Luk 5 | KjiSC | STEP | Kaike ravata, ne tuturi beana ghu Zisas ka ia tapuruna Lokana Genesareti , ira leghahai varigharadi noni, dike vari bubu lao ka manei dike la nonomoho ghu ka ia saorona God.

Luke 5

Ira Kusu Mane Ta Nonofoi

1 Kaike ravata, ne tuturi beana ghu Zisas ka ia tapuruna Lokana Genesareti ^{▼▼Luku 5:1Loka Genesareti lamu ghu mu keha babaolonana ia Lokana Galili.}, ira leghahai varigharadi noni, dike vari bubu lao ka manei dike la nonomoho ghu ka ia saorona God. 2 Zisas neke fini fata laori palu koaka ta korogha ka ia tapuruna kolo, vununa ira mane habuhabu dike ghahe kairi, dike la tihiri ghu ira nodi volo. 3 Zisas neke haghe lao ka kaike koaka dike au ari, neke la fangai ghu Saemoni ia ta kutamana, ta tugha kave birusunana ka kavao. Manei neke la nohe ka koaka ani, ghe neke va kakahe ghidi nga ira varigharadi noni aianimu.

4 Nogha ne ghua ghu Zisas ngengenena, manei neke kahe ghua iahi ka Saemoni “O kave lao tuna rauru mo ka ta rokarokasa ani, o la kai hinaeri ghu nomu volo nira, voloizoghurira keha namari,” neke ghua ghini.

5 “Manefaa agho” neke ghua Saemoni, “ghai nake toraina voriti redu kamoto ini, ghe e deo ma heve ta hio fatina. Ghe no kahei agho, a ke la va zoghu hinaeri ghu ghai voloizoghu idi.” 6 !Ka fafata ianimu, ira voloizoghu dike toraina age foudui namaridi, dike to age tatanigai reku ghu! 7 Ianimu tuna ghe dike kudo laori nga ira keha mane ka ia keha koaka dike kaike ghahe varighararo maneri, ta la toka ghidira. Ira palu koaka dike to age fouduai namaridi haro, dike age namo luduru ghu.

8 Ne age fini ghu Saemoni Pita ta ghuana ianimu, manei neke la torongaghituturu hinae ka kenuna Zisas, ghe neke kahe ghua nga iahi, “Lod, o ghahe kaiau ara ia noni ta toraina sasake fuludu, ta deo ga fata ghu meha au namona ka agho.” 9 Pita nia ira keha mane dike au taremehanao, dike puina age nodi fere fuludu ka ira tehi namari dike hioriro. 10 Zemesi ghe Zone ira palu tuunamane Zebedi dike habuhabu taremehanao Pita, dike puina age nodi fere fuludu molamo.

Zisas neke ungene tughui Saemoni, “!Oka maugheu ghu! !Ghatunaina e vai vona ghu, agho o age habuhabu noni!” 11 Tugha vonai tuna ka kavao ia nodi koaka, nai kairira vahina leghutau nga, gedito leghui ghu ma Zisas, dike ghua.

Zisas Ne Va Vehai Ia Mane Ta Dufui Lepa

Matiu 8:2-4; Maki 1:40-45

12 Zisas neke la dufu fati kaike mane ta lepa kamoto ira tinina, ka kaike malau fafaana. Ka ia fafata fini laoi Zisas, manei neke la torongaghituturu rorogho hinae ka kavao, neke fangai ghu Zisas ta va vehaina. “Lod, noto lao hihingou la agho, o ke va vehau.”

13 Zisas neke haghara lao, neke posi laoi ghu ia mane. “Ara na lao hihingogu mo. !O veha gheu!” neke ghua Zisas. Ianimu lama neke to age mamalahu ghu ia tinina ia mane ta lepa. 14 Ghe Zisas neke va kahe ghini taka turi vananina ghu hei noni, ghini heve neke dufuno. Nga neke kahe ghua iahi, “Nga o la va podoligho taghou ka ia hiama ka ia Sugana God aianihi Zerusalemu, la vananina ira veala ta leghuri ira ungene va gigima ka God, e mala va podoli ghu ka ira noni haroharo, agho mu to veha gheu kamoto ka ia Lepa, ta ghuana.” 15 Ne ghua mo ianimu neke kaheina Zisas ghe, neto suufu laoni ma mamagali ongahanana ia tuturina ia mana ka manei, dike to la meha ghu ira leghahai varigharadi noni, meha nonomoho nodi tuturi beanana nia ta mala va doliri ghedira ka fogara, e ghua. 16 Ghe Zisas mu e fani lao ka ira malau ta ghou mala la taraina.

Zisas Ne Va Vehai Ia Mane Ta Doli Ta Leme Kamoto Ia Tinina

Matiu 9:1-8; Maki 2:1-12

17 Kaike ravata, ne vari va kakahei ghu Zisas, keha Farisira nia ira mane ta vari va kakahe ghini ia vetula ta maduana ka God e ghua, dike nohe molamo aianimu. Noni irahi mu tanidi ka ira leghu rekahadi malau nga ka ira palu Babaradi Galili ghe Zudia, nia ka ia malau leghaha Zerusalemu, e ghua. Ia mana ka ia Lod neke toraina au ka Zisas, mala va veharira ira ta fogara. 18 Keha manera dike hurei dike la meha ghu ka ia natu, kaike mane ta doli ta leme kamoto ia tinina. Maneri dike va sisiva hure hagheli manei ka giliona ia suga, edi la nakaini ghu ka kenuna Zisas, dike ghua, 19 ghe dike deo boka hio laoidina ka Zisas, vununa to deo hae ta boka ghirutu laona ka ia varigharana noni. Vona lao tuna ka ia fatena suga ta sare, gedi la toha kipe kaveri ghu ira kava kiriufu va korosaina dike ghua. Ianimu tuna ghe dike va hinae laoi nga ka ia varigharana noni ka ia torai kenuna Zisas, ia mane ta fogara neke libono nga ka ia nona natu. 20 Ne finini ghu ia nodi va hohoghona, Zisas neke kahe ghua iahi ka ia mane, “Mane baere agho, ira sasake ka agho to kalasa,” neke ghua ghini.

21 “?Taghonai mu hei, e ghua baini mane iahi?” dike kahe ghua ka vari taghodi ira Farisi nia ira mane ta vari va kakahe ghini ia vetula beana, e ghua. “!Toraina lausasaba ghini mamu God mu iahi! ?Hei mu ta boka kai hazarira ira sasake, kaike God lama mu ta bokaina ianimu?” dike ghua.

22 Zisas to avoho laori ira nganganadi, neke notohori ghu, “?Heve no ghua ghe, lausasaba mu iahi no ghua nga ka nganganamu nira? 23 ?Heve mo ta nanamona kaheina, ‘Ira sasake ka agho to age kalasa,’ a ghua, ba, ‘O tetu vona o ghaghahe ghu,’ a ghua ghini? 24 A toraina va fini ghini ghau ghu ara ta kurui mana mala kai haza sasakena ka malau iahi peka, ia Tuuna Noni.” Ianimu tuna ghe neke fihiki lao nga Zisas ka ia mane ta leme kamoto ia tinina, neke kahe ghua ghu iahi “!Tetu vona, o hioi ghu nou natu nia, o ke leghu gheu ghu ka nou sugao, vununa agho mu to veha gheu!”

25 Ianimu lama neke to tetu vona ghu ia mane ka kenudi ira noni haroharo, hio vonaina ia nona natu, neke leghu ghena ghu ka suganao, helahela ghinina God. 26 Ira noni haroharo, dike puina age nodi fere nia maughedi e ghua, dike helahela ghini ghu God kahe ghua ma ta auna ghu iahi, “Ravata iahi ghai na finiri ira leghutau ta namanama nia fefereana e ghua.”

Zisas Ne Kudoi Livae (Matiu)

Matiu 9:9-13; Maki 2:13-17

27 Leghuna ianimu, ne ghahe kaini ghu Zisas ia malau fafaana, manei neke la fini fati ia mane ta mala hio takisi, babaolonana Livae, neke nohe neke au ghu ka ia nona ringifota mala hio takisi. “O meha o mala nogu mane mala nonofoau ghu,” neke la ghua ghini. 28 Ianimu lama neto tetu vona ghu Livae, nai kairira ira leghutau haroharo, neke la leghui ghu Zisas.

29 Leghuna ianimu lama, neke to posini ghu Livae kaike rivai mahai ka suganao, nia Zisas lamu tuna mane tongovona neke kudoina manei, neke ghua. Ira tehi noni ta hio takisi taremehana Livae nia keharani e ghua dike au haroma aianimu. 30 Ghe ira Farisi nia ira nodi mane ta vari va kakahe ghini ia vetula beana e ghua, dike toraina ngengene halari lao ka ira mane ta nonofoi Zisas, kahe ghuana iahi, “?Ne heve ghe no mahai, ketuhu taremehadi nga ghau ira ta hio takisi, nia ira noni ta auri sasake e ghua?” dike ghua ghidi.

31 Zisas neke ungene tughuri, “Noni ta doli vehana mu, eka kuhana ghini ghu ia dokita, nga ira ta fogarari lama. 32 Ara mu aka meha ghidi mo ira noni ta lotoro, nga nake meha mala kudori ira noni ta auri sasake, edi mala taghuru kairi ghu ira puhidi ta muko.”

Zisas Ne Vari Va Kakahe Ghini Ia Filui Mahai

Matiu 9:14-15; Maki 2:18-20

33 Keha nonira dike la kahe ghua iahi ka Zisas, “Ira mane ta nonofoi Zone Ia Ta Rivai Seselebeana, nia ira mane ta nonofori ira Farisi e ghua mu, edi filui mahai nia tarai nodi tudu e ghua. Nga ira mane ta nonofoigho agho mu, toraina deo ma ghe gedi boka nodo ghu mahai, ketuhuna,” dike ghua.

34 “?Heve, ira noni ta la holara ka ia mahai varihio mu edi la filui mahai taremehana muko hihingo ka ia fafata ta va manemane taremehana ia mane ta varihio?” neke ghua notohorina Zisas. 35 “Ghe kaike ravata ia mane ta mala varihio, edi hio kai tadi mala va lemeina. Ka fafata ianimu ghe, gedi boka age filui mahai taremehana muko hihingo nga maneri.”

Ia Tuturina Poko Nia Ira Mala Nakai Waeni

Matiu 9:16-17; Maki 2:21-22

36 Ianimu tuna ghe neke va kahe ghidi nga Zisas ungene talevara iahi: “E deo hei ta rekuina ia poko ta foforu, ta mala sikatina ghu ia poko ta sesepa. Noto ghua ghini la ianimu, agho o age va rekui ma ghatu ia poko ta foforu, nia deo tuna ge age varifata ghu manei ka ia poko ta sesepa, e ghua. 37 Nia, e deo hei ta nakai waeni ta foforuna ka ira sesepadi kafudi gouti mala nakai waeni, vununa ia foforuna waeni e age va pohopori ira sesepadi kafudi gouti mala nakai waeni, nia oranga tuna ia waeni ge age va mukori ghu ira kafudi gouti, e ghua. 38 Ia foforuna waeni mu, e toraina nakaini tudu ma ka foforudi kafudi gouti ta mala nakai waeni. 39 Ghe e deo ma hei ka ira ta fani ketuhu sesepana waeni, dike kabai ghinina ia waeni ta tataghoi doli nia foforu. ‘Ia waeni ta sesepana mo ne vehana,’ dike ghua.”