Luk 23 | KjiSC | STEP | Ianimu tuna ghe, dike tetu nga ia Nonohe Faghina kamoto ka ira Ziu, dike hio laoi ghu Zisas ka Paelati ia gavanana Romu,

Luke 23

Paelati Ne Notohi Zisas

Matiu 27:2,11-14; Maki 15:1-5; Zone 18:28-38

1 Ianimu tuna ghe, dike tetu nga ia Nonohe Faghina kamoto ka ira Ziu, dike hio laoi ghu Zisas ka Paelati ia gavanana Romu, 2 dike la makuti ghu kahe ghuana iahi: “Mane iahi neke batu ghidi va zea ira noni ka ghita, nia neke va kahe ghidi taka kai lao takisina ghu ka Sisa ia mane ginitaukelana Romu, e ghua. Manei neke kahei haro taghonai mu ia Mesaea nia kaike mane ginitaukela e ghua, ta ghuana.”

3 Paelati neke notohi ghu Zisas, “?Agho lamu ghu mu, ia Mane Ginitaukeladi ira Ziu?”

Zisas neke ungene tughui, “To kahei nia ma taghou,” neke ghua.

4 Paelati neke fihiki lao ka ira hiama ta kenu nia ka ia varigharana noni e ghua, neke kahe ghua ghu iahi, “!E deo ma ta fini va mukoina ara ka mane iahi!”

5 Ghe maneri dike tutuufu di kahe ghua ghu iahi, “!Vununa ka ia vari va kakahei manei, neke va vuvuha magara ghu hae ghe hae ta laona manei ka giliona Zudia, tataniga Galili e dufu ghu Zerusalemu!” dike ghua.

6 “?Torai tanina ghu Galili baini mu mane iahi?” neke ghua notohonana Paelati. 7 Ne avohi ghu manei ta taninana aianimu Zisas, Paelati neke va ghahe laoi manei ka Herodi Anitipasi, vununa Galili mu neke au ka pekana ia kopu manei, neke au ghu manei aianihi Zerusalemu ka fafata ianimu.

Herodi Ne Notohi Zisas

8 Herodi neke puina va manemane fuludu fininina Zisas, vununa manei neke nomoho ghini, neke hagala ghini ghu sepaoni ta mala fininina Zisas riva ghinina kaike hahaima. 9 Tehi notohoni neke notohorina manei ka Zisas, ghe Zisas neke pake ghena ungene tughuina. 10 Ka fafata ianimu, ira hiama ta kenu, nia ira ta vari va kakahe ghini ia vetula ta maduana ka God e ghua, dike tetu haroma aianimu, kudokudo makutu laoina. 11 Herodi nia ira nona mane magara e ghua, dike tatanigai vela ghini nia va hahaghavi e ghua Zisas. Ianimu tuna ghe, dike va vona vanani lao pokona ginitaukela ta sodu nga, dike va leghu laoi ghu ka Paelati. 12 Herodi ghe Paelati dike vari kanairo sepao, toke age mane baere ka ravata ianimu.

Paelati Neke Notohini Zisas

Matiu 27:15-26; Maki 15:6-15; Zone 18:39–19:16a

13 Ianimu tuna ghe, neke kudo varighara ghidi nga Paelati ira hiama ta kenu, ira keha mane ta babatu nia ira noni e ghua, 14 neke va kahe ghidi ghu, “Ghau no hio mehai mane iahi ka ara, va zutu ghinina manei ne va hugahugari ira noni, mala taga tetuina ia gaumanina Romu, ta ghuana. Ghe manei mu, ara nato notoho va ziloi zomona ka kenumu ghau, na finini ghu ta kalasa ghenana. 15 Herodi neke fini haroma ta kalasa ghenana manei, neke va leghu mehai ghu ka ghita. E deo muko ma neke riva ghidira mane iahi ta boka age mala va lemeina. 16 A suna age puruasimini ma ghu ara, ghe ga va ghahei nga.” ^{▼▼23:16Keha kakangava sesepadira ka Giriki e ke nai hagheli papaguaina 17 e kahe ghua ghu iahi, “Vununa manei neke mala va malumu kave laoi ka maneri kaike mane, ka ia fafata mahai varighara va manemane.” e ghua.}

17 – 18 Ianimu lama daghoro vona harodira, “!Atungi Zisas, va kave vanamai ghu Barabasi mo!” 19 (Barabasi dike nakai hagheli ka pipiliga vununa manei neke holara magari ia gaumanina Romu ka kaike magarao aianihi Zerusalemu, nia vununa neke atungi manei kaike noni e ghua.) 20 Paelati neke vari tuufuai taremehadi maneri, vununa manei neke kabai va kavei Zisas mo. 21 Ghe maneri dike kudokudo lao ma dike au ghu, “!Tupila ghini ka hekefalahata! !Tupila ghini ka hekefalahata!” dike ghua.

22 Ka ia va litona fafata, manei neke kahe ghuani iahi, “?Ne heve ghe ga tupila ghini nga ara ka hekefalahata? ?Heve muko mo neke riva ghidira manei? E deo ma ge fafahaka ghu ka ara ta mala nainina manei ka ia leme. Ara a puruasimini ma ghu, nia ke va ghahei ma tuna, e ghua.”

23 Ghe ia varigharana noni, dike kudo va fafaa lao ma dike au ghu ta mala va lemeina Zisas, to vuhai age ghorevura ghu ira kudokudo ka maneri. 24 Va uveri tuna ne ghua Paelati ira noni ta mala atungina Zisas ira mane magara, leghuina heve dike kabai ghinio maneri. 25 Paelati neke va kave vanadi Barabasi, ia mane neke auno ka pipiliga, vununa neke tataniga ghini kaike magara nia neke atungi kaike noni, e ghua. Vanadi lao tuna Zisas neke ghua, mala riva ghinina heve dike kabai ghinina maneri ka manei.

Zisas Di Tupila Ghini Ka Hekefalahata

Matiu 27:31-44; Maki 15:20-32; Zone 19:16b-27

26 Ka ia fafata hio ghahei maneri Zisas mala la va lemeina, Saemoni ia tanina Saerini neke la haghele mehao ka malau leghaha ini sipa mehana ka ira kobosodi peghuruo, dike papadi ta mala leghuina Zisas, mala hureina ghu ia hekefalahata ka manei. 27 Leghahai varigharana noni, taremehadi ira fotati ta nakele dudumana ghedi, dike leghuina Zisas leghuna mo. 28 Ghe Zisas neke fihiki leghu ka maneri, neke va kahe ghidi ghu, “Ghau fotatidi Zerusalemu, oka nakele ghinagu ghu ara, nga o nakele ghini ghau taghomu nia ira nomu rekaha, e ghua. 29 Vununa ira ravata edi la meha ghatu ta age kahe ghua iahi maneri, ‘Ka beana ghedi fuludura ira fotati ta deo tuudi, ira tia ta sasahaka, nia ira ta deo kalasu kai va puputidira, e ghua.’ 30 Ira noni edi age kahe ghua iahi ka ira vuhuku, ‘!Riufu meha ka ghai!’ nia ka ira voruhu, ‘!Tamunu ghai!’ ^{▼▼23:30 Hosea 10:8} edi age ghua ghatu. 31 Iahi mu e toraina mala dufu, vununa ira noni dito nai lao heke ta dodoli la ka kaike totoi, edi age saliga kaike pelo ma. Nga dito nai lao heke ta leleme la ka kaike totoi, edi age saliga va nogha. E varifata haroma ghu dito va vavahagali la maneri kaike mane ta kalasa ghena taghe ara. God e age tibiriri ira ta auri muko edika holara hihingo la ghu mala hioina ia vavahagala ta toraina muko laoni.”

32 Keha palu mane ta muko, dike hio kaveri haroma, mala va leme taremehanana Zisas. 33 Ianimu tuna ghe, dike age dufu nga ka ia malau ta va kudo ghini “Ia Pau.” Maneri lito ghu dike tupila ghidi vona haroma aianimu ka lito hekefalahata. Zisas ka ia hekefalahata hoata, nia ira palu mane ta muko tuna gedi au ghu ka ira palu pelona manei, e ghua.

34 Kahe ghua tuna iahi ne ghua Zisas, “Mama, kai hazari ira sasakedi noni irahi, vununa deo gedi avohori ghu, heve di riva ghidira.” ^{▼▼23:34 Ka keha kusu va kenudi kakangavara e deo ge au ghu ngengene irahi.}

Ka fafata ianimu, ira mane magara dike hilava ghidi daesi ira nona poko Zisas.

35 Ira noni dike tetu ma dike mato ghu, ka ia fafata pagho velavela ghini Zisas ira ta babatu kahe ghuadira iahi, “!Mane iahi mu neke hio va doliri mo ira keha noni; va leghu ghini e hio va dolini ghu tuna taghonai, neto manei la mamu ia Mesaea fafaetena ka God!” 36 Ira mane magara dike vela ghini haroma Zisas, dike vanani waeni ta minga ghu. 37 Kudo lao tuna ka Zisas dike ghua maneri, “!Noto Mane Ginitaukeladi la mamu agho ira Ziu, o hio va doligho taghou!” dike ghu ghini. 38 Kaike takifi dike tupila ghini laona ka ia hekefalahata fatena Zisas ta au lao kakangava irahi: “Iahi Mu Ia Mane Ginitaukeladi ira Ziu.”

39 Kaike ghu ka ira palu mane ta muko ta rekete haro aianimu, neke ungene velavela lao ka Zisas. “?Mesaea mamu baini mu agho? !Neto ghua la iamu, o hio va doligho taghou nia ghai palu haro, e ghua!”

40 Ghe ia keha mane ta muko, neke buruai manei, “Geta to au mo agho ka vavahagala ta au ani manei ghe, e deo go maughini gheu ghu God baini agho mighei? 41 Ghita palu ghu mu, e fatada mo ta mala leme ghidira ira sasake ka ghita palu, nga mane iahi mu e deoi sasake.” 42 Kahe ghua tuna iahi, neke ghua manei, “Zisas, o nganau ka ia meha tetu Mane Ginitaukela agho ka ia nou Ravutu.”

43 Ungene tughui tuna neke ghua Zisas, “A toraina va kahe ghinigho ghu ara, ghatu lama o age au taremehagu ghu agho aianihi paradaisi.”

Ia Leme Ka Zisas

Matiu 27:45-56; Maki 15:33-41; Zone 19:28-30

44 Ka ia hoatai ravatana, ia malau kamoto neke to age nagoromo ma neke dufu ghu ka nakele lito ghu. 45 Ia taunu neke to nodo pelarana. Ia poko riringi leghaha ta tuta neke reketeo ka vari hoataina ia Ringifota ta Maduana God nia ia ringifota ta maduana mala saliga inisenisi e ghua ka giliona ia Sugana God, neke to age reku fota palu. 46 Zisas neke kudo, “!Mama, ara na nai agei tarungagu ini ka kameu nira!” Ne ghua ianimu ghe, neke hingo kai nga, leme ghenana.

47 Ia manefaadi ira mane magaradi Romu ne age finini ghu heve neke dufuno, ne kudo vehai God neke kahe ghua ghu iahi, “Torai mane lotorona ghena mamu ngaini mane iahi.” 48 Ira tehi noni dike meha holara fifiniro, di finiri ghu heve neke dufuro, dike sura ka malaudiro, toraina muko hihingodi fuluduna. 49 Ghe ira baere ka Zisas, nia ira vuro fotati dike leghu ghaghahe mehaio aianihi Galili e ghua, dike tetu hauai lao matorira leghu irahi nga.

Ia Giugilu Ka Zisas

Matiu 27:57-61; Maki 15:42-47; Zone 19:38-42

50 Kaike mane ta puina veha nia lotoro ira puhina, babaolonana Zosepu neke auna aianimu. Mane iahi mu kaike ghu ka ira mane neke holarao ka ia Nonohe Faghina ira Ziu, 51 ghe manei e deo geke lao hihingona ghu ka ira va puhipuhi nia riva ira keha mane babatu. Mane iahi mu tanina ghu Arimatia giliona Zudia, neke au afa ghini ghu ia meha ka ia Ravutu God. 52 Manei neke lao ghu ka Paelati la fangaina ia tinina Zisas. 53 La hio hinaei tuna ia tinina Zisas ka ia hekefalahata, ge va piha ghini poko ghiho lineni ta sodu ghu, ghe neke la nakaini nga tuna ka kaike lianga foforuna ta toha va korosai ka mafara ta deo nga geke nai ghini noni ta leme ghu, neke ghua. 54 Iahi mu neke riva ghini manei ka saighonana Faraide, ia ravata mala va tana ghini ia Ravata Mala Maghoso ka ira Ziu.

55 Ka ia fafata hio ghahei ia tinina, ira vuro fotatidi Galili dike leghu laoi haroma, dike la finini ghu ia lianga ka dike la nakainio maneri ia tinina. 56 Ianimu tuna ghe, dike leghu lao nga Zerusalemu, dike la va tanari ghu ira bosoboru nia sedi e ghua, mala nai laorira ka ia tinina Zisas. Nogha di ghua ghu maneri, to Ravata Mala Maghoso ma ka ira Ziu, dike mamana ghu maneri leghuina ia ungene va gigima ka Mosese.