Luke 15

Ia Ungene Talevarana Ia Sipisipi Ta Ghahe Va Zea

Matiu 18:12-14

1Ira noni ta hio takisi nia ira noni ta kuru sasakedi e ghua, dike meha nonomoho ka ira vari va kakahei Zisas. 2Ghe ira Farisi nia ira ta vari va kakahe ghini ia vetula beana, dike age tatanigai ngenengene kahe ghuadira iahi, “Mane iahi mu neke baere taremehadi nia mahai taremehadi ghe ira noni ta kuru sasakedi!” dike ghua.

3Zisas neke riva ghini ghu ungene talevara iahi: 4“?Go kuruigho la agho kaike ghobi sipisipi, ge ghahe va zea tau ghu kaike ghu, la zeana ka ia malau ghouna, heve, agho e deo goke boka nai kairi ghu ira keha leghaha ngavuluai leghaha sipisipi, ta ke la haduina ghu ia ta ghahe va zea ta vuhai la dufuina ghu? 5Ka ia la fini fatiu agho ghatu, agho o va manemane o hure surai ghu ka rafau nira. 6Ka ia sabara leghu mehau, agho o kudo varighara ghidi ira nou noni baere, nia ira ta au gheremeu mo e ghua, o kahe ghua ghu iahi ka maneri, ‘Ara na puina va manemane fuludu, vununa nato ke dufui ia nogu sipisipi neke zeao. !Aria da hilava va manemane ghu!’ o age ghua. 7!E age ghua molamo ghatu, e age au ghu ia leghahai va manemane ka malauo God fate, ghinina kaike noni ta kurui sasake ta taghuru kairi ira sasake ka manei take fihiki lao ghu ka God, fuludu laoina ia va manemane ta vanadi ira leghaha ngavuluai leghaha noni ta lotoro taka ghahe va zea ghu!

Ia Ungene Talevarana Ia Kunegele Neke Kakaio

8“?Ba haeba ge kurui la tazo kunegele ta siliva kaike fotati, ge kakai tana ghu kaike ghu. ?Heve, manei e deo ge va dolini ghu ia zuta, ta haduina ghu ka ira leghu lobosaidi nga ka ia suga, ka ia tokeni ta takusu va huhugurira ghu ira leghu pelodi nga, ta vuhai age fininina ghu manei? 9Ka ia finini manei, manei e age kudori ghatu ira nona baere, nia ira noni ta au namoi e ghua, kahe ghuana iahi ka maneri, ‘Ara na puina va ghaseghase fuludu, vununa nato ke finini ia nogu kunegele neke kakai taguo. !Aria da hilava va ghaseghase va manemane ghu!’ e age ghua. 10E ghua molamo e age au ghu ia va manemane ka kenudiro ira engizeli ka God, ghini kaike noni ta aui sasake ta holara hihingo.”

Ia Ungene Talevarana Ia Tuunamane Kaike Mane Neke Ghahe Va Zeao

11Ianimu tuna ghe, neke va kahe ghidi nga Zisas kaike ungene talevarani: “Kaike mane neke au palu tuunamane. 12Ia tuunamane ta ite neke la kahe ghua iahi ka nona mama, ‘Ara na kabai ghidi ghatunaina lama ira tufagu ka ira leghutau ta taghori agho, aka ke afa dufui la ghu ia leme ka agho.’ Neke malumu mo ka nona mama ta ghuana ianimu, neke fota vanadi ghu ira palu tuunamane, ira leghutau neke taghoriro manei.

13“Keha palu lito ravata leghuna ianimu, ia tuunamane ta ite neke va tanari ira leghu nona boroza nga, neke lao ghu ka ia keha malau varihauni, la pepesana ghidira ira nona rongo ka kaike doli ta muko. 14Ka ia fafata neke to age nogha tanaro ira rongo, neke la dufu meha molamo kaike lalara soduai ka ia hori kamoto, neke to age tatanigai lemei mahai ghu manei. 15Ianimu tuna ghe, neke la riva vanani nga kaike mane ka soloso ianimu, neke tuhu laoio ka ira nona galahedi nunuma, mala la kopu vananina ira nona vadu. 16Ia rekaha mane neke to age puina nona liha fuludu, neke to age kulukulu ghidi ghu ghe ira fuadi bini neke va valiha ghidiro ira vadu. Ghe, e deo ma hei neke vananina kaike momohuna ghano ghu.

17“Ne age ngana avohi ghu ta ghuana ianimu, manei neke age kahe ghua iahi ka taghonai, ‘!Ka malauro mu ira noni ta rivai tabara ghe, edi boka kuru ghedi ghano kunudi mo, aiahi tuna ga meha lemei mahai ghu ara na ghua! 18Ara a ke sura ghu ka nogu mama, a la kahe ghua ghu iahi: Mama, ara nato age sasake kunui God ka malaunao fate, nia agho e ghua, 19to deo ghu ara ga to fata ghu ta va kudo ghinagu tuu manena, nga o suna hioau taghe kaike mane ta rivai tabara o ghua ghinagu ma.’ Tetu vona tuna, geke leghu lao ghu ka nona mama neke ghua.

20“Neke la meha ngama manei varihauni, neke to fini laoi ghu nona mama la mehanana manei. Manei neke puina dudumana ghini ghena fuludu, neke purudu lao ghu ka ia tuunamane la abai, angohi, ta la ghua ghinina.

21“Kahe ghua tuna iahi ka nona mama neke ghua ia tuunamane, ‘Mama, ara nato age sasake kunui God ka malaunao fate, nia agho e ghua, e deo ghu ga fata ghu ta va kudo ghinagu tuumanena.’

22“Ghe nona mama neke kahe ghua iahi ka ira nona maneriva, ‘!Magali! Hio mehai ia poko sodu ta toraina veveha ka giliona sugana, o va vona vanani lao ghu. Hio mehai kaike ringi malana kilona ini, nia ira sadolo malana ghahena idi, e ghua. 23Nia atungi tuna ia rekahana bulumakau dake pausu va businio ka bara ani, e ghua. Ghita da toraina hilava va manemane ka kaike mahai varighara, 24vununa tuugu mane iahi ara neke leme, ghe neto ke doli leghu. Manei neke to zea, ghe ghatunaina toke finini.’ Tataniga ghini tuna ia hilava, mahai varighara va manemane, dike ghua.

25“Ka fafata ta ghua iahi maneri, ia tuunamane ta faa neke riva neke au ghu ka ia galahena nunuma. Ka ia ke sura mehana, manei neke nomoho lao koze nia ragi e ghua ka giliona suga ani. 26Notohi tuna kaike ghu ka ira maneriva neke ghua, kabai avohina heve mo dike riva ghinina maneri. 27‘Ia tahiu mane neto ke leghu meha, neke atungi ghu nou mama ia rekahana bulumakau dake pohi va businio ghita, va tanaina kaike mahai varighara leghaha,’ neke ghua ghini. ‘Ghai na hilava va manemane ghu, vununa ghini ia leghu meha siakale ka manei.’

28“Ia tahina mane ta faa neke puina hali neke pake ghena ghu haghele laona. Kave lao tuna nona mama ge la papadi ghu ta mala haghelena gilio manei, neke ghua. 29Ghe manei neke ungene tughui, ‘Leghu komuhu irahi nga mama, ara nake toraina riva va faa vananigho taghe kaike noni mala varituhu ta ghuana, deona ghe kaike fafata ta pake ghegu ghu riva vananighona kaike leghutau tei ghu, ka ira ta va kahe ghinagu agho. Ka leghu fafata iranimu nga, agho e deo ghe goke vanagu ghu kaike rekahana gouti ghu, mala hilava mahai varighara taremehadira ara ira nogu baere. 30Nga ka ia fafata leghu mehana tuu mane iahi, neke la ngovala pepesana ghidiro ira nou rongo ka ira ghase ta kikirasei tabara mu, agho no va manemane no atungi ghu ia noda rekahana bulumakau ta toraina busi.’

31“Ne ghua ghu iahi neke va kahe ghinina nona mama, ‘Fini ba agho tuugu maneo. Agho mu no au tagu tudu ma ara, e nou ghu agho mu vahina leghutau ta taghori nga ara. 32Ghita da toraina, ragi hilava ghu ka ravata va manemane iahi. !Vununa ia tahiu mane neke leme, ghe manei neto ke doli leghu! !Manei neke to zea, ghe ghatunaina ghita dato ke finini manei!’”