Joh 10 | KjiSC | STEP | Zisas neke kahe ghua iahi, “!Ara a torai va kahe ghini ghau ka ia hohoghona, hei neto pauku kalahu la ka ia barana sipisipi, deona ge haghele ghu ka ia makatana, manei mu e torai mane sisikona nia mane ngongovalana!

John 10

Ia Ungene Talevarana Ia Mane Kopunai Sipisipi Ta Veha

1 Zisas neke kahe ghua iahi, “!Ara a torai va kahe ghini ghau ka ia hohoghona, hei neto pauku kalahu la ka ia barana sipisipi, deona ge haghele ghu ka ia makatana, manei mu e torai mane sisikona nia mane ngongovalana! 2 Vununa hei ia ta kopunai sipisipi mu, e haghele ka ia makatana. 3 Ia mane ta kopui makatana e tobehe vanani ia mane ta kopunai sipisipi ia makatana, nia ira sipisipi gedi nomohi ghu ia leona gedi la meha ghu ka manei, e ghua. Manei e kudori ira nona sipisipi taghona ka ira babaolodi, ghe ge batu ghidi kave nga. 4 Leghuna hio varighara ghidi kave ira nona sipisipi taghona, manei e ghahe kenu lao ka maneri, gedi leghu laoi nga ira nona sipisipi, vununa maneri di nomoho avohi ia leona manei. 5 Maneri e deo gedi age leghui ghu ia noni haza, maneri edi age pelo kaini manei ghatu, vununa maneri e deo gedi nomoho avohi ghu ia leona manei.”

6 Zisas neke va kahe ghidi ungene talevara iahi, ghe maneri deo gedi ke avohi ghedi ghu heve fafahakanana. 7 Ke va kahe ghidini tuna neke ghua Zisas, “Ara a va kahe ghini ghau ia hohoghona, ara mu ia makatana ka ira sipisipi,” neke ghua ghidi. 8 “Heiri haro dike kusu kenu meharo ka ara mu, ira noni ta sisiko nia ngongovala, e ghua. Ghe ira sipisipi e deo gedi ke nomohori ghu maneri. 9 Uve, ara mu taghe ia makatana ta mala haghele lao ka ira sipisipi ka giliona ia bara mala la kagara ghidira a ghua, ghe gedi ke kave la hadu ghedi ghanoni nga tuna, ira ta ghua. Taghe iala molamo, ia noni ta haghele meha ka ara lama mu ta age hio va dolinina ghatu, ta age hiorira ghu ira leghutau ta veha mala toka ghinina ia dolina taghonaghi. 10 Ta meha ghinina ia ta sisiko mu, mala sikori, atunguri nia ngovalari ma ira sipisipi. Nga ara mu nato ke meha mala vanadi ia doli hohoghona ira noni, ia doli ta foudui tehi leghutau ta veha.

11 “Ara mu ia mane kopunai sipisipi ta veha. Ia mane kopunai sipisipi ta veha mu, e va malumi taghonai ta mala leme vanadina ira sipisipi. 12 Ia mane ta rivai tabara mu, e haza ka ia mane ta tagho sipisipi ta kopunai ghidi torai taghonai. Neto finini la manei ia wulufu mehanana, maneriva iahi, e pelo kairi ira sipisipi, e nai kakaikeri ghu leghu. La meha tuna ia wulufu, ge rapata va pirarari ghu, e ghua. 13 Ia mane ta rivai tabara mu, e pelo kairi ira sipisipi, vununa manei e deo ge taghori ghu sipisipi ari, e deo ghu torai tongovonana ka manei mu, ge leme la sipisipi ari, ta ghuana.

14 “Ara mu ia mane ta kopunai ghidi va veha ira sipisipi. Ara mu a avohori ira nogu sipisipi taghogu, nia maneri gedi avohoau ghu ara, e ghua, 15 taghe nogu Mama la ta avohoau ini ara, nia ara ta avohi ini nogu Mama, e ghua. Ara mu na ohoꞌoho ghu ta leme vanadina ira nogu sipisipi. 16 E au nga molamo keha sipisipira ka ara ta deora nga gedi au ghu ka giliona barana sipisipi ini. Ara a toraina hio hagheleri haro ghu molamo maneri. Maneri edi age nomohi ghatu leogu ini ara. Leghu sipisipi irahi nga ka ara mu edi age kaike totopa ma, nia ara lama tuna mane ta mala age kopu ghidira maneri haroharo ghatu, e ghua. ^{▼▼10:16 Aiahi mu Zisas ne turi ghidi ira noni taka Ziu ghu. Leghunana ka ia age va hohoghona ka manei, maneri haro edi age holara ka ia nona totopa sipisipi.}

17 “Ia Mama e namaha ghinagu ara, vununa ara na va malumuau taghogu ta mala lemena, a mala boka ke hio leghui ghu ia doligu. 18 E deo hei ta boka hio kai taguna doli ini ka ara nato deo la ara ga va malumi ghu, ghe ghatunaina mu ara na lao hihingogu mo ta mala lemena. Ara mu e kuruau ia mana mala va malumu laoina ia doligu ka ia leme, nia mala ke doli leghuna e ghua, vununa ianimu lamu neke ungene va gigimaina nogu Mama ta mala riva ghinina ara.”

19 Di nomohori ghu maneri leghutau neke kaheri irahi Zisas, ira noni dike age fotani ka ira nganganadi ghinina manei. 20 Tehini ka maneri dike kahe ghua iahi, “Mane iahi mu ne sukui nazahi, neto age gogosu ghu. ?Heve ghe no kabai nonomoho nga ka manei?” dike ghua.

21 Ghe kehara dike kahe ghua iahi, “!Mane ta sukui nazahina mu, e deo ge boka ngengene ghua ghu iahi! ?Heve e ghua ia nazahi ghe, ge boka va vovoho fifinini nga ia noni ta kivi?”

Maneri Di Huhai Ka Ia Mahai Varighara Nganaleghudi Ira Zuta Ani Zerusalemu 10:22-42

Zisas Di Sokei

22 Ka ia fafatana rabongi, Zisas neke au aianihi Zerusalemu ka ia mahai varighara nganaleghuna ia fafata dike tobehio maneri ia Sugana God. ^{▼▼10:22 Iahi mu e va kudo ghini, “Hanuka”.} 23 Zisas neke ghaghahe ka ia koloina ta va kudo ghini Memehana Suga Ka Solomone, ka ia giliona Sugana God, 24 dike la varighara lilohi ghu ira noni. Ira ta babatu ka ira noni Ziu dike tetu lilohi Zisas ghe dike notohi nga, “?Taghe niha fafata ta va tubi ghai ma ta auna ghu agho? Va kahe ghini ghai lotoro meha ma, neto agho la mamu Mesaea na.”

25 Ungene tughuri tuna neke ghua Zisas, “Ara nato ke va kahe ghini ghau, ghe ghau e deo ma go va hohoghonau ghu ara. Ira riva nake riva ghidiro ara ka ia babaolona nogu Mama lamu, ne va podolina hei mu ara na. 26 Ghe ghau e deo go va hohoghonau ghu ara, vununa ghau mu eka nogu sipisipi ghu ara. 27 Ira nogu sipisipi ara mu, edi nomoho avohi leogu ini ara. Ara a avohori maneri, nia maneri gedi leghuau ghu ara, e ghua. 28 Ara a vanadi ia doli soduai, e toraina deo ghu boka age lemedira. E deo ghu hei ta boka hio kaverina ka ara. 29 Vununa nogu Mama neto ke vanagu ara maneri, e varanga fuluduri ghu manei vahina va vuha nga, e deo ghu hei ta boka hio kaverira ka ira kamena nogu Mama. 30 Ia Mama nia ara e ghua mu kaike mo.”

31 Ira ta babatu ka ira Ziu, dike sene vona ghahipani mala va fera ghini laona Zisas ta mala atungina ghu. 32 Ghe Zisas neke kahe ghua iahi, “Ka ia nona babatu nogu Mama nato ke riva ghidi ghu ara tehina leghutauni, ta mala toka ghidira ira noni. Hae mo ka riva ta veha irahi mu no kabai atunguauna ara ghau?”

33 Ke ungene tughui tuna dike ghua, “Ghai e deo ga va fera ghinigho ghahipa ghu agho ka ira riva ta veha ta riva ghidi agho, nga ka ia ngengene va mukoi agho God mo, vununa agho mu noni ma, ghe taghou mu God no ghua agho.”

34 Zisas neke ungene tughuri, “Ne kangava hinaeri mo ka ira Kakangava Ta Maduana ghau mu, neke kahe ghuana iahi sepaoni God ka keha mane varifatera, ‘!Ghau mu ira god!’ ia ta ghua. ^{▼▼10:34 Samu 82:6} 35 Ghita da avohori mo ira vahina leghutau ta kaheri nga ka ira Kakangava Ta Maduana ta hohoghodira leleghu fafata. Ira god, ne ghua ghidi ghu God mu ira noni neke va kahe ghidio manei ia nona nonomoho. 36 ?Heve ghu ghe no lausasaba ghini God no ghua ghinagu nga ghau ka ia fafata kahei ara ta Tuunana God ara? God lamu neke faeteauna ara neke tuhu mehauna ghu ka malau iahi peka. 37 Oka va hohoghonau la ghu, nato deo la ara ga riva ghidi ghu ira leghutau ta kabai ghinagu nogu Mama riva ghidira ara. 38 Geta deo ghu va hohoghonauna ghau ghe, o va hohoghonari ma heve ta riva ghidi ari ara, nato riva ghidi la ara ira nona riva nogu Mama. Ianimu tuna ghe go age toraina avohi nga ia Mama ta auna ka ara, nia ta auna ara ka ia Mama, e ghua.”

39 Maneri dike va sisiva sakomini Zisas, ghe manei neke ghahe kairi ghena.

40 Ianimu tuna ghe neke kadolo lao nga ka keha pelona Ketuhu ani Zodani, neke la au ghu ka gheremena ia malau neke kusu rivai seselebeanao Zone. 41 Tehi nonini dike la mehara ka manei dike kahe ghua ghu iahi, “Zone mu, deo ma geke rivai hahaima va ghilaghila ghu, ghe ira leghu neke kaheriro nga manei ghinina Zisas mu di hohoghodi,” dike ghua. 42 Tehi nonini ka malau ianimu dike va hohoghonara ka Zisas.