Luke 14

14 Zisas Ne Va Dolini Ia Mane Ta Fogara Ka Ia Ravata Mala Maghoso Ira Ziu

1Ka kaike Ravata Mala Maghoso ira Ziu, Zisas neke au ka ia sugana ia mane babatu ka ira Farisi, dike puina mato leleghui ghu ira noni, 2vununa kaike mane ta boku ira ghahena, kamena, neke au aianimu ka kenuna Zisas. 3Neke notoho ghua ghidi ghu iahi Zisas ira Farisi nia ira ta avoho fikifokoi ia vetula beana e ghua, “?Heve, e totonu mo ka ia vetula beana mu ta va doli noni ta fogarana ka ia Ravata Mala Maghoso, ba deo?” 4Ghe maneri dike pake ghedi ungene tughuina. Posi laoi tuna Zisas ia mane ta fogari va vehaina neke ghua, ghe neke tuhu ghahei nga. 5Ianimu tuna ghe neke fihiki lao nga Zisas ka maneri, neke notohori ghu, “?Hei ka ghau mu taka fani rivana ghu ka ia Ravata Mala Maghoso? ?Neto riufu lao la ia tuu mane ba ia nou bulumakau ka ia golava, e deo go la hio kavei ghu agho ka fafata ianimu lama?” 6Ghe e deo soni ngama gedi ungene tughui ghu.

Zisas Ne Vari Va Kakahe Ghini Ia Au Unuhu

7Ne fini avohori ghu Zisas ira noni dike laoro ka ia mahai va sasaighona la fafaetedira ka ira malau va vonavona mala nohedi ira faghina, manei neke turi vanadi ungene talevara iahi: 8“Dito fangaigho la ta mala la holarana ka ia mahai varihio, oka kabai la hioi tudu ghu ia malau mala nonohedi ira faghina. ?Heve o age ghua agho ghatu, dito kudoi haro la maneri kaike noni ta tongovona fuludu laoigho agho? 9Ia noni neke fanga ghau mehano ghau palu, e la meha ka agho, e age kahe ghua ghu iahi ghatu, ‘Vanani noni iahi mo malau mala nohe iahi,’ e age ghua ghinigho ghatu, nia age haghava gheu tuna, go age nohe ghu ma ka ia malau mala nohe taka tongovona ghu, e ghua!

10“Nga o lao, o la nohe ghu pekani ka ia malau mala nohe taka tongovona ghu, dito fanga mehaigho la. Ianimu tuna ghe, ge age kahe ghua nga iahi ghatu ka ia finigho age ia noni neke fangaighono, ‘!Mane baere agho, kaike malau mala nohe ta veha fuludu laoi iahi ta au ghaina ghai malauna agho!’ ge age ghua ghinigho nga. Nia age va vonavonaigho tuna ka ira kenudi ira keha noni dike holara harono, e ghua. 11Vununa ira noni haroharo ta va vonavonari taghodi mu, edike age nai hinaeri nia heiri ira ta nai va hinaeri taghodi tuna gedi ke age nai vonari ghu ghatu, e ghua.”

12Ianimu tuna ghe, neke fihiki lao nga Zisas ka ia mane neke fanga mehaio, neke kahe ghua ghu iahi, “Noto va tanai la agho kaike mahai va raravata, ba va sasaighona, oka kudori ghu ma ira nou noni baere, ba ira tahiu mane, ba ira taremehau, ba ira ta taghotagho ta au namoigho. Vununa maneri edi ke kudo leghuigho ghatu mala ke holarina. 13Nga o kudori ira ta malanga, ta magugele, ta paheku, nia ta kivi e ghua, 14e va beanigho ghu God. Ianimu tuna ghe, ge age vananigho nga God ghatu, ia tabarau ka ia tetuleghudi ira ta lotoro, vununa agho noke kudori ira ta deo boka ke kudo leghuighona.”

Ia Ungene Talevarana Ia Sarumahai Leghaha

15Kaike mane neke nohe taremehanao Zisas ne nomohi ghu tuturi iahi, neke kahe ghua iahi, “!God e age va beanari ira noni ta la mahai ka ia mahai varighara ka ia Ravutu God!”

16Zisas neke ungene tughui ka ungene talevara iahi: “Kaike mane neke va tanai kaike sarumahai leghaha, neke kudori ghu tehi noni ta mala la holarana. 17Ne age hokoto ghu ira leghu va tana nga, manei neke va ghahei ia nona noniriva ta la va kahe ghidira ira noni neke kudoriro geala ta mala laona maneri. 18Ghe maneri haroharo dike age tatanigai kahe lao meha, dike ghua. Ia kusu noni neke kaheina mu, ‘Ara nake bake tabari mo kaike nunuma ta sare, na toraina kabai la fini va vehai ghu. Va malumuau ghu ko,’ neke ghua. 19Kehanani neke kahe ghua iahi, ‘Ara nake bake tabarari mo tazo bulumakau ta lalage mala koroho pake ka ia nunuma, nato lao ghu mala va sisiva ghidira. Va malumuau ghu ko,’ neke ghua. 20Kehanani neke kahe ghua iahi, ‘Ara nake bake varihio mo e deo ghu boka mehaguna,’ neke ghua.

21“Ia maneriva neke leghu lao, neke la va kahe ghini ghu ia nona faghina, heve dike kaherira maneri. Ia faghina neke age hali neke kahe ghua ghu iahi, ‘Magali kave lao agho ka ira hangana ta faa, nia ta rekahadi ka ia malau fafaana, o la hio mehari ghu ira ta malanga, ira ta magugele, ira ta paheku, nia ira ta kivi e ghua,’ neke ghua ghini. 22Ka ia leghu mehana ia maneriva, manei neke la kahe ghua iahi, ‘Faghina agho, ara nato riva ghini va hokoto noke va kahe ghinaguo agho, ghe tehi kalasadi maladi tehi noni ta aura nga,’ neke la ghua ghini. 23Neke kahe ghua ghu iahi ia nona faghina, ‘Kave lao ka ira hangana peghuruo, nia leghudi mo ira numa bara e ghua, o la toraina kahe ghidi meha ghu, heiri ta la fini fatarira agho, edi meha va foudi ghu nogu suga ini. 24E deo hei ka ira nake kusu kudoriro ara, ta age lingi fatina ghe kaike birusuna tei ghu, ka heve nake va tana vanadiro ara.’”

Tabarana Ia Nonofoi Zisas

25Ira leghahai varigharadi noni dike ghahe leleghui Zisas. Manei neke fihiki lao ka maneri neke kahe ghua ghu iahi, 26“Noto kabai meha nogu noni mala nonofoau la, agho o toraina namaha ghinagu ara fuludurira nou mama ghe nou uke, ia ghaseborou nia ira tuu, ira tahiu mane nia ira kerau fotati e ghua; uve, fuludu laoi ia doli ka taghou. Ghatu o deo go boka age nogu noni mala nonofoau ghu. 27Nia agho e deo go boka age nogu noni mala nonofoau ghu, noto deo la agho go hurei ghu ia nou hekefalahata, ta leghuauna ghu ara.

28“Kaike ghu ka ghau noto nganai va tetui la kaike koku, agho o kusu nohe hinaena, o hadu kavei ghu taghe nihau tabaranana, mala avohi ghu neto fata la mo ia rongo ta mala va hokotona ia riva. 29Ghatu o age va tetui ma agho ia pakaraina koku, to age ponoe ghu ira rongo. Nia age paghoigho tuna ira tehi noni ta finigho, e ghua. 30Kahe ghua tuna iahi edi ghua, ‘!Ianihi nga ia noni neke tataniga va tetuio ia koku, ghe ponoei rongo tuna ge deo ghu boka va noghainana neke ghuao!’ edi age ghua ghinigho ghatu, vela ghinighona.

31“?Ba, mane ginitaukela hevena mu, ta kabai la magarana, ghe ta deona nga ge kusu nohe hinae ghu hadu ghini nganganana, ia kaike vuro mane magara ka taghona, e gigima mo ta la talarira palu vuro mane magara ka ia keha mane ginitaukela, ta ghuana? 32Neto deo la bokanana manei, e hau ngama ia kana, eto va ghahe laori ghu manei ira nona mane ta mala la nonogele ghidira keha ghaghahedi malana bule ka varihoataidi maneri. 33E deo ghu hei ta boka meha nogu noni mala nonofoauna ara, neto deo la ge nai kairi ghu, ira vahina nona leghutau ta taghori nga.

34“?Kuratahi mu e veha ka mala va lingilingi, ghe neto kakai la ia lingilingina, heve o ghua ghe goke boka va kudaru leghui nga? 35Kuratahi ta deo lingilingina mu, e deo ge veha ghu ka ia kava nia ka mala va doli veha beberi e ghua, e sakomo kai laoi ghu. !Hei ia ta ohoꞌoho va melongona mu, geala e nonomoho, e va fafahakari ghu!”