Luk 2 | KjiSC | STEP | Ka fafata ianimu ia mane ginitaukelana Romu, Agusitasi ia ta ghua ghini, neke nakaini kaike puhi ta gigima, ia ta mala riva ghini kaike taho noni, ka ira soloso haroharo ta au pekana Romu.

Luke 2

Ia Urahana Zisas

1 Ka fafata ianimu ia mane ginitaukelana Romu, Agusitasi ia ta ghua ghini, neke nakaini kaike puhi ta gigima, ia ta mala riva ghini kaike taho noni, ka ira soloso haroharo ta au pekana Romu. ^{▼▼2:1Sisa Agusitasi, e ghua mu ta va kudo ghinina Agusitasi ira noni. Babaolo Sisa ta ghua iahi mu, “mane ginitaukela” e ghua fafahakanana.} 2 (Iahi lamu ghu mu, kusu taho dike riva ghinina ka ia fafata gavanana Kuiriniasi aianihi Siria.) ^{▼▼2:2Ka fafata ianimu, ira palu Babaradi Galili ghe Zudia dito ke au haghele haro ka ia soloso Siria.} 3 Ira noni haroharo dike leghu lao ka ira sopai malaudi, mala ira noni ta riva ka ia gaumanina Romu, edi kangava hinaeri ghu ira babaolodi ka ia bukana taho. 4 Vununa Zosepu mu neke pagusu meha ka Deveti ia mane ginitaukela, neke lao ghu manei Betilehemu aianihi Zudia, ka ia torai malauna neke dolio Deveti. Manei mu neke sipana meha ka ia malau fafaana Nazareti aianihi Galili. 5 Manei neke hio taremehana haroma Mere ia nona paru neke to poteo ka fafata ianimu. 6 Ka ia la audi aianimu ghe, neke la dufu meha nga ia fafata ta mala uraha ia nona rekaha. 7 Manei neke va urahi ghu ia va kenuna rekaha ka manei. Manei neke piha va vevehai ka ira rekudi poko, ghe neke va epui nga ka ia hao mala valiha bulumakau, vununa neke to deo ringifota ta boka la au ghedira ka ia suga ta maladi ira ta ghahe fuludu.

Ira Engizeli Di Kahe Kavei Ia Urahana Zisas Ka Ira Mane Ta Kopunai Sipisipi

8 Ka redu ianimu, keha mane ta kopunai sipisipira, dike au ka ira galahedi kava leghaha ka peghuruna ia rekahana malau, kopunai ghidira ira nodi sipisipi. 9 Kapi ne ghua ma, neke to podolo ghu ia engizeli ka ia Lod vari hoataidi maneri ka giliona ia pelarana ia Lod neke fegala lilohorino, dike toraina maughedi ghu. 10 Ghe ia engizeli neke va kahe ghidi, “!Oka maughemu ghu! !Ara na hio mehai ia nonomoho ta veha, mala vanamuna ia va ghazaghaza ghau nia ira noni haroharo, e ghua! 11 !Redu iahi ka ia malau fafaana Deveti aianihi Betilehemu, ia nomu Va Doli, Kraes ia Lod neto uraha! 12 E ghua ghu iahi mala la fini avohina ghau ghatu: Ghau o la finini kaike rekaha ta epu ka kaike hao mala valiha bulumakau, ta piha va vevehai ka ira rekudi poko.”

13 Kapi ne ghua ma, dike to meha holara taremehana ghu engizeli ini ia vituruna engizeli fate, helahela ghinina God:
14 “Vanani God ia pelarana varanga ka malaunao fateni,
nia bule ka malau iahi peka, ka ira noni ta lao hihingona God.”

15 Ka ia ke leghu laodi ira engizeli ka malauo God fate, ira mane dike kopunai sipisipiro dike vari turi taghodi, “Aria da age ghu Betilehemu, da age finini ghu leghutau ta namanama neke va kahe ghini ghitao ia Lod tato dufu ani aianimu.”

16 Magali ma dike lao ghu maneri ka ia malau fafaana, dike la finiri ghu Mere ghe Zosepu niala ia gogoso tei ta epu ka ia hao mala valiha bulumakau, e ghua. 17 Ira dike kopunai sipisipiro di finini ghu Zisas, maneri dike la va kahe ghidi maneri haroharo aianimu heve neke turi ghinio ia engizeli ghinina rekaha iahi. 18 Ira noni haroharo dike nonomohoro ka heve dike kaheriro ira mane ta kopunai sipisipi dike puina nodi fere, 19 ghe Mere neke ngana poikari ma leghu irahi nga ka ia hihingona, neke puina hadu ghidi ngangana ghu. 20 Ira mane dike kopunai sipisipiro dike leghu lao ka ira nodi sipisipi, va varangi nia helahela ghinina God ka heve dike finiri nia nomohoriro, taghe neke to kaheio lama ia engizeli.

Zisas Di Hio Hagheli Ka Ia Sugana God

21 Leghuna hana ravata ka ia fafata age hioi ia papahe va ghilaghila ia gogoso tei, Zisas dike ghua ghini babaolonana, ia babaolo neke kusu vananio ia engizeli, ghe neke la vuha mehao nga manei ka tianao nona uke.

22 Ne dufu meha ghu ia fafata mala va kakalasa leghuna ia va doli rekaha ta kahei ka ia vetula Mosese, Mere ghe Zosepu dike hio laoi Zisas aianihi Zerusalemu, mala vanani laona ia Lod. 23 Taghe ia ta kangavi la ka ia vetula ia Lod, ta kahe ghua iahi, “Neto rekaha mane la ia rekaha ta kusu va dolini ia fotati, rekaha mane ianimu, e mala vanani lao ia Lod,” ^{▼▼2:23 Kave 13:2,12} ia ta ghua. 24 Mere ghe Zosepu dike hiori ghu “palu babahulu bora ba, palu babahulu tahi,” ^{▼▼2:24 Hiama 12:8} mala riva ghinina ia veala, leghuina ia vetula ka ia Lod.

25 Ka fafata ianimu, kaike mane, Simoni e ghua ghini babaolonana, neke au haro aianihi Zerusalemu. Mane Simoni iahi mu kaike mane ta lotoro ka ia nahalina God nia e toraina heluhelu ghini nia nomohi God, e ghua. Manei neke foudi ia Tarunga Ta Maduana, neke toraina au afa ghini ghu ia Mesaea ta ke meha hio va dolinina Isiraeli. 26 Ia Tarunga Ta Maduana neke va kahe ghini Simoni ta deona ge boka leme ghu manei, e vuhai age finini ghu ia Mesaea ka ia Lod. 27 Ka ravata ianimu ia Tarunga neke babatu ghini lao Simoni ka kaike ghu, ka ira galahedi ka giliona ia Sugana God, ka ia fafata hio laoi Mere ghe Zosepu ia gogoso Zisas mala vanani laona ia Lod, leghuina ia puhina ia vetula. 28 Simoni neke au haroma aianimu, neke hio ebeti ghu ia gogoso tei ka ira kamena helahela ghinina God, ghe neke kahe ghua nga iahi,
29 “!Lod, ghatunaina ara a boka leme ghegu mo tuna ka ia bule!
Taghe noke naiungene vanaguo agho,
30 ara nato fini hibagu ia nou Va Doli
31 noke vanadiro agho ira noni haroharo.
32 !Manei mu ia fegala ta va podoli God ka ira noni taka Ziu ghu,
nia e age vanadi va vonavona ira nou noni Isiraeli, e ghua!”

33 Zosepu ghe Mere dike puina nodi fere ka heve neke kaheriro Simoni ghinina Zisas. 34 Ianimu tuna ghe neke va beanari nga Simoni, ne va kahe ghini ghu Mere, ia nona uke, “Rekaha iahi mu, e age va riufuri kehara nia hio va doliri kehara e ghua, ka ira tehi noni giliona Isiraeli. Manei mu kaike va ghilaghila ta mala age sokei maneri ghatu. 35 Ka ianimu ghe gedi age podolo nga ira toraina popoikadi ngangana ka ira tehi noni. Nia ia muko hihingo taghe ngaruna leboto sisilufu mala magara ia ta ghua tuna, ge age suvuli ghu torai hihingou nia, e ghua.”

36 Ana ia porofeti, neke au molamo aianimu, ka ira galahedi ka ia Sugana God. Manei mu ia tuunaghase Fanueli ka ia butubutu Asa, neke to puina ghaghasekusu ghena ghu. Manei mu ghasekusu lemekaina, vununa vitu komuhuna mo ia varihio ka maneri palu, neke leme ghena ghu ia keranau. 37 Ka fafata ianimu, Ana neke to age hana ngavuluai rodana komuhuna. Manei neke au tudu ma ka ia Sugana God redu ravata, va totoana ghinina God ka tarai nia filui mahai, e ghua. 38 Neke nonogele ngama Simoni taremehadi Mere ghe Zosepu, neke to ghahe namo lao ghu Ana, la tatanigai helahela ghinina God. Manei neke tuturi ghini Zisas ka ira tehi noni dike au afa ghinio ia mehana ia Mane Ginitaukela neke naiungene ghinio, ta mala meha va kalasarira ira nonidi Zerusalemu.

39 Leghuna va ghuduvuri Zosepu ghe Mere ira vahina leghutau nga ta kahei ka ia vetula ia Lod, maneri dike leghu lao ka ia malaudi Nazareti aianihi Galili. 40 Maneri dike au ma aianihi Nazareti neke to age manefaa nia maneheta ghu Zisas. Rekaha ngama manei, neke to puina age avoavoho fuludu ghu manei, auina ia va beana ka God.

Zisas Ne Au Ka Giliona Ia Sugana God

41 Leleghu komuhu nona uke ghe nona mama Zisas, dike lao aianihi Zerusalemu ka ia Mahai Varighara Va Manemanena Ia Ghahe Fuludu. 42 Ka ia fafata neke to age tazoi palu komuhunao Zisas, maneri lito tatamana dike la holara haroma ka ia mahai varighara, taghe ta fani ghua tudu lama. 43 Leghuna va fuluduri ira ravata mahai varighara, nona uke nia nona mama e ghua, dike tatanigai ke leghu ka ia malaudi aianihi Nazareti, nga ia rekaha mane Zisas mu neke au hinae mo Zerusalemu. Nona uke ghe nona mama e deo gedi ke avohi ghedi ghu ka ia tatanigaina, 44 vununa nganganadira maneri palu mu, manei neke leghuri mo keha noni ta avohori ka dike ghahe varighara taremehadiro taghodi, dike ghua. Ghe di deo ghu fininidina saighona ianimu leghuna ghaghahe ia kamotona ravata, maneri palu dike to tataniga hadui ka ira taremehadi nia ka ira ta avohori maneri palu, e ghua. 45 Di deo ghu boka fini fataidina, dike leghu lao aianihi Zerusalemu, dike la hadui ghu aianimu. 46 Leghudi lito ravata ghe dike la finini nga. Manei neke au ka ia Sugana God, nohe taremehadira ira mane vari va kakahei ka ira Ziu, nonomohona nia notohorina e ghua. 47 Maneri haroharo dike nonomohoro, dike nodi fere fuludu ka ia avoavoho nia ka ira ungene tughu manei. 48 Ka ia la finini nona uke ghe nona mama, maneri palu dike puina age nodi fere fuludu. “!Tuugu Maneo!” neke ghua ghini nona uke. “?Heve no ghua ghe, no va riva ghini ghai nga agho mu kokolona riva iahi? Ghai palu nou uke ghe nou mama nato puina age anga ghemai fuludu, nake haduigho ghu ka ira leghu pelodi nga.”

49 “?Mala heve ghe no haduau nga?” neke ghua notohorira Zisas. “Geala ghau palu to kusu avohi ma ta mala auna ara ka giliona ia sugana nogu Mama.” 50 Ghe maneri palu e deo gedi ke va fafahaki ghu heve neke kaheino manei.

51 Ianimu tuna ghe neke leghu laori nga manei nona uke ghe nona mama aianihi Nazareti neke la au nonomoho ghu ka maneri palu. Ghe nona uke neke suteri leghu irahi nga ka ia hihingona. 52 Zisas neke faa vona ghu ka ia tini nia avoavoho. God nia ira noni haroharo dike avohio manei, dike toraina namaha ghini fuludu.