Luk 21:8-24 | KjiSC | STEP | Zisas neke ungene tughuri, “O banabana, mala edika batu ghini ghau va zea la ghu hei noni. Vununa tehi nonini ta la mehara ghatu ka babaologu ini ara, ta meha kahe ghuana ghu iahi, ‘!Ara mu ia Mesaea’, nia ‘Ia fafata to dufu!’ edi meha ghua. Ghe oka va hohoghonari ghu.

Luke 21:8-24

Ira Va Ghilaghilana Ia Meha Ka Zisas

Matiu 24:4-13; Maki 13:5-13

8 Zisas neke ungene tughuri, “O banabana, mala edika batu ghini ghau va zea la ghu hei noni. Vununa tehi nonini ta la mehara ghatu ka babaologu ini ara, ta meha kahe ghuana ghu iahi, ‘!Ara mu ia Mesaea’, nia ‘Ia fafata to dufu!’ edi meha ghua. Ghe oka va hohoghonari ghu. 9 Nia noto nomohori la ira soloso ta vari magara, nia ira ta vari magara taghodi ka giliodi ira soloso e ghua, oka maughemu ghu. Leghutau irahi mu edi kusu meha mamu, ghe ia va nonoghana e deo ge selu mehai ghu.”

10 Ianimu tuna ghe neke kahe ghuani nga iahi manei, “Ira soloso edi age magarari ira keha soloso nia ira ravutu edi age magarari ira keha ravutu, e ghua. 11 Ghatu mu, ira leghahai kuzo, ira songe, nia ira avena ta lelemeana e ghua, ta age dufura ka tehi malauni. Nia ghatu tehi leghutau ta mamaghuana, nia leghahai va ghilaghila e ghua, ta aura ka kolangana fate.

12 “Ghe gedi la dufu meha nga leghu irahi nga, maneri edi age sakomo ghau, nia ngovala ghau, e ghua. Ghatu maneri edi age koroho kakanaka ghini ghau lao ka ira suga mala varighara ira Ziu, nia ka ira suga pipiliga, e ghua. Nia ghatu maneri edi hio ghau lao ka kenudi ira mane ginitaukela, nia ira gavana e ghua, vununa ghau no leghuau ara. 13 Iahi mu e age vehana fafata ka ghau, mala va kahe ghidira maneri ghinaguna ara. 14 Oka anga ghini la ghu, heve e ghua ungene tughurira ira puhi ta va zutu ghini ghau, 15 vununa ara ta vanamuna ghatu ira ngengene nia ira avoavoho e ghua, ta deo gedi boka ungene tughuri ghu ira kana, ba tadi kaheina no zea ghau, ta ghua ghini ghauna. 16 Geta ghua ghu nomu ukeri nomu mamari, ira tahimu mane, ira taremehamu, nia ira nomu baere e ghua ghe, ghatu maneri edi age namaha sebo ghau. Nia kehara ka ghau gedi age atungu ghau ghu, e ghua. 17 Leghu noni nga edi age kikipana ghini ghau ghatu, vununa ghinagu ara. 18 !Ghe e deo kaike kala ghu ka paumu nira ta age kakaina ghatu! ^{▼▼21:18Ngengene irahi ka Giriki fafahakadira mu, maneri e deo gedi age leme ghu, eka ghua mo. Fafahakanana mu, geta age leme ghu maneri ghe, e deo heve ta boka age fotarina ka God. Zisas deo geke kabai ghidi ghu maneri ta hangapuahana, vununa ia doli ta deo va nonoghana ka maneri mu, e torai age hohoghona dito tetu va gima la maneri ka ia nodi va hohoghona ka Zisas.} 19 Noto tetu va gima la va hohoghonana ka ara, ghatu ghau o age hioi ia doli soduai.

Ia Huarana Zerusalemu

Matiu 24:15-21; Maki 13:14-19

20 “Noto finini la ghau Zerusalemu tato au lilohina ira punugara, ghe go avohi nga ia fafata ta mala huari manei neto dufu mamu, ta ghuana. 21 Heiri ira ta au Zudia mu, edi torai pelo lao ka ira voruhu, nia heiri ira ta au Zerusalemu tuna, gedi torai kave kaini ghu, e ghua. Nga heiri ira ta au ka ia malau peghuruo mu, edika puina la haghele ghu ka malau leghaha ani. 22 Vununa iranimu lamu ira ravata mala age hioi ia vavahagala, age ghuduvudira tuna heve neke kaheriro ka ira Kakangava Ta Maduana. 23 E puina age mamaghuana mamu ka ira fotati ta pote, nia ka ira uke ta borori ira nodi rekaha gogoso, e ghua. Vununa ghatu e age au ia leghahai vavahagala ka ia kava Isiraeli, nia ia haala ka God ta lao ka noni irahi, e ghua. 24 Kehara ka maneri ghatu, edi age atunguri ka kaike leboto sisilufu mala magara, nia kehara tuna gedi hio ghahe laori ghu ka ira leghu soloso nga varihau la pipiligana, e ghua. Zerusalemu, edi age deke dadalapi ghatu va muko kaini ghedina, edi age hio kadoli ghu ira noni taka Ziu ghu, e vuhai age ghuduvu ghu ia fafata ka maneri.