Mar 1 | KjiSC | STEP | Aiahi e tataniga ghu ia Nonomoho Ta Veha ghini Zisas Kraes, ia Tuuna God.

Mark 1

Zone Ia Ta Rivai Sesele Beana, Neke Va Tanari Ira Noni Ghini Ia Meha Ka Zisas

Matiu 3:1-11; Luku 3:3-16; Zone 1:19-34

1 Aiahi e tataniga ghu ia Nonomoho Ta Veha ghini Zisas Kraes, ^{▼▼“Kraes” mu ungene Giriki, nga ka ungene Hiburu mu, “Mesaea”. Fafahakadira mu “Ia Va Doli”.} ia Tuuna God.

2 Ka giliona ia buka Aesaea ia mane porofeti, God ne kahe ghua iahi ka ia Tuuna,
“Fini, ara na kusu tuhu kenu agei ia nogu mane ta mala hio nonomoho ka agho,
ta mala va tanaina ia nou hangana. ^{▼▼Malakae 3:1}
3 Manei mu ia leo ta kudo ka ia malau koroghana ta karango kahe ghuana iahi:
‘!O va tanai ia hangana mala mehana ia Lod!
!O riva vanani ira hangana ta lotoro!’” ^{▼▼Aesaea 40:3}

4 Mane ta mala hio nonomoho iahi mu Zone neke meha seselebeanariro ira noni. Manei neke au ka ia malau koroghana ta karango, taka tehi nonina ghu ka ia Babarana Zudia, neke tuturi vanadi beana ghu ira noni, geala ta mala seselebeanana maneri, mala va podolina dito taghuru kairi ira sasakedi to fihiki lao ghu ka God, ta ghuana, mala God e kai hazari ghu ira sasake ka maneri dike riva ghidiro. 5 Ira nonidi ka ia malau leghaha Zerusalemu nia ka ia Babarana kamoto Zudia e ghua, dike lao ka ia malau koroghana ta karango, mala la fini, nia la nonomohona ka Zone. Ka leghuna kahe kaveri ira sasake ka maneri ka kenudi ira noni, maneri dike fangai God ta mala kai hazarira ira sasake ka maneri, ghe neke seselebeanari nga Zone ka ia Ketuhu Zodani. 6 Nona pokora manei mu dike fifihu ka kalana kamele, nia manei e ghua, neke lilihiti ka kafuna popohi. Ghena ghanora tuna manei mu kupo nia mizuana mauke, e ghua. 7 Manei neke kahe ghua ghu iahi: “E deo ma sepana, e la meha ghu kaike noni ta kenu lao fuluduau ara, e toraina kenu fuludu lao, e deo ghu ghe ga fata ghu ara, ta nohe neneki hinae, ta fudaha kairira ghu ira nona sadolo, taghe noni mala varituhu ta ghuana. 8 !Ara mu na seselebeana ghau ka kolo, nga manei mu e seselebeana ghau ka ia Tarunga Ta Maduana!”

Zone Neke Sesele Beani Zisas, Ia Tuuna God

Matiu 3:13-17; Luku 3:21-23

9 Kaike ravata, Zisas neke sipa mehana Nazareti ka ia Babarana Galili, neke meha seselebeana ghu ka Zone ka ia Ketuhu Zodani. 10 Ka ia ke podolo vonana Zisas ka ia ketuhu, manei neke finini ia kolanga fate neke tobehe, neke hinae meha ghu ia Tarunga Ta Maduana, taghe babahulu bora ta ghuana ka fatena manei. 11 Kaike leo sipa mehana ka kolanga fate, neke kaheina, “Agho mu ia Tuugu Mane ta namaha ghinigho fuludu ara, na puina va manemane ghinigho ghu,” neke ghua.

Satana Neke Va Sisiva Auaui Zisas Ta Mala Huhughina God

Matiu 4:1-11; Luku 4:14-15

12 Ka leghuna ianimu haro lama, neto lao ghu Zisas ka ia babatu ia Tarunga Ta Maduana ka ia malau koroghana ta karango, aianihi Zudia. 13 Zisas neke la au rodana ngavulu ravata aianimu. Ka fafata ianimu, Satana neke va sisiva auaui manei. Zisas neke au taremehadi ira va vuha taka namaha ghu, ghe ira engizeli dike fini kopu ghini manei.

Zisas Neke Faeteri Ira Ta Kusu Mala Nonofoi

Matiu 4:12-22; Luku 4:14-15

14 Leghuna Herodi Anitipasi ia Mane Ginitaukela sakomo hioina Zone, Zisas neke lao aianihi Galili, neke la va ongahi ghu ia Nonomoho Ta Veha. 15 Neke ghua ghu iahi neke va ongahina manei, “!To dufu tuna ia toraina fafata ka ia ta age namo meha God mala kopu ghidira ira noni! !O fihiki lao ghu ka God, taghuru kairira ira sasakemu, o va hohoghona ghu ka Nonomoho Ta Veha iahi!”

16 Kaike ravata neke ghaghahe leghui ghu Zisas ia tapuruna Lokana Galili, manei neke fini laori palu tatahina, Saemoni ghe Aduru, ta fera kai lao zapu ta au ari ghu ka ia loka, vununa maneri palu mu mane habuhabu. 17 Zisas neke kudo laori, “!O meha leghuau, o mala nogu noni mala nonofoau ghu, a va kakahe ghini ghau ghu mala zapuina ia noni!” 18 Ka ianimu lama dike to nai kairi ghu ira nodi zapu, la leghuina manei.

19 Kenu lao mo ka ia tapuruna loka, Zisas neke finiri Zemesi ghe Zone, ira tuunamane Zebedi, sikatari ta aura ghu ira nodi volo ka ia koaka. 20 Ne fini laori ghu, Zisas neke kudori. Ianimu lama dike to ghahe kaini ghu Zebedi ia nodi mama nia ira nona maneriva ka koaka ani e ghua, dike to la leghui ma ghu Zisas.

Zisas Neke Tavusu Kaini Kaike Nazahi

Luku 4:31-37

21 Zisas nia ira nona noni ta nonofoi e ghua, dike lao ka ia malau fafaana Kapaniumu. Ka ia fafata dufu mehana ia Ravata Mala Maghoso ka ira Ziu, Zisas neke la haghele ka ia suga mala varighara ira Ziu, neke la tataniga va kakahe ghidi ghu ira noni. 22 Ira noni dike nodi fere fuludu ka ira vari va kakahei manei, vununa vari va kakahe ari ka manei, taghe ta ghua nia, kaike noni ta kurui mana neke ghua, neke deo ghu varifatana ka ira mane ta vari va kakahe ghini ia vetula ta maduana ka God.

23 Kaike mane ta sukui tarunga ta muko neke au ka ia giliona suga mala varighara ira Ziu. 24 Heve ba ne ghua ma, neke to kudo lao ghu kahe ghuana iahi, “?Heve no kabai va riva ghini ghaina agho, Zisas na Nazareti? ?Agho mu no meha mala ngovala ghai? !Ara na avohigho mo agho! !Agho mu ia Ta Maduana neke tuhu mehaighono God!”

25 Ghe Zisas neke buruai ia nazahi, kahe ghuana iahi, “!O vanemoho! O kave meha ka mane iamuhu.” 26 Ianimu tuna ghe neke va kudoko nanazari nga ia mane ia tarunga ta muko, neke azili va fafaa ghu ghe neke kave kaini nga.

27 Ira noni haroharo dike puina nodi fere dike vari nonotoho ghu, “?Heve kokolona mo mu foforuna vari va kakahei ta au manana iahi? !Ira tarunga ta muko ghe, di leghurira ira ta va kahe ghidi manei!” 28 Ia nonomohona heve neke riva ghinio manei, neke to magali ma neke ongaha ghu ka ia hori kamoto Galili.

Zisas Neke Va Vehari Ira Tehi Noni

Matiu 4:23; 8:14-17; Luku 4:38-44

29 Leghuna kave kaini maneri ia suga mala varighara ka ira Ziu, maneri dike lao taremehadi Zemesi ghe Zone ka ia suga Saemoni ghe Aduru. 30 Ia nona vasagha Saemoni, neke dufui fogara ta dangava fuludu, neke epu ghu ka vavagenao. Magali ma dike va kahe ghini ghu Zisas ghinina manei. 31 Lao tuna manei ka gheremena ia vavagena, ge la posi vonai ghu ia kamena toka ghinina va tetu vonaina, neke ghua. Ia fogara ta dangava, magali ma neke to ghahe kaini ghu manei. Tatanigai va tana vanadi mahai tuna neke ghua ia nona vasagha Saemoni.

32 Ka ia eroai laona ia taunu ka saighona ianimu, tehi noni ta fogara, nia ta sukuri nazahi e ghua, dike hio meharira ka Zisas. 33 Ira tehi nonidi hae ghe hae ghu aianihi Kapaniumu, dike varighara ka peghuruna ia makatana. 34 Zisas neke va doliri tehi noni ta fogarari ka ira sopai kokolodi lelemeana nga, nia neke tavusu kairi ira tehi nazahi ka ira noni, e ghua. Ghe Zisas deo geke va malumuri ghu ira nazahi ta ngengenena, vununa maneri dike to kusu avohi, manei mu ia Va Doli, ta ghuana.

35 Ia keha fufugho, Zisas neke to soduai baghununa ghe, neke pagasa nga ia fugho, neke kave kaini ghu tuna ia sugana, ghahe kainina Kapaniumu neke lao ghu ka ia malau ghouna ta boka la au kakaike, neke la tatanigai tarai ghu manei. 36 Birusuna fafata leghuna ianimu, Saemoni nia keharani e ghua, dike kave lao mala la haduina manei. 37 Di la dufui ghu Zisas, dike la kahei iahi ka manei, “Ira tehi noni haroharo di haduigho,” dike ghua ghini.

38 Ghe manei neke ungene tughuri, “Ghita da toraina age haro ka ira keha malau fafaadi ta vari namo, a tuturi beana vanadi ghu ara, vununa ianimu lamu ghe, nake meha nga ara,” neke ghua ghidi. 39 Ianimu tuna ghe neke ghahei kamoto nga manei Galili, tuturi beanana ka ira suga mala varighara ira Ziu nia tavusu kairira ira tehi nazahi ka ira tehi noni, e ghua.

Zisas Ne Va Vehai Ia Mane Ta Dufui Lepa

Matiu 8:1-4; Luku 5:12-16

40 Kaike mane ta lepa neke meha ka Zisas, neke la torongaghituturu ghu ka kenuna manei, neke torai papadi ghu mala va vehaina, “To lao hihingou la agho, o boka mo agho va vehauna ara,” neke ghua ghini.

41 Zisas neke toraina dudumana ghini ghena, neke posi laoi ghu ia kamena, kahe ghuana iahi, “Ara na lao hihingogu mo. !O ke veha gheu ghu!” neke ghua ghini. 42 Ka fafata ianimu lama, neke to age nogha ghu ia lepa ka manei, nia to ke age veha ghena ma tuna, neke ghua.

43 Ianimu tuna ghe, neke va ghahei nga Zisas ia mane, torai va kahe ghini ghuana iahi, 44 “O avohi nga agho, go puina turi vanadi la kehara, heve noke ghua ghe noke veha nga, ta ghuana. Nga o la va podoligho ma taghou ka ia hiama ka ia Sugana God aianihi Zerusalemu, o la vanani ghu ira veala neke ungene va gigimario Mosese, mala va podolina ka ira noni haroharo agho mu to ke veha leghu gheu ka ia Lepa, ta ghuana.”

45 Neke ghua mo ghe, manei neke ghahe lao soni mo ka ira leghu pelodi nga, neke la va ongahi ghu ia nonomoho ka ira noni haroharo, ghinina heve neke dufuio taghonai. Vununa ghidi irahi, dike meha varighara ghini ghu Zisas ira tehina noni, to deo ghu ghe geke boka podolo haghele lao ghu manei ka kaike malau faana ghu. Neke ghua ianimu ghe, neke au kave nga Zisas ka ira malau ta ghou. Ghe ira noni ka ira leghu pelodi nga, dike soni la kave meha mo ka manei.