Joh 11 | KjiSC | STEP | Kaike mane babaolonana Lazarusi neke fogari. Manei neke au taremehadi Mere ghe Mata ira tahina ghase taghonai, ka ia rekahana malau Betani.

John 11

Maneri Di Huhai Ani Betani 11:1–12:11

Ia Leme Ka Lazarusi

1 Kaike mane babaolonana Lazarusi neke fogari. Manei neke au taremehadi Mere ghe Mata ira tahina ghase taghonai, ka ia rekahana malau Betani. 2 Iahi lamu ia Mere neke va oranga ghini sedi ta vona tabaranao ia ghahena ia Lod leghunana, nia ke guranga va karangori tuna ka ira kalana taghonai neke ghuao. Lazarusi mu ia tahina mane manei neke fogario. 3 Va ghahe lao nonomoho tuna ka Zisas dike ghua palu tatahina fotati irahi, “Lod, ia noni ta namaha ghini fuludu agho ne fogari ghena,” dike ghua lao.

4 Ghe ne nomohi ghu Zisas turi iahi, neke kahe ghua iahi, “Fogara iahi ka manei mu e deo ge age va nonoghana ghu ka leme. Neke dufu nga fogara iahi mu, mala va podolona ia varanga ka God, ia ta vanagu varanga ara, ia Tuuna God.” 5 Zisas neke namaha ghidi ira lito tatahina Mata ghe Mere nia Lazarusi e ghua. 6 Ianimu la ghe, neke au laoni nga manei keha palu ravatani ka neke au ani. ^{▼▼11:6 Zisas neke au soduai laona aianimu mala e lemena nga Lazarusi. Vununa manei neke namaha ghidi maneri lito tatahina, neke kabai ghidi ghu Zisas maneri ta finina taghonai va tetuleghuina Lazarusi ka ia leme, mala maneri edi age va hohoghonai ghu neke tuhu mehaina God manei.} 7 Leghuna ianimu ghe neke kahe ghua nga iahi Zisas ka ira nona mane ta nonofoi, “Aria dake leghu age ghu ka ia Babarana Zudia.”

8 “?Mane Vari Va Kakahei Agho,” dike ghua ghini, “nihaoba tei lama mu, ira noni aianimu dike kabai va fera ghinigho ghahiparo agho, ghe take kabai leghu lao ini nga tuna agho?” dike ghua ghini.

9 – 10 Ghe Zisas neke ungene tughuri ira ngengene ka maneri ka ia ungene talevara, kahe ghuana iahi, “O ngana laoina ia ravata nia ia redu. Ka ia leghui ara ia lao nanafa ka nogu Mama, ara mu taghe kaike mane ta ghahe lao meha ka ia ravata, ia ta deo ge riufu. Nga ia mane ta deo ge kurui fegala ghu ka God mu, taghe kaike mane ta ghahe lao meha ka ia redu, ia ta riufu, e ghua.” 11 Va kahe ghidi tuna neke ghua Zisas, “Ia mane baere ka ghita Lazarusi mu neke epu ghena ma, ghe ghatunaina ara a lao, a ke la va baghuni ghu,” neke ghua ghidi.

12 Ira mane ta nonofoi dike kahe ghua iahi, “!Lod, neto epu la manei, fafahakana mu, manei e ke toraina age veha ghena mo ghatu!” 13 Torai fafahakanana ka Zisas mu, Lazarusi mu neto ke toraina leme ghena, ghe ka ia nganganadi maneri mu Lazarusi neke suna epu ghena ma, neke ghua Zisas, dike ghua.

14 Ianimu tuna ghe neke kahe ghidi va lotoro lao nga Zisas, “Lazarusi mu to leme ghena, 15 ghe ara na va manemane ghini deona gake au ghu aianimu ka ia fafata lemena manei, vununa heve ta age fininina ghau ghatu mu, e age toka ghini ghau ghatu ta va hohoghonana ka ara. Aria da age dorini ghu manei.”

16 Tomasi, ia dike va baolo ghini Sua no maneri, neke kahe ghua iahi ka ira keha taremehana mane nonofoi, “Ghita da age haro molamo, da age leme taremehana ghu Zisas,” neke ghua.

Zisas Ia Ghasolona Ia Doli Soduai

17 Ne la dufu ghu Zisas aianihi Betani, manei neke age hadu kavei dike to hoatai nainina maneri Lazarusi rodana ravata ka ia lianga beku. 18 Betani mu e deo ge dufui ghu lito kilomita sipana aianihi Zerusalemu, 19 tehi noni Ziuni dike laora ghu aianimu mala la holara au muko hihingo taremehadira Mata ghe Mere ghinina ia tahidi mane Lazarusi neke leme ghenao.

20 Ne nomohi ghu Mata neke la meha Zisas ta ghuana, manei neke lao neke la dufui ghu, nga Mere mu neke au mo ka sugao. 21 “Lod, goke au la agho aiahi, geala tahigu mane ini e deo geke leme ghena ghu,” neke ghua Mata ka Zisas. 22 “Ghe ara na avohi mo, geta ghua ghu ghatunaina ghe, God e age vananigho mo ghatu heve tei ta fangaina agho.”

23 Va kahe ghini tuna Mata neke ghua Zisas, “Tahiu mane nia, e ke age tetu leghu mo ghatu,” neke ghua ghini.

24 “Ara na avohi mo ta age tetu leghuna manei ka ia ravata va nonoghana,” neke ghua Mata.

25 Va kahe ghini lao tuna neke ghua Zisas, “Ara lamu ia tetuleghu nia ia doli. Heiri ira ta va hohoghona ka ara edi age doli, geta leme ghu maneri. 26 Nia hei ia ta va hohoghona ka ara mu, e age aui doli soduai, toraina deona gedi age leme ghu ghatu. ?No va hohoghonai mo agho iahi Mata?” neke ghua Zisas.

27 “Uve Lod,” neke ghua ungene tughuna Mata. “Ara na va hohoghonai mo agho lamu ia Mesaea ia Tuuna God, neke mala mehao ka malau iahi peka, ta ghuana.”

28 Leghuna kahei manei iahi, manei neke leghu lao neke la kudo nenemai ghu Mere ia tahina fotati taghonai. “Ia Mane Vari Va Kakahei to au iahi, manei ne notohigho agho,” neke la ghua ghini. 29 Nomohi ne ghua ghu iahi Mere, magali ma neto la dufui ghu manei.

30 Ka fafata iahi Zisas neke deo nga geke la dufu ghu ka rekahana malau ani, nga neke au ngama peghuru ka ia malau neke la dufuio manei Mata. 31 Ira noni dike auro ka ia suga va sisiva kakapotina Mere, di finini ghu manei kufara tetu ta ghahena ghu, manei neke lao bana nga ka ia bekuna Lazarusi ne la nakele ghu dike ghua, dike leghu laoi ghu aianimu.

32 Ka ia la dufuna Mere ta la finini ghu Zisas, manei neke la torongaghituturu hinae ka ira ghahena Zisas kahe ghuana iahi, “Lod, goke au la agho aiahi, geala tahigu mane ini e deo geke leme ghu,” neke ghua ghini.

33 Ne finini ghu Zisas ta nakelena manei, nia ta nakele muko hihingodi taremehana harora manei ira keha noni e ghua, Zisas neke toraina age muko hihingona nia zea vanani e ghua, 34 neke notoho ghu, “?Hae mo noke la nakainina ghau manei?” neke ghua ghidi.

“Lod, meha o fini ghu,” dike ghua ghini.

35 Ka fafata iahi Zisas neke nakele.

36 Ira noni dike tetu namoio dike kahe ghua iahi, “Fini, manei mu neke puina namaha ghini fuludu Lazarusi,” dike ghua.

37 Ghe kehara ka maneri dike kahe ghua iahi, “Mane iahi mu neke va vehaio mo ia mane ta kivi. ?Heve e ghua manei ghe, ge deo nga posi va dolini ta auna ghu Lazarusi ka leme?” dike ghua.

Zisas Ne Va Tetu Leghui Lazarusi Ka Ia Leme

38 Ka ia la dufuna ka ia lianga bekuna Lazarusi, Zisas neke puina age muko hihingonani. Lianga beku iahi mu, dike va pidu kaputu ghini lao kaike leghahai ghahipa ia makatanana. 39 “Va pidu laoi ghereme mo ghahipa nia,” neke ghua ghidi Zisas.

Ghe Mata, ia tahina ghase mane ta leme ini neke kaheina, “Lod, ghatunaina mu, manei eto puina age hurangi mumukona, vununa to rodana ravata taniga ia lemena,” neke ghua ghini.

40 Kahe ghua tuna iahi neke ghua Zisas, “?E deo gake va kahe ghinigho ghu ara mu, noto va hohoghona la agho, o age finini ghatu ia varanga ka God, ta ghuana?” 41 Va pidu laoi tuna ghereme mo ia ghahipa dike ghua. Ianimu tuna ghe neke mato vona nga Zisas ka kolanga fate tarai ghuana iahi, “Mama, ara na kudo vehaigho ta nomohoau ini agho. 42 Ara na avohi mo ta nomohoau tuduna agho, ghe ara a kahei iahi, malana ia veha ka noni ta tetu irahi, edi age va hohoghonai ghu maneri noke tuhu mehauna ara agho.” 43 Leghuna kahe ghuana ianimu, manei neke kudo va fafaa vona, “!Lazarusi, o kave meha!” 44 La kave meha tuna neke ghua Lazarusi, pipiha ngama ira kamena ghahena ka ira kodakadi poko giugilu, nia ia hihilina ge pipiha liloho ghu ka kaike poko neke ghua. Va kahe ghidi tuna neke ghua Zisas, “!Hio kai tana pipihana nira va ghahei ghu!” neke ghua ghidi.

Ia Vatovato Mala Atungi Zisas

45 Tehini ka ira noni dike to meharo mala va kakapotina Mere, dike va hohoghona ka Zisas ka ia fata finiri maneri heve neke riva ghidiro Zisas. 46 Ghe kehara ka maneri dike lao ka ira Farisi dike la va kahe ghidi ghu heve neke to riva ghidiro Zisas. 47 Ianimu tuna ghe dike kudoi nga kaike haedu ira hiama ta kenu nia ira Farisi e ghua taremehadina ia Nonohe Faghina Kamoto ka ira Ziu kahe ghuadina iahi, “?Heve mo ta age riva ghinina ghita? To puina tehi hahaima va ghilaghila neto riva ghidira mane iahi. 48 Dato va leleghu ghini la ghita, leghu noni nga edi age va hohoghona ka manei ghatu, nia meha tuna ia punugarana Romu gedi age huara tada ghu noda Sugana iahi God nia noda butubutu noni Ziu ini, e ghua,” dike ghua.

49 Ghe kaike ghu ka maneri, Kaefasi ia ta ghua ghini, neke hiama paunao ka fafata ianimu, neke kahe ghua iahi, “Ghau e deo ma heve leghutau no avohina. 50 ?E deo go ngana avohi ghu ghau mu, ia ta leme vanadi ira leghu noni nga kaike mane mo mu, e veha fuludu laoi ta va mukoina ia kamotona butubutu, ta ghuana?”

51 Kaefasi e deo geke kahei ghu iahi ka ia ngangana taghonai, nga ka ia papala hiama pauna manei ka fafata ianimu, neke va podoli ghu God ka manei ta mala leme vanadira Zisas ira noni Ziu. 52 Ia leme ka Zisas mu, neke kusu kahe kenui ta deona ge maladi ghu ira Ziu lama, nga mala ke hio varighara va kaikeri haro ira leghu nona rekaha nga God dike riraha lao meharo ka malau iahi peka.

53 Ka ravata ianimu ta vai vona ghu, ira ta babatu ka ira Ziu dike to tatanigai vato ghini mala va lemeina Zisas. 54 Leleghonana ianimu, Zisas neke age nodo rizu lao mehana ka ira malau ta boka finini manei ira manefaa ka ira Ziu ka ia Babarana Zudia. Nga manei neke ghahe kaini Zerusalemu neke ghahe poika lao ghu ka kaike malau ka gheremena ia malau koroghana ta karango, ka ia rekahana malau ta va kudo ghini Ifiriamu, neke la au taremehadi ghu ira nona mane ta nonofoi aianimu.

55 Ka fafata iahi, ia Mahai Varighara Nganaleghuna Ia Ghahe Fuludu to ke namo dufu, to kusu ke sabara ghu Zerusalemu tehi nonidi ka ira tehi malau teri ka ia kamotona soloso mala la va kalasarira taghodighi ka ia Sugana God, ghe ge la dufu meha nga ia Mahai Varighara Nganaleghuna Ghahe Fuludu ianimu. 56 Ira noni dike hadui Zisas, dike tetu vari nonotoho ghu ka ia galahena ka giliona ia Sugana God kahe ghuadira iahi, “?Heve no ghua nganganamuna ghau? ?Manei e toraina deo mamu ge la meha ghu ghatu ka Nganaleghuna Ghahe Fuludu iahi, ba heve?” dike ghua. 57 Ka fafata iahi ira hiama ta kenu nia ira Farisi e ghua dike kahe kavei ka ira noni, ta magali kaheina maneri hae mo ne auna Zisas dito finini la, edi boka sakomi ghu, dike ghua.