Luke 18

Ia Ungene Talevarana Ia Fotati Ta Lemekai Ta Fanga Va Tutugu, Nia Ia Manefate

1Kaike ravata Zisas neke turi vanadi ira nona mane ta nonofoi kaike ungene talevara mala va podolo vanadina geala ta tarai tuduna maneri, nia taka bualefona ghu e ghua. 2Zisas neke turi vanadi ghu tuturi iahi, “Ka kaike malau leghaha, kaike manefate neke auna. Mane fate iahi mu eka heluhelu ghini ghu God, nia e deoi va vonavona ka leghu noni nga, e ghua. 3Ka malau leghaha haro ianimu neke au kaike fotati ta lemekai neke lao tuduno ka ia manefate la fanga va tutugu ghuana iahi, ‘Toka ghinagu ko ta va totonuauna ka ia puhi ngongovala neke va riva ghinaguo kaike noni,’ e la ghua tudu. 4Ia manefate, neke deona mamu va ghunaghunaina fotati ani, ghe kani la fufu ghini tudu mo manei, neke to age baelu ghini ghena ghu. Kahe ghua tuna iahi ka taghonai neke ghua manefate ini, ‘Ara mu aka heluhelu ghini ghu mamu God, nia hei noni e ghua, 5ghe fotati iahi ne puina meha va kurasau. !Ara ato va totonui ma manei, mala eka meha fufu ghinagu tudu la ghu va malasauna!’”

6Kahe ghua tuna iahi neke ghua ia Lod, “O hio avoavoho ka manefate ta muko iahi. 7?Ka ia nganganamu ghau mu e heve; God e deo ge boka vanadi ghu ia totonuna ira nona noni faetaidi ta fangai manei redu ravata, no ghua? ?Heve, manei e age mamahuge toka ghidira ghatu, no ghua? 8!A va kahe ghini ghau ghu, God ghatu e magali ma e vanadi ghu ia totonuna! ?Nga ka leghu mehaguo ara ia Tuuna Noni mu, taghe niha noni ta meha finirira ara ghatu, ta kururi va hohoghonara?”

Ia Ungene Talevarana Ia Farisi Nia Ia Mane Mala Hio Takisi

9Zisas neke turi ghini ungene talevara iahi ka ira keha noni ta nganai taghodi lama ta vehana ira ta ghua, ta fini hinaeri ghu leghu noni nga: 10“Palu mane dike vona la tarai ka ia Sugana God. Kaike ghu mu mane Farisi, nia kehana tuna ge mane sekesekeina ghu ka hio takisi, e ghua. 11Ia Farisi ta va varavaranga, neke la tetu kakaike taghonai ghe neke verevere ghua nga iahi: ‘!Ara na kudo vehaigho God, ta deo ini ga sesebo ghu, luluto ghu, nia taka zave kunuini ghu keraguau e ghua, taghe ta ghua ira leghu noni nga, sughavona ghu taghe mane mala hio takisi ta tetu ianihi! 12Ara mu a filui mahai palu fafata giliona kaike kolabana, nia ka ira leghu nogu ta taghori nga ara, a vananigho kaike tufa ka leleghu tazo tufa, e ghua.’

13“Nga ia mane mala hio takisi mu, neke la tetu ghena meha varihauni, deona ghe ge mato vona ghu ka kolangana fate, ghe neke tarai nga. Manei neke dupai ia hihingona ka muko hihingo, ghe neke kahe ghua nga iahi, ‘God, o dudumana ghinagu, vununa ara mu ia noni ta kuruau sasake,’ neke ghua. 14A va kahe ghini ghau ghu ara, mane ta kurui sasake iahi mo mu ne leghu kalasa ghenana ka suganao kenuna God, nga eka ghua ghu ia mane Farisi. Vununa ira noni ta va varavaranga mu, God e age nai hinaeri ghatu, nga ira ta nai hinaeri taghodi mu, God e age va vonavonari ghatu.”

Zisas Ne Va Beanari Ira Rekaha

Matiu 19:13-15; Maki 10:13-16

15Kaike ravata keha nonira dike hio laori ira nodi rekaha ta ite ka Zisas mala la posiri nia va beanarira manei, ghe ira mane ta nonofoi Zisas dike va kahe ghidi taka la va rugusinina ghu. 16Ghe Zisas neke kudori ira rekaha, ghe neke kahe ghua nga iahi ka ira mane ta nonofoi, “O va malumu mehari rekaha nira ka ara. !Oka va nodori ghu! Vununa ia Ravutu ka God mu, e nodi mamu ira noni taghe rekaha irahi ira ta ghua,” neke ghua ghidi. 17“Ara a va kahe ghini ghau ghu ia hohoghona, hei noni neto deo la hioina ia Ravutu ka God taghe kaike rekaha tei ta ghuana, ghatu e deo ge boka age hagheli ghu.”

Ia Mane Ta Taghotagho

Matiu 19:16-29; Maki 10:17-30

18Kaike fafata kaike mane babatu ka ira Ziu, neke notoho ghua iahi ka Zisas: “?Mane Vari Va Kakahei Ta Veha Agho, heve mo ta torai riva ghinina ara ghe ga hio kadoli nga ia doli soduai?” neke ghua.

19“?Heve no ghua ghe, no va kahe ghinagu veha nga?” Neke ghua notohina Zisas. “E deo heini mu ta vehana, nga taghonai God lama. 20Ghe ghinina ia notoho ka agho mu, agho to avohori ira ungene va gigima: ‘Oka zave kunui ghu kerauau. Oka vari atungu ghu. Oka sisiko ghu. Oka turi sebo ghu ka ia giliona koti. Heluhelu ghidi nou mama ghe nou uke,’ ▼

▼18:20 Kave 20:12; Ngengene 5:16-20

ira ta ghua.”

21Ia mane neke ungene tughui Zisas, “Ara mu nake to leghuri ma nake meha ghu ungene va gigima irahi taniga ia rekahaguni.”

22Ne nomohi ghu iahi Zisas, manei neke kahe ghini lao, “Kaike leghutauni no deona nga go riva ghini ghu agho. O la tatabara ghidi ira leghu nou ta taghori nga, o tufari ghu ira rongodi ka ira ta kuma, ghe go age auigho taghotagho nga ka malauo God fate. Meha tuna go leghuau ghu ara, e ghua.” 23Ghe ne nomohi ghu iahi manei, neke age muko hihingona fuludu, vununa manei mu neke torai mane taghotaghona fuludu.

24Zisas neke fini laoi manei ta muko hihingonana, neke kahe ghua ghu iahi ka ira nona mane ta nonofoi, “!Ka mamarutana fuludura ka ira noni ta taghotagho haghelina ia Ravutu ka God! 25!Ta suku haghelena ia kamele ka ia korosana nila pitipiti mu, e nanamo fuludi ia noni ta taghotagho ta la haghelina ia Ravutu ka God!”

26Ira dike nomohio dike notoho ghua iahi, “?Hei ghu ngaini ka malau iahi peka mu, ta age boka doli ghenana ghatu?”

27Zisas neke ungene tughuri, “Heve ia taka boka riva ghini ghu ia noni mu, e bokai tudu ma God.”

28Ianimu tuna ghe neke kahe ghua nga iahi Pita ka Zisas, “Ghai mu nato ghahe kairi ira malaumai tato meha leghuigho ini ghu agho,” neke ghua.

29“Uve,” neke ghua ungene tughuna Zisas, “A va kahe ghini ghau ghu ara ia hohoghona. Heiri haro ira ta ghahe kairi ira sugadi, ba, ira ghaseborodi, ba, ira tahidi mane, ba, ira nodi mama nodi uke, ba, ira nodi rekaha ba e ghua, malana ia Ravutu ka God mu, 30edi age hio va tehi laoni ka fafata iahi ghatunaina, nia age hioi ia doli soduai ka ia fafata ta la meha ghatu, e ghua.”

Zisas Neke Kusu Kahe Kenuini Ia Leme Nia Ia Tetuleghu Ka Taghonai

Matiu 20:17-19; Maki 10:32-34

31Zisas neke hio nenemari ira tazoi palu mane ta nonofoi, ghe neke va kahe ghidi nga, “To avohi ghau mu ta vona agena ghita Zerusalemu. Dato age dufu la ghita aianimu, ira leghu dike kangavariro nga ira porofeti ghinina ia Tuuna Noni mu, edi age hohoghona ghatu. 32Maneri edi age nai laoi manei ka ira kamedi ira noni taka Ziu ghu mala vela ghinina, va hahaghavina nia kamusina, e ghua. 33Maneri edi age puruasimini nia atungi e ghua, ghe ka ia va litona ravata, manei e ke age tetu leghu ghatu.”

34Ghe ira mane ta nonofoi e deo ma kaike leghutau ta avohi ghu ka neke kaheriro manei. Ia fafahakana ira ngengene ka manei neke poika, dike deo ghu va fafahakina heve mo neke turi ghinina manei.

Zisas Ne Va Vehai Ia Mane Ta Kivi Ta Fafanga

Matiu 20:29-34; Maki 10:46-52

35Ne la namo dufu ghu Zisas aianihi Zeriko, kaike mane ta kivi ta fafanga neke nohe neke au ghu ka ia gheremena hangana. 36Ne nomohi ghu manei ia varigharana noni ngilingoele ta fuluduna ghu, manei neke notohori heve mo neke dufuna. 37“Zisas ia tanina Nazareti ta fuludu age ini,” dike ghua ghini. 38“!Zisas, Tuuna Deveti, dudumana ghinagu!” neke ghua tatanigai kudonana manei. 39Ira varigharadi noni dike kenu agero ka Zisas, dike buruai ia mane ta mala vanemohona manei, ghe ianimu tuna ghe neke kudo va fafaa laoni nga manei, “!Tuuna Deveti, dudumana ghinagu!” neke ghua.

40Zisas neke nodo, ghe neke va kahe ghidi nga keha nonira ta hio laoina ka taghonai ia mane ta kivi. Ne ghahe namo lao ghu manei, Zisas neke notohi, 41“?Heve no kabai ghinina agho ta riva vananighona ara?”

“!Lod, ara na kabai fifini!” neke ghua.

42Kahe ghua tuna iahi neke ghua Zisas, “!Toraina veha, boka fifini mo agho! Ia nou va hohoghona taghou neto va vehaighona.” 43Ka fafata ianimu lama neke to age vovoho fifini ghu ia mane, nia leghui tuna Zisas helahela ghinina God, neke ghua. Ira noni haroharo dike fininio, dike helahela ghini haro molamo God.