Joh 6 | KjiSC | STEP | Leghuna iahi, Zisas neke fera kadoli ka kaike koaka ia Lokana Galili, ia ta va kudo ghini ia Lokana Taebiriasi haro.

John 6

Maneri Di Huhai Ka Ia Mahai Varighara Nganaleghuna Ia *Ghahe Fuludu Ani Galili 6:1-71

E Fuludi Gaha Togha Noni Neke Valiharira Zisas

Matiu 14:13-21; Maki 6:30-44; Luku 9:10-17

1 Leghuna iahi, Zisas neke fera kadoli ka kaike koaka ia Lokana Galili, ia ta va kudo ghini ia Lokana Taebiriasi haro. 2 Ia leghahaina varigharana noni dike ghahe leleghui manei, vununa maneri dike finiri ira hahaima va ghilaghila neke riva ghidiro manei, ka ia va vehari manei ira noni dike fogarariro. 3 Ka ia la sabaradi ka ia keha pelona loka, Zisas neke vona lao ka ira voruhu, neke la nohe hinae ghu, taremehadira ira nona mane ta nonofoi, mala va kakahe ghidira. 4 Ka fafata ianimu, ia Mahai Varighara Nganaleghuna Ia Ghahe Fuludu neke to namo. 5 Ne mato liloho ghu Zisas, manei neke finini ia leghahai varigharana noni dike ghahe vona lao ka taghona, neke notohi ghu manei Filipi, “?Filipi, hae mo ta boka la tabara bereti va tehina ghita ta mala valiharira ghu noni haro irahi?” neke ghua ghini. 6 Manei mu neke suna notoho mala va sisiva ghini ma Filipi, nga neke to kusu avohi mo heve neke mala age riva ghinina manei.

7 Filipi neke ungene tughui, “Geta au ghita ghu ia tabara fatana ka hana hihile ghe, e deo ma ghe ge boka age fata ghu mala tabara ghano fatadira maneri haroharo ta boka age sopa hio kipenana ghu maneri.”

8 Ianimu tuna ghe neke ngengene lao nga ka Zisas kaike ghu ka ira nona mane ta nonofoi, Aduru ia tahina mane Saemoni Pita, 9 “?Kaike rekaha mane aiahi ne aui mo gaha bereti tetepele nia palu pakeledi namari e ghua, ghe heve mo ta boka age veha ghinina leghahaina varigharana noni iahi mu ka ghano teri irahi?”

10 “Kahe ghidi haro edi nohe hinae ghu,” neke ghua Zisas. Maneri haro dike nohe hinae ka ia tabafena ta sesehui. Ira mane lama mu, dike to dufu ka gaha togha varigharadira. 11 Ianimu tuna ghe neke hiori nga Zisas ira bereti, neke kudo vehai ghu God, ghe neke vanadi lao nga ira noni. Taghe iala neke ghua ghidi molamo ira namari. Maneri haroharo dike mahairi taghe niha ghu dike kabai ghinina. 12 Ka ia tato age hoviri haroharo maneri, Zisas neke kahe ghua iahi ka ira nona mane ta nonofoi, “Varighara ghidi ghano kunudi nira, e deo ghu heve ta pepesanana” neke ghua ghidi. 13 !Sene varighara ghidi tuna, gedi va fouduri ghu tazoi palu maka ka ira kipedi bereti dike kunuro ka dike mahairo ka ira gaha bereti tetepele, dike ghua!

14 Di finini ghu ira noni hahaima va ghilaghila neke riva ghini iahi Zisas, maneri dike tatanigai kahe ghua iahi, “!Torai iahi lamu ghu mu ia Porofeti, ia ta mala meha ka malau iahi peka!” dike ghua. 15 Zisas neke avohi ta kabai va tutuufu ghinina maneri mala va tetu mane ginitaukelaina, neke ghahe kakaike vona laoni ghu manei ka ira voruhu.

Zisas Ne Ghaghahe Ka Ia Kolo

Matiu 14:22-33; Maki 6:45-52

16 Ka saighona ianimu ira nona mane ta nonofoi dike hinae lao peka ka gheremena ia loka. 17 Ka ia nagoromona nga ka fafata neke deono nga ge lao ghu Zisas ka maneri, maneri dike la haghe vona ka kaike koaka, nia tatanigai fera kadolo lao tuna ka ia loka, vai laodina ka ia malau fafaana Kapaniumu, dike ghua. 18 Deo ma sepana neto dufuri ghu ia leghahai dafe ta gigima torai va raghi geoina ia loka ka ia fafata gelugelu ta lao ghu maneri. 19 Neke to age nona au ka gaha, ba onomo kilomita hauaidira dike fini laoi ghu maneri Zisas aianimu ghaghahe vai laona ka koaka ani ka ia fatena kolo. Maneri dike age puina maughedi fuludu, 20 ghe manei neke kudo ghua lao iahi, “!Ara lama ngama ini! Oka maughemu ghu,” neke ghua ghidi. 21 Ianimu tuna ghe dike oho’oho nga dike va malumi ghu ta va hagheina ka ia koaka. Ka fafata ianimu lama dike la sabara ghu ka ia malau dike kabai la dufuno.

Zisas Ia Bereti Ta Va Mehai Ia Toraina Doli Hohoghona

22 Ka ia keha ravata, ira varigharadi noni dike auro leghu ka ia keha pelona loka, dike la hadui Zisas, vununa maneri dike avohi Zisas nia ira nona mane nonofoi e ghua dike kaike meha mo, ghe ka ia ke ghahedi ka ia koaka ira mane nonofoi, Zisas neke au hinae mo leghu. 23 Keha koakadira Taebiriasi dike sabara ka ia gheremena malau ka neke va beanio ia bereti ia Lod dike mahainio ghu ira noni. 24 Di deo ghu ira noni kalae la finiridira Zisas nia ira nona mane ta nonofoi e ghua, dito haghe vona ma ka ira nodi koaka dike to kadolo lao ghu ka ia malau fafaana Kapaniumu, la haduina Zisas. 25 Ka ia la sabaradi ta la finini ghu ka ia keha pelona loka, maneri dike notohi, “?Mane Vari Va Kakahei Agho, nihao meha dufuna agho aiahi?” dike ghua ghini.

26 Zisas neke ungene tughuri, “A va kahe ghini ghau ghu ka ia hohoghona, no haduau nga ara ghau mu, vununa ghau noke mahaini ia bereti, neke age hovi ghau haro ghu, nga noke va fafahakari ira hahaima nake riva ghidiro ara, eka ghua ghu. 27 Nga ghau geala oka ngana tahuri ghu ira leghutau ta age nogha taghe ia ghano. Nga o voriti ghini haduina ia doli soduai ta boka vanamu ara, ia Tuuna Noni. Vununa God ia Mama ne vanagu mana ara mala riva ghinina ianimu.”

28 “?Heve mo geala tada riva ghinina ghita, da mala riva ghini ghu heve ne kabai ghini ghitana God ta mala riva ghinina?” dike ghua notohina Zisas.

29 Va kahe ghidi tuna neke ghua Zisas, “Riva ne kabai ghini ghauna God ta mala riva ghinina mu ia ta va hohoghona ka ara, ia neke tuhu mehauo taghonai,” neke ghua ghidi.

30 Ke notohi tuna dike ghua ira noni, “?Heve mu hahaima va ghilaghila ta riva ghinina agho mala va hohoghonaighona ghai neke tuhu mehaigho mamu God, ta ghuana? ?Heve ta age riva ghinina agho ghatu?” dike ghua ghini. 31 “Taghe dike ghuaro la ira faada dike mahairiro ira bereti ta va kudo ghidi ‘manna’ ka ia malau koroghana ta karango! Iahi mu ne kahei mo ka ira Kakangava Ta Maduana, ‘Mosese neke vanadi beretina ka malauo God fate mala mahaina,’ ^{▼▼6:31 Kave 16:4; Nehemaea 9:15; Samu 78:24,25} ia ta ghua.”

32 Ianimu tuna ghe neke kahe ghidi nga Zisas, “Ara a va kahe ghini ghau ghu ia hohoghona, Mosese deo geke vanadi beretina ghu ka malauo God fate, nga nogu Mama mo neke vanadina. Nia ghatunaina ge vanamu ghu ia bereti ta hohoghona ka malauo God fate, e ghua,” neke ghua ghidi. 33 “Vununa bereti ta va mehaina God mu manei ia ta hinae meha ka malauo God fate ta vanani doli ghu malau iahi peka,” ne ghua ghidi.

34 “Lod, ghatunaina e vai vona ghu o vanamai bereti iahi,” di ghua ira noni.

35 “Ara lamu beretina dolina,” ne ghua ghidi Zisas. “Heiri ira ta meha ka ara, e toraina deo gedi age nodi liha ghu, nia heiri ira ta va hohoghona ka ara, ge toraina deo ghu age parangosodira, e ghua. 36 Geta toke finiau mo ghau ghe, ghau e deo ma ghe go va hohoghona ghu, nake ghua ghini ghau mo sepao. 37 Heiri haroharo neto ke vanaguo ia Mama mu, edi meha mo ka ara ghatu, toraina deona ga age sokeri ghu ara. 38 Vununa ara nato ke sipa meha ka malauo God fate, mala meha riva ghidira ira nona lao nanafa God, nga aka mala riva ghidi ghu heve ira ta kabai ghidi taghogu. 39 E lao nanafa ghu ka manei neke tuhu mehauo mu, ta toraina deona ga mala age siana ghini ghu ara kaike noni tei ghu ka heiri haroharo neto ke vanaguo manei, ghe ianimu ghu mu, ka ia va nonoghana ravata ghu geala ta age va tetu leghurira ara ka ia doli soduai. 40 Vununa lao nanafana ka nogu Mama mu, heiri haro ta finini ia Tuuna ta va hohoghona ghu ka manei mu, edi toraina age hioi ia doli soduai. Ianimu ghu mu, ka ia va nonoghana ravata ta age va tetu leghurira ara maneri ka ia leme.”

41 Ira noni dike age tatanigai ngunungunu ghini manei, vununa manei neke kahe ghua iahi, “Ara mu ia bereti neke hinae mehao ka malauo God fate,” neke ghua. 42 Kahe ghua tuna iahi dike ghua, “Iahi mu Zisas ia tuuna Zosepu. Ghita da avohori mo nona mama nona ukena manei. ?Heve ghu ghe, ge boka kahei nga manei mu, ‘Ara nake hinae meha ka malauo God fate,’ ta ghuana?” dike ghua.

43 Ghe Zisas neke va kahe ghidi, “Oka ngenengene ghidi ghu ghau heve nake kaherira ara. 44 Ira noni e deo boka mehadira ka ara, neto deo la ia Mama neke tuhu mehauo ge batu ghidi meha ghu ka ara. Heiri ira ta meha ghu ka ara mu, ake age va tetu leghuri ara ka ia leme ka ia va nonoghana ravata. 45 Taghe iahi la, dike kangavio ira Porofeti, ‘Maneri haroharo, God e age va kakahe ghidi,’ ia ta ghua. ^{▼▼6:45 Asaea 54:13} Heiri haro ta nomohi ia Mama ta hio avoavoho ghu ka ia Mama mu, edi meha ka ara. 46 E deo hei neto ke finina mu ia Mama, nga ara ia nake sipa mehao lama ka God nato ke fininina ia Mama.

47 “Ara a va kahe ghini ghau ghu ka ia hohoghona, hei ia ta va hohoghona ka ara mu e aui doli soduai. 48 !Ara lamu ia beretina doli! 49 Ira faamu ghau dike mahai manna ka ia malau koroghana ta karango, ghe maneri haroharo dike leme mo. 50 Nga, ia bereti ta sipa mehana ka malauo God fate mu, ia kokolona neto mahaini la noni, e deo gedi boka age leme ghu. 51 Ara mu ia bereti ta vanamu doli neke hinae mehao ka malauo God fate. Hei ia ta mahaini bereti iahi mu, e age doli toghunai. Ia bereti ta age vanamu ara malanana ia dolina malau iahi peka mu, ia vilahigu.”

52 Ianimu lama dito age tatanigai vari tuufuai ghu ira noni kahe ghuadira iahi, “?Heve e ghua mane iahi ghe, ge boka va valiha ghini ghita nga vilahina ini?” dike ghua notohodira.

53 Ghe Zisas neke kahe ghuani iahi, “A toraina va kahe ghini ghau ghu ara. Noto deo la ghau go mahaini ghu vilahigu ini nia ketuhi ghu busakagu ini ara, ia Tuuna Noni, e deo ge boka au ghu ia doli soduai ka ghau. 54 Nga ira ta mahaini ia vilahigu, nia ketuhi ia busakagu ara mu, edi auri ia doli soduai, ake age va tetu leghuri ghu ara ka ia va nonoghana ravata. 55 Vununa vilahigu ini mu e torai ghano hohoghona, nia busakagu ini mu e torai ketuhu hohoghona, e ghua. 56 Heiri haroharo ta mahaini vilahigu ini, nia ta ketuhi busakagu ini mu, edi au ka giliogu ini ara, nia ara ga au ghu ka giliodi maneri, e ghua. 57 Ia Mama ta doli mu neke tuhu mehauna ara, nia vununa ghini manei na doli haro ghu ara. Taghe iala molamo heiri haroharo ta mahaini vilahigu ini ara mu edi age doli ghedi haro ghu, vununa ara a age vanadi ghatu ia doli soduai. 58 Ara mu ia bereti neke hinae mehao ka malauo God fate. Hei ia ta age mahaini bereti ianimu, e age hioi ghatu ia doli soduai. Ara mu taghe ia bereti dike mahainio ira faamu eka ghua ghu. Maneri dike mahaini mo bereti ianimu ghe, dike leme soni mo.”

59 Manei neke kaheri leghutau irahi ka ia fafata vari va kakaheina ka ia suga mala varighara ira Ziu aianihi Kapaniumu.

Tehi Noni Ta Nonofoi Di Ghahe Kaini Zisas.

60 Di nomohi ghu iahi ira tehi nona noni ta nonofoi, dike kahe ghua iahi, “Iahi mu toraina marutana va fafahakina. ?Hei mu ta boka leghuina?” dike ghua.

61 Zisas neke to avohi ma taghona dike ngunungunu ghinina iahi maneri, neke kahe ghua ghu iahi, “?Heve, vari va kakahei iahi ne va sasake ghau ka ia nomu va hohoghona?” neke ghua ghidi. 62 “?Heve o age ghua ghu ghau mu nganganamuna, noto finiau la ghatu ara ia Tuuna Noni, ke leghu laoguna ka malauo God fate? 63 Ia Tarunga lamu ta vanadana ia doli soduai. Nga ia voriti ka ia noni mu e deo heve ta boka va ghorevuraina. Ira toraina ngengene nato ke kaheriro ara ka ghau mu sipadi ka ia Tarunga ta va meha doli. 64 Ghe kehara ka ghau deo go va hohoghonau ghu ara.” Zisas neke to kusu avohi ka ia tatanigaina, heiri mu dike deora gedi va hohoghona ghu, nia hei mu neke mala age namaha seboina, e ghua. 65 Kahe ghua tuna iahi neke ghua Zisas, “Ianimu lamu fafahakanana mu ka ia kahei ara, ira noni e deo gedi boka meha ghu ka ara, neto deo la hio meharira taghonai ia Mama, nake ghuao.”

66 Leghuna kahei Zisas iahi, tehini ka ira noni ta nonofoi dike ghahe kaini manei, dike deo ghu va nunumaina. 67 Ianimu tuna ghe neke fihiki lao nga ka ira tazoi palu nona mane ta nonofoi, neke notohori ghu, “?Heve, ghau no kabai ghahe kaiau haroma ara?” neke ghua ghidi.

68 Pita neke ungene tughui, “?Lod, ka hei mo ta boka laona ghai? Agho lama ta auighona ira ngengene ta vanamai ia doli soduai,” neke ghua Saemoni Pita. 69 “Ghai na va hohoghonaigho nia avohi, agho mu Ia Ta Maduana ka God, ta ghuana.”

70 Kahe ghua tuna iahi neke ghua Zisas, “Ara lamu nake faete ghauna ghau tazoi palu mane, ghe kaike ghu ka ghau mu kaike Faghinadi ira nazahi.” 71 Manei mu neke turi ghini Zudasi ia tuunamane Saemoni Isikarioti, kaike ghu ka ira tazoi palu mane ta nonofoi ia neke mala age namaha seboio manei.