Jude

Zudi Zud Zudi Ia Leta Ka Zudi Ia Leta Ka Zudi Va Kenuna Tuturi Ghinina Leta Iahi

Ia Ponoena Va Fafahaka Ghinina Leta Iahi

Ia leta ka Zudi mu e toraina fuluduri ira keha leghu leta nga ka ia Foforuna Naiungene vari va kakahe ghini va gigima laonani ghidira ira ta vari va kakahei sesebo dike to meharo ka giliona ia kiloau. Ira leta ka Polo nia ira keha leta ka ia Foforuna Naiungene e ghua mu, edi turi ghini haro molamo ghinina ia mamarutana ka ira ta vari va kakahei sesebo.

Hei Neke Kangavina Leta Iahi

Leta iahi mu neke kangavi Zudi ia tahina mane Zisas nia ia tuunamane Zosepu ghe Mere, e ghua (Matiu 13:55). Papaguaina kaikeu ne tuturi ghini molamo Zemesi ia ta Totonu, ia keha tahina mane Zudi. Manei mu neke mane babatu ghu ka ia kiloau ani Zerusalemu neke kangavi ghu ia leta ka Zemesi.

Ka Fafata Neke Kangavina

Zudi neke kangavi leta iahi haeba ka vari hoataidi 50 nia 100 A.D., e ghua, leghuna ia urahana Zisas. Haeba manei neke kangavi iahi ka vari hoataidi A.D. 60 nia 66, e namo lao ghu ka ia fafata neke kangavio Pita ia va paluna leta ka manei.

Torai Papataidi Nganganara Ka Leta Iahi

Zudi ne ngengene va gigima ghini ia lelemeana ka ira ta vari va kakahei sesebo nia ghinina heve e ghua ira ta leghui Zisas torai tetu kaputurira maneri. Manei ne vari va kakahei ghinina ia ta age fateri ghatu God ta zeana ira ta vari va kakahei sesebo ka ia sokei maneri ia mana mala kopu ka Kraes. Zudi ne kaheina, Zisas mu ia Lod ghatunaina, nia e deo va nonoghana e ghua.

Ira Papataidi Tuturi Ka Giliona Leta Iahi

1. Va Kenuna Pagahaina: Fafahakanana ghe neke kangavi nga Zudi leta iahi 1:1-4

2. Va Paluna Pagahaina: Zudi ne tuturi ghini taghe heve tadi ghuana ira ta vari va kakahei sesebo 1:5-16

2.1 Heve neke ghua faterira ira ta vari va kakahei sesebo sepao 1:5-7

2.2 Taghe heve edi ghua mu ira ta vari va kakahei sesebo 1:8-13

2.3 God e age fateri ira ta vari va kakahei sesebo 1:14-16

3. Va Litona Pagahaina: Ia kudo mala tetu va gigima kaputuri ira ta vari va kakahei sesebo 1:17-23

4. Va Rodanana Pagahaina: Ia tarai helahela 1:24-25

Va Kenuna Pagahaina: Fafahakanana Ghe Neke Kangavi Nga Zudi Leta Iahi 1:1-4

1 Leta iahi mu sipana ka ara Zudi ia mane mala varituhu ka Zisas Kraes nia ia tahina mane Zemesi e ghua.

Ara na kakangava age ka ghau neto ke kudo ghauno God. Ghau mu no vari parekete taremehana God ia Mama, vununa manei ne namaha ghini ghau nia Zisas Kraes ne kopu ghini ghau va veha, e ghua.

2 Ara na tarai fangai, e faa fuludu lao ghu age dudumana ghini ghauna God, nia va foudu ghauna ka ia nona bule nia namaha, e ghua.

3 Vanamu ghau ira nogu baere ta namaha ghini ghau ara. Sepao ara nake to puina hagala ghini ta kakangava vanamu age ghinina ia hio va doli neke to vanadao God ghita haroharo. Ghe ghatunaina mu ara na puina hivoroau ta torai mala kakangava vanamu ghinina keha leghutauna mo. Ara na kabai va gigima ghau ghu ta tetu va gima kaputurira, ira ta kabai va sisiva holari ia vari va kakahei ta hohoghodi. God neke vanada ghita ira nona noni, vari va kakahei iahi malana leleghu fafata, deona ghe ge holara ghu manei. 4 Na kahei nga ara iahi mu, vununa keha noni ta deo gedi nomohi ghu God dito ke suku haghele poika age ka vari hoataimu ghau. Di kaheina maneri mu, vununa God neto ke kai hazari ira muko ka ghita, e veha mo ghu ta mukona ka zave, edi ghua. Maneri e deo ghu gedi lao hihingodi ghu ta leghuina Zisas Kraes ia noda kaikena Faghina nia Lod, e ghua. Ghe sepaoni, neke to kahe kavei ghu ka ira Kakangava Ta Maduana mu, ta mala fateri ta va kilasarira ghu God maneri.

Va Paluna Pagahaina: Zudi Ne Tuturi Ghini Taghe Heve Tadi Ghuana Ira Ta Vari Va Kakahei Sesebo 1:5-16

Heve Neke Ghua Faterira Ira Ta Vari Va Kakahei Sesebo Sepao

5 Geta to avohori mo ghau leghu irahi nga ghe, ara na kabai ke va kahe ghini ghau leghuni neke hio va dolirio ia Lod ira nona noni Ziu ka ia hio kaveri aianihi Izipi. Ghe leghunana, manei neke age atunguri soni mo ira noni dike deoro gedi va hohoghona ghu ka manei. 6 Nia ara a ke va ngana ghini ghau leghu haroni, ghidira ira engizeli dike lao hihingo ghinio ta ghahe kainina ia papalana mana mala kopu neke vanadio God, dike ghahe kaini ghu ia toraina malaudi taghodi. God neto ke piliga nakairi gilio ka seni taka boka ukuhu ghu ka ia malau ta nagoromo, au afa ghinina ia ravata leghaha mala varifate. 7 Nia oke ngana laorina ira noni dike auro ka ira malau leghaha aianihi Sodomu nia Gomora, nia ka ira malau fafaadi gheremedi mo e ghua. Maneri dike epu taremehadi ira dike deoro gedi keradiau ghu nia dike riva ghidi ira ta muko fuludu lao ka ianimu ka ira ghaghahedi zave ta muko ka ira tinidi, e ghua. God neke age huara va mukori malau leghaha iranimu ka totoi, iahi mu kaike va ghilaghila ghu mala va podolina God ghatu e age va vavahagalari heiri haroharo ta muko ka ia totoi ta burungu fuludai, ta ghuana.

Taghe Heve Edi Ghua Mu Ira Ta Vari Va Kakahei Sesebo

8 E ghua molamo ianimu ka ira noni ta vari va kakahei ta sesebo ta au ka vari hoataimu ghau. Noni irahi mu edi kahe va gigimai ta kururi manana ka ira nodi epu baghunai ta mala kikirasena. Maneri edi sokei ghu ia mana mala kopu ka God nia maneri edi ungene va mukori molamo ira engizeli ta muko nia ta veha, ta kururi mana, e ghua. 9 Ghe Maekolo ia engizeli ta kenu ka ira leghudi engizelina ghe, neke deona ge makuti ghu ia Faghinadi ira nazahi ka ia fafata vari tuufuai ghini maneri palu ghinina hei mo ta hioina ia tinina Mosese. Nga neke kaheina manei mu, “Ia Lod ta age va vavahagalighona ghatu,” ^{▼▼1:9 Ka Diutoronomi 34:5-6 ne kaheina mu ia Lod neke gilu ghini Mosese ka ia solosona Moabu. Ka papaguaina 1:9 Zudi ne turi ghini ia tuturi ta deo ge au ghu ka ia Baebolo. Tuturi iahi mu e va kudo ghini “Ia Vona Lao Ka Mosese.” Tuturi iahi mu dike kangavi ka ira keha buka sepa. Ira noni neke kangava laoio leta iahi Zudi mu, haeba dike avohi mo tuturi iahi.} neke suna ghua ghini ma. 10 Ghe ira noni ta vari va kakahei sesebo, edi mala vela nodi nia kahe va mukori edi ghua ira leghutau ta deo gedi avoho va fafahakari ghu maneri. Noni iranimu ghu mu, taghe ira va vuha, taghe pusiri meusuri ira taka va fafahaka ghu ghidira ira leghutau, edi ghua. Vununa maneri di suna riva ghidi ma ira leghutau ta kuhana ghidi ira tinidi, e age ngovala va mukori ghu ghatu God. 11 !Ka puina age mamaghuanara ka maneri ghatu! Vununa maneri di leghui ia nai malaba ta muko ka Keni neke atungio sepaoni Ebolo ia tahina mane taghonai. Maneri di riva ghini taghe neke riva ghinio lama Belamu, di leghui ghu ia va zezea ka manei ka ia batu ghidi lao ira noni ka ia muko mala rivai rongona. Nia maneri dito ke tetu magari God, taghe neke riva ghinio la Kora. Vununa ghidi leghu irahi nga, God e age ngovala va mukori ghu ghatu.

12 Ka ia fafata varighara ta mahai varighara va manemane ghini ghu ia namaha ka ia Lod ghau ira ta va hohoghona, noni vari va kakahei ta sesebo irahi edi holara taremehamu mala va mukoina ia mahai beana ka ghau. Geta nganari ghu ma taghodi lama maneri ghe, maneri edika haghava ghedi ghu. Maneri edi boka va mukoi mo ia va hohoghona ka ghau, taghe ta ghua niala kaike zao ta lelemeana ia ta boka va mukoi kaike vaka. E tehi fuludu ta nai ghidi ungenera maneri, ghe deo ma tuna heve tadi va podolina, edi ghua, taghe ira toba ta dumisi la ta dafe laori ka fatena kaike malau ta karango e ghua, ghe deo ma tuna ge nanare ghu, ia ta ghua. Maneri mu taghe ta ghua nira la ira heke ta deo fuadi ka ia fafata mala haharui, edi ghua. Taghe ira heke ta huba vona taremehadi la ira zagharadi edi ghua, edi toraina age leme ukuhu lao ghu. 13 Maneri mu taghe ira tokofo ta mamaghuana ka ia tahi, ta va podolo vona ngorongoro ta sota edi ghua ka ira puhidi ta hahaghavana ta riva ghidi maneri. Maneri mu taghe ira kukudi babaghunu ta zoghu hinae meha ka kolangana edi ghua, vununa edi age au toghunai ka giliona kaike malau ta toraina duduru nagoromo, neto ke kusu va tanaio God maladira maneri.

God E Age Fateri Ira Ta Vari Va Kakahei Sesebo

14 Adamu lamu ia va kenuna pagusu neke kusu au mehana sepaoni. Nia Inoke neke auno ma ka ia va vituna pagusu tuna, geke kusu turi ghidi kenu mo ghu noni ta muko irahi, kahe ghuana iahi, “!Fini! Ia Lod ne meha taremehadi ira tehi nona togha engizeli ta beana, 15 mala faterira ira noni haroharo, nia ta mala va kilasarira ira ta deo gedi leghui ghu God e ghua, vununa ka ira leghutau ta muko dito ke riva ghidiro maneri taga tetuina manei. Nia manei e age va kilasari ghatu ira ta auri muko ta huhai God, vununa ka ira vahina leghutau ta muko nga, dito ke va kahe ghinio God maneri.”

16 Noni irahi edi ngunungunu tudu ma, nia edi va zutuzutu ghidi lao ira keha noni edi ghua, ghe gedi leghuri nga tuna ira nodi lao hihingo ta muko taghodi. Maneri edi turi va varavarangari taghodighi nia turi va lomolomosori ira keha noni edi ghua mala hio vehana ka taghodi.

Va Litona Pagahaina: Ia Kudo Mala Tetu Va Gigima Kaputuri Ira Ta Vari Va Kakahei Sesebo 1:17-23

17 Ghe ghau ira nogu baere ta namaha ghini ghau ara, o toraina ngana leghuri heve dike va kahe ghini ghauro sepao ira mane nonomoho ka ia noda Lod Zisas Kraes. 18 Maneri dike kahe ghua iahi ka ghau, “Ghe geke la leghu meha nga Zisas ka ira va nonoghadi fafata, keha nonira edi age vela ghini ia Lod nia ira nona noni e ghua nia edi age leghuri haro ira lao hihingo ta muko ka taghodi, e ghua,” dike ghua. 19 Maneri mu to au ghu aiahi ghatunaina nia maneri lamu tuna gedi rivai fofota ghu ka vari hoataimu ghau, e ghua. Maneri edi au ma ka ira au dolidi ka malau iahi peka, vununa ia Tarunga ka God e deo ge au ghu ka maneri.

20 Ghe ghau ira nogu baere ta namaha ghini ghau ara, ara na kabai ghini ghau ta vari va gigimaina ka ira vari va kakahei dake hioriro ka God, mala ghau o age tetu va gigima ghu. Ka ia fafata tarai ghau, o va malumi ia Tarunga Ta Maduana ta batu ghini ghauna. 21 Ghau o au ka ia kokolona au doli ta boka va beana ghau ka ia nona namaha God, ka ia au afa ghini ghau ia noda Lod Zisas Kraes mala vanamuna ia doli soduai ka ia nona dudumana.

22 Fini dudumana ghidi heiri ira ta ngana palupalu. 23 O koroho leghuri mala hio va dolirira ira ta leghui ia hangana ta ghahe vai lao ka ia totoi ta burungu fuludai, mala edi ke la leghu meha ghu, leghuina ia hangana ta ghahe vai lao ka ia doli. E au haroma keha nonirani ta mala fini dudumana ghidira ghau, ghe o banabana ghini ghau taghomu, mala oka leghuri la ghu puhidi ta muko ari maneri.

Va Rodanana Pagahaina: Ia Tarai Helahela 1:24-25

24 O helahela ghini God. Manei lama ta boka kagara ghini ghauna o mala deo ghu riufu laomuna ka giliona muko. Nia manei e age hio haghele ghau ka ia nona varanga, va ghazaghazana nia kalasana ka ia muko. 25 Varanga ka manei ia kaikena God ia ta hio va doli ghita ka heve neke riva vanadao Zisas Kraes ia noda Lod. Uve, ia nona varanga, ia nona heluhelu, ia nona mana nia ia nona mana mala kopu, e nona ma manei lama ka ia tatanigaina, dufu ghu ghatunaina nia e au toghunai ghu. Amen.