Luk 20 | KjiSC | STEP | Kaike ravata, ka ia vari va kakaheina nia tuturi beanana Zisas ka kaike galahena ka giliona ia Sugana God ghinina ia Nonomoho Ta Veha, ira hiama ta kenu nia ira ta vari va kakahe ghini ia vetula beana, nia keha noni babaturani e ghua, dike vona lao ka manei,

Luke 20

Ia Notoho Ghini Ia Mana Ka Zisas

Matiu 21:23-27; Maki 11:27-33

1 Kaike ravata, ka ia vari va kakaheina nia tuturi beanana Zisas ka kaike galahena ka giliona ia Sugana God ghinina ia Nonomoho Ta Veha, ira hiama ta kenu nia ira ta vari va kakahe ghini ia vetula beana, nia keha noni babaturani e ghua, dike vona lao ka manei, 2 dike la notohi ghu, “?Ka mana hei mo no riva ghidira agho leghutau irahi?” dike ghua ghini.

3 “A kusu notoho ghauna ara kaike notoho,” neke ghua ungene tughuna Zisas. 4 “?Ia rivai seselebeana ka Zone mu neke sipa mehana ka malauo God fate, ba, neke meha ka noni?”

5 Maneri dike nonogele ghinina ka vari hoataidi taghodi kahe ghuana iahi, “Neke sipa meha ka malauo God fate dato ghua la ghita, ghatu manei e ke age notohi, heve da ghua ghita ghe, da deo nga va hohoghonaina Zone, e ke ghua. 6 Nga neke meha ka noni dato ghua la ghita, ghatu ira noni edi age fera ghini ghita ghahipa, vununa maneri edi va hohoghonai Zone mu kaike porofeti, ta ghuana.” 7 “Ghai e deo ga avohi ghu hae neke la sipa mehana,” dike ghua ghu ungene tughuidina.

8 “Neto ghua la ianimu, ara e deo ga age va kahe ghini ghau ghu ka mana heve mo na riva ghidira ara leghutau irahi,” neke ghua ghidi Zisas.

Ia Ungene Talevaradi Ira Mane ta Muko Ta Kopunai Nunuma Gerepi

Matiu 21:33-44; Maki 12:1-11

9 Zisas neke fihiki laoni ka ira noni, neke turi vanadi ghu ungene talevara iahi: “Kaike mane neke numa ghini kaike nunuma gerepi, neke vanadi lao ghu ira noni ta kopunai nunuma, mala hio vanani rongona leleghu fafata. Ianimu tuna ghe neke ghahe lao nga manei ka ia keha soloso, la au soduaina. 10 Ka ia fafata mala pisu fuana gerepi, manei neke tuhu laoi kaike ghu ka ira nona noniriva, ta mala la hio vananina ia tufana ka ira gerepi. Ghe ira ta kopunai nunuma, dike sakomo hioi dike botai ghu, ghe dike va leghu kamena kakatoi nga. 11 Ke tuhu laoini tuna ia keha maneriva neke ghua ia mane ta kutamai nunuma, ghe varifata haroma dike la va riva ghinina; dike la ruzai, nia va hahaghavi dike ghua, nia ke va leghu kamena kakatoi haroma tuna, dike ghua. 12 Ianimu tuna ghe neke tuhu laoini nga manei kaike va litona maneriva. Manei haro dike la va bakobakorai dike kai kavei ghu ka ia nunuma gerepi.

13 “‘Heveni tuna ta age riva ghinina ara?’ neke ghua ia ta kutamai nunuma notohina taghonai. ‘!Na avohi mo ara! Ara a tuhu laoi tuugu mane ta toraina namaha ghini fuludu ini ara. Geala maneri edi toraina la heluhelu ghini mo ghatu,’ neke ghua.

14 “Ghe ira mane ta kopunai nunuma, di fini laoi ghu ia tuunamane, dike kahe ghua iahi ka vari taghodi, ‘Ta la meha iahi tuna ia tuunamane manei, ta mala hio kadoli nunuma iahi ghatu. !Aria da atungi ghu, da taghoi ghu taghodai nunuma ta mala hio kadoli iahi manei!’ dike ghua. 15 Kai kavei tuna ka ia peghuruna nunuma gerepi gedi atungi ghu, dike ghua.

“?Geala heve ghu mu ta age riva ghinina ia mane ta kutamai nunuma gerepi ka ira mane ta kopunai nunuma?” neke ghua notohona Zisas. 16 “A va kahe ghini ghau ghu ara, manei e la meha ghatu, e atunguri haroharo ghu, nia ke vanadi tuna kehara ia nunuma gerepi, e ghua.”

Di nomohi ghu iahi ira noni, dike kahe ghua iahi, “!Toraina deo kabai ghinina ta ghuana ianimu!” dike ghua.

17 Zisas neke mato laori, ghe neke kahe ghua nga iahi, “?Heve ghu mu fafahakadira Kakangava Ta Maduana ta kahe ghua irahi?
‘Ia ghahipa dike sokeio ira ta rivai suga,
neto ke toraina meha ghahipa tongovonana,’ ^{▼▼20:17 Samu 118:22} ta ghua iahi.

18 Heiri haroharo ira ta riufu lao ka fatena ghahipa ianimu, edi age guto paparomoto ghatu, nia hei neto zoghui la ghahipa ianimu, e age muzara ghatu.”

19 Di nomohi ghu tuturi iahi ira ta vari va kakahe ghini ia vetula beana, nia ira hiama ta kenu e ghua, dike to kabai magali sakomi ma Zisas, vununa maneri dike avohi ungene talevara iahi mu, neke turi ghidi ma taghodi, ta ghuana. Ghe dike maughedi ka ira noni.

Ia Notohona Kai Takisi

Matiu 21:45-46; 22:15-22; Maki 12:12-17

20 Ka ia au afa ghini maneri ia nodi fafata ta veha, ira ta babatu dike tuhu laori ira mane sigho ta la namaha seboina Zisas ka keha nodi notoho. Maneri dike kabai va sisiva sakomi Zisas ka keha ngengene ta kahe va zeari manei, edi boka mala nai laoi ghu ka ia mana ia gavanana Romu, dike ghua. 21 Notohi tuna Zisas dike ghua ira mane sigho, “Mane Vari Va Kakahei Agho, ghai na avohi mo ta ngengene, nia ta vari va kakahe ghinina agho ia ta lotoro, nia taka toka kaike pelona ghu ka ira noni, e ghua. Nga o vari va kakahe ghini ia hohoghona ka ia ghaghahena ta kabai ghini God. 22 ?O va kahe ghini ghai ghu ghatunaina, ne totonu mo ta kai laorira ira takisi ka Sisa ia mane ginitaukelana Romu, ba deo?”

23 Zisas neke to avoho laori ta kabai seke ghinini maneri, neke kahe ghua ghidi ghu iahi, 24 “O va podolo vanagu mehana ko kaike kunegelena Romu. ?Totoghalena hei nia babaolona hei mu, ta au lao nira?

“Ka Sisa,” dike ghua ungene tughuina.

25 “Neto ghua la ianimu, vanani Sisa nonara manei, nia ira leghutau haroharo ta nona God, go vanani ghu God, e ghua,” neke ghua ghidi Zisas.

26 Ira ta kana ghini Zisas, dike deo boka seke ghinina, ta kaherira ghu manei keha ngengene va zezea ka kenudi ira noni. Nga dike to puina nodi fere ma ka ira ungene tughu manei, dike to au vanemoho ma ghu.

Ira Sadiusi Di Notoho Ghini Ia Tetuleghu

Matiu 22:23-32; Maki 12:18-27

27 Ianimu tuna ghe dike deke kenu lao nga keha mane Sadiusira, kaike pukuna noni ka ira Ziu taka va hohoghonai ghu ia tetuleghu ka ia leme, dike la notohi ghu, 28 “Mane Vari Va Kakahei Agho, Mosese neke kakangava malamai ghai ghinina kaike mane neto deo tuuna la, neto leme kaini ghu ia ghaseborona, ia tahina mane e toraina ke hioi ia ghaseboro ta lemekai, e ke mala nai vanani rekaha ghu ia tahina mane neke lemeo. 29 Kaike fafata, taghe vitu tatahina mane dike aura. Ia mane ta faa ne varihio ghu, neke deoi rekaha ngama, neke to leme ghu. 30 Ia va paluna tahina mane manei neke age hioini ia ghaseboro ta lemekai, ghe manei neke deoi rekaha haroma, neke leme ghu. 31 Neke ghua ma ianimu dike hokoto haro ghu ira vitu tatahina mane hioina manei dike leme kainina ghu, ghe dike deori rekaha haroma, e ghua. 32 Va nonoghanana, ia fotati neke age leme haroma molamo. 33 ?O va kahe ghini ghai ghu, e age ghaseborona hei mo mu fotati iahi ka ia tetuleghudi maneri? !Vununa ira vitu tatahina mane haro dike varihioro ka manei!”

34 Ungene tughuri tuna neke ghua Zisas, “Varihio ini mu, e maladi ma ira noni ka malau iahi peka. 35 Nga ka ia doli ta la meha ghatu mu, eka ghua ghu ianimu. Vununa ira noni ta fata ka ia tetuleghu ka ia leme mu, e deo ke age varihiodira ghatu. 36 Nia maneri e ghua, e deo boka ke age lemedira ghatu, vununa maneri mu taghe ira engizeli to ke age ghua. Maneri mu nona rekaha ghu God, vununa to ke va doli leghuri ka ia leme. 37 Nga ghidira ira noni ta leme edi ke age tetu leghu ia ta ghua mu, Mosese na ghe neke va podoli nga mu ta hohoghonana iahi, ka ia kakangava manei ghinina ia rekahana heke ta saliga, ka ia kahei manei ia Lod mu, ‘ia God ka Ebarahamu, ia God ka Aesake, nia ia God ka Zekopu,’ ^{▼▼20:37 Kave 3:6} neke ghuao. 38 Manei mu e nodi God ghu ira ta doli, nga eka ghua ghu ka ira ta leme. Ka God mu, heiri haroharo ta doli ira tarungadi mu, edi doli.”

39 “!Vehana ungene tughu, Mane Vari Va Kakahei Agho!” dike ghua ira mane ta vari va kakahe ghini ia vetula beana, dike teturo aianimu. 40 Leghuna ianimu, e deo heini neke va ghaghanoi hetana mala notohina manei.

Zisas Ne Notohori Ira Mane Ta Vari Va Kakahe Ghini Ia Vetula Beana Ghinina Ia Mesaea

Matiu 22:41–23:14; Maki 12:35-40

41 Ianimu tuna ghe neke notohori nga Zisas, “?Ne heve ghe, ia Mesaea mu e tuuna Deveti, ne ghua nga? 42 Vununa taghonai Deveti na ghe, neke kahe ghua nga iahi ka ia bukadi ira Samu:
‘Ia Lod neke kahe ghua iahi ka ia nogu Lod,
Nohe ka kame mautugu ini
43 a vuhai nairi ghu ara ira ta kana ghinigho,
taghe nonohe mala dedeke nouna ka pekadi ghaheu nira.’ ^{▼▼20:43 Samu 110:1}

44 ?Deveti neke to va kudo ghini Lod la manei, heve e ghua ghe, tuuna Deveti mu manei geke age ghua nga?”

45 Ka ia fafata ta nonomoho ira leghu noni nga, Zisas neke fihiki lao ka ira nona mane ta nonofoi, ghe neke kahe ghua nga iahi, 46 “!O balau ghidi ira ta vari va kakahe ghini ia vetula beana! Vununa maneri edi puina kabai liloho lao meha ka ira nodi poko sodu, torai kabai ghidira ira noni ta kudo veharira, nia ta va vonavonarira e ghua, ka giliodi ira malau mala makete. Maneri edi puina kabai ghini fuludu ta noherira ira nonohe va vonavona ka ira suga mala varighara ira Ziu, nia ka ira fafata mahai varighara, e ghua. 47 Ghe maneri e deo gedi haghava ghedi ghu, seke ghidira ira fotati ta lemekai ta la sisikona ghu ka ira sugadi. Ianimu tuna ghe gedi tarai soduai nga tuna peghuruo, taghe noni vehadi ta ghuana mala ghona ghedira ira noni. Vununa di ghua iahi maneri, e toraina age faa fuludu lao ghu ghatu ia vavahagala ka maneri.”