Joh 21 | KjiSC | STEP | Leghuna ianimu, Zisas neke podoloni ka ira nona mane ta nonofoi ka ia tapuruna Lokana Galili. Taghe iahi neke ghua ghu podolo ghidira manei.

John 21

Zisas Ne Podolo Ka Vitu Mane Nonofoi

1 Leghuna ianimu, Zisas neke podoloni ka ira nona mane ta nonofoi ka ia tapuruna Lokana Galili. ^{▼▼21:1 ia ta va kudo ghini ia Lokana Taebiriasi haro.} Taghe iahi neke ghua ghu podolo ghidira manei. 2 Saemoni Pita, Tomasi (Sua ia ta ghua ghini), Nafaneli ia tanina Kena ka ia Babarana Galili, ira palu tuunamane Zebedi, nia keha palu mane nonoforani e ghua, dike au varighara haroharora aianimu. 3 Kahe ghua tuna iahi neke ghua Saemoni Pita, “Ara nga a la habuhabu,” neke ghua.

“Ghai a leghuigho molamo,” dike ghua ghini ghu. Di kave lao tuna ka kaike koaka dike ghua, ghe e deo ma dike hio fatina ia redu kamoto.

4 Ka ia ghalaghala mehana ia fugho, ira mane ta nonofoi dike fini laoi Zisas tetu mehana ka ia tapuruna kolo, ghe e deo gedi ke fini avohi ghu manei mu Zisas, ta ghuana. 5 Kudo lao tuna neke ghua Zisas, “?Ghau mane baere, noke boka voloizoghuri mo ghau keha namarira?” neke ghua ghidi.

“Deo ma ngaini,” dike ghua ungene tughuina.

6 Va kahe ghidi tuna neke ghua manei, “O va zoghu hinaei voloizoghu nia visi mautu mo ka koaka nia, ghe go age hiori nga keha namari,” neke ghua ghidi. Riva ghini mamu tuna ianimu, gedi ke deo ghu boka koroho vonaidina voloizoghu ani dike ghua, vununa namari dike aura neke toraina tehi fuludu.

7 Ianimu tuna ghe neke kahe ghua lao nga iahi ka Pita ia mane nonofoi ta namaha ghini Zisas, “Ia Lod konia!” neke ghua ghini. Ne nomohi ghu Saemoni Pita manei mu ia Lod ta ghuana, manei neke va vona leghui ia nona poko sodu (vununa manei neke riva neke to hio kaini ghu) ghe neke zoghu lao nga ka kolono, neke zaha parago ghu. 8 Ira keha mane nonofo dike auro ka koaka ani mu, dike koroho paragoi ia voloizoghu ta foudui namarina, vununa maneri deo gedi ke hauai ghu ka kavao, e nona au ma ka kaike ghobi mita. 9 Di la sabara kalae ghu, maneri dike fini laori keha beretira nia kaike totoi sisibe ta lera, ta au namari momorana, e ghua.

10 “Hio mehari keha namarira ka noke bake sakomori nira mo ghau,” neke ghua Zisas. 11 Lao tuna Saemoni Pita ge la haghe ghu ka koakana, ge la koroho paragoi ghu ia voloizoghu, neke ghua. Kaike ghobi, gahafului lito namari ta faa neke auna, ghe neke ghua mo ianimu tehidira ira namari ghe, ia voloizoghu e deo ma geke reku ghu.

12 “!O meha mahai va fufughona!” neke ghua ghidi Zisas. E deo ma hei neke kabai notohina ghinina hei mo mu manei ta ghuana, vununa maneri dito ke toraina avoho va vehai manei mu ia Lod, ta ghuana. 13 Ianimu tuna ghe neke hioi nga Zisas ia bereti neke vanadi ghu. Manei neke ghua ghidi haroma ira namari. 14 Iahi lamu va litona fafata neke podolo ghidina Zisas ira nona mane nonofoi, leghuna ia tetuleghuna ka ia leme.

Zisas Ne Notohi Pita

15 Leghuna ia mahai va fufugho, Zisas neke notohi Saemoni Pita, “?Saemoni tuunamane Zone, no namaha ghinagu mo agho, fuludu laoina namaha ta vanagu ini keha irahi?”

“Uve, Lod, agho no avohi mo ta namaha ghinighona ara,” neke ghua Pita.

“Neto ghua la, o valihari ira nogu rekahadi sipisipi,” neke ghua va kahe ghinina Zisas.

16 Zisas neke notoho leghuini, “?Saemoni, tuunamane Zone, no namaha ghinagu mo agho?”

“Uve, Lod, agho no avohi mo ta namaha ghinighona ara,” neke ghua Pita.

“Neto ghua la, o hio suteri ira nogu sipisipi,” neke ghua Zisas.

17 Zisas neke notohini manei ia va litona fafatana, “Saemoni tuunamane Zone, no namaha ghinagu mo agho?”

Pita neke age muko hihingona, vununa neto age va litona fafata neke to notohina Zisas. Kahe ghua tuna iahi neke ghua manei, “Lod, agho mu o avohori vahina leghutau nga. Agho no avohi mo ghu ta namaha ghinighona ara.”

“Neto ghua la, o valihari ghedi ira nogu sipisipi,” neke ghua Zisas. 18 “A toraina va kahe ghinigho ghu ia hohoghona, ka fafata noke foforuno nga agho mu, agho noke va vovona nou poko taghou noke lao ghu hae mo noke kabai laona taghou. Nga ka ia tato age noni sepa agho mu, agho o age va fedara kaveri kameu nira ghatu, edi age piligaigho ghu keha nonira mo ghatu, hio laoighona ka ira ta pake gheu laona agho,” neke ghua ghini. 19 Zisas neke kahei iahi mala va podolo vananina Pita ia kokolona leme ta dufui manei ghatu ka kaike hekefalahata mala va varangina God. Ianimu tuna ghe, neke kahe ghua nga iahi Zisas ka manei, “!Leghuau ara!” neke ghua ghini.

20 Ne fihiki liloho ghu Pita, manei neke fini laoi ia mane nonofoi ta namaha ghini Zisas neke leghu laorina leghudi mo. (Iahi mu ia neke rorogho laono ka Zisas ka ia fafata mahai va sasaighona, neke notoho ghuao ghu iahi, “?Lod hei mo ka ghai mu ta age namaha seboighona ghatu?” neke ghuao.) 21 Ne fini laoi ghu mane nonofoi iahi Pita, manei neke notohi Zisas, “?Lod, nga mane iahi mu heve ta age dufuina manei ghatu?”

22 Zisas neke ungene tughui, “?Nato kabai ghini la ara manei ta doli ma ta auna ghu ta ke vuhai leghu mehana ghu ara, heve e ghua mu ianimu ka agho? Agho o leghuau ara,” neke ghua ghini. 23 Ia tuturi alavana, e deo ge age leme ghu ghatu mane nonofoi ianimu, ia ta ghua, neke ongaha ka hoatadi ira keha noni ta va hohoghona. Ghe Zisas deo geke kahei ghu ta deona ge age leme ghu manei. “Nato kabai ghini la ara ta doli ma ta auna ghu manei, ta ke vuhai leghu mehana ghu ara, heve mu ianimu ka agho?” neke ghua ma neke kaheina.

24 Ara lama mu ia mane nonofoi neke notoho ghinio Pita ka Zisas. Ara lamu nake finirira leghutau irahi nake kangava hinaeri ghu aiahi. Ghai haroharo mu a avohi mo ta hohoghodira leghutau ta kangavari irahi ara.

25 Tehini mu keha leghutau neke riva ghidira Zisas. Geke mala kangavari haroharo la, geala e deo bana nga hae ka malau kamoto iahi peka, ta boka nakairira.