Joh 7 | KjiSC | STEP | Leghuna iahi, Zisas neke ghahe liloho ma aianihi ka ia Babarana Galili. Manei neke kabai au kave ka ia Babarana Zudia, vununa ira mane babatu ka ira Ziu aianimu dike kabai va lemei manei.

John 7

Maneri Di Huhai Ka Ia Mahai Varighara Nganaleghuna Ia Ghaghahe Au Ka Ira Rorofe Ani Zerusalemu 7:1–10:21

Ira Tahina Mane Kraes Deo Gedi Va Hohoghona Ghu Ka Manei

1 Leghuna iahi, Zisas neke ghahe liloho ma aianihi ka ia Babarana Galili. Manei neke kabai au kave ka ia Babarana Zudia, vununa ira mane babatu ka ira Ziu aianimu dike kabai va lemei manei. 2 Ghe ia fafatana ia Mahai Varighara Nganaleghuna Ia Ghaghahe Au Ka Ira Rorofe to namo, 3 dike kahe ghini ghu Zisas ira tahina mane ta laona manei aianihi ka ia Babarana Zudia ka ia mahai varighara va manemane. “!O lao ka ia ta boka fini tau ira nou mane ta nonofoigho nou hahaima nira!” dike ghua ghini. 4 “!Ira noni ta kabai varanga mu, edika poikari ghu ira heve ta riva ghidi maneri! Vununa agho no riva ghidi leghutau irahi, o va podoligho ghu taghou ka malau kamoto iahi peka!” dike ghua ghini. 5 Ira tahina mane ghe, deo haro gedi ke va hohoghonai ghu manei.

6 “Ghatunaina mu e deo nga ge lotorona fafata mala lao ghu ka ara, nga ka ghau mu, fafata e ghua ma ta lotorona,” neke ghua ghidi Zisas. 7 “!Malau iahi peka mu e deo ge kikipana ghini ghau ghu ghau, nga ne kikipana ghinagu ara mo, vununa ara na makuti ka ia muko ta riva ghini manei! 8 Ghau o lao mo ka mahai varighara nganaleghu ani. Ara mu e deo nga ga age ghu ka nganaleghu iamu, vununa ia fafata ta lotoro ka ara e deo nga ge meha ghu.” 9 Au hinae mo tuna Galili neke ghua Zisas.

Zisas Ka Ia Mahai Varighara Nganaleghuna Ia Ghaghahe Au Ka Ira Rorofe

10 Ghe leghuna ka dike to ghahe laoro ira tahina mane ka ia nganaleghu, ghe neke ghahe poika lao nga molamo Zisas aianimu. 11 Ka nganaleghu ianimu, ira ta babatu ka ira Ziu dike hadui Zisas dike notoho ghu, “Hae mu mane ianimu,” dike ghua. 12 Ia ngunungunu poika ghini manei neke age faa ka vari hoataidi ira varigharadi noni aianimu. Kehara mu dike kaheina, “Manei mu mane vehana,” dike ghua. Nga kehara dike kaheina mu, “Deo, manei ne sebori ira leghu noni nga,” dike ghua ghini. 13 Ghe e deo ma hei neke turi ghini kavena manei ka kenudi ira noni, vununa maneri dike maughedi ka ira ta babatu ka ira Ziu.

Zisas Ne Vari Va Kakahei Ka Ia Nganaleghu

14 Hoata ghu ka ira vitu ravatana ia nganaleghu, Zisas neke ghahe vona lao ka ira galahedi ka giliona ia Sugana God neke la tatanigai vari va kakahei ghu. 15 Ira ta babatu ka ira noni Ziu dike age nodi fere nomohina manei. “?Ne heve ghe ne puina avohori nga manei leghutau dake sikolu ghidiro ghita, neke deono manei geke sikolu ghidi ghu?” dike ghua notohodira.

16 Va kahe ghidi tuna neke ghua Zisas, “Vari va kakahei irahi ka ara mu eka nogu ghu taghogu, nga nona God neke tuhu mehauo. 17 Hei ia ta kabai riva ghini ia lao nanafa ka God mu, e age avohi mo dito tau la ka God vari va kakahei irahi, ba dito tau lama ka ara. 18 Heiri ira ta va podolori ira nodi ngangana taghodi mu edi hadu va vonavona maladi taghodi, nga hei ta hadu mala va vonavonaina hei neke tuhu laoio mu, e turi ghini ia hohoghona, e deo sesebo ghu ta auna ka manei. 19 !Mosese mu neke vanamuna ghau ia vetula, ghe e deo hei ka ghau no leghuina ia vetula! ?Ne heve ghe no ghorevaha mala atunguau nga ara?”

20 “!Agho mu ne sukuigho nazahi! ?Hei mu ne voritai atungighona agho?” dike ghua ia varigharana noni.

21 “Ara nake riva ka ia Ravata Mala Maghoso va vehaina kaike mane, ghe ghau noke zea vanamu,” neke ghua ungene tughurira Zisas. 22 “Ghe ghau no riva molamo ka ia Ravata Mala Maghoso leghuina ia ungene va gigima ka Mosese ghinina ia papahe va ghilaghila. Ghe eka Mosese ghu mu neke vanamuna ungene va gigima iahi nga ira faamu ghau mo. 23 Taghe neto hoto la ka ia Ravata Mala Maghoso ia lotorona fafata mala papahe va ghilaghilaina ia tuu mane, o riva ghini agho ianimu, o mala deo ghu huhughimuna ia vetula ka Mosese. ?Heve ghu ghe no hala ghau nga ghau ka ara, ka ia va veha kamoti ara kaike mane ka ia Ravata Mala Maghoso? 24 Oka fatei ghu ia noni ka ira ta finiri lama agho, nga o varifate ka heve ia ta lotoro ka ira nahalina God,” neke ghua ghidi Zisas.

?Zisas Lamu Mesaea na?

25 Kehara ka ira noni ta au Zerusalemu dike kahe ghua iahi ka vari taghodi, “?Eka ghua ghu iahi baia mu ia mane ta kabai atungi maneri?” dike ghua. 26 “Ghe manei mu tato turi iahi ma ka kenudiari ira noni, ghe e deo ma heve ta kaheina maneri ka manei. ?Ba, dito avohi ira ta babatu ka ghita mu manei lamu torai Mesaea na, ta ghuana? 27 ?Ghe heve e ghua ghe ge boka la ghua nga ianimu? Vununa ghita ta avohini mo tanina hae mu manei, ta ghuana. Neto la meha la ia Mesaea mu, manei e suna la podolo meha ma. E deo hei ta age avohina mu, tanina hae mo manei, ta ghuana.”

28 Ka ia fafata vari va kakaheina Zisas ka ia Sugana God, manei neke kudo lao, “Uve, ghau no avohoau mo ara, nia tanigu hae mu ara ta ghuana, e ghua. Ghe ara e deo ga meha ghu ka ia nogu mana mala kopu taghogu. Ara mu neke tuhu mehau Ia ta hohoghona, ia ta deo go avohi ghu ghau. 29 Ara na avohi mo manei, vununa ara mu nake to sipagu meha ka manei, neke tuhu mehau ghu manei ka ghau.” 30 Ianimu lama dike to kabai sakomo hioi ghu maneri, ghe e deo ma hei neke posi laoina, vununa ia fafata ka manei neke deo nga ge dufu ghu.

31 Tehini ka ira varigharadi noni ka ia Sugana God dike age va hohoghona ka manei. “?Neto la meha la ia Mesaea, e age rivai tehi hahaima va ghilaghila mo manei fuludina mane iahi?” dike ghua.

Ira Mane Magara Di Va Ghahe Laori Mala Sakomo Hioina Zisas

32 Di nomohori ghu ira Farisi ira leghutau dike ngunungunu ghidiro ira varigharadi noni ghinina Zisas, maneri nia ira hiama ta kenu e ghua, dike tuhu laori keha mane magara ta kopu ka ia Sugana God mala la sakomo hioina. 33 Ghe Zisas neke va kahe ghidi, “Ara a au taremehamu birusuna ma ghatunaina, ghe gake leghu lao nga ka Ia neke tuhu mehauo. 34 Ghau o age haduau ara ghatu, ghe e deo go age finiau ghu. Ghau e deo go boka lao ghu ka ta auna ara.”

35 Ira Ziu dike kahe ghua iahi ka vari taghodi. “?Hae mo ne nganai laona mu manei, ghe gada deo nga ghita boka fininina?” dike ghua notohodira. “?Haeba manei neke nganai ghahe kaini bana nga soloso ini, e la va kakahe ghidi ghu ira Ziu ka ira keha soloso, ba haeba ka ira noni taka Ziu ghu, e ghua?” dike ghua. 36 “?Heve mo fafahakanana mu ta kahe ghua ini iahi manei, ‘Ghau o age haduau ara ghatu, ghe e deo go age finiau ghu,’ nia ‘Ghau e deo go boka lao ghu ka ta auna ara,’ ta ghua ini manei?”

Zisas Ne Naiungene Ghini Ia Ketuhu Ta Doli Fuludai

37 Ka ia va nonoghana ravata, ta torai tongovona fuludu lao ka nganaleghu ianimu, Zisas neke tetu vona ghe neke kudo lao nga ka ia varigharana noni, “!Noto parangoso la ghau, o meha ka ara o ketuhu ghu!” neke ghua ghidi. 38 “Hei ia ta va hohoghona ka ara mu, ‘ia ketuhu ta va meha doli, e age futu kave meha ka giliona manei,’ ia ta kahe ghua ka ira Kakangava Ta Maduana.” 39 Zisas mu neke turi ghini ia Tarunga Ta Maduana ia ta mala age vanadi ira leghu noni ta va hohoghona nga ka manei. Ghe ia Tarunga neke deo nga geke va mehai ghu, vununa Zisas neke deo nga geke tetu leghu ghu ka ia nona varanga.

Isiraeli Ne Fota Vununa Ghini Kraes

40 Ka ia nomohi iahi ira varigharadi noni, maneri dike kahe ghua iahi, “Torai manei lamu ghu mu Porofetina,” dike ghua. ^{▼▼7:40 Ngengene 18:15-19 God neke nai ghini ungene ta ke tuhu mehaina kaike porofeti taghe Mosese e ghua.}

41 Kehara tuna dike kaheina mu, “Mane iahi lamu ia Mesaea,” gedi ghua ghu dike ghua.

Ghe keharani dike kaheina mu, “Deo, ia Mesaea e deo ge boka la sipa meha ghu Galili,” dike ghua. 42 “Ira Kakangava Ta Maduana dike kaheina mu, ia Mesaea mu e la meha ka ia pagusu ia Ginitaukela Deveti, e age uraha ghu ghatu ka ia malau fafaana Betilehemu, ka neke urahao Deveti, neke ghua.” 43 Ia varigharana noni neke age fota vununa ghini Zisas. 44 Kehara ka maneri dike kabai sakomo hioi manei, ghe deo ma hei neke posi laoina.

Ira Farisi Nia Ira Mane Babatu Ka Ira Ziu Di Deo Gedi Va Hohoghona Ghu Ka Zisas

45 Va nonoghanana ira mane magara ta kopu ka ia Sugana God dike tuhu laorio mala sakomina Zisas, dike leghu lao ka ira hiama ta kenu nia ka ira Farisi e ghua. Notohori tuna ira mane magara dike ghua maneri, “?Ne heve ghe noke deo nga go hio mehai ghu?” dike ghua kahe ghidi va gigimana.

46 “!E deo nga hei neto ke ngengenena ka ghaghahena taghe ta ghua ini mane iahi!” dike ghua ungene tughuna ira mane magara.

47 “?Heve, manei neto ke age hio va zea ghau haroma ghau?” dike ghua ira Farisi va siredira. 48 “?Hei ka ghai ira ta babatu ba ira Farisi mu ne va hohoghonana ka manei? 49 !Deo ma! Ghe varigharana noni iahi mu, deo gedi avohi ghu ia vetula, di zoghuri ghu tibiri ka God.”

50 Ianimu tuna ghe neke ngengene vona nga Nikodimasi, ia mane babatu neke dufuio molamo Zisas. 51 “Ia vetula ka ghita eka fatei ghu ia noni to deo la ge kusu nonomoho ghu ka manei, ta hadu kaveina ghu heve neto ke riva ghinina manei,” neke ghua.

52 “?Agho mu taniu haroma Galili?” dike ghua ungene tughuina. “O hadu ka ira Kakangava Ta Maduana o finini ghu taghoughi ta deona porofeti ta sipa mehana Galili!”

53 Ianimu lama age noghanana ia haedu, dike to sura ghu maneri haroharo ka ira sopai sugadi, dike ghua. ^{▼▼7:53 Ira kakangava ta toraina sesepadi nia toraina vehadi e ghua ka Giriki, e deo ge au ghu tuturina fotati ta poho iahi zave kunuina keranau ia ta kangavi ka 7:53-8:11.}