Joh 4 | KjiSC | STEP | Zisas neke avohi dike nomohina ira Farisi neke to seselebeanarira ira noni manei, neke to hio va tehi noni ta nonofoina ghu, fuludu laoina Zone.

John 4

God Ne Va Podoli Ani Samaria Zisas Mu Ia Kraes Taghuana 4:1-42

Zisas Nia Ia Fotatina Samaria

1 Zisas neke avohi dike nomohina ira Farisi neke to seselebeanarira ira noni manei, neke to hio va tehi noni ta nonofoina ghu, fuludu laoina Zone. 2 Ghe Zisas taghona deo geke seselebeanari ghu maneri, nga ira nona mane ta nonofoi mo dike riva ghinina ianimu. 3 Ne nomohi ghu Zisas heve dike va kahe ghinina taghona maneri, manei neke ghahe kaini ia Babarana Zudia neke leghu lao ghu ka ia Babarana Galili.

4 Ka ia ghahe vai laona aianimu, manei neke taono haghele fuludu ka ia Babarana Samaria. 5 Aianihi Samaria, manei neke meha ka kaike malau fafaana babaolonana Sikari, eka hau ghu ka ia birusuna kava Zekopu ia faadi ira Ziu neke vananio Zosepu ia tuunamane taghonai sepaoni. ^{▼▼4:5 Ia Tatanigaina 33:19; Zosua 24:32} 6 Ia seu ka Zekopu mu neke au nga aianimu ka fafata iahi. Zisas neke puina age baelu fuludu ka ia ghaghahe soduai neke nohe maghoso hinae ghu ka gheremena seu ianimu. Ka fafata iahi mu neke nona au ka ia hoatai ravata.

7 – 8 Ira nona mane ta nonofoi mu dike lao ka malau fafaana iahi mala la tabararira keha ghano. La meha mala tokolo vona nona ketuhu tuna kaike fotatina Samaria, ge fanga ghua ghu iahi neke ghua Zisas, “O vanagu ghegu ketuhu ko,” neke ghua ghini.

9 Ia fotati neke kahe ghua iahi, “Agho mu noni Ziu nia ara mu noni Samaria. ?Heve ghe no boka fangau ketuhu nga agho?” neke ghua ia fotati. (Ira noni Ziu mu deo gedi ke au kapa ghu ka ira noni Samaria.)

10 Zisas neke ungene tughui, “Goke avohi lama agho heve mu ta vanadina God ira noni, nia hei mu ta fangaigho ketuhu ini e ghua, geala agho oto ke fangau ara ato ke vananigho ketuhu ta vananigho doli ghu.”

11 “Faghina Agho,” neke ghua ia fotati, “agho mu ta deoigho bakete mala tokolo vona ketuhu ini ka seu ta lao iahi gilioni. ?Hae ghu mu ta boka hioina agho ketuhu ta veha fuludu lao ta va doli noni iahi? 12 ?Agho mu o varanga fuludi Zekopu ia faada neke vanadao seu iahi? Manei taghonai, ira tuuna nia ira nona totopa papausu e ghua dike ketuhuna mu ka seu iahi.”

13 Zisas neke ungene tughui, “Heiri haroharo ta ketuhi ketuhu iahi mu, edi ke age parangoso leghu. 14 Nga hei ia ta ketuhi ia ketuhu ta vanani ara mu, e deo kalasu kai ge age parangoso ghu ghatu. Ia ketuhu ta vanani ara mu taghe kaike futu taka nodo ghu ologhonana e ghua ka giliona manei, vananina ia doli soduai.”

15 “Faghina Agho, o vanagu ko ketuhu ianimu, a mala deo kalasu kai ghu ke age parangosoguna ara, nia ato mala deo ghu ke la leghu meha mala tokolo vona ketuhunani ara ka seu iahi, e ghua,” neke ghua ia fotati.

16 “O lao o la hio mehai ghu ia kerauau,” neke kahe ghua Zisas ka manei.

17 “Ara e deo keraguau,” neke ghua ungene tughuna fotati iahi.

“Hoghou mamu e deo kerauau ta ghua nia agho,” neke ghua ungene tughuina Zisas. 18 “Agho mu noto ke varihio ka gaha mane, nia mane ta au taremehau nia agho ghatunaina tuna, geka torai kerauau la ghu agho, e ghua. Agho noto ke va kahe ghinagu ia hohoghona.”

19 “Faghina agho, ara na boka fini avohi mo, ta kaike mane porofetina agho. 20 Ira faamai meha dike va totoana ghini God ka vuhuku iahi, ghe ghau ira Ziu no kaheina mu, aianihi Zerusalemu geala malau ta mala va totoana ghinina God, no ghua. ?O va kahe vanagu ghu hae mo mu toraina malauna?”

21 Zisas neke va kahe ghini, “Va hohoghonau fotati agho, ia fafata e la meha mo ghatu tadi deo gedi age va totoana ghini ghu ia Mama ira noni ka vuhuku iahi, ba aianihi Zerusalemu. 22 Ghau ira noni Samaria mu e deo go toraina avohi ghemu ghu hei mo no va totoana ghinina, nga ghai ira noni Ziu mu na avohi mo hei na va totoana ghinina, vununa ia ghaghahena mala hio va doliri ira noni mu, God neke tataniga ghini ka ghai ira noni Ziu. ^{▼▼4:22 Ira nonidi Samaria nia ira noni Ziu e ghua dike va totoana ghini haroma Iawe, ia God na Isiraeli taghe God na. Fafahakanana ka ira nonidi Samaria ghe dike deo nga toraina avoho va vehaina Iawe mu, vununa maneri dike sokeri ira leghu buka nga ka ia Baebolo, nga ira gaha buka neke kangavariro Mosese lama dike hiorira.} 23 Ghe ia fafata mu to la meha to kusu au ghu aiahi, ia fafata ta batu ghidi ia Tarunga ira ta hohoghodi va totoanana, mala va totoana ghinina ia Mama leghuina ia hohoghona. Ia Mama mu e haduri kokolodi noni iranimu mala va totoana ghinina taghonai. 24 God mu Tarunga, heiri ira ta va totoana ghini ghu God mu, edi toraina babatu ghidi ia Tarunga mala va totoana ghinina manei leghuina ia hohoghona.”

25 Ia fotati neke kahe ghua iahi, “Ara na avohi mo ta la mehana ghatu ia Mesaea. Manei e age va fafahaka vanamai ghai vahina leghutau nga neto la meha la.” (Ia Mesaea mu ia ta va kudo ghini Kraes maneri.)

26 Va kahe ghini lao tuna neke ghua Zisas, “Ara ta turi taremehau iahi agho lamu, Mesaea na,” neke ghua ghini.

27 Ka fafata ianimu lamu ke leghudira ira mane ta nonofoi. Maneri dike age nodi fere fininina manei turi taremehanana fotati ani. Ghe e deo ma hei ka maneri neke notohina fotati ani, “?Heve no kabai ghinina?” ta ghua ghinina, ba e deo hei neke notohina Zisas, “?Ne heve ghe no turi taremehana nga agho fotati iahi?” neke ghua harona.

28 Nai kaini tuna ia zagi mala hio ketuhu, geke leghu lao ghu ka malau fafaana ani neke ghua ia fotati la kahe ghuana iahi ka ira noni, 29 “!Meha o age finini ghu kaike mane, neke turi vanaguo heve tei ka ira vahina leghutau nake riva ghidiro nga ara! !Haeba manei lamu Mesaea na!” 30 Ghahe kaini tuna ia malau fafaana gedi la finini ghu Zisas, dike ghua.

31 Ghe dike dufui nga Zisas ira noni, ira mane ta nonofoi dike va ohiohini Zisas kahe ghuadira iahi, “Mane Vari Va Kakahei Agho, o hiori keha ghano o mahai ghu,” dike ghua ghini.

32 Ghe Zisas neke va kahe ghidi, “Ara kuru ghegu ghano mala mahai mo, ta deo go avohori ghu ghau,” neke ghua ghidi.

33 “Hei mo neke hio vanani meha ghanona manei?” dike ghua ira mane ta nonofoi vari nonotohodira.

34 Va fafahaka vanadi tuna neke ghua Zisas, “Ghegu ghanona ara mu mala riva ghini ia lao nanafa ka manei neke tuhu mehauo, nia mala va hokotina ia riva neke vanaguo manei mala riva ghinina ara, e ghua. 35 Kaike ngengene ka ghau mu e ghua iahi, ‘Ghita da toraina afani rodana hihileni, ghe ge meha nga mu ia fafata mala haharui ka ira nunuma,’ e ghua. Ghe ara a va kahe ghini ghau ghu, ta mato va veharira ira noni taghe ira galahedi nunuma ira ta ghua. Maneri mu to ghano ghatunaina mala va tanai haharuina. 36 God mu to kusu tabarari ghatunaina ira nona noniriva ta haharuiri ira fuana ia nunuma. Ira fuadi ta haharuiri maneri mu, ira noni ta va hohoghona ka ara ta hioi ghu ia doli soduai. Mala edi va manemane varighara haro ghu ira ta numa ghe ta haharui ghu. 37 Ia ngengene, ‘Ia keha e numa, ia keha e haharui,’ ia ta ghua mu ne hohoghona ghu. 38 Ara na tuhu lao ghau mala haharuina ka noke deono go numa ghu ghau. Kehara mo dike to kusu va hokotina ia riva ngazuluai nia ghau go age hio vehamu ghu ka ira riva maneri, e ghua.”

Tehi Noni Samaria Di Va Hohoghona

39 Ira tehi nonidi Samaria ka malau fafaana ianimu, dike age va hohoghona ka Zisas, vununa ka neke turi ghuao iahi ia fotati, “Manei neke turi vanagu heve tei ka ira vahina leghutau nake riva ghidiro nga ara,” neke ghuao. 40 Ka ia kave mehadi ta la dufui ghu Zisas, maneri dike papadi ta au tadina ka rekahana malaudi ani, neke au taremehadi ghu manei aianimu palu ravata.

41 Tehi laoni ka ira noni Samaria dike age va hohoghonara, vununa ka ia nomohi maneri ia nona nonomoho. 42 Ianimu tuna ghe dike va kahe ghini nga ia fotati, “Ghatunaina ghai na va hohoghona tuna, vununa taghomai nato ke nomohina manei, eka ghua ghu ma ka ira heve noke turi vanamairo agho. Torai manei hohoghona mamu ghu mu ia Va Doli ka malau iahi peka.”

God Ne Ke Va Podolini Ani Galili Zisas Mu Ia Kraes Ta Ghuana 4:43-54

Zisas Ne Va Vehai Ia Tuunamane Ia Manefaa Ta Riva Ka Gaumani

43 Leghudi ira palu ravata neke aurio manei aianimu, manei neke lao ka ia Babarana Galili. 44 – 45 Ka ia la sabarana Zisas ani Galili, ira noni dike hio namahi manei, vununa maneri dike to lao ka ia mahai varighara va manemanena ia Ghahe Fuludu aianihi Zerusalemu, dike to finiri ghu ira vahina leghutau neke to riva ghidiro nga manei. Ghe maneri e deo gedi ke toraina fini avohi ghu hei mu maneina. Taghe neke to kusu kaheio lama manei sepao neke dufuna, “Ia porofeti mu edika heluhelu ghini ghu ka ia nona soloso taghonai,” ia ta ghua.

46 Ianimu tuna ghe neke leghu lao nga Zisas ka ia malau fafaana Kena ka ia Babarana Galili, ka neke fihikinio manei ia kolo ketuhu ka waeni. Ka ia malau leghaha Kapaniumu, kaike manefaa ta riva ka ia gaumani neke fogario ia tuunamane, neke auna. 47 Ne nomohi ghu manei Zisas neke to kave kainina ia Babarana Zudia neke to la dufuna ghu ka ia Babarana Galili, manei neke lao Kena neke la papadi ghu Zisas ta mala mehana Kapaniumu mala va vehaina ia tuunamane neke to namo leme ghenao.

48 Va kahe ghini lao tuna neke ghua Zisas, “?Heve, ghau noni deo go age va hohoghona ghu ka ara, o vuhai finiri ghu ira hahaima va ghilaghila ta fefereana?” neke ghua.

49 “Lod, oto meha ko agho ghatunaina, ghe ge leme nga ia tuugu mane,” neke ghua ia manefaa ta riva ka gaumani.

50 Ghe Zisas neke kahe ghua iahi, “Oke leghu lao ka nou sugao, ia tuu mane e ke age doli ghena mo ghatu,” neke ghua ghini. Ia mane neke va hohoghonari ira ngengene ka Zisas, neke tatanigai leghu lao ghu ka suganao.

51 Ka ia ghahe vai hinae leghu manei ka suganao, ira nona noni riva dike dufui manei dike va kahe ghini ghu tato ke veha ghenana ia tuunamane. 52 Ne notohori ghu manei ghinina nihao neke age vehana tuunamane ani, maneri dike kahe ghua iahi, “Ka nakele kaikeu leghuna ia hoatai ravata norao neke age noghana ia fogara dangava ka manei,” dike ghua ghini.

53 Ianimu tuna ghe neke age ngana avohi nga nona mama rekaha mane ini, ia torai fafata neke kahe ghuao iahi Zisas, “Ia tuu mane e ke age doli ghena mo ghatu,” neke ghua ghinio. Manei nia ira noni haroharo ka suga ani dike va hohoghonara ghu ka Zisas.

54 Zisas neke riva ghini hahaima va ghilaghila iahi leghuna ghahe kaini Zudia ta ke leghu lao ghu Galili. Tarmehadi laora ira keha hahaima va ghilaghila neke riva ghidiro manei aianihi Zudia mu, iahi lamu ghu mu va paluna hahaima neke riva ghinina manei ani Galili.