Joh 3 | KjiSC | STEP | Kaike mane ka ia pukuna ira Farisi babaolonana Nikodimasi neke auna. Manei mu kaike mane babatu ka ira Ziu.

John 3

Zisas Ghe Nikodimasi

1 Kaike mane ka ia pukuna ira Farisi babaolonana Nikodimasi neke auna. Manei mu kaike mane babatu ka ira Ziu. 2 Kaike redu manei neke meha ka Zisas neke kahe ghua ghu iahi, “Mane Vari Va Kakahei Agho, ghai na avohigho agho neke tuhu mehaighona God mala va kakahe ghini ghaina, vununa e deo hei ta boka riva ghidira ira hahaima va ghilaghila ta riva ghidi agho, neto deo la God ge au taremehana ghu manei.”

3 Zisas neke ungene tughui, “Ara a va kahe ghinigho ghu ia hohoghona, e deo hei ta boka haghelena ka ia ravutu God neto deo la ke uraha leghunana. ^{▼▼3:3 Ba, “uraha ani fate” e au haro molamo ka Zone 3:7}

4 “?Heve e ghua mu ia noni ta faa, ghe ge ke boka uraha leghu nga?” neke ghua notohona Nikodimasi. “!Torai hohoghonana mu, manei e deo boka ke haghele leghuna ka ia tiana nona uke take va palu fafata dolina ghu!”

5 Zisas neke ungene tughui, “A va kahe ghinigho ghu ia hohoghona, e deo hei ta boka haghelina ia ravutu ka God, neto deo la ge uraha ghu ka kolo nia ia Tarunga Ta Maduana. 6 Ia noni mu e hioi ia doli ka malau iahi peka, vununa manei ne doli meha ka nona uke ghe nona mama. Nga hei ia ta doli foforu taremehana ia mana ka ia Tarunga Ta Maduana mu, manei mu e doli meha kaike nona rekaha God. 7 Oka nou fere ghu ka heve ta va kahe ghinigho ini ara ghini take torai age uraha leghuna ghau haroharo. 8 Ia dafe mu e ufu lao hae mo ta kabai laona manei. Agho o nomohi mo ia kurumuna, ghe e deo go avohi gheu ghu hae mo ne la mehana, ba hae mo ne laona manei. Taghe ianimu e ghua, e deo ghu hei ta boka avohina ia ghaghahena ta vanadi doli foforu ira noni ia Tarunga Ta Maduana, ka ia doli vona foforu maneri ka ia Tarunga.”

9 “?Heve ghe ge boka age ghua nga iahi?” neke ghua notohona Nikodimasi.

10 Zisas neke ungene tughui, “Agho mu kaike mane vari va kakahei ta varanga Isiraeli. ?Heve no ghua ghe no deo nga go va fafahakari ghu leghutau irahi? 11 A va kahe ghinigho ghu ia hohoghona, ghai a turi ghini heve ia ta avohi nia heve ia ta finini, ghe ghau e deo ngama go kabai va hohoghonari ghu heve ta va kahe ghini ghau idi ghai. 12 ?Noto deo la go va hohoghona ghu turi vanamuna ara ghidira ira leghutau ka malau iahi peka, heve e ghua ghe go boka age va hohoghona nga ghau turi vanamuna ara ghidira ira leghutau ka malauo God fate? 13 Ara lama ta va fafahakarira mu ira leghutaudi ka malauo God fate, vununa ara ia Tuuna Noni nake hinae meha ka malauo God fate. E deo heini neke hinae mehana ka malauo God fate.

14 “Sepao laoni, ka ia fafata ghaniri tehi adogho ta lelemeana ira noni Isiraeli ka ia malau koroghana ta karango, God neke va kahe ghini Mosese ta riva ghinina kaike adogho ta barasi, mala boka hure vona laoina manei fate ka kaike taghele ta tetu. Mala ira noni dito mato laoi la adogho ani, edi ke age hio va doliri ghu ka ia leme. E ghua molamo ara ia Tuuna Noni, e toraina hure vonau ghu ka hekefalahata, 15 mala heiri haroharo ta va hohoghona ka ara, edi age hioi ghu ia doli soduai.”

16 Vununa God neke puina namaha ghidi fuludu ira noni ka malau iahi peka, neke tuhu hinae mehai ghu ia Tuuna kaikena, mala heiri haroharo ta va hohoghona ka manei e deo ghu boka age lemedira, nga edi age hioi ia doli ta au toghunai. 17 Vununa God e deo geke tuhu hinae mehai ghu ia Tuuna ka malau iahi peka mala faterira ira noni, nga mala meha hio va doliri maneri, neke ghua.

18 Heiri ira ta va hohoghona ka ia Tuuna God mu, e deo ge fateri ghu, nga heiri ira ta deo gedi va hohoghona ghu mu to kusu faterira, vununa maneri dito ke deo gedi va hohoghona ghu ka ia Tuuna kaikena God. 19 Ia varifate mu e dedeke ka iahi. Ia fegala mu neto ke meha ka malau iahi peka, ghe ira noni di namaha ghini ia nagoromo mo, nga eka ghua ghu ia fegala, vununa ira riva ka maneri di muko. 20 Heiri haroharo ta rivai muko mu edi hakohako ghini ghedi ia fegala, e deo ghu age mehadira ka ia fegala, vununa di maughedi age podolodira ira muko ta riva ghidi maneri. 21 Nga heiri ira ta riva ghini heve ia ta hohoghona mu, edi meha ka ia fegala mala va podolina ka ia fegala ira heve dito ke riva ghidiro maneri. Vununa maneri di kabai ghidi ira noni ta avohina God ne toka ghidira ta riva ghidira ira riva ta veha, ta ghuana.

Zisas Nia Zone Ia Ta Rivai Sesele Beana

22 Leghuna ianimu, Zisas nia ira nona mane ta nonofoi dike kave aianihi Zerusalemu dike lao ghu ka ira keha malau teri ka ia Babarana Zudia. Maneri dike auna aianimu keha ravatara, dike seselebeanari ghu keha nonira aianimu.

23 Zone neke rivai seselebeana haro molamo ka ia futuna Aenoni gheremena ia malau fafaana Salimi, vununa neke tehi ketuhu ka malau ianimu. Tehi noni ghu dike lao ma dike aura ghu ka manei, mala la seselebeanarira. 24 Ka fafata iahi mu Zone e deo nga gedi ke nai hagheli ghu ka pipiliga. 25 Kaike mane Ziu neke tatanigai vari tuufuai taremehadi ira mane ta nonofoi Zone ghinina ia ghaghahena mala seseleri ira tinidi leghurira ira puhi mala leghuri ka ira Ziu. 26 Maneri dike lao ghu ka Zone kahe ghuadina iahi, “Mane Vari Va Kakahei Agho, ia mane noke dufuino agho fateo mo ka ia keha pelona Ketuhu Zodani noke tuturi ghinio, ne seselebeanari molamo ira noni, di lao ghu ira leghu noni nga ka manei.”

27 Zone neke ungene tughuri, “Ia noni mu e boka hioi ma heve ia ta vanani lama God, a deo ghu ara ga age ngenengene ghidi ghu ira noni ta lao ka Zisas. 28 Ghau taghomu to avohi nake toraina kahe ghini ghau va vehana ara ghinina eka ghua ghu ia Mesaea mu ara, ta ghuana. God neke tuhu kenu mehau ka manei mala va tanarira ira noni malana ia meha ka manei. 29 Ia Mesaea mu taghe kaike mane ta mala varihio, e ghua. Ia fotati mala varihio mu e nona ghu mane ianimu. Nga ara mu taghe kaike mane baere ka ia mane ta mala varihio, a ghua ma. Mane baere ianimu e puina va manemane neto la meha la ia mane ta mala varihio ka ia varihio. Taghe ianimula a ghua haroma ghu ara. Ara na puina va manemane ka fafata iahi, vununa Zisas neto ke meha. 30 Manei e toraina mala meha varanga fuludu lao, nia ara ga toraina mala meha au ghu peka deona ga tongovona ghu, e ghua.”

31 Manei mu neke la sipa meha fate, e varanga fuluduri ghu heiri haroharo. Heiri haroharo ta sipa meha ka malau iahi peka mu e nona malau iahi peka edi turi ghidi ghu ira leghutau ka malau iahi peka, nga manei ia ta sipa meha ka malauo God fate mu e au ka fatedi vahina leghutau nga. 32 Manei mu e turi ghidi heve ira neto ke finiriro nia nomohoriro e ghua, ghe e deo hei ta va hohoghonaina manei. 33 Heiri ira ta va hohoghonai manei mu, dito va podoli mamu ta toraina hohoghonana God. 34 Ia neke tuhu mehaio God mu, e turi ka ira ngengenena God, vununa God ne vanani ia kamotona mana ka ia nona Tarunga. 35 Ia Mama ne namaha ghini ia Tuuna, neto ke nai laori ghu vahina leghutau nga ka ira kamena manei. 36 Hei ia ta va hohoghona ghu ka ia Tuuna mu e aui ia doli soduai. Nga heiri ira ta deo gedi va hohoghona ghu ka ia Tuuna mu, e deo tufadi ka doli ianimu, nga ia haala ka God e au ka fatedi maneri.