John 13

Va Rodanana Pagahaina: Ia Tuunamane God Ne Va Tanari Ira Nona Mane Ta Nonofoi 13:1–17:26

Zisas Ne Va Tanari Maneri Ka Ia Giliona Ringifota Fate 13:1–14:31

Zisas Ne Tihiri Ira Ghahedi Ira Nona Mane Ta Nonofoi

1Ponoena fafata tei ma ghe neke dufu nga ia nganaleghuna ia Ghahe Fuludu, Zisas neke avohi neke to dufuna ia fafata ka manei mala ke ghahe kainina malau iahi peka ta ke leghu laona ghu ka nona Mama. Manei neke toraina namaha ghidi ira dike ghahe leghuio taghonai ka malau iahi peka, namaha ghidi tuduna ma neke dufu ghu ka ia lemena taghonai. ▼

▼13:1 Ba “ghatunaina manei neke toraina namaha ghidi va hokoto,”

2Ghe dike mahai va sasaighona nga Zisas nia ira nona mane ta nonofoi e ghua, ia Faghinadi ira nazahi neke to kusu va ohiohini Zudasi ia tuunamane Saemoni Isikarioti, ta mala age namaha seboina Zisas. 3Zisas neke avohi ia Mama neke to vananina ia mana mala kopu ghidira vahina leghutau nga, nia manei neke avohi haro molamo neke to sipa mehana ka God taghonai, nia take mala leghu laona manei ka God, e ghua. 4Ka va fafahaka ianimu ghe neke tetu vona nga ka tevo ani manei neke hio kaini ghu ia nona poko sodu mala va pepeghuru, ghe neke lighoto laoi nga kaike taolo ka ia sorona. 5Ianimu tuna ghe, neke oranga lao kolo nga ka kaike beseni, neke tatanigai tihiri ghu ira ghahedi ira mane ta nonofoi, nia ke guranga va karangori tuna ka ia taolo neke lighoto ghini lilohono ka taghonai neke ghua.

6Ne meha dufu ghu manei ka Saemoni Pita, Pita ne kahe ghua iahi, “?Lod, agho o age tihiri mo tabaladi ghahegu idi ara?” neke ghua ghini.

7Zisas neke ungene tughui, “Agho e deo go va fafahaki ghu ghatunaina heve na riva ghinina ara, ghe ghatu o age va fafahaki mo agho,” neke ghua ghini.

8“E deo,” neke ghua Pita, “!Agho toraina deo kalasu kai go age tihiri ghu tabaladi ghahegu idi ara!”

Zisas neke ungene tughui, “Nato deo la ara ga tihiri ghu tabaladi ghaheu nira, agho mu eka nogu ghu ara,” neke ghua Zisas.

9Ke kahe ghua tuna iahi neke ghua Pita, “Lod, neto ghua la, oka tihiri ghu ma tabaladi ghahegu idi lama, nga o tihiri haroma kamegu idi nia paugu ini, e ghua!”

10Zisas neke ungene tughui, “Ia noni neto ke sesele la, manei mu to mamalahu kamoto, eka mala ke sesele la ghu, nga ira tabaladi ghahena lama ta toraina mala tihi va mamalahurira. Ghau mu to mamalahu ghemu, ghe eka ghua ghu ghau haroharo aiahi.” 11Zisas neke avohi hei mo ka maneri neke mala age namaha seboina taghonai. Ianimu lamu ghe neke kahei nga manei mu, “Eka ghua ghu ghau haroharo mu ta mamalahuna,” neke ghua nga.

12Ka leghuna neke to noghao tihirira manei ira tabaladi ghahedi, manei neke va vona leghui ia nona poko sodu mala va pepeghuru, ghe neke leghu lao nga ka ia malauna ka tevo ani. “?No va fafahaki mo ghau mu heve nato ke bake riva ghini va hokotono vanamuno mo ara? 13Ghau mu no va kudo ghinagu ‘Mane Vari Va Kakahei’ nia ‘Lod,’ e ghua, ne hohoghomu ghu mamu, vununa ianimu lamu ara na. 14Ara, ia nomu Lod nia Mane Vari Va Kakahei nato ke tihiri ghu tabaladi ghahemu nira, geala ghau o ghua ghu molamo vari tihi ghidira tabaladi ghahemu nira vari taghomu. 15Ara nato ke vanamu ia nai malaba ta mala leghuina ghau. O riva leghui ghu, taghe nato ke rivai vanamuo la ara. 16A va kahe ghini ghau ghu ia hohoghona, e deo noniriva mu ta varanga fuludina ia nona faghina, nia ia ta hio nonomoho ge deo haro ghu varanga fuludina hei ia neke tuhu ghaheio manei, e ghua. 17!Ghatunaina ghau noto avohori leghutau irahi, e age va beana ghau ghu God, noto riva ghidi la ghau.

18“Ara mu e deo ga turi ghini ghau ghu ghau haroharo. Ara na avohori mo heiri nato ke faeterira ara. Ghe ira Kakangava Ta Maduana ta kahe ghua iahi mu edi toraina meha hohoghona, ‘Ia neke mahai taremehaguo ara ka tevona neto ke kana ghinagu ara,’ ▼

▼13:18 Samu 41:9

ia ta ghua. 19Ara a va kakahe ghini ghau ghatunaina ghe ge dufu nga manei, mala neto dufu la manei, o age va hohoghonai ghu ghau, Ara Taghogu mu ia Mesaea. 20A va kahe ghini ghau ghu ia hohoghona, hei neto hio namahi la ia ta tuhu agei ara, manei ne hio namahau ara, nia hei neto hio namahau la ara, manei mu ne hio namahi ia Mama neke tuhu mehauo ara.”

Zisas Ne Kahe Kenui Ia Vari Namaha Sebo Ka Zudasi.

Matiu 26:21-22; Maki 14:18-19; Luku 22:21-23

21Leghuna kaheri leghutau irahi, Zisas neke age faa vanani muko hihingo, neke va kahe ghidi ghu ira nona mane ta nonofoi, “!Heve ta va kahe ghini ghau ini ara ghatunaina mu e hohoghona! !Kaike ghu ka ghau e age namaha seboau ara ghatu!”

22Ira mane nonofoi dike age vari mamato, vununa dike deo gedi avohi ghedi ghu hei mo neke turi ghinina Zisas. 23Kaike ghu ka ira mane ta nonofoi, ia neke namaha ghinio Zisas, neke nohe ka gheremena taghonai Zisas ka tevo ani. 24Saemoni Pita neke ngengene kame lao ka Zone mala notohina ka Zisas hei mo neke turi ghinina manei.

25Zone neke rizu rorogho lao ka Zisas, ghe neke ngangau lao nga notohina, “?Lod, hei mo ka ghai baini?”

26Zisas neke ungene tughui, “Ia mane ta vanani lao ara ia kipena bereti leghuna tihi laoi ara ka ia sosa lamu, ta manei na.” Ianimu tuna ghe, neke tihi laoi nga manei ia bereti, neke vanani lao ghu Zudasi ia tuunamane Saemoni Isikarioti. 27Hioi ne ghua ghu Zudasi ia bereti, Satana to sukui ma manei. Va kahe ghini tuna neke ghua Zisas, “Magali o riva ghini ghu heve ta mala riva ghinina agho,” neke ghua ghini. 28E deo ma hei ka tevo ani neke va fafahakina heve neke ghua ghe neke kahe ghua lao nga Zisas ka Zudasi. 29Ghe vununa Zudasi mu neke nodi mane mala kopui rongo, kehara ka maneri nganganadira mu, Zisas neke va kahe ghini ta la tabararira keha ghano malana ia mahai varighara, ba ta la tufari rongona ira ta kuma, dike ghua ghu. 30Hioi ne ghua ghu Zudasi ia bereti, magali ma neke to kave lao ghu peghuruo ka ia nagoromo.

Ia Foforuna Ungene Va Gigima

31Kave kaini ne ghua ghu Zudasi ia ringifota, Zisas neke kahe ghua iahi, “Ia fafata neto ke meha mala hioina ara ia Tuuna Noni ia varanga, e age hioi ghu God ghatu ia varanga, vununa e ghidi ira leghu ta dufuau nga ara. 32Nia ara ia Tuuna Noni nato va podoli la ia varanga ka manei, taghonai God e age va podoli ghatu ia varanga ka ara. E deo ghu manei ge age mamahuge ghu riva ghinina ianimu.

33“!Ghau nogu rekaha, ara e deo ga age au soduai taremehamu ghu ghatu. Ghau o age haduau ara ghatu, ghe ghau e deo go age finiau ghu. Ara a va kahe ghini ghau taghe nake va kahe vanadiro la ira ta babatu ka ira Ziu: Ghau e deo go boka meha ghu ka ta laona ara, nake ghua ghidiro.

34“Ghatunaina ara a vanamu ghu kaike foforuna ungene va gigima. O vari namahai ghemu. Taghe nato ke namaha ghini ghau ini la ara o ghua, o toraina vari namahai ghemu ghu. 35Ia vari namahai ka ghau lamu ta age va podolina ka ira noni haroharo, ghau mu nogu mane mala nonofoau ara, ta ghuana.

Zisas Ne Kahe Kenui Ta Age Kaheina Ghatu Pita Ne Deo Ge Avohi Ghu Taghonai Ta Ghuana

Matiu 26:34-35; Maki 14:30-31; Luku 22:33-34

36“?Lod, hae mo ta laona mu agho?” neke ghua notohona Saemoni Pita.

Ungene tughui tuna neke ghua Zisas, “Agho e deo go boka ghahe taremehagu ghu ara ghatunaina, nga ghatu leghu ghe, go age leghuau nga.”

37“?Lod, ne heve ghe ga deo nga ara boka meha leghuighona ghatunaina?” neke ghua notohona Pita. “Ara mu nato va tana mala leme vananighona agho,” neke ghua.

38Zisas neke ungene tughui, “?No torai va tana mamu agho mala leme vanaguna ara? Ara a va kahe ghinigho ghu ia hohoghona, ghe ge nakele nga ia kokorako, agho o age tuufu kaheina lito fafata ta deona ghe go avohoau ghu ara,” neke ghua ghini.