John 14

Zisas Ia Hangana Mala Lao Ka Ia Mama

1Ianimu tuna ghe, neke kahe ghua nga iahi Zisas ka ira nona mane ta nonofoi, “Oka anga ghemu ghu. O rangerange ka God nia o rangerange haro molamo ka ara e ghua. 2Ka ia sugana nogu Mama, tehi ringifotani ta aura. Ara a lao, a la va tanai ghu kaike malau malamu ghau. Geke deo la ge hohoghona ghu iahi, geala ara deo gato ke va kahe ghini ghau ghu. 3Ka leghuna lao ara ta la va tanai ghu kaike malau ka ghau, ara a ke la leghu meha mala hio ghauna, o mala age au haro ghu molamo ghau hae ta auna ara. 4Ghau no avohi mo ia hangana ta lao ka ia malau ta lao iahi ara.”

5“?Lod, ghai deo ga avohi ghu hae mo ta laona agho,” ne ghua Tomasi, “heve e ghua ghe, ga boka avohi nga ghu ghai mu hangana mala laona?”

6Va kahe ghini tuna neke ghua Zisas, “Ara mu ia hangana, ia hohoghona nia ia doli. E deo keha hanganarani mala laona ka ghau ka ia Mama, nga ka ara lama. 7O avohoau ara ghau ghe, go avohi nga ghau nogu Mama. Ghatunaina e vai vona ghu mu, ghau to avohi manei, nia ghau noto ke finini manei, e ghua.”

8Filipi neke kahe ghua iahi, “Lod, va podolo vanamai ma agho ia Mama. Ianimu lama na kabai ghinina ghai,” neke ghua.

9Zisas neke ungene tughui, “?Filipi, ia au tamu ta meha ghu ara, to soduai fuludu, ghe deo ngama go avohoau ghu agho? !Hei neto ke finiau ghu ara, manei neto ke finini ia Mama! ?Heve no ghua ghu agho ghe, no fangai nga ta kabai fininina manei? 10?E deo ma go va hohoghonai ghu agho mu ta auna ara ka giliona ia Mama nia ta auna ka giliogu ini ara ia Mama, e ghua? Ira ngengene ta kaheri ara ka ghau mu eka nogu ghu taghogughi, nga ia Mama ta au ini ka giliogu ara mo mu, ne riva ghidira leghutau irahi. 11O va hohoghonai ma ta auna ara ka giliona ia Mama, nia ta auna ia Mama ka giliogu ini ara e ghua. Neto deo la, o va hohoghona ma vununa ka ira heve noke finiriro ghau riva ghidira ara.

12“Torai hohoghonana mu, hei ia ta va hohoghona ka ara mu, e age riva ghidi ghatu ira riva ta varifata ka nato ke riva ghidi va hokotoro ara. Uve, e faa laoni leghutau ta age riva ghidira manei ghatu, vununa ara na lao ka nogu Mama. 13Heve tei ta fangaina ghu ghau ka ia Mama mu, ara a age riva vanamu ghatu, vununa ghau mu nogu noni ta nonofoau ara, mala ia varanga ka ia Mama e age podolo ghu ka ia Tuuna. 14!Uve, fangari vahina kokolodi leghutau nga ka babaologu ini ara, a riva ghidi ghu ara ghatu!

Zisas Ne Naiungene Ghini Ta La Tuhu Mehaina Taghona Ia Tarunga Ta Maduana

15“Noto namaha ghinagu la ara, ghau o age leghuri ghatu nogu ungene va gigima idi. 16Ara a fangai ghatu ia Mama, e age vanamu ghu Ia Keha Mala Vari Tokai ia ta age au tamu toghunai ghatu. 17Manei lamu ghu mu ia Tarunga Ta Maduana ia ta va podoli ia hohoghona ghinina God. Ira noni ka malau iahi peka, e deo gedi boka hioi ghu manei, vununa maneri e deo gedi finini ghu, ba avohi ghu manei. Nga ghau mu no avohi mo manei, vununa manei ne au taremehamu ghau, nia e age au ghatu ka giliomu nira ghau, e ghua. 18Ara mu taghe ira rekaha ta leme kairi e deo ga ghua ghini ghau ghu ghahe kai ghauna. Ara a ke leghu meha mo ka ghau ghatu. 19Ka birusuna fafata tei ma, e deo ghu ke age finiauna ira noni ka malau iahi peka, nga ghau mu o age finiau mo ghatu. Vununa ara ake age doli leghu, o age doli molamo ghau ghatu. 20Ka ravata ianimu, ghau o age avohi ghatu ta auna ara ka giliona nogu Mama, nia ta auna ghau ka giliogu ara, nia ara ka giliomu ghau, ta ghuana. 21Heiri ira ta hiori nogu ungene va gigima idi ta leghuri ghu mu, ta namaha ghinagura ara. Nogu Mama e age namaha ghidi ira ta namaha ghinagu ara, nia ara haro age namaha ghidi maneri, a va podoloau ghu taghogu ka maneri.”

22Zudasi (eka ghua ghu Zudasi Isikarioti) neke kahe ghua iahi, “?Lod, ne heve ghe no vato ghini nga agho ta va podolighona taghoughi ka ghai lama, ne deo ghu ka malau kamoto iahi peka?” neke ghua notohonana.

23Zisas neke ungene tughui, “Heiri haroharo ta namaha ghinagu ara mu, edi age leghuri nogu vari va kakahei idi. Nogu Mama e age namaha ghidi maneri, nia ghai ga la meha ghu ka maneri ghatu, ga au taremehadi ghu, e ghua. 24Heiri ira ta deo gedi namaha ghinagu ghu ara mu, e deo gedi age leghuri ghu nogu vari va kakahei idi. Ngengene ta nomohori irahi ghau mu, eka nogu ghu taghogughi, nga nona nogu Mama neke tuhu mehauno.

25“Ara a va kahe ghini ghau ghu leghutau irahi ghatunaina, malai au taremehamuna nga ara. 26Ghe ia ta Vari Tokai, ia Tarunga Ta Maduana, ia ta la tuhu mehai ghatu ia Mama ka babaologu ini ara, ta age va kakahe ghini ghauna vahina leghutau nga, va ngana ghini ghau leghuna ira vahina leghutau nga nato ke va kahe vanamuro ara.

27“Ara a nakai vanamu ia bule, ia nogu bule taghogughi ta vanamuna ara. Bule ta vanamu iahi ara mu eka ghua ghu ia kokolona bule ta meha ka malau iahi peka. Oka anga ghemu, ba maughemu la ghu. 28Ghau noke nomohi mo kahe ghuaguna iahi ara, ‘Ara mu na ghahe, ghe ara a ke la leghu mehani ka ghau ghatu,’ nake ghuao. Goke toraina namaha ghinagu la ara, ghau geala oke va manemane ta lao ini ara ka ia Mama, vununa manei e varanga fuludu lao ka ara. 29Ara ato kusu va kahe ghini ghau leghutau irahi, ghe gedi dufu meha nga, o mala age va hohoghona ghu ghau dito dufu la maneri.

30“To deo ga suri kuru au ghu fafata mala turi taremehamuna, vununa Satana, ia ginitauna malau iahi peka, to zukuru meha. Manei e deoi mana mala paufuauna ara, 31ghe heve ta age dufuna ghatu mu e age va podoli ka malau iahi peka ta namaha ghinina ara ia Mama. Ianimu la ghe, na riva ghidi nga ara ira heve neke toraina ungene va gigimauo nogu Mama ta mala riva ghidira ara.

“Meha, dato ghahe kaini ghu malau iahi.”