John 9

Zisas Ne Va Vehai Ia Mane Ta Doli Kivi

1Ne ghaghahe ne lao ghu Zisas, manei neke fini kaike mane neke doli kivi. 2“Mane Vari Va Kakahei Agho,” dike ghua notohona ira nona mane ta nonofoi, “?Heve ne ghua mane iahi ghe, neke doli kivi nga? ?Neke la vuha meha ka ira sasakena taghonai, ba ka ira sasakedi nona uke ghe nona mama?”

3“Eka vuha meha mo ka ira sasakena taghonai, ba ka ira sasakedi nona uke ghe nona mama,” neke ghua ungene tughurina Zisas. “Ghe neke doli kivi nga manei mu, e mala boka fini ghu ia mana ka God ta rivana ka manei, neke ghua. 4Vununa ghatunaina ka malai ravatana nga nia ka malai kuru ghita nga fafata e ghua, da toraina riva vanani ghu ghita nogu Mama neke tuhu mehauo ara. Vununa taghe ta ghua la ka ia redu e ghua, e deo ghu boka ke rivana kaike mane ka leghuna ia leme ka manei. 5Ghe ka ta au ini nga ara ka malau iahi peka mu, ara lamu fegalana ka malau iahi peka.”

6Leghuna kahei iahi Zisas, manei neke kakamisu hinae ka kavana, neke rivai nepete ghu ka ira okona, ghe neke va guranga ghini lao nga ka ira hibana ia mane ta kivi. 7“Lao, o la dadalo kairi ghu nepete nira ka ia kolobakuruna Silomu,” neke ghua ghini. (Fafahakanana babaolo Saelomu ta ghua iahi mu “Neke Tuhu Laoi” e ghua.) Lao tuna ge la tihi kairi ghu ira nepete, geto ke age vovoho fifini ghu neke ghua ia mane, ianimu tuna ghe neke leghu lao nga ka suganao.

8Ira ta au namoi, nia ira keha noni dike to fininio fafangana manei, dike vari nonotoho, “?Eka ghua ghu mane iahi mu ia ta fani nohe ta fafanga ghu baini?” dike ghua. 9Kehara dike kaheina mu, manei lamu, dike ghua, nia kehara tuna gedi ke kahe ghua ghu iahi dike ghua, “!Deo, taghe fifinina manei ne suna ghua ma!” dike ghua.

Ghe ia mane ta fafanga neke kaheina, “!Ara lamu mane ianimu!” neke kahe ghua ma neke au ghu.

10“?Heve neke ghua ghu ghe no age vovoho fifini nga agho ghatunaina?” dike ghu notohina.

11Va kahe ghidi tuna neke ghua manei, “Ia mane Zisas ia ta ghua ghini, neke rivai nepete neke va guranga ghidi ghu hibagu idi. Ghe neke kahe ghinagu nga ta laona ka ia kolobakuruna Saelomu ta la dalorina ghu hibagu idi. Na la riva ghini ghu ara ianimu, nato ke age vovoho fifini ma.”

12“?Hae mo mu manei ghatunaina?” dike ghua notohona.

“Ara e deo ga avohi ghu,” neke ghua ghidi.

13Ianimu tuna ghe dike hio laoi nga tuna ka ira Farisi ia mane neke to doli kivi mehao. 14Ia ravata neke rivai nepeteo Zisas neke va vehaio ghu ia mane mu, ka ia Ravata Mala Maghoso ira Ziu. 15Ira Farisi dike notoho va huhugunai ia mane ghinina heve neke ghua ghe neke vovoho fifini nga ta ghuana. Va kahe ghidi tuna neke ghua manei. “Manei neke va guranga ghidi nepete hibagu idi. Na la tihi kairi ghu ara, nato ke age boka fifini ma,” neke ghua ghidi.

16Kehara ka ira Farisi dike kahe ghua iahi, “Mane Zisas iahi mu, e deo ge sipa mehana ghu ka God, vununa manei ne riva ka ia Ravata Mala Maghoso.”

Keharani tuna gedi ke kahe ghua ghu iahi dike ghua, “?Heve e ghua ira ta auri sasake ghe, gedi boka riva ghidi nga hahaima va ghilaghila ta ghuara irahi?” Age au tuna ia vari fotai ka ira ngangana vari hoataidi maneri, dike ghua.

17Ianimu tuna ghe dike notohini nga ira Farisi ia mane neke doli kivi mehao, “?Heve mu ta kaheina agho ghinina manei, vununa manei neke va vehariro hibau nira?”

“Manei mu kaike porofeti,” neke ghua ungene tughuna ia mane.

18Ira ta babatu ka ira Ziu e deo ma gedi ke va hohoghonai ghu neke kivina manei, take age vovoho fifinina ghu. Kudo hagheleri tuna nona mama ghe nona uke, dike ghua. 19“?Iahi lamu ghu mu ia tuumu mane ghau palu neke doli kivi meha noke ghua ghinio? ?Heve neke ghua ghe neke boka age vovoho fifini nga manei?” dike ghua notohorira.

20“Ghai palu noni, na avohi mo ta tuumai manena manei, nia na avohi mo neke doli kivi mehana manei, e ghua” dike ghua ungene tughuna nona uke ghe nona mama. 21“Ghe e deo ga avohi ghemai ghu heve neke ghua ghe neke boka vovoho fifini nga manei, ba, hei mo neke va vehaina manei. O notohi taghonai, manei to manefaa e boka ungene tughu ghau mo ghu taghona.” 22Ghe dike kahe ghua nga iahi maneri palu mu, vununa dike maughedi ka ira ta babatu ka ira Ziu. Maneri dike to kahe kavei ta mala nai kaveina ka ia suga mala varighara ira Ziu hei noni ta kaheina, Zisas mu ia Mesaea, ta ghuana. 23Ianimu la ghe dike kahe ghua nga iahi nona uke ghe nona mama, “Manei mu to manefaa to boka turi ghu taghonai. O notohi ma taghonai,” dike ghua nga.

24Ka ia va paluna fafata, ira ta babatu ka ira Ziu dike kudo haghele leghuini ia mane neke doli kivio, dike va kahe ghini ghu. “O va varangi God turi ghinina ia hohoghona, vununa ghai na avohina mu, Zisas e au sasakena.”

25“Ara e deo ga avohi ghu, manei mu e au sasakena, ba deo, ta ghuana,” neke ghua ungene tughuna ia mane. “Nga ta avohina ara mu iahi, ara nake kivi ghe ghatunaina ara nato vovoho fifini!” neke ghua ghidi.

26“?Ghe heve neke riva ghinina ghu manei?” dike ghua notohina. “?Heve neke ghua va vehaighona manei?”

27“Ara nake to kusu va kahe ghini ghau, ghe ghau e deo ma goke va hohoghona ghu,” neke ghua ungene tughurira manei. “?Ne heve ghe noke kabai nomoho leghuini nga? Ghau no kabai ghini haro ta mala meha nona noni mala nonofoina manei?” neke ghua ghidi.

28Ianimu tuna ghe dike tibirini nga kahe ghuana iahi, “Agho mu nona mane mala nonofoi manei, nga ghai mu nona mane mala nonofoi Mosese. 29Ta avohina ghai mu, God neke turi ka Mosese, nga mane iahi mu, ghai e deo ghe ga avohi ghu hae mo neke la sipa mehana.”

30“!Ka fefereana fuludura!” neke ghua ungene tughuna ia mane. “Neke va vehari mo manei hibagu idi ara, ghe ghau e deo ngama go avohi ghu hae mo neke la sipa mehana manei! 31Ghita da avohi mo God taka nonomohona ghu ka ira ta kuru sasakedi, nga manei e nonomoho ka heiri ira ta va totoana ghini, ta riva ghini ghu ia nona lao nanafa. 32Ka ia tatanigaina meha malau iahi peka, e deo nga hei noni neke va vovoho fifininina ia noni ta doli kivi meha. 33Geke deo la ge sipa meha ghu ka God mane iahi, geala e deo heve ta boka riva ghinina manei.”

34“?Agho noke dolio ka giliona muko mu, ta kabai va kakahe ghini ghaina ghai?” dike ghua ghini. Nai kavei tuna ka ia suga mala varighara ira Ziu dike ghua.

Kivi Ka Ia Tarunga

35Ka ia age nomohi Zisas heve neke to dufuna, manei neke la dufui ia mane, neke kahe ghua ghu iahi, “?No va hohoghona mo agho ka ia Tuuna Noni?” neke ghua ghini.

36“Hei mu manei, faghina agho, a va hohoghonai ghu ara?” neke ghua ia mane.

37“!Agho to finini manei!” neke ghua Zisas, “!manei lamu ta turi taremehau iahi agho ghatunaina!”

38“!Uve Lod,” neke ghua ia mane, “ara na va hohoghona mo!” Ianimu tuna ghe neke torongaghituturu hinae nga manei, neke va totoana ghini ghu Zisas.

39Ianimu tuna ghe, neke kahe ghua nga iahi Zisas, “Ara mu nake meha mala fateri ira noni ka malau iahi peka, mala ira ta kivi edi boka fifini ghu, nia edi mala age kivi ghu ira noni di vovoho fifini ira ta ghua ka ira nganganadi.”

40Kehara ka ira Farisi dike auro aianimu dike nomohi manei kaheina iahi, dike notohi ghu, “?Na kivi ghai, no ghua mu agho?” dike ghua.

41“Goke kivi la ghau goke deo ghu avohimuna heve neke kabai ghinina God, geala e deo ge hoto ghau ghu sasake. Ghe vununa ghau no kahei ta boka fifinina mo nia no kahei ta avohina mo heve ne kabai ghinina God, ne hoto ghau ma ne au ghu ira sasake ka ghau.”