Luk 11 | KjiSC | STEP | Kaike ravata Zisas neke la tarai ka kaike malauo. Leghuna ia tarai manei, kaike ghu ka ira nona mane ta nonofoi neke la kahe ghua iahi ka manei, “Lod, o va kakahe ghini ghai tarai ko, taghe neke ghuao la Zone neke va kakahe ghidiro ira nona mane ta nonofoi,” neke ghua ghini.

Luke 11

Vari Va Kakahe Ghini Ia Tarai

Matiu 6:9-13

1 Kaike ravata Zisas neke la tarai ka kaike malauo. Leghuna ia tarai manei, kaike ghu ka ira nona mane ta nonofoi neke la kahe ghua iahi ka manei, “Lod, o va kakahe ghini ghai tarai ko, taghe neke ghuao la Zone neke va kakahe ghidiro ira nona mane ta nonofoi,” neke ghua ghini.

2 “E ghua iahi noto tarai la,” neke ghua Zisas.
“Mama, maduana ia babaolou.
Ia nou ravutu e meha.
3 Vanamai leleghu ravata ira ghemai ghano.
4 Kai hazari ira sasakemai,
taghe ghai tato kai hazaridi la ira sasakedi heiri haroharo dike va muko ghairo.
Nia oka va malumu ghai ghu ta auau ghaina.”

Ungene Talevarana Ia Mane Baere Ta Fanga Va Tutugu

Matiu 7:7-11

5 Ianimu tuna ghe neke kahe ghua haro nga iahi Zisas: “Go lao la agho ka ia sugana kaike nou mane baere ka ia hoatai redu, go la kahe ghua ghu iahi, ‘Mane baere agho, na kabai hio tauna nga keha lito bereti tetepele, 6 vununa kaike mane baere ka ara neke bake sabara mo, ghe ne deo au ghano ta mala va valiha ghinina.’ 7 La kudo ghua meha tuna iahi gilio ne ghua manei, ‘Oka meha va rugusiau ghu. Makatana ini to bakisi va gima nato au tadi haroharo ghu ara nogu rekaha idi ka vavage ini. E deo ghu ga boka toka ghinigho ghu ara ghatunaina.’ 8 Ghe a va kahe ghini ghau ghu ara iahi, geta deo ghu manei tetu vona ta valihaighona ghu ka ia ghaghahena mane baere ghe, noto ketaketa la noto au ghu agho, manei e tetu vona mo ghatu e meha vananigho ghu taghe niha ghu no torai kuhana ghidira agho.

9 “A va kahe vanamu ghu ara, o fanga ma o au ghu ghau, ghe go age hioi nga heve ta fangai nia. O hadu ma o au ghu, ghe go age finini nga. O ketaketa ma o au ghu, ghe ge tobehe vanamu nga ia makatana. 10 Vununa heiri haroharo ira ta fanga mu, edi hihio. Heiri haroharo ira ta hadu, gedi finini ghu e ghua, nia ia makatana ge tobehe ghu ka heiri haroharo ira ta ketaketa, e ghua.

11 “?Hei ka ghau ira mama mu dito fanga ghau namari la ira tuumu, ta vanadi adoghona? 12 ?Ba dito fanga ghedi tediri la, ta vanadi nona uke tetehina? !Toraina deo hohoghona! 13 Ghau ira noni ta muko noto avohoa ghini la vanadi leghutau ta vehana ira nomu rekaha, ge heve soni mu nomu Mama ka malaunao fate, ta vanadina heiri ira ta fangai ia Tarunga Ta Maduana.”

Zisas Nia Ia Faghinadi Ira Nazahi

Matiu 12:22-30,43-45; Maki 3:22-27

14 Kaike ravata Zisas neke tavusu kaini kaike nazahi ka ia mane ta melu ngengene, neke age vovoho ngengene ghu manei. Ia varigharana noni dike toraina nodi fere fuludu, 15 ghe kehara dike kahe ghua iahi, “Ghazai ghua mo ngaini ge boka tavusu kai nazahi mane iahi. !Manei neke hio mana ka Belezibolo, ia faghinadi ira nazahi!” 16 Kehara dike kabai va sisiva ghini Zisas, dike fangai ghu ta riva ghinina manei kaike hahaima va ghilaghila sipana ka malauo God fate, mala va fini ghidina neke sipa mamu manei ka God, ta ghuana.

17 Manei neke to avoho laori nganganadi ari, neke kahe ghua ghu iahi, “Leghu ravutu ta vari magara nga taghodi mu, edi age nogha. Kaike butubutu ta fota ge age nogha ghu molamo, e ghua. 18 ?Satana neto magari la taghonai, heve e ghua ghe, ge age boka pika nga ia ravutu ka manei? Ghe ghau no kaheina ara na tavusu kairi ira nazahi ka ia mana Belezibolo, no ghua. 19 Ira mane ta nonofo ghauna ghau di tavusu kai nazahira molamo. ?Heve, maneri di riva ka ia mana Satana? !Toraina deo! Neto ghua la ianimu, geala ghau oka kahei ghu na tavusu kai nazahi ara ka ia mana Satana, ta ghuana. Heiri ira ta leghu ghau taghomu, di va podoli ghu ta zeana ghau! 20 Nga ara nato tavusu kai nazahi la ka ia mana God, fafahakanana mu, ia Ravutu ka God to dufu ka ghau, e ghua ghu.

21 “Ia mane ta gigima neto va vonari la ira nona mala magara neto kagara ghini ghu ia nona malau, ira vahina leghutau nga aianimu e deo ta age geretena. 22 Nga neto meha paufi la ka magara kaike mane ta gigima fuludu laoni, manei e age hio ghahe tana haro ira vahina leghutau mala magara nga neke rangerangeriro manei, nia la tufa ghidi haro tuna heve neke sikoriro, e ghua.

23 “Hei ia taka au ghu ka ara mo mu, ne huhau ara, nia hei ia taka toka ghinagu ghu ara varighara ghidira ira sipisipi, ge toraina riva huhau ghu ara, e ghua.

24 “Neto kave kaini la ia noni kaike tarunga ta muko, manei e ghahe e lao ghu ka ia malau koroghana ta karango, hadu malau mala maghosona. Ghe neto deo la ta la fininina, e la kahe ghua iahi, ‘Ara a ke leghu lao ma ka ia suga nake la sipa mehao,’ e la ghua. 25 Ke leghu lao tuna, ge la finini ghu ia kusu nona suga tato kusu takusu va mamalahuina, ne ghua. 26 Ka ianimu ghe ne la hio mehari nga tuna keha vitu nazahi ta muko fuludu laoini taghonai, di la haghele haroharo ghu ka noni ani la auna aianimu. Noni ianimu to age muko fuludu laoini tuna ia kusu auna sepao.”

27 Turi ngama manei to kudo ghu kaike ghasekusu ka ia varigharana noni, “!Ka beana ghenara ia fotati neke va urahighono nia neke va putighono agho!” neke ghua.

28 Ghe Zisas neke kahe ghua iahi, “Heiri ira ta nomohi ta leghui ghu ia saorona God mu, ta toraina beana ghedi fuludu laorani.”

Va Ghilaghilana Zona

Matiu 12:39-42

29 Ka ia vari bubu lao ira varigharadi noni ka Zisas, manei neke kahe ghua iahi, “Ka mukora ubalana noni iahi ghatunaina. Maneri di fangau hahaima va ghilaghila ma di au ghu ara. Ghe va ghilaghila ta vanadi na ara mu ia va ghilaghila ka porofeti Zona lama. 30 Heve neke dufuio Zona mu va ghilaghila ka ira nonidi Nineve, taghe neke tuhu laoi mamu God manei, ta ghuana. Heve ta age dufuna ghu ka ara ghatu mu, taghe va ghilaghilana God mamu neke tuhu mehauna ara ia Tuuna Noni ka noni irahi, e ghua haroma ghu. 31 Ia ghase ginitaukelana Siba e tetu vona ghatu, e fatei ghu ubalana noni iahi ghatunaina ka ia ravata mala varifate, vununa manei neke sipa mehana ka ia malau varihauni, mala nomohorira ira avoavoho ka Solomone. Ghe kaike ta varanga fuludu laoini Solomone mu, tato au iahi ghatunaina e ghua, ghe ghau e deo go age nonomoho ghu ka manei ghatu. 32 Ira nonidi Nineve haro, edi age tetu vona ghatu, edi fatei ghu ubalana noni iahi ghatunaina ka ia ravata mala varifate, vununa maneri dike taghuru kairi ira sasakedi ka ia nomohi maneri Zona tuturi beanana. Ghe kaike ta varanga fuludu laoini Zona mu, tato au iahi ghatunaina e ghua, ghe ghau e deo go kabai taghuru kairi ghu ira sasake ka ghau.

Zutana Ia Tini

33 “E deo hei ta va dolinina ia zuta ta poikaina ghu, ba, ta va rokomo ghini lao togilaina ghu. Nga e va nohei ka ia mala nohena mo, mala e vanadi fegala ghu ira ta haghele meha ka ia suga. 34 Hibau nira mu, zuta malana tiniu nia. Neto veha la ira hibau, ia tiniu kamoto e fouduai fegala haro molamo. Nga neto muko la hibau nira mu, ia tiniu kamoto e au ka nagoromo. 35 O toraina avohi agho ia fegala ta au nia ka agho mu eka nagoromona ghu. 36 Neto fegala kamoto la tiniu nia agho deona kaike pelona tei ta nagoromo ghu, manei e age fegala kamoto, taghe ta ghua nia ia fegalana zuta ta pelara age ka agho, e ghua.”

Zisas Ne Ungene Tonori Ira Farisi Nia Ira Ta Vari Va Kakahe Ghidi Ira Vetula.

37 Ne nogha ghu ngengenena Zisas, kaike mane Farisi neke fangai manei ta la va ginitau taremehanana ka suganao. Lao tuna ge la nohe mahai ghu, neke ghua manei. 38 Ia mane Farisi neke fangaio, neke nona fere fuludu fininina ta deo ini manei geke kusu titihi kame ghu, ghe geke mahai nga. 39 Ianimu tuna ghe neke kahe ghua nga iahi ia Lod ka manei, “!Ghau ira Farisi no puina hagala ghini ta tihi va mamalahurira ira peghurudi panikeni nia disi e ghua, ghe ka giliomu nira mu, no puina fouduai luluto nia muko, e ghua!” 40 !Ghau noni ta kingo! ?Eka ghua ghu ia God neke riva ghinio ia peghuruna mu, neke riva ghini harona ia giliona? 41 O vanadi ghu ira ta malanga heve ta aura ka giliodi panikeni nira nia disi nira e ghua, ghe go mamalahu kamoto nga.

42 “!Ka puina mamaghuana fuludura ghatu ka ghau ira Farisi! Ghau no vanani God ia va tazona ka ira nomu mala va tatagafa mahai, taghe ira miniti nia ru e ghua. Ghe ghau no seke ghidi ira noni nia deo go namaha ghini ghu God, e ghua. Geala ghau o totonu nia o suteri ira keha noni, ghe go vanani tudu nga God ia va tazona ka ira ghemu nomu.

43 “!Ka puina mamaghuana fuludura ka ghau ira Farisi! Vununa ghau no puina kuhana ghidi ira nonohe ginitaukela ka ira suga mala varighara ira Ziu, nia no puina hagala ghini ta ungene va vonavona ghauna ira noni ka ira makete, e ghua.

44 “Uve, ka puina mamaghuana fuludura ghatu ka ghau. Vununa ghau mu taghe ira beku ta deo va ghilaghiladi, ta deo gedi avohori ghu ira noni, ta ghahe kalahuri ghu, e ghua.”

45 “Mane Vari Va Kakahei Agho,” neke ghua kaike mane ta avoho fikifokoi ia vetula beana, “agho no ngovala va muko ghai haroma ka ta kaheri nira agho,” neke ghua ghini.

46 “!Uve,” neke ghua Zisas, “ka puina mamaghuana fuludu harora ghatu ka ghau ira ta avoho fikifokoi ia vetula beana! Vununa ghau no va hure ghidi lao ira gapa ta tahuri ira noni, ghe go deo nga taghomu posi laona kaike kilomu ghu, toka ghidina va sasananoina ia gapa.

47 “!Ka puina mamaghuana fuludura ghatu ka ghau! Vununa ghau no riva ghidi va veveha ira bekudi ira torai porofeti dike atunguriro ira faamu meha sepao. 48 No kaheina ghau mu, heve dike riva ghidiro ira faamu meha mu neke veha mo, no ghua; maneri dike atunguri ira porofeti, nia ghau go riva ghidi ghu ira bekudi no ghua. 49 Vununa ka ia riva ghini iahi, ne kahei ghu God iahi ka ia nona avoavoho: ‘Ara ghatu a tuhu laori keha porofeti nia keha mane nonomohora e ghua ka ira noni, ghe kehara edi age atunguri nia kehara edi age ngovalari, e ghua.’

50 “Ghau ubalana noni ka fafata iahi mu, ta age tapata ghidira ira vari atungu neke va riva ghidiro ira leghu nona porofeti nga God, ka ia tatanigai vuha mehanani malau iahi peka, 51 ka ia atungini Ebolo, e dufu lao ghu ka ia atungi Zakaraea, dike atungio ka ia vari hoataina ia sopebeana nia ka ia galahena ta beana. Uve, ghau o toraina age tapata ghini ghu mamu iahi ghatu.

52 “!Ka puina age mamaghuanara ghatu ka ghau ira ta avoho fikifokoi ia vetula beana! Vununa ghau no va poika ghidi ira noni, ia hangana ta boka mala avohi maneri God. Taghomu tuna go deo ghu haghelina ia Ravutu ka God e ghua, ghe go va nodori nga tuna ira keha noni ta va sisiva haghele ghedi.”

53 Ne ghahe kaini ghu Zisas malau ianimu, ira Farisi nia ira ta vari va kakahe ghini ia vetula beana e ghua, dike puina halari fuludu, dike va fera ghini ghu leghu kokolodi notoho nga, 54 edi boka mala nomohi ghu kaherira manei keha leghutau ta zea, dike ghua.