Luk 8 | KjiSC | STEP | E deo ma ge sepa ghu leghuna ianimu, neke tatanigai ghaheri ghu Zisas ira malau leghaha nia ira rekahadi malau gheremedi mo e ghua, neke la turi ghini kave ghu ia Nonomoho Ta Veha ghinina ia Ravutu ka God. Manei neke hio taremehana ira tazoi palu nona mane ta nonofoi,

Luke 8

Ira Fototati Dike Toka Ghinio Zisas

1 E deo ma ge sepa ghu leghuna ianimu, neke tatanigai ghaheri ghu Zisas ira malau leghaha nia ira rekahadi malau gheremedi mo e ghua, neke la turi ghini kave ghu ia Nonomoho Ta Veha ghinina ia Ravutu ka God. Manei neke hio taremehana ira tazoi palu nona mane ta nonofoi, 2 nia ira keha fotati neke va vehariro ka fogara, nia ira fotati ka neke tavusu kairiro manei ira tarunga ta muko, e ghua. Dike au taremehanana manei mu, Mere ia tanina Magidala ka neke tavusu kairiro Zisas vitu nazahi; 3 Zoana ia ghaseboro ka Kuza ia manefaana ira riva ka Herodi; Susana; nia tehi fotatini dike toka ghini harono Zisas nia ira nona mane ta nonofoi e ghua, ka ira nodi vahina leghutau nga taghodi.

Ungene Talevaradi Ira Rodana Kokolodi Kava

Matiu 13:1-23; Maki 4:1-20

4 Kaike ravata Zisas neke tuturi ghini ungene talevara iahi ka ira tehi noni dike la varighara meharo ka ira tehi malau fafaadi, mala meha nonomohona ka manei: 5 “Kaike mane ponogara neke la numa ghidi keha subudi witira. Ka ia fafata fusa ghidi manei ka ia nona galahena kava ta mala numa witi, keha subudira dike zoghu hinae ka ia hangana mala ghaghahe, dike deke dalapari ghu, nia meha tuna ira memeha gedi mahairi ghu, dike ghua. 6 Keha subudira dike zoghu ka ia kava ta parimisi ta ghahipai ia pekana. Subudi irahi dike tatanigai kodolo vona mamu, ghe magali ma dike leme hinae ghu, vununa ia kava neke deo ge boese ghu. 7 Keha subudira dike zoghu ka hoataidi ira rekahadi heke ta kekere, dike kodolo vona taremehadi ghu, panauku kaputuri va namo lemerira. 8 Keha subudirani dike zoghu ka kaike kava ta veha. Subudi iranimu dike doli veha dike fua va veha ghu, kaike ghobi subuna ka kaike vununa ta ghuana, taghe kaike ghobi fafata tehi fuludu laoini ia subuna neke numa ghinio.”

Ianimu tuna ghe neke kudo vona nga Zisas, “!Hei neto lao hihingona la nonomohona, geala e vanemoho talinga e va fafahaka ghu!”

9 Ira nona mane ta nonofoi dike notohi heve fafahakanana ungene talevara iahi. 10 Neke kahe ghua ghu iahi Zisas, “Neto tobehe vanamu ghau mu ta mala va fafahakarira ira dike poikaro ka ia Ravutu God. Nga ara mu na riva ghidi ka ungene talevara, e mala poika ghu ka ira keha noni peghuruo vahina leghutau nga ghinina ia Ravutu ka God, va ghorevurarira ira Kakangava Ta Maduana ta ghua iahi:
‘Maneri di fini mo heve na riva ghinina ara,
ghe e deo ma gedi toraina fifini ghu;
maneri di nomohi mo heve na kaheina ara,
ghe e deo ma gedi va fafahaki ghu.’ ^{▼▼8:10 Asaea 6:9}

11 “Iahi mu fafahakanana ia ungene talevara: Ira subudi mu ia nonomoho ka God. 12 Ira subudi dike zoghuro ka ia hangana ta palaki mu, totoghaledi ira noni ta nomohi ia nonomoho, ghe ia Faghinadi ira nazahi ne la meha ne hio kai tadi ghu ka ira hihingodi, e mala va gogohari ghu ta va hohoghonana maneri ta hio va dolirina ghu God ka ira sasake maneri. 13 Ira subudi dike zoghuro ka ia kava ta ghahipai mu, totoghaledi ira noni ta nomohi ta va ghazaghaza ghini ghu ia nonomoho. Ghe taghe ira rekahadi heke ta kodolo vona la ka kokolona kava ianimu di ghua, di deo ghu gedi suri haghele lao ghu gilio ira zagharadi. Maneri edi va hohoghona laona va suranana, ghe ka ia gigima mehana lama ia va sisiva ghidi, to ke age bualefo ghu. 14 Ira subudi dike zoghuro ka ia kava ta lolozi mu, totoghaledi ira noni ta nomohi, ta hioi ghu ia nonomoho, ghe magali ma to toufu kaputi ghu ia nonomoho ira vahina leghutau ta ngana tahuri nga, ira taghotagho, nia ira au va manemane ka doli iahi, e ghua. Ia va hohoghona ka maneri e deo ghu kodolo va gimana. 15 Nga ira subudi dike zoghuro ka ia kava ta veha mu, totoghaledi ira noni ta hohoghodi, nia ta veha ira hihingodi e ghua, ta nomohi ghu ia nonomoho ka God posi va gimana ka ira hihingodi fua va tehi tuduna.

Ia Va Fafahaka Ta Fini Laoi Ka Ia Zuta

Maki 4:21-25

16 “E deo kaike noni ta va dolini ghu ia zuta, ta va rokomo ghini togilaina ghu, ba, ta nakainina ghu ka ia pekana vavage. E deo ge ghua ghu ianimu. Nga ia zuta mu, e va nohei tudu ma ka ia fatena nonohe, mala ira noni ta la haghele meha ka sugana edi finini ghu ia fegala. 17 Ira leghu heve ta poika nga mu, edi ke va podolo kaveri peghuru, nia ira leghu heve ta toufu kaputuri nga mu, edi ke age finiri edi hio kaveri ghu ka ia fegala, mala fininina ira sare noni haroharo. 18 O toraina va fafahaka va veha ghu, ka heve ta nomohorira ghau. Ka ira noni ta tobehe hioina nogu vari va kakahei ini mu, e faa laoni ia avoavoho ta vanadi laona ghatu. Nga ka ira noni taka va melongo ghu mu, geta ghua ghu ira heve teri di kururi ira ta ghua maneri ghe, God e age hio kai tadi.”

Torai Nona Ukena nia Tahinara E Ghua Zisas

Matiu 12:46-50; Maki 3:31-35

19 Kaike fafata, nona uke nia ira tahina mane e ghua Zisas, dike mala la finini manei, ghe dike deo bokadira vununa ira tehi noni dike vari bubu ka ta au ani manei. 20 Kaike noni neke la kahe ghini Zisas, “Nou uke nia ira tahiu mane e ghua, ta au ari peghuru, di kabai finigho agho,” neke la ghua ghini.

21 Ghe ungene tughuna ka Zisas mu, neke ghua iahi, “Nogu uke nia tahigu manera ara mu, ira noni ta nomohi ta leghui ghu ia nonomoho ka God.”

Zisas Ne Va Bulei Ia Tapaoho Ka Ia Lokana Galili

Matiu 8:23-27; Maki 4:35-41

22 Kaike ravata, Zisas neke kahe ghidi ira nona mane ta nonofoi, “Aria da kadolo age ghu visi fateo mo ka keha pelona loka ini,” neke ghua ghidi. Haghe lao tuna ka ia koaka gedi tatanigai kave lao ghu, dike ghua. 23 Ka ia fafata tepe kadolodi, Zisas neke to epu. Magali ne ghua ma, to la raza meha ghu ia tapaoho ta mamaghuana ka lokana, age tatanigai va foudu ghini kolona ia koaka, torai nairina ka giliona lelemeana leghaha.

24 Ira mane ta nonofoi dike kudo va baghuni Zisas, “!Faghina agho, Faghina agho, ghita nga da age lomoho ghatu!” dike ghua ghini.

Tetu vona tuna neke ghua Zisas, neke va nodoi ghu ia dafe nia ira oloꞌolobaghe ta posa, e ghua. !Ia tapaoho neke age nodo neke toraina age bule dilili ghu! 25 Ianimu tuna ghe neke notohori nga Zisas, “?Hae mo mu va hohoghonana ka ghau?” neke ghua ghidi.

Maneri dike puina age maughedi nia nodi fere fuludu e ghua, dike vari nonotoho ghu, “?Hei mo mu mane iahi? Ia dafe nia ira oloꞌolobaghena ghe ta nomohini.”

Zisas Ne Tavusu Kai Laori Ira Nazahi Ka Ira Vadu

Matiu 8:28-34; Maki 5:1-20

26 Maneri dike sabara lao ghu ka ia hori Gerasa ka ia keha pelona ia loka visi kadolona mo ia Babarana Galili. 27 Ne deke kave ghu Zisas ka ia koaka, kaike manena ka ia malau leghaha neke sukuio ira nazahi, neke la kave meha mala dufuina manei. To age soduai fuludu mu au sosolena mane iahi, nia deo geke au ghu ka suga e ghua, nga neke au ma ka ira lianga mala gilui noni ta leme. 28 Ne fini fata laoi ghu manei Zisas, neke to riufu hinae ma ka kavana ka kenuna manei, ghe neke azili nga, “?Zisas, agho ia Tuuna God ta Varanga Sughavona, heve no kabai va riva ghinaguna ara? Ara a torai fangaigho taka va vavahagalauna ghu!” neke ghua ghini, 29 vununa Zisas neke to kusu ungene va gigimai tarunga ta muko iahi, ta kave kainina mane ani. Tarunga ta muko iahi, e fani meha sukui tudu ma mane iahi. Geta va gimari mo ira kamena ghahena ka ira seni ghe, manei e soni ukuhuri ghena mo, ghe ge zozoro nga laonana ka ira malau ghoudi, ka ia mana ia nazahi.

30 “?Hei mu babaolouna agho?” neke ghua notohona Zisas.

“Punugara,” neke ghua ungene tughuna manei, vununa tehi nazahini neke sukuina mane ianimu.

31 Ira nazahi dike fangai ma dike au ghu Zisas, taka va ghahe laorina ghu ka ia golava ta lao gilioni. ^{▼▼8:31Ira ngengene “golava ta deo va nonoghana” ta ghua iahi mu, ghini gehena, ia malau va nonoghana ta mala age hioi ia vavahagala ira nazahi.} 32 Kaike hoghara totopa vadu leghaha dike hukiti dike aura ghu, mahai ghedira ka ia tabafena voruhu ghereme lao mo. Ira nazahi dike papadi Zisas, ta va malumu haghele laorira ka vadu iranimu, neke va malumu laori ghu manei. 33 Ira nazahi dike kave kaini ia mane dike la haghele ghu ka ia hoghara totopa vadu. Ia kamotona hoghara totopa vadu, dike rurutu hinae lao ka ia gheremena voruhu ka ia pegu ta didighili, dike la lomoho haroharo ghu ka ia loka.

34 Ira noni dike kopui vaduro di finini ghu heve neke dufuno, maneri dike pelo lao ka ia malau leghaha visi gheremedi mo, nia ka ira nunuma ta au lilohori e ghua, va ghahei ta laona ghu ia tuturi. 35 Magali ma dike to meha vari bubu ghini ghu Zisas ira tehi noni, vununa dike toraina kabai fini hibadi heve neke dufuno. Di la finini tuna dike ghua ia mane neke sukuio ira nazahi, nohe vanemoho ta auna ghu ka ira ghahena Zisas, poko nona va vevehana, nia to ke avoavohona, e ghua. Ia varigharana noni kamoto dike age maughedi. 36 Ianimu tuna ghe dike turi nga ka ira keha noni ira noni dike fifiniro, ghinina heve neke ghua ke meha veha leghuna ia mane neke sukuio nazahi. 37 Ira noni haroharo ka ia horina Gerasa dike fangai Zisas ta ghahe kairina, vununa dike puina maughedi fuludu.

Ke leghu tuna ka ia koaka geke kadolo leghu lao ghu ka ia keha pelona loka, neke ghua Zisas. 38 Ia mane neke sukuio nazahi, neke kabai leghui haroma Zisas neke papadi ghu, ghe Zisas neke kahe ghua iahi, 39 “Deo. Agho o ke leghu lao ka ira taremehau, o ke la turi vanadi ghu ira vahina leghutau ta namanama nga, neke riva ghidiro God ka agho.” Manei neke ghahe kamoti ghu mamu malau leghaha ani, tuturi ghinina heve leghutau leghaha neke riva ghinina Zisas ka taghonai.

Zisas Ne Va Vehai Ia Fotati Ka Ia Fogara

Matiu 9:18-22; Maki 5:21-34

40 Ka ia keha pelona loka, ira noni dike age va manemane fuludu hio namaha va sabarina Zisas, vununa maneri dike afa ghini ma dike au ghu. 41 Ka fafata ianimu, kaike mane babatu ka ia suga mala varighara ira Ziu, babaolonana Zaerusi, neke la torongaghituturu hinae ka kenuna Zisas, neke fangai ghu ta lao taremehanana ka suganao. 42 Ia tuunaghase kaikena ta tazoi palu komuhuna, neke to namo leme ghena.

Zaerusi ka ia leghui ta lao ghu Zisas, ira varigharadi noni dike la vari bubu ghini manei. 43 Kaike fotati ta dufui fogara kolotibo giliodi tazoi palu komuhu, neke holara haroma ka noni ta varighara iranimu. Manei neke to kai va noghari haro leghu nona rongo nga ka ira dokita, ghe e deo ma geke age veha ghu. 44 Manei neke la vona meha leghuna mo Zisas. Posi laoi ne ghua ghu manei ia va kukuruna poko sodu ka Zisas, nodo neke to ghua ma ia fogara kolotibo ka manei.

45 “?Hei mu neke posi auna ara?” neke ghua notohona Zisas. Zea ghini ghedi ka dike ghua harono maneri, Pita neke kahe ghua lao iahi, “Manefaa agho, leghu noni ta varighara irahi nga edi boka vari tutupi mo ka agho,” neke ghua ghini. 46 Ghe neke kaheina Zisas ka manei mu, “Deo, kaike noni neke toraina posi au mamu ara, vununa manana va doli fogara nake va ghilaghilai ara ta kavena ka tinigu ini,” neke ghua ghini. 47 Fotati ini neke to age avohi tato haduina Zisas, neke nanazara ghu, la torongaghituturu tuna ka kenunao manei, neke ghua. Ira noni haroharo dike varighararo, dike nomohi mo fotati ini la va fafahaka vananina Zisas, ghinina heve neke ghua taghonai ghe, neke la posini nga ta ghuana, neke age veha ghena ghu ka fafata ianimu lama. 48 “Tuugu ghaseo,” neke ghua ghini, “ia nou va hohoghona taghou neke age va vehaighona. Ghahe gheu ghu ka ia bule.”

Zisas Ne Va Doli Leghui Ia Tuuna Ghase Zaerusi Ka Ia Leme

Matiu 9:23-26; Maki 5:35-43

49 Neke turi taremehana ngama fotati ini Zisas, neke to dufu ghu ia ta vari ghahe leghu neke sipa mehao ka ia suga Zaerusi taremehana nonomoho iahi, “la nou rekaha ghase tei to leme ghena. Oka va rugusini la ghu Mane Vari Va Kakahe nia,” neke la ghua. 50 Ghe ne nomohi ghu Zisas nonomoho ini, manei neke kahe ghini Zaerusi, “Oka maugheu ghu. O va hohoghona ma agho, e ke age veha ghena ma ghu manei.”

51 Di dufu lao ghu ka ia suga Zaerusi, Zisas deo geke va malumuri ghu ira noni ta haghele taremehana laona, nga Pita, Zemesi, Zone, nia nona mama ghe nona uke rekaha ghase ini, e ghua lama. 52 Suga ani mu neke foudui noni ta azili taremehana nakele ghedi, ghe Zisas neke kaheina, “!Nodo nakelena! Manei mu e deo ge leme ghu; nga ne suna epu ghena ma,” neke ghua ghidi.

53 Ghe ira noni ta varighara dike paghoi, vununa maneri haroharo dike avohi neke to lemena rekaha ghase ini. 54 Ianimu tuna ghe neke posi vonai nga Zisas ia kamena rekaha ghase ini, neke ngengene va fafaa vona ghua ghu iahi, “!Tetu vona goi!” neke ghua ghini. 55 !Ka fafata ianimu lama toke leghu meha ghu ia tarungana manei toke doli ghena ghu nia to tetu vona ma tuna neke ghua manei! Ianimu tuna ghe, neke va kahe ghidi nga Zisas ta valihai ghenana ka keha ghano. 56 Nona uke ghe nona mama dike puina age nodi fere fuludu, ghe Zisas neke va kahe ghidi va gigima, taka puina turi lamehana ghu ka kehara, ghinina heve neke riva ghinio taghona ka rekaha ghase ini.