Jam 5 | KjiSC | STEP | O nomoho meha, ghau ira ta taghotagho, o nakele taremehana azili akeake vununa ghidi leghu mamarutana ta mamaghuana ta la meha nga ka ghau.

James 5

Ira Ta Taghotagho Edi Balau

1 O nomoho meha, ghau ira ta taghotagho, o nakele taremehana azili akeake vununa ghidi leghu mamarutana ta mamaghuana ta la meha nga ka ghau. 2 Ira nomu taghotagho to boe nia ira nomu poko tuna gedito ghaniri ghu lasobeana, e ghua. 3 Ira nomu golu nia siliva e ghua to age nara. Nara iahi lamu ta mala age va podolina ghu no zea ghau ta ghuana, taghe totoi nia e age ghua ghu saligarira vilahimu nira. Ghe ghau no age nai teghi taghotagho ngama no au ghu ka ravata va nonoghadi irahi. 4 !Fini! Ghau noto ke sesebo to deo ghu goke tabarari ghu ira tabaradi ira ta riva ka ira nunuma ta sare. Ira tabaradi maneri to nakele age ari ka ghau. Ira nakele ka ira noni ta riva, neto ke nomohori God, ia Lod ta Torai Mana. 5 Ia doli ka ghau ka malau iahi peka mu neto ke mitirimatara nia va manemane, e ghua. Ghau to pohi va busi ghau taghomu, va tana ghinina ia ravata mala vari atungu. 6 Ghau noto fate va mukori nia atunguri e ghua ira noni ta kalasa ghedi, ta deori gigima mala kagara ghidira taghodi.

Ia Va Litona Pagahaina: Zemesi Ne Tuturi Ghini Ia Ghaghahena Ta Mala Au Ma Ta Laona Ghu Ia Va Hohoghona 5:7-20

Au Vanemoho Ma Afa Ghu Ka Giliodi Ira Vavahagala

7 Ghau taremehaguro, o au vanemoho ma o afa ghu, e vuhai ke la leghu meha ghu ia Lod. Taghe ira noni ponogara la, ta au afa ghidi ma ta au ghu zogudira ira nanare nia age ghanodira ira ghano ka ia kava, e ghua. 8 Ghau haro o toraina au vanemoho ma, o au afa ghu. Hioi hetamuna, vununa ia meha ka ia Lod mu to namo.

9 Oka vari ngunungunui ghu ghau tahiguro, mala God e deo ghu age fate ghauna. Ia manefate mu to tetu ka makatanana.

10 Ghau tahiguro, ghau o toraina mato leghuri ira au doli ka ira porofetidi sepao dike tuturi ghini kaveo ia saorona God. Maneri dike vanemoho ma dike au afa ghu, geta ghua ghu ka ia fafata talari maneri ira vavahagala. 11 Ghita da nganai ta beana ghedira heiri dike toraina tetu va gima tuduro, paufurira ira leghu mamarutana nga dike dufuriro. Ghau noto ke nomohi ia tetu va gima ka Zobu. Ka ia va nonoghana God neke age toka ghini ghu manei.

12 Ghe ghau tahighuro; ta toraina kenu fuludu laona mu, oka puina va bebereana lao ghu ka malauo God fate, ba, ka malau iahi peka, ba ka keha leghutaurani. “Uve” ba “Deo” e ghua ma ta torai mala kaheina ghau. Ianimu tuna ghe go deo nga go age au ghu ka ia pekana varifate God.

Ia Tarai Taremehana Va Hohoghona

13 ?Hei ka ghau mu ne auna ka giliona mamarutana? Manei geala e verevere. ?Hei ka ghau mu ne va manemanena? Manei geala e koze ghidi ira koze helahela.

14 ?Hei ka ghau mu ne fogarina? Manei geala e kudori ira ta babatu ka ia kiloau edi mala verevere toka ghini ghu, nia va oranga ghini oelena olivi ghu, e ghua, ka ia babaolona ia Lod. 15 Tarai ta riva ghini iahi ka ia va hohoghona, e age va vehai ghatu ia noni ta fogari ghena. Ia Lod e age va vehai, nia e age kai hazari ira sasake neke riva ghidiro manei, e ghua. 16 O kahe kaveri ghu ka vari taghomughi ira sasake ka ghau nia o vari verevere tokai e ghua, o mala age veha ghu. Ia verevere ka ia noni ta lotoro mu e toraina mana nia e toraina riva, e ghua.

17 Ilaiza mu kaike noni taghe ghita lama, ghe ka ia verevere va gigima manei mala va nodoina ia nanare, lito komuhu fotana neke deona ge nanare ghu. 18 Ghe neke verevere leghu ghu manei fanga nanarena, ia nanare neke la zoghu hinae meha ka kolanga fate, nia va kodolori tuna ira vahina ghano nga ka ia kava, neke ghua.

19 Ghau tahiguro, hei neto ghahe kave la ka ia hohoghona, ghau geala o ke va sisiva batu ghini leghu. 20 O nganai ghu iahi: noto age hio kavei la ghau ia noni ta sasake ka ira zea manei, ghau o age hio va dolini manei ka ia leme, e age kai hazari ghu God ghatu ira tehi sasake ka manei.