Luke 6

Zisas Ne Riva Ka Ia Ravata Mala Maghoso Ira Ziu

Matiu 12:1-8; Maki 2:23-28

1Ka kaike Ravata Mala Maghoso ira Ziu, Zisas neke ghahe ka giliodi ira keha galahedi kava ta numa ghidi witi. Ira nona mane ta nonofoi dike pisu kaveri ira fuadi witi, dike ngazala kairi ghu ira kafudi ka ira kamedi, ghe dike mahairi nga. 2Ghe keha Farisira dike kahe ghua iahi, “!Ghau mu geala oka riva ghini ghu iamu! E zea ka ia vetula mu ta rivana ka ia Ravata Mala Maghoso, ta pisu fuadi witina ghu.”

3“?E deo ngama go izumi ghu ghau ka ira Kakangava Ta Maduana, heve neke riva ghinio Deveti ia Mane Ginitaukela ka ia fafata neke nona lihano manei nia ira nona mane dike ghahe taremehanao, e ghua?” neke ghua ungene tughurina Zisas. 4“Manei neke la haghele ka ia sugana God neke la mahaini ghu ia bereti ta fifiluana ta maladi ma ira hiama lama, vanadi tuna ira nona mane kehara, neke ghua. Ianimu mu neke zea haroma ka ia vetula.” 5Zisas neke kahe ghuani iahi, “Ara, ia Tuuna Noni, a faghina kaputi ghe ia Ravata Mala Maghoso.”

Zisas Ne Va Vehai Ia Mane Ta Peleku Ia Kamena Ka Ia Ravata Mala Maghoso Ira Ziu

Matiu 12:9-14; Maki 3:1-6

6Ka keha Ravata Mala Maghosonani, kaike mane ta peleku ia kame mautuna, neke au ka ia suga mala varighara ira Ziu, ka ia fafata vari va kakaheina Zisas. 7Ira mane ta vari va kakahe ghini ia vetula beana nia ira Farisi e ghua, dike mato dodoghohoti Zisas geke va vehai la manei mane ta muko kamena iahi ka Ravata Mala Maghoso ini, dike ghua. Maneri dike puina kabai fini tana ghu keha puhi ta puina muko ta va zeari manei ka ia vetula, mala hioina ka vari sukutuai. 8Ghe Zisas neke to avohori ira nganganadi, neke kahe ghua ghu iahi ka ia mane ta muko kamena, “Meha tetu aiahi kenu ta boka finigho meha ini maneri haroharo.” Ne vona lao tuna neke ghua ia mane, neke la tetu ghu kenu. 9Ianimu tuna ghe neke kahe ghua nga iahi Zisas ka ira noni ta kabai ungene va mukoi manei. “Ara na kabai notoho ghau, notoho iahi. ?Heve, ne totonu mo ka ia vetula ta riva ghidira ira leghutau ta veha ka ia Ravata Mala Maghoso ira Ziu, ba, ravata iahi mu mala rivai muko? ?Ravata iahi mu mala hio va doli noni, ba, mala ngovali ia dolina ia noni?” 10Manei neke mato lilohori ghu ira noni haroharo, ghe neke kahe ghua lao nga iahi ka ia mane, “Va lotoro kave mehai kameu nia,” neke ghua ghini. !Va tuhu kavei tuna ia kamena geto ke veha ghena ghu, neke ghua ia mane! 11Ka riva iahi dike to puina ngaziri ghu ira noni ta kana ghini Zisas, dike tatanigai nonogele ghini ghu heve tadi age va riva ghinina manei.

Zisas Ne Faeteri Ira Tazoi Palu Mane Nonomoho

Maki 3:13-19

12Kaike ravata ka leghuna ianimu, Zisas neke vona la tarai ka kaike vuhuku, tarai laona ka God ia redu kamoto. 13Ka ia pagasana ia fufugho, manei neke kudo varighara ghidi haroharo ira nona noni ta nonofoi, neke faete kaveri ghu tazoi palu ka maneri, ta mala mane nonomohona. Irahi la ira babaolodi:
14Saemoni (neke va kudo ghini Pita harono Zisas),
Aduru (Ia tahina mane Pita),
Zemesi,
Zone,
Filipi,
Bafolomiu,
15Matiu,
Tomasi,
Zemesi (ia tuunamane Alofiasi),
Saemoni (ia mane Zeloti),
16Zudasi (ia tuunamane Zemesi),
Zudasi Isikarioti (ia mane neke seke ghinio Zisas neke vanadi laono ghu ira ta kana ghini).

Ira Varigharadi Noni Di Leghui Zisas

17Ka ia fafata hinae mehadi ka ira tabafedi vuhuku, ira mane nonomoho dike tetu taremehana Zisas ka kaike galahena leghaha ta sare, meha au lilohorira ira tehi nona noni ta nonofoi, nia ira varigharadi noni, e ghua. Tehi noni ka ira leghu pelodi nga Zudia, Zerusalemu, e dufu lao ghu pelovona mo ka ira agharadi tahi aianihi Taea nia Saedoni e ghua, dike aura aianimu. 18Maneri dike meha mala nonomoho ka manei, nia mala meha va doliri ghedi ka ira fogara e ghua, neke tavusu kairi ghu Zisas tehi tarunga ta muko. 19Maneri haroharo dike va sisiva posi lao ka manei, vununa ia mana ka God neke la meha ka manei, dike la veha ghedi ghu ira noni haroharo.

Va Manemane Nia Muko Hihingo

Matiu 5:1-12

20Ianimu tuna ghe neke fihiki lao nga Zisas ka ira nona mane ta nonofoi, neke kahe ghua ghu iahi,
“God e va beana ghau, ghau ira ta malanga,
vununa ia nona Ravutu God ne vanamu ghau.
21God e va beana ghau, ghau ira ta nomu liha ghatunaina,
vununa ghau, e age hovi ghau ghatu.
God e va beana ghau, ghau ira ta nakele ghatunaina,
vununa ia fafata e la meha mo, ta age pagho va ghazaghaza ghau.
22God e va beana ghau, ghau ira ta kikipana ghini ghau, ghau ira ta va kave ghau, ghau ira ta ngovala ghau, nia ghau no muko ira ta ghua ghini ghau e ghua,
vununa maneri di avohi, ta leghuauna ghau, ara ia Tuuna Noni.

23“!Neto ghua la ianimu, o va manemane o paraku va ghazaghaza ghu, vununa ia tabara leghaha, to au afa ghini ghau ka malaunao God fate! Nia o ke ngana avohi molamo e ghua, ira faamu meha sepao dike ghua ghidi haroma ira porofeti sepa.”
24“Ka lelemeana leghahara ka ghau ira ta taghotagho,
vununa au va manemanena ka ghau mu, ghatunaina lama.
25Ka torai lelemeanara ka ghau ira ta hovi ghau ghatunaina,
ghau o ke age nomu liha ghatu.
Ka lelemeana leghahara ka ghau ira ta pagho ghatunaina,
ghau o ke age muko hihingomu nia nakele ghatu.
26Ka lelemeana leghahara ka ghau ira ta helahela ghini ghau leghu noni nga,
vununa sepao, ira faamu meha, dike helahela ghidi molamo ira porofeti ta sesebo.

Namaha Ghidi Ira Ta Kana Ghini Ghau

Matiu 5:39-48; 7:1-2,12

27“Ghe noto lao hihingomu la nonomohona, ara a va kahe ghini ghau ta namaha ghidira ira noni ta kana ghini ghau nia riva va veha ka ira noni ta kikipana ghini ghau, e ghua. 28Tarai fangai ghu God, e va beanari ghu ira noni ta tibiri ghau, nia tarai toka ghidi ira noni ta ngovala ghau, e ghua. 29Neto tapaligho la kehara ka bakou nia, o ke fihiki vanani laoni keha pelona bakou nia. Neto kabai ghini la ia nou koti kehara, o ke vanani lao haroni nou sote nia. 30Heve leghutau ta kuruighona agho, o vanani hei noni ia ta fangaigho; nia hei neto hio ghahe tau la ira nou leghutau, oka ke va sisiva hio leghu tana ghu. 31Riva vanadi kehara taghe ira ta kabai ghidi la ghau ta riva vanamuna maneri.

32“?Ka ia nganganamu ghau, e boka age helahela ghini ghau mo God noto namaha ghidi lama ira noni ta namaha ghini ghau, no ghua? Ira noni ta auri mukona nga, di namaha ghidira ira ta vari namahai taghodi. 33?Nia noto riva va veha vanadi lama ghau ira noni ta veha vanamu, heve, e age veha vanani mo God mu ianimu?” Ira noni ta au sasakedina, di namaha ghidira heiri ira ta vari namahai taghodighi 34?Nia noto vanadi rongo lama ghau ira noni ta boka ke lifu vanamu leghu, e age veha vanani mo God mu ka ianimu? Ira noni ta au sasakedina, di vanadi rongora ira noni ta varifata ka taghodi, mala ke boka lifu vanadi leghu va hokoto ghu, tadi ghuara.

35“!O namaha ghidi ira ta kana ghini ghau nia o riva vanadi va veha, e ghua! Dito fanga ghau leghutau la maneri, o vanadi, ghe oka ke nganai ghu ge deo la lifuidina maneri, ta ghuana. E ghua ianimu ghe, ge age faa nga ia tabaramu ka malauo God fate, go age toraina nona rekaha hohoghona ghu God, vununa manei e namaha ghidi haroma ira noni taka kudo vehai ghu taghonai, nia ira noni ta puina muko, e ghua. 36Ghau o toraina dudumana ghidi ira noni haroharo, taghe nomu Mama la, ia ta dudumana ghidi haroharo leghu noni nga.

Oka Fateri Ghu Ira Keha Noni

Matiu 7:3-5,16-18

37“Nodo faterira ira keha noni, mala eka fate ghau la ghu God. Oka kahei ghu ira keha noni di hotori muko ta ghuana, e deo ghu God age va kahe ghini ghauna, ne hoto ghau muko, ta ghuana. Noto kai hazari la ghau ira sasake ka ira keha noni, God e age kai hazari molamo ira sasake ka ghau. 38Noto tufari la ghau ira keha noni, God e age tufa ghau haroma. E toraina hohoghona fuludu mamu ta ke age vanamu leghuna God ia kamotona tufamu ghatu, taghe ira leghutau ta ghigho ghidi haghele la ka ia baiki mala ke va foudu laoinani, nia age losa kakai tuna, ia ta age ghua. Taghe faana tufa noke riva ghidiro ghau lama mu, ta ke leghui harona God ka ia tufamu ghau.”

39Ianimu tuna ghe neke va kahe vanadi nga Zisas ungene talevara iahi: “?Heve veha mu ta la au mehana ka ia mane ta kivi ta babatu ghini ia keha mane ta kivi? Mane ta babatu ani e age riufu lao ghatu ka ia golava, e koroho haghele laoi haro ghu ia keha mane ta kivi. 40Ia rekaha sikolu mu, e deo boka fuludina ia noni ta vari va kakahei. Ghe ia rekaha sikolu ta riva va gigima mu, taghe ia noni ta vari va kakahei la, e age ghua molamo ghatu.

41“?Heve no ghua agho ghe, no matoi ngama ia foroku ta au ka ia hibana ia nou baere, no deo ghu va ghunaghunaina gagolo ta au nia ka hibau nia taghou? 42?Boka gheu ghe, no kahe ghua nga iahi, ‘Taremehaguo, meha a hio kaini ghu foroku iamu ka hibauna,’ no ghua nga, ghe ta deo ini go boka finini ghu gagolo ta au nia ka hibauna taghou? !Agho ta tatangana kobiri! Agho o kusu hio kainina gagolo ta au nia ka hibauna taghou, ghe go age fifini va veveha nga, go boka hio kaini ghu foroku ani, ka hibanana ia nou baere.

43“Ia heke ta doli va veha mu, eka boka muko ghu ira fuana, nia ia heke ta doli va muko tuna, eka boka veha ghu ira fuana, e ghua. 44Ia heke mu, da fini avohi ma ghita, ka ira fuana ta fua ghidi manei. Ira rekahadi heke ta kekere mu, e deo boka ke fuai figina nia ira kuhama mu, e deo boka ke fuai gerepina, e ghua. 45Ia noni ta veha mu, e va podolori ira riva ta veha ta la ghusu meha ka ia hihingona ta veha, nia ia noni ta muko tuna, ge va podolori ghu ira riva ta muko ta la ghusu meha ka ia hihingona ta muko, e ghua. Vununa heve ia ta foudu ka ia hihingo lama mu, ta boka kaheina ia manga.

Tuturidi Ira Palu Pakaraina Mala Rivai Suga

Matiu 7:24-27

46“?Heve ghu ghe, ‘Lod, Lod’ no ghua ghinagu nga, noto deo la go riva ghidi ghu ira ta kaheri ara? 47Ara a va fini ghini ghau ghu, heve e ghua mu ia noni ta meha ka ara ta meha nonomoho ghu, nia leghuri tuna nogu vari va kakahe idi, ia ta ghua. 48Manei mu taghe ta ghua nia ia noni ta toha lao gilioni ta la riva ghini ghu ia suga ka ia pakaraina ta gima ka ia ghahipa mafara, e ghua. Ka ia fafata faa mehana ia ologho, ta la hapata ghu ka suga ani, ia suga ne tetu va gima ma ne au ghu, vununa neke toraina riva ghini va gima. 49Nga hei ia ta nomohori nogu ngengene idi, ghe ia taka leghuri ghu mu, taghe ta ghua nia ia noni ta va tetui ia suga ta deo pakaraina, e ghua. Ka ia fafata gigima hinaena ia ologho ta la hapati ghu ia suga, suga ianimu e age riufu momotu hinae ghatu.”