Luk 9 | KjiSC | STEP | Kaike ravata Zisas neke kudo varighara ghidi ira tazoi palu nona mane nonomoho, neke vanadi ghu ia gigima nia ia mana, ta mala tavusu kairira leghu nazahi nga, nia ta mala va veha fogarana, e ghua.

Luke 9

Zisas Ne Tuhu Kaveri Ira Tazoi Palu Mane Nonomoho Ta Mala La Tuturi Beanana

Matiu 10:1-14; 14:1-12; Maki 6:6b-16

1 Kaike ravata Zisas neke kudo varighara ghidi ira tazoi palu nona mane nonomoho, neke vanadi ghu ia gigima nia ia mana, ta mala tavusu kairira leghu nazahi nga, nia ta mala va veha fogarana, e ghua. 2 Ianimu tuna ghe neke tuhu kaveri nga ta mala la tuturi beana vanadina ira noni haroharo ghinina ia Ravutu ka God, nia ta mala va veharira ira ta fogara, e ghua. 3 “!Oka hio leghutau taremehamu ghu ka ghaghahe nia! Deo totongono, deo mogoha nanapisi, deo ghano, deo rongo, e ghua. Kaike va paluna sote ghe, e deo haroma,” neke ghua ghidi. 4 “Noto la haghele la ka ira leghu rekahadi malau nga, o la au ma ka ia suga ta malumu hio ghauna. 5 Dito deo la ira noni ka malau ianimu hio namaha ghauna ka ia haghelimu malau ianimu, o vuvusu kairi ira sota ka tabaladi ghahemu nira ghe go ghahe kaini nga. Iahi mu taghe kaike ngengene va gigima vanadi maneri.”

6 Ianimu tuna ghe dike tatanigai ghaheri nga ira leghu rekahadi malau nga, tuturi beana ghinina ia Nonomoho Ta Veha, nia ke va veharira ira ta fogarari ka ira leghu pelodi nga, e ghua.

7 Ne nomohori ghu Herodi Anitipasi ira leghu hahaima neke riva ghidiro nga Zisas, manei neke age anga ghena taremehana naologhabili, vununa kehara dike kahe ghua iahi, “Iahi lamu Zone Ia Ta Rivai Seselebeana neto ke doli leghu ghu,” dike ghua. 8 Kehara gedi kahe ghua ghu iahi dike ghua, “Mane iahi mu Ilaiza ta ghuara, kaikeu ka ira keha porofeti sepa neto ke tetu leghu ghu ka ia leme ta ghuara, e ghua,” dike ghua.

9 “Ara mu nake to kodaka kainio ia pauna Zone,” neke ghua Herodi, “nga hei mo mu mane ta nomoho ghini iahi ara ghidira leghu kokolodi tuturi irahi nga?” neke ghua, neke va toraina va sisiva ghu ta la fininina manei.

E Fuludi Gaha Togha Noni Neke Valiharira Zisas

Matiu 14:13-21; Maki 6:30-44; Zone 6:1-13

10 Ka ia fafata ke dufu leghudi ira mane nonomoho, maneri dike turi vanani Zisas ghidi ira vahina leghutau nga dike la riva ghidi va nogharo. Ianimu tuna ghe, neke ghahe poika taremehadi lao nga ka kaike malau fafaana ta va kudo ghini Betiseida. 11 Ghe ira varigharadi noni dike soni hadu kavei mo hae mo neke laona manei, dike la ghahe leghui ghu. Ghe manei neke hio namahari, neke tuturi vanadi ghu ghinina ia Ravutu ka God, nia ke va vehari ghedi ira dike fogarariro, neke ghua. 12 Ka ia namo luduru laona ia taunu, ira tazoi palu mane ta nonofoi dike lao ka manei dike la kahe ghua ghu iahi, “Tuhu ghahe laorina nga noni ta varighara irahi ka ira rekahadi malau, nia ka ira nunuma ta vari namo meha e ghua, edi la boka hadu ghedi ghano ghu nia malau mala au ghedi laona nga redu ini, e ghua. Ne deo heve ta mahainina aiahi ka malau ta ghou iahi.”

13 Ghe Zisas neke kahe ghua iahi, “O valihari ghedi,” neke ghua ghidi.

Ghe maneri dike kahe ghua iahi, “Gaha bereti tetepele nia palu namari ma e ghua, ne au ghaina,” dike ghua ghini lao. “?Ba heve no ghua, ghai a boka la tabara ghano fatadi mo varigharana noni kamoto iahi, no ghua?” 14 Noni dike aura aianimu, neke nona au ka gaha togha noni.

“O va kahe ghidina ma, edi nohe hinae ghu maneri ka kavana ka sopai pukudi ta gahafulu,” neke ghua ghidi Zisas. 15 Leghuna riva va hokoti iahi ira mane ta nonofoi, ira leghu noni nga dike nohe hinae haroharo. 16 Zisas neke hiori ira gaha bereti tetepele nia palu namari e ghua, ghe neke mato vona nga ka kolangana fate, neke kudo vehai ghu God. Ianimu tuna ghe neke kipe va iteiteri nga, neke vanadi lao ghu ira mane ta nonofoi, mala tufarira ka ira noni. 17 Maneri, dike mahai dike toraina age hoviri ghu ka ira ghano, nia ke sene varighara ghidi tuna tazoi palu karao kunudi ghano, dike ghua.

Zisas Ne Kusu Kahe Kenui Ia Leme Nia Ia Tetuleghu Ka Taghonai

Matiu 16:13-21; Maki 8:27-31

18 Kaike ravata ka ia au kakaikena ta tarai ghu Zisas, manei neke lao ka ira nona mane ta nonofoi neke la notohori ghu, “?Ara mu hei, di ghua ghinagu ira noni?”

19 Ungene tughui tuna dike ghua, “Kehara dike kaheina mu, agho mu Zone Ia Ta Rivai Seselebeana dike ghua, kehara ba, agho mu Ilaiza gedi ghua ghu, nia keharani tuna gedi ke kahei ghu, agho mu kaike ghu ka ira porofeti sepa to ke tetu leghu ghu ka ia leme, gedi ghua ghu, dike ghua.”

20 “Nga ghau mu, hei no ghua ghinagu ara?” neke ghua manei notohorina.

“!Agho mu ia Mesaea neke va mehaighono God!” neke ghua ungene tughuina Pita.

21 Zisas neke kahe ghidi va gigima taka va kahe ghidina ghu hei noni, ghinina iahi. 22 Manei neke va kahe ghidi haro molamo iahi, “Ia Tuuna Noni, e toraina age vavahagala ghidi tehi leghutau ta mamaghuanani. Ira ta babatu, ira hiama ta kenu, nia ira ta vari va kakahe ghini ia vetula beana e ghua, edi age sokeau ara ghatu, edi age atunguau ghu. Ghe leghuna lito ravata, ara a ke age tetu leghu ka ia leme.”

Ia Tabarana Nonofoi Zisas

Matiu 16:24-28; Maki 8:34–9:1

23 Ianimu tuna ghe neke kahe ghua nga iahi manei ka ia varigharana noni, “Hei ka ghau neto kabai leghuau la ara, agho o toraina kai hazari ira puhiu ta luluto, hurei ghu ia nou hekefalahata leleghu ravata, leghuauna ara. 24 Vununa noto kabai sutei la agho ia doliu taghou, agho o age siana ghini ghatu. Nga noto siana ghini la agho ia doliu, malaguna ara mu, agho o hioi ia doli soduai. 25 ?Heve veha mu ta hioina agho noto tagho kamoti la malau iahi peka, ghe va mukoigho tuna taghou, ba, pepesana ghini tuna ia doliu, ta ghuana? 26 Hei noni neto haghava ghinagu la ara nia nogu nonomoho ini e ghua, ara ia Tuuna Noni a haghava ghini ghegu molamo noni ianimu ka leghu mehaguo ghatu ka ia nogu pelarana varanga, nia ka ia pelarana varanga ia Mama nia ira engizeli ta maduana, e ghua. 27 Nia a toraina va kahe ghini ghau ghu ara, kehara ka ghau ta tetu aiahi ghatunaina, e deo nga lememuna o age finini ghu ghatu ia Ravutu ka God.”

Ia Holara Ka Ia Tinina Zisas

Matiu 17:1-9; Maki 9:2-9; 2 Pita 1:17-18

28 Taghe hana ravata leghuna ianimu, Zisas neke hiori Pita, Zemesi nia Zone e ghua, dike la tarai ghu ka ia vuhuku. 29 Ne tarai ghu manei, ia hihilina neke holara nia ia poko tinina tuna geto ke age ghighiho ngesele ghu, neke ghua. 30 Ianimu tuna ghe dike podolo nga ira palu mane, Mosese ghe Ilaiza, dike tatanigai nonogele taremehana ghu Zisas. 31 Maneri dike toraina fegala pelara fini laorira, dike nonogele ghini ghu maneri litou ia vatovato ka God ia ta age va ghuduvi Zisas ghatu ka ia leme manei aianihi Zerusalemu. 32 Pita nia ira keha palu mane nonomoho e ghua, dike puina epu doka dike to age epu melu kai ghu. Ka ia baghunu vonadi maneri lito ghu, dike finini neke toraina ghiho ngeselena Zisas, tetu taremehadira Mosese ghe Ilaiza. 33 Ka ia va tanai ghahedi Mosese ghe Ilaiza, Pita e deo ghe geke va fafahaki ghu taghonai, neke kahe ghua ghu iahi, “!Faghina agho, ka puina namanamara ta au ini ghita aiahi! Ghai a riva ghidi lito suga tapole; kaike ghu ka agho, kaike ghu ka Mosese nia kaike ghu ka Ilaiza, e ghua.”

34 Ngengene ngama manei, neke to meha ghu fatedi ia toba, toufu kaputurira ka ia kakapona, dike puina maughedi ghu. 35 Ianimu tuna ghe neke kahe ghua nga iahi ia leo ka tobana, “Iahi mu ia Tuugu nato ke faetio ara. O nonomoho ghu ka manei.” 36 Nodo lao ne ghua ghu ia leo, Zisas lama neke to tetu kakaikena aianimu. Ka fafata ianimu, ira mane ta nonofoi dike au vanemoho ghini ma dike au ghu, deona gedi ke turi ghini ghu ka hei noni.

Zisas Ne va Vehai Ia Rekaha Mane Neke Sukuio Nazahi

Matiu 17:14-18; Maki 9:14-27

37 Ka ia keha ravata, di hinae meha ghu maneri ka ia vuhuku, kaike leghahai varigharana noni neke meha dufuina Zisas. 38 Kaike mane ka ia giliona varigharana noni neke kudo lao ka manei, “Mane Vari Va Kakahei Agho, o fini vanagu ko tuugu mane ini, vununa manei lama kaikena tuugu manena ara. 39 Kaike nazahi ta muko e suku va mukoi tudu ma e au ghu va azili akeakeina, ghe ge fera pisena ghini hinae nga va gagahetaina, nia va ngorongoroina e ghua paetena ini. Nazahi ini e deo ghe ge ghahe kaini ghu, ne torai ngovali ghena ghu. 40 Ara nake fangari ira nou mane ta nonofoi ta mala tavusu kainina ia nazahi ta muko, ghe maneri dike deo bokadina.”

41 “!Ghau ira noni noka va hohoghona ghu, no toraina zea ghu!” neke ghua Zisas. “?Taghe niha nare ta au tamu ma ta auna ghu ara, ghe go va hohoghona nga? O hio mehai ko tuu mane nia aiahi.” 42 Ne ghahe vai lao ghu ia rekaha mane, ia tarunga ta muko neke pisena ghini hinae ka kavao peka, torai va nanazara va mukoina. Ghe Zisas neke buruai ia tarunga ta muko, neke va vehai ghu ia rekaha mane. Ianimu tuna ghe neke vanani leghu lao nga nona mama. 43 Maneri haroharo dike puina nodi ferei ia mana ka God neke va podolio Zisas ka ira riva manei.

Zisas Neke Kusu Kahe Kenuini Ia Leme Nia Ia Tetuleghu Ka Taghonai

Matiu 17:22-23; Maki 9:30-32

Ira tehi noni dike nodi fere ngama ka ira vahina leghutau ta namanama neke riva ghidiro manei, ka ia fafata neke ngengene ghuao iahi Zisas ka ira nona mane ta nonofoi, 44 “O va melongo meha ka ara, o ngana tahui ghu heve ta kahei ini ara. Ia Tuuna Noni edi age namaha seboi ghatu, edi nai laoi ghu ka ira kamedi ira ta kana ghini.” 45 Ghe mane ta nonofoi idi, deo gedi ke avohi ghu heve mo fafahakanana ka manei. Ia torai fafahakana neke poika ka maneri, dike deo ghu boka avoho va vehaidina. Ghe maneri dike maughedi notohina manei ghinina iahi.

Ia Ta Varanga Fuludu Lao Ka Ia Ravutu God

Matiu 18:1-5; Maki 9:33-40

46 Ianimu tuna ghe neke age au nga kaike vari tuufai vari hoataidi taghodi, ghinina hei mo ka taghodi mu ta toraina kenu va avohona. 47 Ghe Zisas to avoho laori ira nganganadi, neke hioi ghu kaike rekaha tei va tetuina gheremena mo. 48 Ianimu tuna ghe neke va kahe vanadi nga manei, “Hei ia ta hio namahi ka babaologu ini ara kaike rekaha taghe ta au iahi ka gheremeguna ara lamu, ne hio suteauna ara, nia hei ia ta hio namahau ara tuna, ge hio namahi ghu nogu Mama neke tuhu mehauo ara, e ghua. Hei ia ta nai hinaei taghonai ka vari hoataimu ghau lamu, ta toraina kenu va avohona ghu ka ghau haroharo.”

49 “Faghina agho,” ne ghua Zone, “ghai nake finini kaike mane tavusu kai nazahina ka babaolou nia agho. Ghai nake va nodoi ghu, vununa manei eka tanina ghu ka pukuna ini ghita.” 50 “!Oka va nodoi ghu!” neke ghua ghidi Zisas, “Hei neto deo la ge gora ghau ghu, e malamu haroma ghau,” neke ghua ghidi.

Ira Nonidi Samaria Di Sokei Zisas

51 Ne namo dufu ghu ia fafata ta mala ke leghu taghonai ka malauo God fate, Zisas neke toraina kuhana ghini ta mala laona aianihi Zerusalemu. 52 Manei neke kusu tuhu kenu laori keha mane ta hio lao nonomohora ka kaike rekahana malau aianihi Samaria, mala kusu va tana vananina maneri vahina leghutau nga ghe neke sabara nga manei. 53 Ghe vununa manei neke mala lao aianihi Zerusalemu, dike pake ghedi ghu ira nonidi Samaria ta laona manei ka nodi malau ani. 54 Di nomohi ghu Zemesi ghe Zone ta ghuana ianimu maneri, dike kahe ghua iahi ka Zisas, “?Lod, no kabai ghini ghai mo agho ta kudo hinae totoina ka kolangana fate mala saligarira noni irahi?” 55 Ghe Zisas neke fihiki lao ka maneri neke buruari ghu, 56 nia ke lao tuna ka ia keha rekahana malau, dike ghua.

Ia Tabaranana Nonofoi Zisas

Matiu 8:18-20

57 Ka ia ghaghahe ta lao ghu maneri, kaike noni neke kahe ghua iahi ka Zisas, “Ghatu ara a ghahe leleghuigho hae tei ta laona agho.”

58 Ghe Zisas neke kahe ghua iahi, “Ira fokisi mu edi kuru korosadi mala au ghedira, nia ira memeha gedi kuru sugadi ghu e ghua, nga ia Tuuna Noni mu, e deo malauna ta mala va epuina ia belehuna.”

59 Ke kahe ghua tuna iahi ka keha noninani neke ghua Zisas, “Meha, o mala nogu mane mala nonofoau ghu,” neke ghua ghini.

Ghe ia mane neke kahe ghua iahi, “Lod, va malumuauna, a kusu la gilu ghini ghu nogu mama ka malauguo,” neke ghua.

60 Kahe ghua tuna iahi neke ghua Zisas, “Va leghu ghidi ira ta leme ka ia tarunga, edi gilu ghidi ghu ira nodi noni ta leme taghodi. Nga agho mu, o lao o la va ongahi ghu ia Ravutu ka God.”

61 Keha noninani neke kahe ghuani iahi, “Uve Lod, ara a leghuigho mo, ghe va malumuauna ta kusu la kubaerina ara ira taremehagu,” neke ghua ghini.

62 Ghe Zisas neke va kahe ghini lao, “Hei ia ta va tanai leghuau ara, ghe ta mato leghu ngama ta au ghu ka ira puhina sepa mu, e deo lighorona ka ia Ravutu God.” ^{▼▼9:62Ka ira ngengene Giriki mu: “Hei ia ta tatanigai korohi ia pake ka ira bulumakau, ghe ta mato leghu ngama ta au ghu mu, e deo lighorona ka ia Ravutu God.” Iahi mu e varifata ma ka ta kahe ghua ini iahi, “Hei ia ta gili ka ia hore, ghe ta mato leghu ngama ta au ghu mu, e deo lighorona ka ia Ravutu God.”}