Luk 4 | KjiSC | STEP | Ka ia fafata sipana ka ia Ketuhu Zodani ta ke leghu ghu Zisas, manei neke foudi ia Tarunga Ta Maduana. Ia Tarunga neke babatu ghini kave lao manei ka ia malau koroghana ta karango,

Luke 4

Satana Ne Auaui Zisas

Matiu 4:1-11; Maki 1:12-13

1 Ka ia fafata sipana ka ia Ketuhu Zodani ta ke leghu ghu Zisas, manei neke foudi ia Tarunga Ta Maduana. Ia Tarunga neke babatu ghini kave lao manei ka ia malau koroghana ta karango, 2 ka neke la auauio ia Faghinadi ira nazahi rodana ngavulu ravata. Ka ravata iranimu, Zisas e deo heve neke mahainina, neke puina age kovoro ghu ka leghudi leghu iranimu nga.

3 Kahe ghua tuna iahi ka Zisas neke ghua ia Faghinadi ira nazahi, “Noto Tuuna la agho God, o kahe ghini ghahipa iahi e ke fihiki ghu ka bereti.”

4 Ghe Zisas neke va kahe ghini, “!E deo! Ira Kakangava Ta Maduana neke kaheina mu, ‘Eka ghua ghu ka ia bereti lama mu ta hioina ia doli ira noni,’” ^{▼▼4:4 Ngengene 8:3} neke ghua ghini.

5 Ianimu tuna ghe neke tetu nga ia Faghinadi ira nazahi, neke batu ghini lao ghu Zisas fate va fini ghinina birusuna fafata tei ira leghu ravutu nga ka malau iahi peka, 6 neke kahe ghua ghu iahi, “Ara a vananigho leghu mana nia taghotagho irahi nga ka malau iahi peka, ta mala taghorira agho, vununa leghu irahi nga mu, nogu ara ta mala vanani laona hei ia ta kabai vanani ara. 7 Ara a vananigho haro ghu leghu irahi nga, noto maimanihi hinae la va totoana ghinaguna agho.”

8 Zisas neke ungene tughuini, “Ira Kakangava Ta Maduana ne kaheina mu,
‘Agho o toraina va totoana ghini ia Lod ia nou God lama;
riva vananina manei lama.’” ^{▼▼4:8 Ngengene 6:13}

9 Leghuna ianimu, ia Faghinadi ira nazahi neke hio laoi Zisas ka ia leghahai malau Zerusalemu neke la va tetui ghu ka fatena ia lobosaina ia riringina Sugana God, ghe neke kahe ghua nga iahi, “Noto Tuuna la agho God, O paraku hinae! 10 Vununa ne kahe ghua iahi ka ira Kakangava Ta Maduana,
‘God e age ungene va gigimari ira nona engizeli mala fini kopu ghinighona agho.
11 Nia maneri edi age hure vonaigho ka ira kamedi,
mala deo ghu ghe tutu ghinighona ghaheu nira ka ira ghahipa.’” ^{▼▼4:11 Samu 91:11,12}

12 Zisas neke ungene tughui, “Ira Kakangava Ta Maduana di kahe ghua molamo iahi, ‘Oka va sisiva ghini ghu ia Lod ia nou God.’” ^{▼▼4:12 Ngengene 6:16}

13 Leghuna la auaui Zisas ka ira leghu ghaghahedi nga, ia Faghinadi ira nazahi neke ghahe kainina birusuna fafata tei, afa ghinina kaike fafata ta vehani.

Zisas Di Sokei Aianihi Nazareti

Matiu 4:12; Maki 1:14

14 Ianimu tuna ghe neke leghu nga Zisas aianihi Galili, foudina ia mana ka ia Tarunga Ta Maduana. Ia nonomohona manei neke to ongaha kamoto ka ira malau haroharo aianimu. 15 Manei neke vari va kakahei ka ira suga mala varighara ira Ziu, dike helahela ghini ghu ira noni haroharo.

16 Ka ia fafata mehana Zisas aianihi Nazareti ka ia malau neke faa vonao, manei neke lao ka ia suga mala varighara ira Ziu ka ia Ravata Mala Maghoso taghe ta fani ghua tudu lama, neke tetu vona ghu manei izumurira ira Kakangava Ta Maduana. 17 Ia buka ta vividuhu ta au ira tuturi ka Aesaea ia mane porofeti, dike vanani laona, neke fedaha dufu laoi ghu manei ka ia ta kahe ghua iahi:
18 “Ia Tarungana ia Lod ne au ka ara,
vununa God neke faeteau ara mala tuturi ghinina ia Nonomoho Ta Veha ka ira ta malanga.
Manei neke tuhu mehau ara mala va ongahina ia ta ke age kalasa ghedi ghatu ira ta au pipiliga,
ta ke age vovoho fifinina ghatu ira ta melu fifini,
ta ke age kalasa ghedira ira ta au ka pekana ia mana ira keha noni,
19 nia ta mala va ongahina ia namaha ka ia Lod tato dufuna, e ghua.” ^{▼▼4:19 Asaea 61:1,2}

20 Manei neke viduhu leghui ia buka ta vividuhu, neke va leghu vanani lao ghu ia noni ta kopu, ghe neke nohe hinae nga. Ira noni haroharo ka giliona ia suga mala varighara ira Ziu, dike mato va gigima lao ka Manei. 21 Ianimu tuna ghe neke kahe ghua nga iahi Zisas, “Kakangava Ta Maduana iahi neto meha hohoghona ghatunaina, taghe ta nomohi nia ghau izumina!”

22 Ira noni haroharo dike auro aianimu, dike toraina ungene va vehai manei, nia dike puina nodi fere fuludu ka ira ngengene ta namanama neke kaheriro manei, e ghua. “?Heve e ghua ghe, ge boka riva ghidi nga leghu irahi nga manei?” dike ghua notohodira. “Mane iahi mu tuuna ma Zosepu,” dike ghua.

23 Ianimu tuna ghe neke kahe ghua nga iahi Zisas, “Ara na avohi mo ta ke age kaheinani ghau ka ara ghatu, ia ungene talevara ia ta ghua iahi, ‘!Dokita, o va doligho taghou!’ ia ta ghua. Nia ghau o age kahe ghua haro molamo iahi ghatu ka ara, ‘?Heve no ghua ghe, noka rivai hahaima nga ka toraina nou malau ini taghou, taghe noke riva ghidiro la aianihi Kapaniumu?’ 24 Ghe torai hohoghonana mu, e deo porofeti ta fani hio suteina maneri ka ia torai malauna.

25 “Hohoghona fuludu, ka ia fafata Ilaiza tehi fotati nabokodini dike aura Isiraeli kuhana ghinina ia toka ka ia fafata neke lalarao lito komuhu onomo hihile, nia neke auno ia songe, lemei mahai, ka ia soloso kamoto, e ghua. 26 Ghe God e deo geke tuhu laoi ghu Ilaiza ka maneri. Nga neke tuhu laoi aianihi Zarefati mo, ka kaike fotati nabokona taka noni Ziu ghu, gheremena ia malau leghaha Saedoni. 27 Nia ka fafatao porofeti Ilaiza e ghua, ira noni dike au vavahagalaro ka lepa ani Isiraeli, dike tehi fuludu. Ghe deo kaikeu ka maneri neke age vehana, nga Nemani ia manena Siria, ia taka noni Ziu ghu lama.”

28 Di nomohi ghu iahi, ira noni dike auro ka ia giliona suga mala varighara ira Ziu, dike puina halari. 29 Paraku tetu tuna gedi vari lalao ghini ghu, hio kaveina ka malau leghaha ani gedi hio laoi ghu ka ia gheremena voruhu ka dike riva ghinio ia malau leghaha, dike ghua, vununa dike kabai tiulu kai laoi manei ka pegu ta didighili ani. 30 Ghe manei neto fihiki liloho ma neke to ghaghahe haghele lao ghu ka vari hoataidi tehi noni ari, nia to ghahe ghena ma tuna neke ghua.

Zisas Ne Tavusu Kaini Kaike Nazahi

31 Ianimu tuna ghe neke lao nga Zisas ka ia malau Kapaniumu, aianihi Galili, neke la vari va kakahei ghu leleghu Ravata Mala Maghoso, ka ia suga mala varighara ira Ziu. 32 Ira noni haroharo aianimu, dike puina nodi fere molamo ka ira neke kaheriro manei, vununa ira ngengenena manei neke au manadi.

33 Kaike fafata auna manei gilio ka ia suga mala varighara ira Ziu, kaike mane ta sukui nazahi neke kudo va fafaa lao ka Zisas, 34 “!O ghahe lao! ?Heve no kabai ghinina ka ghai, agho Zisas taniu Nazareti? ?Agho mu o meha, o mala ngovala ghai ghu noke ghua? Ara na avohigho mo agho. !Agho mu ia Ta Maduana neke va mehaighono God!”

35 Zisas neke burua laoi. “!O vanemoho o kave kaini ghu mane iamu!” neke ghua ghini lao ia nazahi. Ia nazahi neke fera kai hinaei ia mane ka kenudi ira tehi noni dike matoro. Ianimu tuna ghe neke ghahe kaini nga, deona ke va vavahagalinani.

36 Ira leghu noni nga dike age nodi fere fuludu, dike kahe ghua ghu iahi ka vari taghodi, “!Ka fefereanadi ngengenera! !Ka ia va kahe ghidi manei ka ia mana nia gigima ta kave mehana ira tarunga ta muko, maneri dike nomohi.” 37 Ia tuturina heve neke riva ghidiro manei, neke magali ma neke to ongaha ghu ka ia hori kamoto aianimu.

Zisas Ne Va Vehari Tehi Nonini

Matiu 4:23-25; 8:14-17; Maki 1:29-39

38 Leghuna ghahe kaini ia suga mala varighara ka ira Ziu ravata ianimu, Zisas neke lao ka suganao Saemoni. Nona vasagha Saemoni neke fogara taremehana dangava fuludu aianimu, dike fangai ghu Zisas maneri ta mala la toka ghinina. 39 Manei neke tetu ka ia gheremena vavagena ghe, neke va kahe ghini lao nga buruaina ia fogara. Magali neke ghua ma neke to vai hinae ghu ia fogara dangava, neke to ke age veha ghena ghu. Ia tetu vonana lama manei, neke va tana vanadi mahai ghu.

40 Ka ia luduru laona ia taunu saighona ianimu, ira noni haroharo ka rekahana malau ianimu, dike hio laori ira taremehadi ta fogara ka Zisas. Geta fogara heve dike dufurira ghe, ka ia vari posi lama manei dike veha ghedi haro ghu. 41 Kehara mu dike sukuri nazahi; ka ia va kahe ghidi va gigima Zisas, dike kave ghu ira nazahi kudo ghuadina iahi, “!Agho mu ia Tuuna God!” Ghe vununa maneri dike to avohi manei mu ia Mesaea ta ghuana, neke va nodori ghu Zisas, nia neke va kahe ghidi haro ta vanemohona, neke ghua.

42 Ka ia pagasana ia keha fufugho, Zisas neke kave lao ka ia malau ta ghou. Ira varigharadi noni dike hadui ghu ka ira leghu pelodi nga. Di la dufu fati ghu, maneri dike la papadi taka ghahe kairira ghu. 43 Ghe manei neke ungene tughuri, “Ara a torai tuturi ghini ia Nonomoho Ta Veha ghini ia Ravutu ka God, ka ira keha malau haro, vununa ianimu lamu ghe neke tuhu mehau nga manei.” 44 Manei neke ghaheri haroharo ghu ira leghu malau nga, tuturi beanana ka ira suga mala varighara ira Ziu aianihi Zudia.