Joh 17 | KjiSC | STEP | Leghuna kaheri Zisas leghu irahi nga, manei neke mato vona ka kolangana fate ghe neke kahei nga, “Mama, to dufu tuna ia fafata. Va podoli ka ira noni haroharo ta varanga sughavonana ara ia Tuu, mala ara ia Tuu a va podoli molamo ta varanga sughavonana agho.

John 17

Ia Tarai Ka Zisas

1 Leghuna kaheri Zisas leghu irahi nga, manei neke mato vona ka kolangana fate ghe neke kahei nga, “Mama, to dufu tuna ia fafata. Va podoli ka ira noni haroharo ta varanga sughavonana ara ia Tuu, mala ara ia Tuu a va podoli molamo ta varanga sughavonana agho. 2 Taghe noke vanaguo la ia mana mala kopu ka fatedi leghu noni nga a ghua, a boka ghu molamo ara ta vanadi doli soduaina, heiri haroharo noke vanaguo agho. 3 Fafahakanana doli soduai ta ghua iahi mu, ghini ia ta avohigho agho ia kaikena God ta hohoghona, nia ia ta avohoau ara ia noke tuhu mehauo agho aiahi, e ghua. 4 Ara nato ke va podoli ia nou varanga ka malau iahi peka, ka ia riva ghini va hokoto ia riva noke vanaguo agho, mala riva ghinina ara. 5 Nia ghatunaina tuna Mama, oke vanagu mehani ia varanga, ia varanga dake vari tufa ghinio, ghe neke va vuhaio nga malau iahi peka.

6 “Ara nake to va podoligho agho ka heiri noke vanagu mehao agho ka malau iahi peka. Maneri mu noke taghori agho noke vanagu meha ghu ara, nia maneri gedi leghui ghu ia nou saoro, dike ghua. 7 Maneri di avohi noke vanaguna agho vahina leghutau ta kuruau nga ara. 8 Ara nake vanadi ia nonomoho noke vanaguo agho, dike va hohoghonai ghu maneri. Nia maneri di avohi nake sipa mehana ara ka agho, nia di va hohoghonai noke tuhu mehauna ara agho, e ghua.

9 “Tarai iahi ka ara mu, eka malana ghu malau iahi peka, nga e maladi ira noni noke vanagu meharo agho, vununa maneri mu nou agho. 10 Ira leghu noni ta taghori nga ara mu nou agho, nia ira leghu noni ta taghori nga agho mu nogu ara. Ia varanga ka ara mu, e podolo ghu ka maneri. 11 Ara mu to deo ga au ghu ka malau iahi peka, nga maneri mu di au nga ka malau iahi peka. Ara mu nato meha ghu ka agho ghatunaina. Mama agho ia ta Maduana, o kagara ghidi ka ia manana ia babaolou, ia babaolo noke vanaguo, edi mala kaike ghu maneri, taghe ghita palu la ta kaike ini. 12 Ka ia birusuna fafata au taremehadi ara ira nogu mane ta nonofoau, ara nake kagara ghidi va veha ka ia manana ia babaolou, ia babaolo noke vanaguo agho. E deo kaike ghu ka maneri nake age siana ghinina ara, nga hei ia ta mala age siana ghini lama. Taghe iahi mu mala age va ghorevurana heve ia ta kahei ka ira Kakangava Ta Maduana.

13 “Ara mu nato meha ka agho ghatunaina. Ghe ara a kaheri leghutau irahi malai auguna nga ka malau iahi peka, e boka age au ghu ka giliodi maneri ia kamotona va ghazaghaza ka ara. 14 Ara nake vanadi maneri ia nou nonomoho, dike kikipana ghidi ghu malau iahi peka, vununa maneri mu eka nona ghu malau iahi peka, taghe ara la, ta deo ini ga nona ghu malau iahi peka. 15 Ara e deo ga fangaigho ghu agho ta hio kaverira maneri ka malau iahi peka, nga o kagara ghidi va veha ma, ka Satana. 16 Maneri mu eka nona ghu malau iahi peka, taghe ara la ta deo ini ga nona ghu malau iahi peka. 17 Va kalasari nia o va beanari ira hihingodi ka ia hohoghona ta meha ka ia nou saoro. 18 Taghe noke tuhu mehauo la ara ka giliona malau iahi peka na ghua, na tuhu kaveri ghu molamo ara maneri ka malau iahi peka. 19 Vununa malana ia veha ka maneri nato nakaiau ghu taghogughi mala torai riva vananighona agho, edi mala age hohoghodi ghu maneri vananighona ira dolidi mala riva vananighona ia nou riva.

20 “Ara mu e deo ga tarai toka ghidi ghu ma maneri ira ta nonofoau lama, nga na tarai toka ghidi haro molamo maneri ira ta va hohoghonau ara, vununa ka ia va ongahi ira mane ta nonofoau irahi ia nonomoho. 21 Ara na tarai fanga, mala maneri haroharo edi age kaike ghu. Mama, taghe ta ghua ini la agho ta kaike taremehagu ini ara nia ara ta kaike taremehau ini agho na ghua, na tarai fangai ghu ara mala age kaike taremehada harona molamo ghita maneri, mala edi boka age va hohoghonai ghu malau iahi peka noke tuhu mehauna agho. 22 Ara nato ke vanadi maneri ia varanga noke vanaguo agho, mala edi age kaike ghu maneri, taghe ghita la ta kaike ini. 23 Ara a age kaike taremehadi maneri nia agho o age kaike taremehagu ara, mala maneri edi toraina age kaike ghu. Ianimu tuna ghe gedi age avohi nga ira nonina malau iahi peka noke tuhu mehauna agho, nia noke namaha ghidira agho e ghua, taghe noke toraina namaha ghinaguo la agho. 24 Mama, ara na kabai ghidi ira noni noke vanagu meharo agho tadi au taremehaguna hae ta auna ara. E ghua ianimu ghe, gedi boka finini nga ia varanga noto ke vanaguo agho, vununa agho noke namaha ghinagu ara ghe neke va vuhai nga malau iahi peka.

25 “Mama agho ia ta lotoro, ira noni ka malau iahi peka deo gedi avohigho ghu agho, nga ara mu na avohigho mo agho, nia mane ta nonofoau irahi edi avohi mo noke tuhu mehauna agho ara. 26 Ara nato ke va podoligho agho ka maneri, nia age riva ghini ma a lao ghu ianimu ghatu e ghua, mala ia namaha ka agho malagu ara e boka au ghu ka maneri, nia mala taghogu haro molamo a boka au ghu ka maneri, e ghua.”