John 16

1Ianimu tuna ghe, neke kahe ghau nga iahi Zisas ka ira nona mane ta nonofoi, “Ara nato ke va kahe ghini ghau leghutau irahi, mala oka age paeke la ghu ghau ka ia nomu va hohoghona. 2Maneri ghatu edi age nakai kave ghau ka ira suga mala varighara ira Ziu, nia ia fafata e la meha mo ghatu ta age atungu ghauna ira noni, ta age nganai ghu maneri di riva vanani God, ta ghuana. 3Maneri edi age riva ghidi leghutau irahi, vununa maneri deo gedi ke toraina avohi ghedi ghu ia Mama, ba ara. 4Uve, ara ato va kahe ghini ghau leghutau irahi ghatunaina, mala neto dufu meha la ia fafata ta mala riva ghidi maneri leghutau irahi, ghau ghatu oke age ngana leghuri mo heve nake to va kahe ghini ghauro ara ghidira maneri. Ara e deo gake va kahe ghini ghau ghu iahi ka ia tatanigaina, vununa ara nake au taremehamu ghau.

5“Ghe ghatunaina mu, ara ato lao ka manei neke tuhu mehauo, ghe deo ma hei ka ghau ne notohoauna, hae mo na laona ara. 6Vununa nato ke kaheri ara leghutau irahi, noto puina muko hihingomu ghu ghau. 7Ghe ara a toraina va kahe ghini ghau ghu ka ia hohoghona, ta torai mala vehana ka ghau mu ta ghahe ini ara, vununa nato deo la ara ga ghahe ghu, ia mala Vari Tokai e deo ge age meha ghu ka ghau. Nga nato ghahe la ara, ghe ga la tuhu mehai nga ara manei ka ghau. 8Nia neto la meha la manei, manei e age va podoli ka ira noni, ta zeana maneri ghinina ia muko, nia ghinina heve ia ta lotoro, nia ghinina ia varifate ka God, e ghua. 9Maneri di hotori muko, vununa maneri deo gedi va hohoghona ghu ka ara. 10Maneri edi age va podoli ta zeana maneri ghinina ia lotoro ka ara, vununa geta fateau mo maneri ne hotoau ta mala va lemeauna ta ghuana ghe, ia lao ka ara ka nogu Mama mu, ne va podolina ta lotorona ara. Ghau e deo ghu ke age finiau ta auna ghu ghatu. 11Nia maneri mu di zea ka ia nganai ta deona ge age fatei ghu ia muko, vununa God neto ke kusu fatei Satana ia ginitauna malau iahi peka.

12“Tehi leghutauni ta auna ka ara mala va kahe ghini ghauna ghau, ghe ka torai ghatunaina mu, e age tehi fuludu laoi ia ta boka hioi ta va fafahaki ghu ghau. 13Ka ia la mehana ia Tarunga ta va podoli ia hohoghona ghinina God, manei e age babatu ghini ghau mala avohorira vahina leghutau ta hohoghodi nga. Manei e deo ge age ngengene ghu ka ia nona mana mala kopu taghonai, nga manei e age kahe ghini ghau heve neto ke nomohoriro ka God nia e age va kahe ghini ghau ira heve leghutau ta la meha nga, e ghua. 14Manei e age vanagu ia varanga, vununa manei e age turi vanamu vahina leghutau ta va kahe ghini nga ara manei. 15Ira leghu ta nona nga ia Mama mu, nogu ara. Ne ghua mamu ghe, na kahei nga ara mu, ia Tarunga e meha va podolo vanamu ghau ira turi ta hiori manei ka ara, na ghua nga.

Muko Hihingo E Age Fihiki Ka Va Ghazaghaza

16“Ka birusuna fafata tei ma, ghau o deo go age finiau ghu, nia ka birusuna fafata tei ma leghuna ianimu, ghe goke age finiauni nga, e ghua.”

17Kehara ka ira mane ta nonofoi dike vari nonotoho, “Heve mu fafahakanana iahi? Manei ne va kahe ghini ghita ta deona gada age finini ghu ghita ka birusuna fafata tei, nia ianimu tuna ghe gada ke age fini leghuini nga tuna ghita birusuna fafata tei leghunana e ghua, ta ghua ini. Nia manei ne kahei haro molamo, ‘Vununa ara na lao ka ia Mama,’ ta ghua ini, e ghua. 18?Nia heve mu fafahakanana, ‘birusuna fafata tei’ ta ghua ini? Ghita deo gada va fafahaki ghu heve ne turi ghinina manei,” dike ghua.

19Zisas neke avohi ta kabai notohina maneri manei neke va kahe ghidi ghu, “?Ghau mu no vari nonotoho ghini heve fafahakanana nake kahe ghuao ara iahi, ‘Ka birusuna fafata tei, ghau o deo go age finiau ghu, nia ka birusuna fafata tei leghuna ianimu, goke age fini leghuauni ghu, e ghua,’ nake ghuao? 20Ara a va kahe ghini ghau ghu ia hohoghona, ghau mu, o age nakele nia adoꞌado ghatu, ghe malau iahi peka mu e age va ghazaghaza. Ghau mu o age muko hihingomu ghatu, ghe muko hihingo ianimu ka ghau, e ke age fihiki ghatu ka ia va ghazaghaza. 21Taghe ta ghua nia lama ia fotati ka ia karatana va dodoli rekaha, e age ghua. Doli ghena e ghua ghu ia rekaha, to ngana kaini ma manei ia vavahagalana va dodoli rekaha, vununa manei ne va ghaseghase ghini gogoso tato doli ani ka malau iahi peka. 22O age ghua haroma ghu ghau, ghatunaina mu ghau o muko hihingomu, ghe ara mu ake age fini ghau mo ghatu, oke age va ghazaghaza ghu ghau, nia deo tuna hei take age hio kai tamuna va ghazaghaza ianimu, e ghua. 23Ka ravata ianimu, e deo heve leghutau ta age fangaina ghau ka ara. A va kahe ghini ghau ghu ka ia hohoghona, nogu Mama e age vanamu ghatu heve leghutau ta fangaina ghau ka manei vununa ghau mu nogu noni ta nonofoau ara. 24Taniga sepaoni e dufu ghu ghatunaina ghau e deo goke fanga leghutau ghu ka ia Mama, taghe kaike nogu noni ta nonofoau ta ghuana. Ghe ghatunaina mu o fanga o age hihio ghu, mala ia va ghazaghaza ka ghau e age hokoto ghu.

25“Ara nato ke turi vanamu leghutau irahi ka ungene talevara, ghe ia fafata e la meha mo ghatu, ta age kahe ghini ghau va lotoro ara ghatu ghinina ia Mama, deona ga age turi ghu ka ungene talevara. 26Ka ravata ianimu, ghau o age fangai ia Mama ghatu, vununa ghau mu nogu noni ta nonofoau ara. Ara e deo ga kahei ghu ta mala age fanga vanamuna ara ka ia Mama, 27vununa taghonai ia Mama ne puina namaha ghini ghau fuludu. Manei ne namaha ghini ghau vununa ghau no namaha ghinagu ara, noto ke va hohoghonai ghu nake sipa meha harona ara ka God. 28Uve, ara mu nake sipa mehagu mamu ka ia Mama, nake la meha ghu ka malau iahi peka. Nia ghatunaina tuna, ga ghahe kaini ghu malau iahi peka, gake leghu lao ghu ka ia Mama, e ghua.”

29Ianimu tuna ghe dike kahe ghua nga iahi ira nona mane ta nonofoi, “Ghatunaina agho to turi va lotoro meha ini ma ka ghai, deona go turi ghu ka ungene talevara. 30Ghatunaina ghai nato avohi ghu, ta avohorira agho vahina leghutau nga. Geta deo nga heve leghutau ta notohina hei noni ghe, agho to kusu avohi heve ne nganaina manei. Ne ghua mamu ghe, na va hohoghonai nga ghai mu, agho noke sipa mehau mamu ka God, ta ghuana.”

31Ke ungene tughuri tuna neke ghua Zisas, “?No toraina va hohoghona tuna ghau ghatunaina? 32Ghe ia fafata mu to tatanigai, ta age pirarao ghau haroharo, sopai laona ka ira malaumu, age nai kakaikeauna ghau. Ghe ara mu e deo ga toraina au kakaike ghu, vununa ia Mama ne au tagu mo ara. 33Ara a va kahe vanamu leghu irahi nga, e mala au ghau bule ghu ka hihingomu nira, vununa e ghini ia nomu va hohoghona ka ara. Ka malau iahi peka mu, ghau o age dufu ghau vavahagala, ghe o hioi hetamuna, vununa ara nato ke paufi malau iahi peka.”