Joh 19 | KjiSC | STEP | Ianimu tuna ghe, neke kahe ghidi nga Paelati ira mane magara ta hioina Zisas, ta la puruasiminina ghu.

John 19

Zisas Di Hio Vonai Ka Vari Sukutuai Mala Va Lemeina

1 Ianimu tuna ghe, neke kahe ghidi nga Paelati ira mane magara ta hioina Zisas, ta la puruasiminina ghu. 2 Ira mane magara dike fihui kaike tarapae ka lolozo dike va vona ghini lao ghu ka ia belehuna Zisas. Ianimu tuna ghe dike va vona vanani lao nga kaike poko sodu ta omoꞌomo. 3 “!Helahela ghini ia mane ginitaukela ka ira Ziu!” dike ghua vela ghinina, ghe dike tapali nga dike au ghu ka ira bakona.

4 Paelati neke kave laoni peghuru, neke la va kahe ghidi ghu ira noni, “Fini, ara ato la hio kave vanamu meha Zisas ghatunaina, o mala avohi ghu ghau ta deona ara ga fini ghu ta hotoina muko sasake manei.” 5 Ianimu tuna ghe, neke la kave meha nga Zisas va vonaina ia tarapae lolozo nia ia poko sodu ta omoꞌomo, e ghua. Kahe ghua tuna iahi ne ghua Paelati, “!Iahi mu ia mane!” neke ghua ghidi.

6 Di fini laoi ghu Zisas ira hiama ta kenu nia ira mane magara ta kopu ka ia Sugana God e ghua, maneri dike kudo lao, “!Tupila ghini ka hekefalahata! !Tupila ghini ka hekefalahata!” dike ghua.

Paelati neke kahe ghua iahi, “O hioi taghomu, o la tupila ghini ghu ka hekefalahata. E deo heve na fininina ara neke va mukoina manei,” neke ghua Paelati.

7 Ira mane babatu ka ira Ziu dike ungene tughu lao, “Leghuina ia vetula ka ghai ira Ziu mu, mane iahi e toraina mala va lemei, vununa taghonai mu Tuuna God, ne ghua.”

8 Ka ia fafata age nomohina Paelati tuturi iahi, manei neke puina age maughena laoni, ge hohoghona la mamu ta ghuana. 9 Manei neke haghele leghu lao gilio ka tolima ginitau ani neke la notohi ghu Zisas, “?Agho mu taniu hae?” neke la ghua ghini. Ghe Zisas e deo geke ungene tughui ghu. 10 “?Heve, no pake gheu ngengene mehana ka ara?” neke ghua Paelati. “?E deo go avohi ghu agho mu, ara e kuruau mana ta mala va kaveighona agho ka pipiliga, ba ta mala tupila ghinighona ka hekefalahata, ta ghuana?”

11 Ianimu tuna ghe, neke kahe ghua nga iahi Zisas, “Mana ta kuruigho iamu agho ka fategu ara mu, ia mana ta vananigho meha lama God. Taghe ia noni neke nai ageauo ara ka agho mu, e toraina hotoi ghu muko ta toraina faa fuludu lao.”

12 Ne nomohi ghu iahi Paelati, manei neke va sisiva hadui kaike ghaghahena mala nai kaveina Zisas. Ghe ira mane babatu ka ira Ziu dike kudo leghu lao, “Noto va malumu kavei la agho mane iahi, agho mu eka nona mane baere ghu Sisa. Hei noni neto kahei la taghonai mu mane ginitaukela ta ghuana, manei mu kaike kana ka Sisa,” dike ghua lao.

13 Ka ia fafata kahe ghuadi ianimu maneri, Paelati neke hio kavei Zisas peghuru, ghe neke la nohe hinae nga ka ia nonohe mala varifate ka ia malau ta va kudo ghini ia “Galahena Ta Pata Ghini Ghahipa Leghaha”. Ka ungene Erameiki mu, “Gabata,” e ghua ghini. 14 Ka fafata iahi mu neto ke age namo hoatai ravata, ia ravata mala va tana ghini ia Mahai Varighara Nganaleghuna Ia Ghahe Fuludu, ta au meha ka ia keha ravata. Kahe ghua tuna iahi ka ira noni, neke ghua Paelati, “!Iahi ia nomu mane ginitaukela!” neke ghua ghidi.

15 Ghe maneri dike kudo leghu lao, “!Atungi! !Atungi! !Tupila ghini ka hekefalahata!” dike ghua.

“?Heve? ?Ghau no kabai ghinagu ta tupila ghinina ka kaike hekefalahata mane ginitaukela iahi ka ghau?” neke ghua notohonana Paelati.

“Ghai mu e deo ghai mane ginitaukela, nga Sisa lama,” dike ghua ungene tughudira ira hiama ta kenu.

16 Va nonoghanana, Paelati neke nai vanadi lao maneri, mala tupila ghinina ka hekefalahata.

Ira Mane Magara Di Tupila Ghini Kraes Ka Ia Hekefalahata 19:17-37

Matiu 27:32-38,48,50; Maki 15:21-26,36a,37; Luku 23:26-33,38,46

Hioi tuna Zisas gedi batu ghini ghahe ghu dike ghua ira mane magara. 17 Zisas neke hure kakaikei ia hekefalahata neke lao ghu ka ia malau ta va kudo ghini malauna ia Pau. (Ka ungene Erameiki mu edi va kudo ghini Gologota). 18 Aianimu ghe dike la tupila ghini nga ka kaike hekefalahata. Keha palu maneni dike sopai tupila ghidi harora maneri ka hekefalahata ka ira palu pelona nai va hoatina Zisas. 19 Ianimu tuna ghe, neke va kahe ghidi nga Paelati ta kangavina maneri kaike kodakana takifi, dike tupila ghini lao ghu ka fatena Zisas ka ia hekefalahata. Kakangava neke au laora mu, “Zisas na Nazareti, ia Mane Ginitaukeladi ira Ziu,” e ghua lao. 20 Ka malau dike tupila ghinina maneri Zisas ka hekefalahata mu, e au namo ka gheremena Zerusalemu ia malau leghaha, dike boka izumu laori mo ghu ira tehi noni kakangava iranimu ka ira ngengene Hiburu, Giriki nia Lateni.

21 Ghe ira hiama ta kenu dike lao ka Paelati dike la kahe ghua ghu iahi, “Holara kaini, ‘Ia Mane Ginitaukeladi ira Ziu’ ta ghua nia, nga, ‘Mane iahi neke kahei, taghonai mu Mane Ginitaukeladi ira Ziu,’ geala e ghua ta kangava laoina,” dike ghua.

22 Ghe Paelati neke va kahe ghidi, “Heve nato ke kangavi la ara, nato ke kangavi ara,” neke ghua ghidi.

23 Ka leghuna neke to tupila ghinio Zisas ka hekefalahata ira rodana mane magara, maneri dike vari tufa ghidi ira poko ka manei ka vari hoataidi taghodi rodana ghu. Maneri dike hioi haro molamo ia poko ta sodu ka manei dike riva ghinio ka kaike kamotona poko ta fifihu ta deo pitikapana. 24 Ira mane magara dike kahe ghua iahi ka vari taghodighi, “Ghita daka reku fotai ghu poko iahi, nga da hilava ghini ka daesi da mala finini ghu hei mo ta age hioina,” dike ghua. Iahi mu neke va ghuduvi heve ia ta kahe ghua iahi ka ira Kakangava Ta Maduana, “Maneri dike tufari ira poko ka ara vari hoataidi taghodi, nia dike hilava ghidi ka daesi ira poko ka ara,” ^{▼▼19:24 Samu 22:18} ia ta ghua.

25 Dike tetu namo laora ka ia hekefalahata Zisas mu nona uke, ia tahina ghase nona uke taghonai Zisas, Mere ia keranau Kilopasi nia Mere ia tanina Magidala, e ghua. 26 Ka ia fafata neke fini laoio manei nona uke tetu taremehanana ia mane nonofoi ta torai namaha ghini fuludu taghonai, Zisas neke kahe ghua iahi ka nona uke, “Fotati agho, manei lamu tuu manena agho.” 27 Ianimu tuna ghe neke va kahe ghini lao nga ia mane ta nonofoi, “Manei lamu mu nou ukena agho.” Ka fafata ianimu vai vona ghu, ia mane nonofoi neke hio laoi Mere ka ia sugana taghonai mane ta nonofoi ini.

Ia Leme Ka Zisas

Matiu 27:45-56; Maki 15:33-41; Luku 23:44-49

28 Zisas to avohi ira vahina leghutau nga dike to age hokoto. Taghe mala va ghuduvurira ghu ira Kakangava Ta Maduana mu, manei neke kahe ghua iahi, “Ara na parangoso.” 29 Kaike zagi ta foudui waeni ta minga, neke nohe neke au ghu aianimu. Maneri dike hioi kaike pusu dike va luduru laoi ghu aianimu, ghe dike nai laoi nga ka kaike hekena hisopu, dike hure va tuhu vona laoi ghu ka paetena ani Zisas. 30 Leghuna ketuhi Zisas ia waeni, manei neke kahe ghua iahi, “!To hokoto!” neke ghua. Leghuna ianimu ghe neke turunguhu hinae nga tuna Zisas ia belehuna, neke nai vanani lao ghu God ia tarungana.

31 Ravata iahi mu ravata mala va tana ghini ia Ravata Mala Maghoso ka ira Ziu, ta la au meha ka ia keha ravata. Ravata Mala Maghoso iahi mu neke toraina tongovona fuludu ka ira Ziu, vununa neke au ka ia Mahai Varighara Nganaleghuna Ia Ghahe Fuludu. Vununa ira mane babatu ka ira Ziu e deo gedi ke kabai ghidi ghu ira tinidi lito mane irahi ta reketera ka hekefalahata iranimu ka ia Ravata Mala Maghoso, dike la fangai ghu Paelati ta tuhu laorira ira nona mane mala la gutorira ira ghahedi, edi magali leme ghu. E la ghua ianimu ghe gedi boka hio hinaeri nga ira tinidi ka ira hekefalahata. 32 La meha tuna dike ghua ira mane magara dike la gutori ghu ira ghahena kaike ghu ka ira palu mane dike tupila ghidiro ka hekefalahata taremehana Zisas. Ianimu tuna ghe dike la gutorini nga ira ghahena ia keha mane. 33 Ghe di la meha ghu ka Zisas, maneri dike finini neke to kusu lemena manei, dike deo ghu va gutorira ira ghahena. 34 Kaike ghu ka ira mane magara, neke hioi kaike kolae neke va zoe ghini lao ghu ia ghaghahona Zisas, ianimu lama oraha kavena busaka nia ketuhu. 35 Ara nake finiriro vahina leghutau irahi nga lamu, na turi ghidira maneri, e hohoghona ghu mu nonomoho iahi ka ara. Nia ara na avohi ta hohoghonana mu heve ta kahei ini ara, o boka va hohoghonai haro ghu molamo ghau. 36 Leghutau neke dufu irahi mu, mala va ghuduvudi ira Kakangava Ta Maduana ta kahe ghua iahi, “E deo kaike ghu ka ira humana ta age gutona ghatu,” ^{▼▼19:36 Kave 12:46; Taho 9:12; Samu 34:20} ia ta ghua, 37 nia kehanani mu, “Maneri edi age mato laoi manei ia dike zoeio,” ^{▼▼19:37 Zakaraea 12:10} ia ta ghua, e ghua.

Ia Giugiluna Kraes 19:38-42

Matiu 27:57-61; Maki 15:42-47; Luku 23:50-56

38 Leghuna iahi, Zosepu ia tanina ka ia malau fafaana Arimatia, neke la fangai ia tinina Zisas ka Paelati. Zosepu mu kaike mane neke nonofoi molamo Zisas, ghe neke poikai taghona, vununa manei neke maughidi ghena ira mane babatu ka ira Ziu. Va malumu vanani tuna neke ghua Paelati, neke la hio hinaei ghu Zosepu ia tinina Zisas. 39 Nikodimasi, ia mane neke to la fininio Zisas ka ia redu, neke la meha taremehana Zosepu, hio taremehana mehana litofulu rodana kilo sedi ta riva ghidi ka palu mereseni ta va kudo ghidi maa nia alo, e ghua, mala va guranga ghini laona ka ia tinina Zisas ka ia va tanai maneri palu ia tinina malana ia giugilu. ^{▼▼19:39 haeba vitu ngavuluai gaha paoni} 40 Palu mane irahi dike la hioina ia tinina Zisas dike va piha ghini kodakadi poko lineni ta sodu veveha ghu taremehadira ira sedi, leghuina ia puhina giugilu ka ira Ziu. 41 Ka ia malau dike la tupila ghinio Zisas ka ia hekefalahata mu, e au kaike luru heke ta au kaike lianga beku foforuna, ta deo nga gedi ke nakai ghini noni ta leme ghu maneri. 42 Vununa ravata ianimu neke ravata mala va tana ghini ia Ravata Mala Maghoso ka ira Ziu, nia vununa ia lianga beku neke au namo lao ma, dike la naini ghu ia tinina Zisas maneri palu ka giliona lianga beku ianimu.