John 18

Va Gahana Pagahaina: Maneri Di Tupila Ghini Ia Tuuna God Ka Ia Hekefalahata, Ghe God Ne Va Tetu Leghui Manei Ka Ia Leme 18:1–21:25

Kehara Di Sokei Kraes 18:1–19:16

Zisas Di Sakomi

Matiu 26:47-56; Maki 14:43-52; Luku 22:47-53

1Leghuna kaheri tarai irahi Zisas, manei neke ghahe kadoli ia Lovete Kidoroni taremehadi ira nona mane ta nonofoi, dike la haghele ghu gilio ka kaike nunuma heke olivi aianimu.

2Zudasi, ia neke namaha seboio Zisas mu, neke avohi mo malau iahi, vununa tehi fafatani Zisas neke fani lao aianimu taremehadi ira nona mane ta nonofoi. 3Ira hiama ta kenu nia ira Farisi e ghua, dike hioi Zudasi mala batu ghini laona kaike pukuna ka ira mane magaradi Romu taremehadi keha mane magara ta kopu ka ia Sugana God. Maneri dike lao ka ia nunuma taremehadi zuta soni, gasi nia ira nodi gagaromo mala magara, e ghua.

4Zisas to kusu avohori haro heve leghutau neke mala age dufuna ka taghona ghatu. Deke kenu lao tuna ge notohori ghu neke ghua Zisas, “?Hei mo no haduina mu ghau?” neke ghua ghidi.

5“Zisas na Nazareti,” dike ghua.

“Ara lamu maneina,” neke ghua Zisas. Zudasi ia neke namaha seboio Zisas neke tetu taremehadi mo maneri. 6“Ara lamu maneina,” ne ghua ghu Zisas, maneri haroharo dike suaraghi leghu dike riufu hinae ghu ka kavao. 7“?Hei mo no haduina mu ghau?” neke ghuani notohorina Zisas.

“Zisas na Nazareti,” dike ghuani ungene tughuina.

8“Ara lamu maneina nake ghua ghini ghauo nga,” neke ghua ghidi Zisas. “Neto ghua la mamu ara no haduina ghau, o va ghaheri nogu mane ta nonofoau irahi.” 9Zisas neke kahe ghua iahi, mala va ghuduvina ia nona ngengene neke kusu kaheio taghonai, “Mama, e deo kaike noni ghu ka ira noke vanaguro agho neke kakai taguna.” ▼

▼18:9 Zone 6:39

10Ianimu tuna ghe, neke koroho kavei nga Saemoni Pita ia nona leboto sisilufu mala magara neke salo kaini ghu ia talinga mautuna Malakusi ia nona mane mala varituhu ia hiama paudi ira hiama. 11Ghe Zisas neke ungene va gigima ghua iahi ka Pita, “O nakai leghui ka sugana nia, leboto sisilufu mala magara iamu ka agho. Ara a toraina vavahagala, leghuina ia lao nanafa ka nogu Mama.” neke ghua Zisas.

Maneri Di Hio Laoi Zisas Ka Anasi

Matiu 26:69-70; Maki 14:66-68; Luku 22:55-57

12Ianimu tuna ghe neke la meha nga ia mane faadi kaike togha mane magaradi Romu, taremehana ira keha nona mane magara, nia ira mane magara ta kopu ka ia Sugana God e ghua, dike la sakomi ghu Zisas piligaina. 13Maneri dike kusu hio laoina Zisas ka Anasi ia manefaa, ta varaoto lao ka Kaefasi ia neke hiama paunao ka fafata ianimu. 14Kaefasi lamu neke kahe vanadira ira mane babatu ka ira Ziu mu, geala e veha fuludu lao geke kaike noni lama neke leme vanadira ira leghu noni nga, ta ghuana.

Pita Ne Kahei Ta Deona Ge Avohi Ghu Zisas

Matiu 26:69,70; Maki 14:66-68; Luku 22:55-57

15Saemoni Pita nia kaike ghu ka ira mane ta nonofoi e ghua, dike ghahe leghu laoina Zisas leghuna mo. ▼

▼18:15 Ia keha mane ta nonofoi neke leghuio Zisas mu Zone.

Keha mane ta nonofoi ianimu ghu mu, neke puina avoho va vehai ia hiama pauna, neke malumu mo ghu ta haghele taremehana laona Zisas ka tatalana ta babara liloho ianimu, ka ia sugana ia hiama pauna. 16Nga Pita mu neke tetu afa ma ka peghuruna makatana leghaha ani. Ianimu tuna ghe, neke lao nga ia keha mane ta nonofoi neke avohio ia hiama pauna, neke la turi taremehana ghu ia fotati ta kopu ka makatana leghaha ani, ghe neke va malumi nga manei ta haghelena Pita. 17Ia fotati neke notohi Pita, “?Agho mu eka kaikeu ghu ka ira mane ta nonofoi Zisas?” neke ghua ghini.

Ghe Pita neke kaheina, “Uve, ara mu e deo,” ne ghua.

18Ira mane magara ta kopu nia ira noniriva e ghua, dike tetu liloho faraina ka ia totoi sisibe ta lera, vununa neke kaporo. Pita neke lao neke la tetu taremehadi haro ghu maneri, la faraina.

Anasi Ne Notohi Zisas

19Notohi tuna Zisas neke ghua Anasi ia neke hiama paunao sepao, ghidira ira nona mane ta nonofoi nia ghinina ia vari va kakahei ka manei, e ghua. 20Va kahe ghini tuna neke ghua Zisas, “Ara nato ke vari va kakahei tudu ma ka kenudi ira noni ka ira suga mala varighara ira Ziu nia ka ia Sugana God, e ghua, ka ira ta mala meha varighara ira noni. E deo kaike leghutau nake kahe poikai ghu ara. 21?Ne heve ghe, no notohoau nga ara agho? O notohori ira dike nomohoriro ira vari va kakahei ka ara. Maneri edi avohi mo heve nake kaheina ara,” neke ghua Zisas.

22Ne kahei ghu iahi Zisas, kaike ghu ka ira mane magara ta kopu ka ia Sugana God, neke la tapali Zisas ka ia bakona, ghe neke kahe ghua nga iahi, “?Taghe iamu e ghua mu ungene tughuina agho ia hiama pauna?” neke ghua ghini.

23Ghe Zisas neke ungene tughui, “?Nato kahei la ara kaike leghutau ta zea, va kahe ghidi heiri haroharo aiahi heve mo ne mukona. ?Nga nato turi hohoghogu la ara mu, heve no ghua ghe no tapalau nga?” neke ghua ghini.

24Ka fafata iahi, Anasi neke va ghahe laoi Zisas ka Kaefasi ia hiama pauna, ka ia neke pipiligaro nga ira palu kamena.

Pita Ne Tuufuni Ta Zea Ghini Ghenana Zisas

Matiu 26:71-75; Maki 14:69-72; Luku 22:58-62

25Ka ia fafata tetu ta farai ghu Saemoni Pita ka ia gheremena totoi, maneri dike notohini manei, “?Agho mu eka kaikeu ghu ka ira mane ta nonofoi Zisas?” dike ghua ghini.

“Uve, ara mu e deo,” neke ghua tuufunana Pita.

26Ghe kaike ghu ka ira nona noni mala varituhu ia hiama pauna, ia taremehana ia mane neke salo kainio Pita ia talingana, neke fini avohi neke notohi ghu, “Ara na torai avohi nake finighona agho au taremehanana mane iamu ka ia nunuma,” neke ghua ghini. 27Pita neke tuufuni ta zea ghini ghenana manei. Selu laoi ma ianimu, neto nakele ghu ia kokorako.

Zisas Ka Kenuna Paelati

Matiu 27:1-2,11-31; Maki 15:1-20; Luku 23:1-5,13-25

28Ka ia fufugho reduna, maneri dike hio kavei Zisas ka ia sugana Kaefasi dike lao ghu ka ia malauna ia mane gavanana Romu. Ira ta babatu ka ira Ziu deo gedi ke haghele lao ghu taghodi ka malau ani ia gavanana Romu, vununa maneri dike kabai nai va kalasari taghodi, edi boka holara ghu ka ia Mahai Varighara Nganaleghuna Ia Ghahe Fuludu, dike ghua. 29Ianimu tuna ghe, neke kave lao nga Paelati ka maneri neke la notohori ghu, “?Heve mu muko ne riva ghidira mane iahi ghe no noreki nga ghau?” neke la ghua ghidi.

30Ungene tughui tuna dike ghua, “!Geke deo la ge mane ngongovalana ghu manei, geala ghai e deo gake hio mehai ghu ka agho!” dike ghua ghini.

31“Neto ghua la ianimu o hio ghahei o la fatei ghu ka ia nomu vetula taghomu,” neke ghua ghidi Paelati.

“Ghe ghai mu e deo ghai mana mala nakainina hei noni ka ia leme,” dike ghua ungene tughuna ira ta babatu ka ira Ziu. 32Iahi mu ne va ghuduvi ia neke kusu kahe kenuio Zisas, ghinina ia ghaghahena neke mala age lemeo taghonai. Vununa ira nonidi Romu dike va leme noni ka hekefalahata.

33Ianimu tuna ghe, neke haghele leghu lao nga gilio Paelati neke kudo laoi ghu Zisas ka taghona, “?Agho lamu ia Mane Ginitaukela ka ira Ziu?” neke ghua notohina.

34Zisas neke ungene tughui kahe ghuana iahi, “?Notoho iahi mu ne la sipa meha ka taghou, ba kehara dike va kahe ghinighona ghinaguna ara?” neke ghua ghini.

35“Ara mu eka noni Ziu ghu. Ira noni ka taghou nia ira hiama ta kenu e ghua mu dike hio mehaighona agho ka ara. ?Heve noke riva ghinina ghu agho?” neke ghua ghini.

36Ianimu tuna ghe, neke ungene tughu nga Zisas, “Ia ravutu ka ara mu eka nona ghu malau iahi peka. Geke ghua la ianimu, geala ira noni ta leghuau ara edi ke magara mala va nodorira ira ta babatu ka ira Ziu ta sakomo hioauna ara. E deo, ravutu iahi ka ara mu eka nona ghu malau iahi peka,” neke ghua ghini.

37Ke notohi tuna neke ghua Paelati, “?Kaike mane ginitaukela ghu mu agho?” neke ghua ghini.

“Agho mo no kaheina, ara mu mane ginitaukela ta ghuana, ne hoghou ghu mamu,” ne ghua Zisas. “Ara nake doli meha ka malau iahi peka mala va kahe ghidira ira noni ghinina ia hohoghona. Heiri haroharo ta hagala ghini heve ia ta hohoghona mu, edi ungene nonomoho ka ara.”

38“?Heve ghu mu hohoghonana?” neke ghua notohonana Paelati. Ianimu tuna ghe, neke kave laoni nga ka ira noni, neke la va kahe ghidi ghu, “E deo heve muko ne hotoina manei ta boka mala fateina. 39Ghe kaike puhi sepa ka ghau mu, ia ta mala va kave vanamu ara kaike noni pipiliga ka ia Mahai Varighara Nganaleghuna Ia Ghahe Fuludu. ?Heve, ghau no kabai ghini mo ta va kave vanamuna ara ia mane ginitaukeladi ira Ziu?” neke ghua ghidi.

40Ghe maneri dike kudo leghu lao, “!E deo, eka ghua ghu manei, va kave vanamai Barabasi mo!” dike ghua. (Barabasi mu kaike mane neke taga tetuio ia au kopu ka ira noni Romu.)