Luke 13

Ia Kudo Mala Taghuru Kai Sasake.

1E nona au ka fafata iahi, kehara dike va kahe ghini Zisas ghidira ira keha nonidi Galili neke atunguriro Paelati, ka ia fafata rivai lao veala maneri ka God. 2“?Nganganamuna ghau mu, noni Galili iranimu dike puina sasake fuludu laori ira keha noni Galili ghe dike leme nga ka kokolona leme ianimu, no ghua?” neke ghua ghidi Zisas. 3“!E toraina deo! Ghau o leme haro molamo noto deo la go taghuru kairi ghu ira sasakemu, ta fihiki laona ghu ka God. 4?Nga dike heve ghua mu ira tazoi hana mane dike zoghu va lemeriro ia kokuna Saelomu? ?Maneri mu dike noni mukodi laoni ka ira noni aianihi Zerusalemu, no ghua? 5!E toraina deo! A ke va kahe ghini ghau sonini ara, ta leme haroma molamo ghau, noto deo la go taghuru kairi ghu ira sasakemu.”

Ia Ungene Talevarana Ia Heke Figi Ta Eghoro

6Ianimu tuna ghe neke vanadi nga Zisas ungene talevara iahi: “Kaike mane neke numa ghini kaike heke figi ka ia nona nunuma gerepi. Manei neke la sigho ghini tudu ma leleghu fafata ge au fuana la ta ghuana, ghe e deo ma neke la fininina e ghua, e zea vanani tudu ghu. 7Va nonoghanana, manei neke va kahe ghini ia nona mane ta kopunai nunuma gerepi, ‘!To lito komuhu kani afa ghu ara, ghe e deo ma kaike fuana tei ta fini fati ghu! Taraha kai hinaei. Ne sunare va iꞌite mo ka galahena ta boka mala ke numa ghidi keha leghutaura.’

8“Ia mane ta kopunai nunuma gerepi neke ungene tughui, ‘Nakai vananina kaike fafatani. Nai vanani laona kaike komuhu, a sute va vehai ghu ara, kai ghini kunu penuna. 9Neto fua la ka komuhu ta meha ini, puina veha fuludu. Nga neto deo la, ghe go taraha kai hinaei nga.’”

Zisas Ne Va Vehai Ia Fotati Ta Magugele Ka Ia Ravata Mala Maghoso Ira Ziu

10Ka kaike Ravata Mala Maghoso, ne vari va kakahei ghu Zisas ka kaike suga mala varighara ira Ziu, 11manei neke fini fati kaike fotati neke va magugelei ia tarunga ta muko. Ka giliona tazoi hana komuhu, manei neke to guto palu loponana, neke deo ghu ge boka tetu va lotoro ghu. 12Ne finini laoi ghu manei fotati ini, Zisas neke kudo mehai neke va kahe ghini ghu, “!Fotati agho, agho to veha gheu ka fogara nia!” neke ghua ghini. 13Posi laoi tuna neke ghua Zisas, neke to boka tetu va lotoro vona ghu ka fafata ianimu lama, helahela ghinina nia kudo vehaina God.

14Ghe ia mane babatu ta kopu ka ia suga mala varighara ira Ziu neke hali, vununa Zisas neke va vehai fotati iahi ka ia Ravata Mala Maghoso ira Ziu. “Onomo ravata tongana ghu ka kaike kolabana mu ta mala rivana. O meha ghu ka ravata iranimu mala va veha ghauna, nga eka ghua ghu ka ia Ravata Mala Maghoso,” neke ghua lao ka ia varigharana noni.

15Ghe ia Lod neke ungene tughui, “!Ghau ta tatangana kobiri, vununa ghau no riva ka ia Ravata Mala Maghoso! Ghau haroharo o fani sopai fudaha kaveri haroma ira nomu bulumakau, ba ira nomu dongiki ka ira baradi, mala va ketuhurina ka ia Ravata Mala Maghoso. 16?Heve, e deo ge tongovona ghu mu ta va kalasi ghenana ara ka ia Ravata Mala Maghoso, fotati iahi ka ia pagusu Ebarahamu, neke posi va gimaio Satana tazoi hana komuhu ka fogara?” 17Ka ngengene irahi dike age haghava ghedi ghu ira noni ta kana ghini Zisas. Nga ira tehi noni mu, dike va ghazaghaza ghidi ira leghutau ta namanama neke riva ghidiro manei.

Ia Ungene Talevarana Ia Subuna Heke Masitadi Nia Ia Isi

Matiu 13:31-35; Maki 4:30-32

18Ianimu tuna ghe neke kahe ghua nga iahi Zisas, “?Taghe heve e ghua mu ia Ravutu ka God? ?Ka heve mo ta va ghaghao ghini laona ara? 19Manei mu taghe rekahana subuna masitadi tei ta hioi nia kaike mane, ta numa ghini ghu ka ia nona nunuma e ghua; manei e kodolo vona e vuhai age heke leghaha ghu, ghe gedi meha nga ira memeha gedi meha soro ghedi ghu ka ira hobona.”

20Zisas neke notohoni, “?Taghe heveni e ghua mu ia Ravutu ka God? 21Taghe ia isi ta mala rivai bereti ia fotati, e ghua. Geta faa leghaha ghu ia falao ghe, ia isi e soni suku kamoti mo.”

Ia Makatana Mala Haghele Ka Ia Ravutu God

22Zisas neke ghaheri ira leghu malau fafaadi nga, nia ta rekahadi nga e ghua, vari va kakahei ta ghahena ghu ka ia vai laona visi Zerusalemu mo. 23Kaike ghu ka ira noni, neke notohi Zisas, “?Lod, kehara lama ta age doli ghedira ghatu?” neke ghua ghini.

Zisas neke ungene tughui, 24“Ia makatana ka malauo God fate mu e ghavoro. O riva va gigima o boka hagheli ghu, vununa tehi nonini ta age va sisiva haghelera ghatu, ghe edi age deo bokadina. 25Ia kutamana ia suga e age tetu vona, e bakisi va gimai ghu ia makatana. Ka ia fafata ta la tetu ghau peghuru, ta tatanigai la ketaketa ghu ka ia makatana fanga va tutugu ghuana iahi, ‘!Lod o tobehe vanamai ko makatana ini!’ ka ta ghuao ghau ghe, ge age ungene tughu ghau nga ia Lod, kahe ghuana iahi ‘Ara e deo ga avoho ghau ghu ghau, ba hae mo no la sipa mehana,’ e age ghua ghini ghau. 26O age kahe ghua tuna iahi ghau, ‘Ghe ghai nake mahai ketuhu taremehauno ma agho, nia agho goke vari va kakahei ma ghu ka ia malau fafaana ghai noke ghuao.’ 27Ke age ungene tughu ghau tuna manei, ‘A va kahe ghini ghau ghu, ara e deo ga avoho ghau ghu hae mo noke la sipa mehana ghau. O ghahe lao ghau haroharo ta riva puhi ta muko.’

28“Ianimu tuna ghe, ge age au nga ira nakele dudumana, nia ia ghani va ghiriti e ghua, vununa ghau o age finiri Ebarahamu, Aesake, Zekopu nia ira porofeti haroharo e ghua, ka ia Ravutu God, nga ghau mu God e age kai kave ghau lao peghuru. 29Ira noni edi la meha ghatu fateo mo nia pakao mo, pelovona mo nia pelopeka mo e ghua, edi age nohe hinae ghu ka ia mahai varighara ka ia Ravutu God. 30Nia iahi tuna ta avohina ghau, e ghua: heiri ira ta va nonoghana mu edi ke age kenu, nia heiri ira ta kenu, gedi ke age va nonoghana ghu, e ghua.”

31Ka fafata ianimu, keha noni Farisira dike meha ka Zisas dike kahe ghua ghu iahi ka manei, “!O ghahe kaini malau iahi o lao ghu ka keha pelodira mo, vununa Herodi Anitipasi ne kabai atungigho agho!” dike ghua ghini.

32Zisas neke ungene tughuri, “O lao, o la va kahe ghini ghu fokisi to ngongovala ianimu, ara a tavusu kai nazahi nia riva ghidi ira hahaima va doli fogara a ghua ghatunaina nia fugho, e ghua; ka ia va litona ravata tuna, ga age va ghuduvi ghu ia nogu riva nake meha mala riva ghinio, e ghua. 33Uve. Ravata iahi, fugho, nia nariha e ghua mu, ara a toraina leghui ma a lao ghu ia nogu ghaghahe. !Vununa ia porofeti ka God mu e mala leme tudu ma Zerusalemu!

34“!Kei Zerusalemu, Zerusalemu, ia malau leghaha ta atunguri ira porofeti, nia fera ghidi ghahipa ira mane ta hio ghaghahei ia nonomoho ka God! Niha ngavulu fafata nake kabai hio varighara ghidira ara ira nou rekaha, taghe ta ghua nia kaike kokorako ta varighara ghidi ira tuuna ka ira pekana laena, boro ghidira. Ghe ghau e deo goke va malumuau ghu, ta ghuana ianimu. 35God e age ghahe kaini ghu ghatu ia suga ka ghau. Nia ghau go deo ghu boka age fini leghuauna ara, o vuhai age kahe ghua ghu iahi, ‘!God va beani manei ia ta meha ka ia babaolona ia Lod!’” ▼

▼13:35 Samu 118:26