Luke 7

Zisas Ne Va Vehai Ia Nona Maneriva Ia Manefaadi Ira Mane Magaradi Romu

Matiu 8:5-13

1Leghuna kaheri Zisas leghu irahi nga ka ira noni, manei neke leghu lao Kapaniumu. 2Ka fafata ianimu, kaike nona maneriva toraina tongovona ka taghonai ia manefaadi ira mane magaradi Romu neke fogari neto ke namo leme ghu. 3Ne nomohi ghu manei ghinina Zisas, manei neke tuhu laori keha mane babatura ka ira Ziu ta la fangaina Zisas, ta mala meha va vehaina ghu ia nona maneriva. 4Maneri dike la papadi ghu Zisas ta mala leghu meharira, ta toka ghinina ghu ia nona maneriva ta fogari. “Manefaa iahi mu toraina fata ma ta mala toka ghinina agho,” dike ghua ghini, 5“vununa manei e namaha ghini ghai fuludu ghai ira noni Ziu, neke riva vanamai haro ghu molamo kaike suga mala varighara.”

6Lao taremehadi tuna neke ghua Zisas. Ghe gedi ke dufu lao nga maneri ka ia suga, ia manefaadi ira mane magara neke to kusu tuhu laori keha mane baerera ta mala la kahe ghuana iahi, “Lod, oka va rugusigho ghu taghou, vununa ara e deo ga fata ghu ta mala hio mehaighona agho ka sugagu ini. 7Ara e deo haroma ga fata ghu ta age dufuighona agho. Nga o kahei ma agho ia ngengene ka ta au nia, eto ke age veha ghena ma ghu nogu maneriva ini. 8Na avohi nga ara mu, vununa ara a riva ka pekana ia mana ira manefaa ta au ka fategu ara, nia ara ge kuruau ghu mana fuludu laorira ira nogu mane magara, e ghua. Ara a suna kahe ghua ma iahi, ‘Lao’ a ghua ma, edi lao ghu maneri, ba, ‘Meha’ a ghua ma, edi meha ghu maneri. Nia, nato kahe ghua la ara iahi ka ira nogu noniriva, ‘O riva ghini iahi, ba ianihi,’ nato ghua ghidi la ara, maneri edi la riva ghini riva ianimu.”

9Ne nomohi ghu Zisas iahi, manei neke puina nona fere. Ianimu tuna ghe, neke fihiki lao nga ka ia varigharana noni, neke kahe ghua ghu iahi, “!A va kahe ghini ghau ghu ara, e deo nga ga finini ghu ara va hohoghona ta ghuana iahi, ka ia malau kamoto Isiraeli!” 10Dike leghu lao ghu ira nona mane baere ka ia sugana ia manefaadi ira mane magara, dike la finini ia maneriva, toraina ke veha ghenana.

Zisas Ne Va Doli Leghui Ia Tuunamane Ia Fotati Ta Lemekai

11Leghuna ianimu lama, neke to ghahe taremehadi lao ghu Zisas ira nona mane ta nonofoi nia ia leghahai varigharana noni e ghua, ka ia rekahana malau Neini. 12Ne la namo dufu ghu manei ka ia makatana leghaha mala haghele lao ka ia rekahana malau, kaike nokolona noni ta la giugilu dike la kave meha. Ia mane foforu neke to lemeo mu, e kaikena tuunamane kaike fotati ta lemekai. Ira tehi noni ka ia rekahana malau dike la au muko hihingo taremehana ghu manei. 13Ka ia fafata fini laoi fotati ani ia Lod, manei neke puina age dudumana ghini ghena, neke kahe ghua ghu iahi, “!Oka nakele ghu!” neke ghua ghini. 14Ianimu tuna ghe neke lao nga Zisas, neke la posini ghu ia kiri, dike nodo ghu ira mane dike hureio. Kahe ghua tuna iahi neke ghua Zisas, “!Mane foforu agho, o tetu vona na ghua ghinigho!” neke ghua ghini. 15Ia mane foforu neke lemeo, neke to nohe vona ma, neke tatanigai ngengene lao ghu ka ira noni dike au lilohio. Hioi tuna Zisas mane foforu ini, ge vanani lao ghu nona uke, neke ghua.

16Ira tehina noni dike varighararo, dike toraina age maughedi fuludu, dike kahe ghua ghu iahi helahela ghinina God. “Kaike porofeti leghaha, neto meha auna ka vari hoataida ghita. Da finini ghu tuna ghita ia kamena God, ta tokana ka ira nona noni ka ravata iahi.” 17Ia tuturina heve neke riva ghidiro Zisas ka ravata ianimu, neke ongaha liloho Zudia, nia ka ira keha malau peghuruna lao mo, e ghua.

Ira Ungene Tughudi ira Notoho Ka Zone

Matiu 11:2-6

18Ira mane ta nonofoi Zone Ia Ta Rivai Seselebeana, dike turi vanani Zone ghidi ira vahina leghutau nga neke riva ghidiro Zisas. Kudori tuna keha palu mane ka ira nona mane ta nonofoi neke ghua, 19neke tuhu laori ghu ka ia Lod, mala la notoho ghuana iahi, “?Agho lamu ghu mu ia Mesaea nake afa ghinio ghai, ba, kehanani mu geala ta afa ghinina ghai?”

20Ira palu nona mane ta nonofoi Zone dike la dufui Zisas, dike la kahe ghua ghu iahi ka manei, “Zone Ia Ta Rivai Seselebeana neke tuhu ghai meha ta mala meha notohighona agho, ‘?Agho lamu ghu mu ia Mesaea nake afa ghinio ghai, ba, kehanani mu geala ta afa ghinina ghai?’” dike la ghua.

21Ka toraina fafata ianimu, Zisas neke va doliri ira tehi noni dike dufuriro leghu kokolodi fogara nga nia tavusu kai tarunga ta muko nia ke va vovoho fifiniri ira ta kivi, neke ghua. 22Kahe ghua tuna iahi neke ghua Zisas ka ira mane ta nonofoi Zone, “O ke leghu lao ka Zone, o la turi vanani ghu manei, heve noke meha finiri, nomohorira. Ira ta kivi dito ke fifini, ira ta paheku dito ke ghaghahe, ira ta lepa dito ke mamalahu, ira ta melongo dito ke nonomoho, ira ta leme dito ke doli leghu, nia ia Nonomoho Ta Veha tuna, gedito tuturi ghini ghu ka ira ta malanga, e ghua. 23O la turi vanani haro Zone iahi, ‘God e va beanari heiri ira ta deo gedi sokeau ghu ara, vununa ka ira heve leghutau ta riva ghidi ara.’”

Zisas Ne Va Hesini Zone

Matiu 11:7-15

24Dito ke leghu ghedi ira mane dike hio lao nonomohoro ghe, neke tuturi vanadi nga Zisas ira noni dike varighararo ghinina Zone. “?Hei mu mane noke kave la fininio ghau ka ia malau koroghana ta karango? ?Taghe kaike sesehu ta dafe va egholo lamehai neke ghua manei? 25?Ba kaike mane ta va vona poko ta puina vona tabaradi mo, noke nganai la fininina ghau? Deo, ira noni ta va vonari ira poko ta veveha ta au va veha ghu mu, edi au ka ira tolimadi ira mane ginitaukela, nga eka ghua ghu ka ia malau koroghana ta karango. 26?Heve ghu ngania noke nganai kave la fininina ghau? ?Kaike porofeti? Uve, ghe manei mu e ke fuludu laoini kaike porofeti. 27Zone lamu ghu mu ia toraina mane neke kahe ghuao iahi God ka ira Kakangava Ta Maduana ghinina manei,
“‘Fini, ara na kusu tuhu agei ia nogu mala hio nonomoho kenuu agho,
e kusu mala age va tana vananigho ia nou hangana.’ ▼

▼7:27 Malakae 3:1

28A va kahe ghini ghau ghu ara, ka ira leghu noni dike doli meharo nga mu, e deo hei ta kenu laona ka Zone. !Geta ghua mo ianimu ghe, hei ia ta va nonoghana ka ia Ravutu God mu, e ke kenu lao ka manei!”

29Di nomohi ghu maneri iahi, ira noni haroharo taremehadi ira ta hio takisi, dike va hohoghonai ta lotorona ia vatovato ka God, vununa maneri dike seselebeana ka Zone. 30Nga ira Farisi nia ira ta avoho fikifokoi ia vetula beana mu, dike sokei ia vatovato e maladi maneri neke ghua ghinio God, dike pake ghedi ghu ta seselebeanarina Zone.

Zisas Ne Zea Vanani Ka Ia Pagusu Taghonai

Matiu 11:16-19

31“?Heve a ghua ara va fafahakina ubalana noni iahi ghatunaina?” neke ghua notohonana Zisas. “Ka heve mo ta va fafata laona ara, ghidira maneri? 32Maneri mu taghe ira rekaha ta zea vanadi ta nohe ka ia makete, ta kudokudo lao ghu ka ira keha rekaha, kahe ghuana iahi, ‘Na hilava ghidi ghu ghai ira koze varihio, ghau e deo ma goke va manemane ghu. Ke hilava ghidi tuna ghai ira koze nakele beana nake ghua, ghe ghau e deo haroma goke muko hihingo mu ghu.’ 33Zone Ia Ta Rivai Seselebeana mu, deo geke ketuhu waeni ghu nia neke fani filui mahai e ghua, ghe no kaheina ghau mu, ‘Manei ne sukui nazahi,’ no ghua. 34Ghe vununa ara ia Tuuna Noni nake meha mahai, ketuhu, no kahe ghua ghu iahi ghau, ‘!Manei mu ne vavara mahai, ketuhu gogosu ne ghua, nia baereri tuna ira ta hio takisi, nia ira noni ta auri muko, e ghua!’ no ghua ghu. 35Ghe ia avoavoho mu, ne va podoli ta lotorona ka heiri ira ta hioi ta leghui ghu avoavoho ianimu.”

Ia Fotati Ne Oranga Ghini Sedi Ira Tabalana Ghahena Zisas

36Kaike Farisi neke fangai Zisas ta la va ginitauna ka ia sugana, neke la nohe hinae ghu va ginitauna ka suga ani manei. 37Kaike fotati ta fani au ka ira doli ta kikirase, neke nomohi ta auna Zisas aianimu, neke hio taremehana lao ghu kaike rekahana botolo ta parimisi, ta riva ghini ka ghahipa ta va kudo ghini alabasita, ta fouduai sedi ta torai vona tabarana. 38Manei neke la torongaghituturu hinae leghuna mo Zisas ka ira ghahena, ghe neke nakele ghena nga. Ira kolona hibana dike kotoro hinae ka ira ghahena Zisas, neke guranga va karangori ghu manei ka ira kalana. Ianimu tuna ghe neke angohori nga manei ira ghahena Zisas neke va oranga ghidi sedi ghu.

39Ka ia fafata fini laoi heve neke riva ghinina fotati ani, ia Farisi neke fangaio Zisas neke ghua iahi ka ia nganganana taghonai, “Toraina hohoghona mamu ta deona ge porofeti ghu ngaini mane iahi. Geke toraina tuhu mehai la God, geala manei eto avohi ma fotati hevena mu ta la posini ani. Fotati iahi mu ia ta kuru sasakena!” neke ghua ka ia nganganana.

40Ka ianimu tuna ghe, neke ngengene vona nga Zisas, ungene tughurira ira nganganana manei. “Saemoni,” neke ghua lao ka ia Farisi. “Ara na kabai va kahe ghinigho keha leghutaura.”

“Puina veha Mane Vari Va Kakahei Agho, lao ba agho,” neke ghua Saemoni.

41Turi vanani tuna tuturi iahi neke ghua Zisas: “Kaike mane neke va malumu vanadi kaoni rongo keha palu nonira, ia keha mu neke kaoniri gaha ghobi rongo kunegeledi ta siliva nia ia keha tuna geke kaoniri ghu gahafulu rongo kunegeledi ta siliva, neke ghua. 42Ghe maneri palu haro, dike deo gedi boka lifu leghuri ghu ira kaoni. Ghe manei ka ia dudumana ghidi ghena, neke taho kairi ghu kaoni iranimu ka maneri palu. ?Hei mo ka ia nganganau agho mu, neke toraina namaha ghini fuluduna manei ka palu mane irahi, leghuna ianimu?”

43“Nganganaguna ara mu, ia mane neke taho kai tanao ia kaoni ta faa mo,” neke ghua Saemoni.

“Toraina hohoghona,” neke ghua Zisas.

44Ianimu tuna ghe, neke fihiki lao nga manei ka ia fotati, neke kahe ghua lao ghu iahi ka Saemoni, “Fini mehai fotati ta torongaghituturu iahi. Ka ia fafata haghele mehagu ara ka suga ini agho, agho deo goke vanagu kolo ghu, mala tihi kairira sota irahi ka ghahegu idi. Nga fotati iahi mo mu, ne tihirira ghahegu idi ka kolona hibana idi nia ne guranga va karangorira e ghua, ka kalana idi. 45Agho deo goke vanagu ghu ia angoho va vonavona, nga manei mo mu neke angohori neke aura ghu ghahegu idi, taniga ia haghele mehaguni ara. 46Agho e deo ghe goke va oranga ghini olivi oele ghu paugu ini, nga manei mo mu ne va oranga ghini sedina tabaladi ghahegu idi. 47A va kahe ghinigho ghu ara tato kai haza tanara fotati iahi ira tehi sasakena manei, vununa manei neto va fini ghinagu ara ia leghahai nona namaha. Nga ia noni ta kai haza tana ma ka birusuna sasake mu, e rekahana ma ia namaha ka manei.” 48Ianimu tuna ghe neke kahe ghua nga iahi Zisas, ka ia fotati, “Ira sasake ka agho to kai hazari.”

49Ira mane ka ia tevo dike kahe ghua iahi ka vari taghodi, “?Taghonai hei, ne ghua baini mane iahi, ta kai haza sasake ma ta ghahe ini ghu?” 50Kahe ghua tuna iahi ka ia fotati, neke ghua Zisas, “Ia nou va hohoghona agho ne hio va dolighona; ghahe gheu ghu ka ia bule.”