Joh 12 | KjiSC | STEP | Onomo ravata ghe neke tataniga nga ia riva Nganaleghuna ia Ghahe Fuludu, Zisas neke sabara Betani ka ia malauna Lazarusi, ia mane neke va tetu leghuino manei ka ia leme.

John 12

Mere Ne Oranga Ghini Sedi Zisas Ani Betani

Matiu 26:6-12; Maki 14:3-9

1 Onomo ravata ghe neke tataniga nga ia riva Nganaleghuna ia Ghahe Fuludu, Zisas neke sabara Betani ka ia malauna Lazarusi, ia mane neke va tetu leghuino manei ka ia leme. 2 Nia ka rekahana malau ianimu, maneri dike va tanai kaike mahai va vonavona malana Zisas. Mata mu kaike ghu ka ira noni neke tokano tufarira ira mahai, nia Lazarusi tuna geke mahai taremehana ghu Zisas ka tevo ani, neke ghua. 3 Hioi tuna Mere kaike fotana lita sedi ta toraina vona tabarana ta riva ghini ka heke nadi kakato, ge va oranga ghini lao ghu ka ira ghahena Zisas neke ghua. Ianimu tuna ghe neke guranga va karangori nga ka ira kalana taghonai, neke ghua. Ia giliona suga kamoto neke toraina age kugumu ka ia longarana sedi.

4 Zudasi Isikarioti, kaike ghu ka ira nona mane ta nonofoi, neke mala age namaha seboio Zisas leghunana, neke kahe ghua iahi, 5 “?Ne heve ghe neka tatabara ghini nga sedi iahi ka tabarana kaike mane ka kaike komuhu, ge vanadi ghu ia rongona ira noni ta kuma,” neke ghua. 6 Neke puina ngana hetari ira noni ta kuma, ghe neke kahe ghua nga iahi eka ghua ghu mu manei, nga manei mu kaike mane ta sisiko. Manei lamu neke kopu ghinina ia baiki rongo ka maneri, e fani hiori ghu manei keha rongora ka baiki iahi mala tatabara nonana taghonai.

7 Zisas neke ungene tughui ghu, “Naini fotati nia e leleghui ghu taghonai. Manei neke sutei neke dufu ghu ghatunaina sedi iahi mala va tanaina tinigu ini malana ia giugilugu ara,” neke ghua ghini. 8 “Ira ta malanga mu, edi age au tamu tudu ma au ghu ghau. Nga ara mu e deo ga age au tamu tudu ghu ghau ghatu.”

9 Ira tehi noni di nomohi ghu neke to sabarana Zisas ani Betani, maneri dike varighara lao mala fininina manei nia Lazarusi haro e ghua, ia mane neke va doli leghuio Zisas ka ia leme. 10 Vato ghini tuna dike ghua ira hiama ta kenu mala atungina Lazarusi, 11 vununa ia doli leghu ka manei neke to age fihikiri ira noni ta va hohoghonana ka Zisas.

Maneri Di Huhai Ani Zerusalemu 12:12-50

Zisas Ne Haghele Taghe Kaike Mane Ginitaukela Giliona Zerusalemu

Matiu 21:1-11; Maki 11:1-11; Luku 19:29-40

12 Ka ia keha ravata, ia leghahai varigharana noni dike to la meharo ka ia Nganaleghuna Ghahe Fuludu, dike nomohi ghahe vai laona Zisas aianihi Zerusalemu. 13 Hio balatadi taghe balatadi tubo ghua tuna gedi kave lao ghu mala la dufuina manei dike ghua daghoro ghuadira iahi,
“!Helahela ghini God!
!God, o va beani manei ia ta meha ka ia babaolona ia Lod! ^{▼▼12:13 Samu 118:25,26}
God, o va beani ia Mane Ginitaukelana Isiraeli,” dike ghua daghorodira.

14 Zisas neke hioi kaike rekahana dongiki neke haghei ghu. Iahi mu neke va ghuduvi ia ta kahe ghua iahi ka ira Kakangava Ta Maduana,
15 “Oka maughemu ghu ghau ira noni mu Isiraeli.
Fini, ta meha iahi ia nomu mane ginitaukela.
Manei ne haghe ka ia fatena rekahana dongiki.” ^{▼▼12:15 Zakaraea 9:9}

16 Ka ia tatanigaina mu, ira nona mane ta nonofoi deo gedi ke va fafahaki ghu iahi. Nga ka ia fafata ke tetu leghuna Zisas take leghu lao ghu manei ka malauo God fate, ghe dike age ngana avohori nga tuna mu leghutau ta dufu irahi ka manei mu, va ghorevuradi ira neke kusu kahe kenuio ka ira Kakangava Ta Maduana, ta ghuana.

17 Ira noni dike to au taremehanaro Zisas ka ia fafata kudo kavei manei Lazarusi ka ia beku take va doli leghui ghu ka ia leme, dike turi vanadi ira keha noni ghinina iahi. 18 Tehi noni dike kave lao mala la dufuina Zisas, vununa maneri dike to nomohi neke riva ghinina manei leghahai hahaima va ghilaghila iahi. 19 Ira mane Farisi dike kahe ghua ghu iahi ka vari taghodighi, “Ghita e deo heve tato boka riva ghinina. Mato ba ghau, malau kamoto iahi peka dito leghui manei!” dike ghua.

Zisas Ne Kusu Kahe Kenui Ia Leme Ka Taghonai

20 Keha nonidi Giriki dike meha molamo Zerusalemu mala la va totoanana ka ia nganaleghuna Ghahe Fuludu. 21 Maneri dike la finini Filipi ia tanina Betiseida ka ia Babarana Galili, dike la kahe ghua ghu iahi, “Faghina agho, ghai na kabai meha finini Zisas,” dike la ghua ghini. 22 Filipi neke la va kahe ghini Aduru nonomoho iahi, dike lao ghu maneri palu ghu la va kahe ghinina Zisas.

23 Ungene tughuri tuna neke ghua Zisas, “To meha ia fafata ta mala hioina ia nogu varanga ara ia Tuuna Noni. 24 A va kahe ghini ghau ghu ara ia hohoghona, ia subuna witi mu e toraina numa ghini hinae ka ia kava e boe va nogha ghu ia penuna manei, ghe ge boka age kodolo vona nga ge tehi subuna ghu—taghe kaike haharui va tehi ka ira dolidi foforu ira noni. Nga neto deo la manei ge numa ghini ghu, subuna ianimu e age kaikena ma e au ghu. 25 Hei ia ta namaha ghini fuludu ia dolina taghonai mu, e age siana ghini ghatu. Nga hei ia ta namaha ghinagu ara fuludu laoina ia ta namaha ghini ia dolina taghonai ka malau iahi peka mu, e age vanani ia doli soduai. 26 Heiri haroharo ira ta kabai riva vanagu ara mu, edi toraina meha leghuau ara, vununa ira nogu noniriva ara mu, edi toraina au hae ta auna ara. Nogu Mama, e va vonavonai hei ia ta riva vanagu ara.

27 “Ghatunaina mu ara na toraina zea vanagu hihingogu ini. ?Heve ghu mu geala ta tarai fangaina ara ka God? ‘?Mama oka va malumuau ghu ta vavahagalana,’ a ghua? Ghe ara e deo ga age riva ghini ghu ianimu, vununa ara nake meha mala vavahagala. 28 Mama, o va podolo vanadi ira noni haroharo ta toraina varanga sughavonana agho.”

Ianimu tuna ghe neke la ngengene meha nga kaike leo ka malauo God fate kahe ghuana iahi, “Ara nato ke va podoli ta varanga sughavonana ara, nia ara ake age riva ghinini ianimu ghatu, e ghua.” 29 Ia varigharana noni di nomohi ghu leo ianimu, kehara mu saduru dike ghua ghini, nia kehara tuna gedi kahei ghu kaike engizeli ne ngengene lao ka manei gedi ghua ghu, dike ghua.

30 Ianimu tuna ghe neke va kahe vanadi nga Zisas “Leo ianimu ghu mu neke malana ia veha ka ghau, nga eka malagu ghu ara. 31 Ia fafata mala fatei malau iahi peka mu neto ke meha, e age kai kavei ghu tuna ghatu Satana, ta tetu ginitauna ka malau iahi peka. 32 Ka ia fafata hure vonau maneri ka fatena kava ini, ara a hio varighara ghidi meha ka taghogu ghatu ira leghu noni nga.” 33 Zisas neke kaheri irahi mala va podolina ia ta age leme taghonai ghatu ka ia hekefalahata.

34 Ia varigharana noni dike notoho ghua iahi, “Ghai nato ke nomohi ka ia Vetula God ta age doli toghunaina ia Mesaea. ?Heve ghu ghe go boka kahei nga agho mu ia Tuuna Noni mu e toraina age hure vonai ka kaike hekefalahata, no ghua nga? ?Hei mo mu Tuuna Noni ta turi ghini iahi agho?”

35 Zisas neke ungene tughuri, “Ia fegala mu e age au tamu ma birusuna fafata tei ghau. O ghaghahe ghu ghau malai auna nga fegala iahi, ghatu e age paufu ghau ia nagoromo. Noto ghaghahe la ghau ka ia nagoromo, ghau e deo go age avohi ghu hae mo no laona. 36 O va hohoghonai ghu fegala iahi, ka malai auna nga manei, e ghua ghe go meha nona rekaha nga ghau ia fegala.” Leghuna kaheri turi irahi Zisas, manei neke ghahe kairi neke poikai ghu taghonai ka maneri.

37 Ne ghua mo rivai ghidira manei leghu hahaima va ghilaghila irahi nga ghe, tehidira ka ira noni deo ma gedi ke va hohoghona ghu ka manei. 38 Iahi mu neke va ghuduvi ghu neke kahe ghuao iahi ia porofeti Aesaea:
“Lod e deo ge tehi ghu noni dike va hohoghonaina nonomoho iahi ka ghai.
Nia e deo ge tehi ghu di fini avohina ia nou mana noto ke va podolio.” ^{▼▼12:38 Aesaea 53:1}

39 Ira noni dike deo ghu boka va hohoghonana ka Zisas, taghe neke kahei harono la Aesaea,
40 “Ia Lod neto ke va kiviri ira hibadi
nia neke va kaputuri ira nganganadi e ghua,
to deo ghu boka fifinidira ira hibadi,
nia ira hihingodi to deo gedi boka va fafahaka ghu,
nia to deo gedi boka fihiki meha ghu ka ara e ghua,
mala hio va dolirira ara.” ^{▼▼12:40 Aesaea 6:10}

41 Aesaea neke kahei iahi vununa manei neke finini ia varanga ka Zisas neke tuturi ghini ghu. 42 Neke ghua mo ianimu ghe, tehi nonini taremehadi kehara ka ira noni babatu ira Ziu dike va hohoghonai mo manei. Ghe maneri deo gedi ke turi ghini kave ghu, vununa maneri dike maughedi ta age nai kaverira ira Farisi ka ia suga mala varighara ira Ziu. 43 Dike ghua nga ianimu maughedira mu, vununa maneri dike puina hagala ghini fuludu ia helahela ta meha ka ira noni, fuludu laoina ia helahela ka God.

44 Ianimu tuna ghe neke kudo vona nga Zisas, “Hei neto va hohoghona la ka ara, manei mu e deo ge va hohoghona ghu ka ara lama, nga ne toraina va hohoghonai God ia neke tuhu mehauno ara. 45 Vununa hei ia ta finiau ara mu, manei ne fini haroma God neke tuhu mehauno ara. 46 Ara mu nato ke meha ka malau iahi peka taghe kaike fegala ta ghuana, mala heiri haroharo ira ta va hohoghona ka ara mu, geala edika au tudu la ghu ka ia nagoromo. 47 Heiri ira ta nonomoho, ghe deo tuna gedi leghuau ghu ara ira ta ghua mu, eka ghua ghu ara ta faterira. Vununa ara mu, e deo gake meha mala fatei ghu malau iahi peka, nga nake meha mala hio va dolini mo. 48 Heiri ira ta sokeau ara ta deo ghu gedi hioi ghu nogu nonomoho ini mu, e au mo kaike ghu ta mala age faterira ghatu. Ira ngengene nato ke kaheriro ara mu ta age faterira ghatu maneri ka ia va nonoghana ravata. 49 Ara mu deo ga ngengene ghu ka ia mana mala kopu taghogughi. Ia Mama neke tuhu mehauno ara neke toraina ungene va gigimauna heve ta torai mala kaheina nia ta mala ngengene ghinina, e ghua. 50 Ta avohina ghu ara mu, ia doli soduai mu e la meha ka ungene va gigima ta vanagu ini manei. Ne ghua mamu ghe na kaheri nga ara ira leghutau ta va kahe ghinagu lama ia Mama ta mala turi ghidira ara.”