Joh 8 | KjiSC | STEP | Nga Zisas mu neke leghu lao ka ia Vuhukuna Olivi.

John 8

Ia Fotati Neke Pohono Zave Kunuina Keranau

1 Nga Zisas mu neke leghu lao ka ia Vuhukuna Olivi. 2 Ka ia nganai fughona ia keha ravata, manei neke leghu ka ira galahedi ka giliona ia Sugana God. Ira leghu noni nga dike la meha ka manei, neke nohe hinae ghu va kakahe ghidira manei. 3 Ne vari va kakahei ghu manei, ira mane ta vari va kakahei ghini ia vetula beana ka God nia ira Farisi e ghua, dike hio haghele mehai kaike fotati, dike pohoino zave kunuina keranau. Nakaini tuna ka kenuna ia varigharana noni dike ghua.

4 “Mane Vari Va Kakahei Agho, fotati iahi nake pohoi zave kunuina keranau. 5 Ka ia vetula mu, Mosese neke ungene va gigima ta fera va lemeina ka ghahipa kokolona fotati ta riva ghinina iahi. ?Heve no ghua ghu agho?” dike ghua ghini.

6 Maneri dike va sisiva ghini Zisas ta mala kaherina manei keha leghutau ta zea ta boka mala hio vonai maneri ka koti. Ghe Zisas neke rorogho hinae, ghe neke tatanigai kakangava nga ka ia kilona ka fatena kava ani. 7 Ka ia tetu notohi ta au ghu maneri, manei neke tetu nadoro vona, ghe neke va kahe ghidi lao nga, “Hei ka ghau neto deo la ge rivai sasake ghu, manei lamu ta kusu va fera ghini lao ghahipana fotati iahi,” neke ghua ghidi. 8 Ianimu tuna ghe neke rorogho hinaeni nga manei neke kakangava ghu ka fatena kava ani.

9 Di nomohi ghu neke kahei ani Zisas, kaikeu, kaikeu dike to ghua ma sopai ghahedira, tatanigaina ka ira noni sepa nogha ghu ka ira noni ta foforu. Va nonoghanana, Zisas lama neke to age au kakaikena taremehana fotati neke tetu neke au ani ghu ka kenuna manei. 10 Ianimu tuna ghe, neke tetu vonani nga Zisas, neke kahe ghua ghu iahi ka fotati ani, “?Hae mu ira dike makutighoro? E deo ma hei ka maneri ne au hinae mala makutighona?” neke ghua ghini.

11 “E deo ma Lod,” neke ghua ia fotati.

Kahe ghua tuna iahi neke ghua Zisas, “Ara e deo haroma ga makutigho ghu agho. O boka ghahe gheu mo ghu, ghe oka ke riva ghidi leghu ghu ira leghutau ta muko.”

Zisas Ia Fegala Ka Malau Iahi Peka

12 Zisas neke kahe ghuani iahi ka ira noni, “Ara mu ia fegala ka malau iahi peka. Hei neto leghuau la ara, manei e deo ge boka age sinabere ghu ka ia nagoromo, vununa manei e age kurui ia fegala ta va mehai ia doli soduai.”

13 “!Agho no turi kave vananigho ma taghoughi, e deo ghu ta hohoghonana ka heve ta kahei nia agho, vununa e deo heini ne kaheina di hohoghodi ta ghuana!” dike ghua ungene tughuina ira Farisi.

14 “Geta turi ghu ara ghinaguna taghogu ghe, e hoghogu mo ta kaheridi ara, vununa ara na avohi hae nake sipa mehana, nia hae na laona e ghua. Nga ghau mu e deo go avohi ghu hae nake sipa mehana ara, ba hae na laona ara. 15 Ghau mu, o fateau ara ka ia avoavoho ia noni, nga ara mu aka varifate ghu ka ghaghahena ianimu. 16 Ghe nato varifate la ara, ia varifate ka ara e lotoro mo, vununa ara e deo ga au kakaike ghu. Ia Mama neke tuhu mehauo ara ne au taremehagu mo aiahi. 17 Ia vetula ka taghomu ta kaheina mu, taghe palu noni dito turi ghini la kaike leghutau mo, turi ianimu ka maneri palu mu e hohoghona, e ghua. 18 Ara lamu kaike ghu ta mala turi kave ghinaguna ara, nia nogu Mama neke tuhu mehauo tuna kehana, e ghua.”

19 “?Hae mu nou mamana agho?” dike ghua notohina.

“Ghau e deo go avohoau ghu ara, ba nogu Mama. Goke avohoau la ara ghau, geala ghau o avohi molamo nogu Mama,” neke ghua ungene tughuna Zisas. 20 Zisas neke turi ghidi turi irahi ka ia fafata vari va kakaheina ka giliona ia galahena ka gheremena ia mala nakai kakai ka ia Sugana God. Ghe maneri e deo gedi ke sakomi ghu manei, vununa ia nona fafata e deo nga geke dufu ghu.

21 Leghuna ianimu Zisas neke kahe ghuani iahi ka maneri, “Ara mu na ghahe, o age haduau ghu ghau ghatu, ghe ghau e deo go boka dufu ghu ka ia malau ta lao ara. Ghau mu o age leme ghatu, nia God e deo ge age kai hazari ghu ira sasake ka ghau, e ghua.”

22 Ira ta babatu ka ira Ziu, dike notoho, “?Heve, fafahakanana iahi mu manei e age atungi taghonai baini? Haeba ianimu lamu fafahakanana ghe neke va kahe ghini ghita nga manei ‘Ghau e deo go boka meha ghu ka ta laona ara, ta ghua ini,’” dike ghua.

23 Ghe Zisas neke ungene tughuri, “Ghau mu tanimu peka, ara mu tanigu fate. Ghau mu tanimu ka malau iahi peka, ara mu deo. 24 Ianimu la ghe nake kahei nga ara mu, ta age lemena ghau ghatu, e deo ghu God ge age kai hazari ghu ira muko ka ghau. Uve, noto deo la ghau go va hohoghonai ghu, Ara Taghogu Ia Ara Taghogu ta ghuana, ghau o age leme taremehadi ira sasake ka ghau.” ^{▼▼8:24 Ka ia fafata neke kahe ghuao iahi Zisas, “Ara Lamu Arana” neke ghuao, manei ne kahei taghonai mu God, ne ghua. Manei ne kaheri ma ghu ira varifatadi ngengene neke kaheriro God ghinina taghonai ka ia fafata neke turi laono manei ka Mosese. Fini Ia Kave 3:14}

25 “O va kahe ghini ghai, hei mo mu agho,” dike ghua notohina.

“Ara lamu ghu mu manei ia nake va kahe ghini ghau ma nake mehao ghu,” neke ghua ungene tughuna Zisas. 26 “Tehi leghutauni ta mala kaheina ara ghini ghauna ghau nia tehini ta mala kahe tono ghauna e ghua. Ghe ara a suna kaheri ma heve nake nomohoriro lama ka manei neke tuhu mehauo. Manei mu e hohoghona ghu.”

27 Maneri e deo ma gedi ke va fafahaki ghu manei mu neke turi vanadi ghinina nona Mama, ta ghuana. 28 Kahe ghua tuna iahi neke ghua Zisas, “Ka ia tato hure vonau ghau ara ia Tuuna Noni ka ia hekefalahata, ghe go age ngana avohi nga tuna ghau mu, Ara Taghogu Ia Ara Taghogu, ta ghuana. Ghau o age avohi haro molamo ta deona ara ga leghuri ghu ira nogu ngangana taghogughi ka ia riva ghini kaike leghutau ghu, nga na suna kaheri ma heve neke va kakahe vanaguo nogu Mama. 29 Manei neke tuhu mehauo ara mu, e au tagu tudu ma ara. Manei e deo geke ghahe kaiau ghu ara, vununa ara na riva ghidi tudu ma ira leghutau ta veha vanani manei.” 30 Ka ia fafata nomohori maneri kaherina Zisas leghutau irahi, tehi nonini dike age va hohoghonana ka manei.

Ia Hohoghona E Age Va Kalasigho

31 Zisas neke kahe ghua iahi ka ira Ziu dike va hohoghonaro ka taghona, “Noto va hohoghonari la to au ghu ghau nogu vari va kakahei idi, ghau mu toraina nogu noni mala nonofoau hohoghona. 32 Age avohi tuna ghau ia hohoghona, ge age va kalasa ghau ghu hohoghona ianimu, e ghua.”

33 “Ghe ghai mu ira pagusuna meha ghu Ebarahamu,” dike ghua ghini. “Ghai mu e deo ngama ghe gake noni mala varituhu ghu ka hei noni. ?Heve ghu fafahakanana ka agho mu, ‘Ghau e age va kalasa ghau,’ ta ghua ini?”

34 “A va kahe ghini ghau ghu ia hohoghona, leghu noni ta riva ghidi nga ira ta muko mu, to paufuri ia sasake. 35 Ghau haro to toraina avohi ia noni ta mala varituhu mu, eka au toghunai taremehana ghu ia faghina ta taghoi manei. Nga ia torai tuuna ia faghinana ia suga mu, e age au toghunai taremehana nona Mama, e aui ghu ia mana ta varifata ka manei. 36 Ianimu la ghe, neto va kalasigho la ia Tuuna, agho mu to toraina age kalasa gheu hohoghona. 37 Ara na avohi mo ta pagusu mehana ghau ka Ebarahamu, ghe kehara ka ghau no kabai atunguau ara, vununa ghau e deo go kabai leghuri ghu ira vari va kakahei ka ara. 38 Ara mu na va kahe ghini ghau heve neto ke va podolo vanaguo nogu Mama, taghe ghau la ta riva ghini nia heve ia neto ke va kakahe ghini ghauno nomu mama.”

39 “Nomai mamana ghai mu Ebarahamu,” dike ghua ghini.

Ghe Zisas neke kahe ghua iahi, “Goke nona rekaha hohoghona la ghau Ebarahamu, geala ghau oke leghui ia au doli ta veha ka manei. 40 Ara nake va kahe ghini ghau ia hohoghona nake nomohio ka God, ghe ghau no ghorevaha ghini mala va lemeauna ara. Ebarahamu e deo geke riva ghini ghu kokolona leghutau ianimu. 41 Ghau mu no riva ghini heve ia ta toraina riva ghini ia torai nomu mama hohoghona.”

“!Ghai e deo gake doli meha ghu ka kikirase! God lama mu toraina nomai mama hohoghonana ghai, a torai tuuna hohoghona ghu manei mu ghai,” dike ghua ghini.

42 Zisas neke va kahe ghidini, “Neto ke God la mamu nomu mamana ghau, geala ghau o namaha ghinagu ara, vununa ara nato ke la sipagu meha ka God, nato au ghu aiahi ghatunaina. Ara aka meha mo aiahi ka ia nogu lao hihingo taghogu, nga manei neke tuhu mehauna. 43 ?Heve ghe noka va fafahaki nga ghau heve ta kahei ini ara? Vununa ghau no pake ghemu hioina vari va kakahei iahi ka ara. 44 Ghau mu nona rekaha nomu mama ia Faghinadi ira nazahi, o kabai riva ghidi ghu ira leghutau ta muko ta riva ghidi manei. Manei mu neke vari atungu ka ia tatanigaina, neke hakohako ghini tudu ma ghu ia hohoghona, vununa ne deo hohoghona ta auna ka manei. Ka ia turi sebo manei, manei ne va podoli ia toraina aꞌauna taghonai, vununa manei mu ia ta sesebo, ia nodi mama ira leghu sesebo nga. 45 Ianimu la ghe, nato turi ghini la ara ia hohoghona, no deo nga ghau go va hohoghonau ghu. 46 ?Hei ka ghau mu, ta boka va podolina ne hotoau sasake mamu ara ta ghuana? ?Tato va kahe ghini ghau ini ara ia hohoghona mu, ne heve ghe noka va hohoghonau nga ghau? 47 Hei ia ta nona God mu, e va manemane nonomohona ka ira heve ta kaheri God. Ghau mu eka nona ghu God, ghe no deo nga go nonomoho ghu.”

48 “?Na sebo ghemai ghai mu ka ia fata kahei agho mu kaike noni ta sota tanina Samaria ta sukuigho nazahi, nake ghua ghinighono?” dike ghua sakolina.

49 “Ara e deo ge sukuau ghu nazahi,” neke ghua Zisas, “Ara mu a heluhelu ghini nogu Mama, nga ghau mu no ngovala va mukoau ara, deona go heluhelu ghinagu ghu ara. 50 Nia geta deo ghu ara ga kabai va varangau ghu taghogu ghe, God mo ne kabai va varangauna ara. Manei lamu ta mala varifatena ghu. 51 A va kahe ghini ghau ghu ia hohoghona, hei neto leghuri la nogu vari va kakahei idi, manei e toraina deo hohoghona ge age leme ghu.”

52 Kahe ghua tuna iahi dike ghua ira Ziu, “Ghatunaina na avohi ghu tuna ta sukuigho nazahina agho. Ebarahamu nia ira porofetina ghe dike leme nga, ghe no kaheina agho mu, heiri ira ta leghuri ira nou vari va kakahei mu, e toraina deo hohoghona gedi age leme ghu, no ghua. 53 ?Agho mo ta varanga fuludu laoina mu noda mama Ebarahamu neke lemeo? Nia ira porofeti gedi ke leme haro ghu molamo dike ghuaro. ?Hei mu taghou no ghua agho nganganauna?”

54 Zisas neke ungene tughurini, “Nato va vonavonau la ara taghogu lama, va vonavona ianimu e deo fafahakana ma. Nga nogu Mama mo mu ne va vonavonauna ara. Manei ia toraina nomu God, ta ghua ghini nia ghau. 55 Ghau e deo go toraina avohi ghu manei, nga ara mu na avohi mo manei. !Taghe gake kahei la ara, na zea ghini ghegu manei ta ghuana, geala ara a noni sesebogu taghe ghau la a ghua! Nga ara mu na avohi manei, a leghuri ghu ira heve ta kaheri manei. 56 Ia faamu Ebarahamu, neke va manemane fini vai kenuina ia meha ka ara. Manei neke finini fafata ianimu neke va manemane ghu.”

57 “Agho mu e deo ghe go dufui ghu gahafulu komuhu. ?Heve e ghua ghe, go boka kahei nga agho mu, noto ke finini Ebarahamu ta ghuana?” dike ghua ira noni.

58 “!Torai hohoghonana mu, ara to kusu au, ghe neke doli nga Ebarahamu!” neke ghua ungene tughuna Zisas. ^{▼▼8:58 Ne kaheina Zisas aiahi mu, taghonai mu God ne ghua.} 59 Ka neke kahe ghuao ianimu Zisas, ira noni dike posi vona ghahipa mala va fera ghini laona manei. Ghe Zisas neke ghahe poika ka giliona ia varigharana noni, neke ghahe kaini ghu ia Sugana God.