazahi. 16 Hae ta auna ia kakabai nia ia ngana hetari taghodi, aianimu e au molamo ira vari hahala nia ira leghu kokolodi ngongovala nga.

17 Nga ira noni ta auri ia ngangana ta veha neke vari va kakahe ghinio God mu, edi toraina kalasa; kabai au tudu ka ia bule taremehadi ira keha noni; edi unuhu, ungene nonomoho, vari dudumanai nia riva va veha tudu; edika toka kaike pelo ghu ka ira noni nia edika tatangana kobiri ghu, e ghua. 18 Ira ta va bubule dito numa ghidi la ira subudi bule ka vari hoataidi ira noni, leleghonana mu maneri edi age haharui ghatu ia fuana riva ta lotoro.